Eaa te Patireia o te Atua?

MEI teaa ra te kino tikai i te tumatetenga tei tupu ki te tangata i te akamata anga te tuatua enua o te au tangata ra! Kua patoi tikai tetai angera meameaau i te mana taoonga o Tei anga mai iaia. Kua akavare teia meameaau i te vaine mua, ia Eva, kia kai i te ua rakau tei tureia. Te tuatua anga kiaia e tana tane ko Adamu, kua karanga te angera e: “Kare rava korua e mate: Kua kite oki te Atua e, i te rā e kai ei korua i to reira, ka puera ïa to korua mata, e ka riro korua mei te Atua ra te tu, i te kite i te meitaki e te kino.” (Genese 2:16, 17; 3:1-5) Kua kapikiia te angera meameaau e ko te Tiaporo e ko Satani.​—Apokalupo 12:9.

Kua akarongo ainei a Eva ki te au tuatua a Satani? Te akakite maira te Pipiria kia tatou e: “E kite akera te vaine e rakau meitaki ei kai, e te taurekareka no te mata, e te rakau anoano oki kia rauka te kite; kua rave iora aia i te kai no rungao ra, kai iora, apai atura oki ki tana tane, e kua kai katoa iora oki aia.” (Genese 3:6) Ae, kua kapiti a Adamu raua ko Eva, te nga tokorua mua, kia Satani i roto i tana meameaauanga. Tei tupu mai, kua ngaro ia raua te Parataito no raua uaorai e no ta raua uanga. Ko te tamariki te ka anau apa kore ia mai ma te oraanga mutu kore i mua ia ratou ka tu i te ara e te mate i teianei.​—Roma 5:12.

Akapeea te Atua ko Iehova, te Tutara Ngateitei i te ao katoa e pini ua ake i te pau atu anga? Kua akakoro aia kia raveia tetai akapapa anga no te akakore anga i te au ara. (Roma 5:8) Kua akanoo katoa te Atua ko Iehova i tetai akanoonooanga kavamani kia akono i teia manamanata. Kua tapaia teia akanoonooanga ko “te basileia o te Atua.” (Luka 21:31) Kua akanooia ei turu tua rua ki te tutaraanga a te Atua i te ao katoa e pini ua ake, e akakoroanga akataka tika ia to teia Patireia.

Eaa te akakoroanga no te Patireia o te Atua? Eaa tetai au tu o te reira, e akapeea te reira i te akaaiteia anga ki te tutara anga a te tangata? I naea te Patireia akamata ai i te tutara? Ka uriuriia teia au uianga i roto i te atikara e aru maira.