Ano an Kahadean nin Dios?

KANIGOAN kagrabeng kapahamakan an nangyari sa katawohan sa kapinonan kan kasaysayan nin tawo! Sarong anghel an nagrebelde tumang sa autoridad kan mismong Saro na naglalang sa saiya. Sinutsutan kan rebeldeng ini an enot na babae, si Eva, na magkakan kan ipinagbabawal na prutas. Nagtataram manongod sa saiya asin sa saiyang agom, si Adan, an anghel nagsabi: “Dai nanggad kamo magagadan. Huli ta naaaraman nin Dios na sa mismong aldaw na kamo kumakan kaiyan mabubuklat an saindong mga mata asin kamo magigin arog nin Dios, na nakakamidbid kan marahay asin maraot.” (Genesis 2:16, 17; 3:1-5) An rebeldeng anghel inapod sa huri na Diablo asin Satanas.—Kapahayagan 12:9.

Naghinanyog daw si Eva sa mga tataramon ni Satanas? An Biblia nagsasabi sa sato: “Naheling kan babae na an bunga kan kahoy marahayrahay na kakanon asin kawiliwili sa mga mata, iyo, an kahoy nakakaarang paghelingon. Kaya nagpoon siang kumua kan bunga kaiyan asin kumakan kaiyan. Dangan tinawan man nia an saiyang agom na lalaki kan ini nasa kaibanan nia asin nagpoon man ining kumakan kaiyan.” (Genesis 3:6) Iyo, an enot na mag-agom, si Adan asin Eva, uminiba ki Satanas sa saiyang pagrebelde. Bilang resulta, nawara ninda an Paraiso para sa sainda mismo asin para sa saindang mga gikan. An mga aki na maninigo kutanang namundag na sangkap na may esperansang mabuhay na daing sagkod nagmana nin kasalan asin kagadanan.—Roma 5:12.

Ano an ginibo ni Jehova Dios, an Soberanong Namamahala sa uniberso? Katuyohan nia na gumibo nin probisyon para sa kapatawadan nin mga kasalan. (Roma 5:8) Nag-establisar man si Jehova Dios nin sarong areglo sa paggobyerno tanganing maasikaso an krisis na ini. An areglong ini inaapod na “kahadean nin Dios.” (Lucas 21:31) Inestablisar bilang subsidiaryo sa unibersal na pamamahala nin Dios, an Kahadean na ini igwa nin espesipikong katuyohan.

Ano an katuyohan kan Kahadean nin Dios? Ano an nagkapira sa mga aspekto kaiyan, asin paano iyan nakakaagid sa pamamahala nin tawo? Noarin kaidto mapoon na mamahala an Kahadean? Totokaron an mga hapot na ini sa masunod na artikulo.