Ania ti Pagarian ti Dios?

ANIAN ti pannakadidigra ti sangatauan idi rugrugi ti pakasaritaan ti tao! Nagrebelde ti maysa nga anghel maibusor iti autoridad Daydiay mismo a nangparsua kenkuana. Dayta a rebelde sinulisogna ti umuna a babai, ni Eva, tapno mangan iti maiparit a bunga. Maipapan ken ni Eva ken ni Adan nga asawana, kinuna ti anghel iti babai: “Sigurado a saankayto a matay. Ta ammo ti Dios nga iti mismo nga aldaw a pannanganyo manipud iti dayta sigurado a maluktan dagiti matayo ket sigurado nga agbalinkayo a kas iti Dios, a makaammo iti naimbag ken dakes.” (Genesis 2:16, 17; 3:1-5) Idi agangay, naawagan iti Diablo ken Satanas dayta a rebelioso nga anghel.—Apocalipsis 12:9.

Impangag kadi ni Eva ti sasao ni Satanas? Kuna ti Biblia: “Nakita ti babai a ti kayo nasayaat a pagtaraon ken maysa a banag a pakailiwan dagiti mata, wen, ti kayo makaay-ayo a matmatan. Gapuna rinugianna ti nangala iti bungana ket kinnanna dayta. Kalpasanna nangted met iti asawana idi kaduanan ket rinugianna a kinnan dayta.” (Genesis 3:6) Wen, ti umuna nga agassawa a da Adan ken Eva kimmapponda ken ni Satanas iti panagrebeldena. Kas resultana, naparuarda iti Paraiso ken saan met a matagiragsak dayta dagiti kaputotanda. Imbes a perpekto ken agbiag nga agnanayon dagiti maipasngay nga annakda, tawidenda ketdi ti basol ken ipapatay.—Roma 5:12.

Ania ti inaramid ni Jehova a Dios, ti Soberano nga Agturay iti uniberso? Pinanggepna ti mangyurnos iti maysa a probision maipaay iti pannakapakawan dagiti basol. (Roma 5:8) Nangipasdek pay ni Jehova a Dios iti gobierno a mangtaming iti krisis. Naawagan daytoy a gobierno kas ti “pagarian ti Dios.” (Lucas 21:31) Kas naipasdek a mangsuporta iti sapasap a turay ti Dios, adda ti masinunuo a panggep daytoy a Pagarian.

Ania ti panggep ti Pagarian ti Dios? Ania ti dadduma kadagiti aspetona, ken ania ti pakaidumaanna iti turay ti tao? Kaano a mangrugi nga agturay ti Pagarian? Mausig dagitoy a saludsod iti sumaganad nga artikulo.