Mubuso wa Mulimu—U Fita Mibuso Ye Miñwi Kaufela

JESU KRESTE na lutile balateleli ba hae kuli: “Cwale mina mu lapele cwana, mu li: Ndat’a luna ya kwa lihalimu, Libizo la hao a li be le li kenile; ku tahe mubuso wa hao; se si latwa ki Wena si ezwe mwa lifasi, mo si ezezwa kwa lihalimu.” (Mateu 6:9, 10) Yona tapelo ye, ye zibahala ku ba bañata sina Ndat’a Luna, kamba Tapelo ya Mulena, i talusa mulelo wa Mubuso wa Mulimu.

Ka Mubuso wa Mulimu, libizo la Mulimu li ka keniswa. Mubuso wo u ka felisa linyazo kaufela ze beilwe fa libizo la Mulimu bakeñisa bukwenuheli bwa Satani ni batu. Taba yeo ki ya butokwa hahulu. Libupiwa ze butali kaufela li kona ku ba ni tabo haiba li nga libizo la Mulimu ku ba le li kenile ni haiba ka ku itatela li lumela kuli ki Mulimu ya swanela ku busa.—Sinulo 4:11.

Ku zwa fo, Mubuso u tomilwe ilikuli “se si latwa ki [Mulimu] si ezwe mwa lifasi, mo si ezezwa kwa lihalimu.” Sona se si latwa ki Mulimu seo ki nto mañi? Ki ku zusulusa sinca silikani se ne si li teñi mwahal’a Mulimu ni batu, ili silikani sa na latehezwi ki sona Adama. Mubuso wo hape u ka taleleza mulelo wa Jehova, Mubusi wa Pupo kamukana, ona wa ku tisa paradaisi fa lifasi ili mo batu ba bande ba ka pila ku ya ku ile. Kaniti, Mubuso wa Mulimu u ka lukisa hande lika kaufela ze ne mbonjanisizwe ki sibi sa kwa makalelo mi u ka tahisa kuli mulelo o lilato wa Mulimu u kone ku petahala. (1 Joani 3:8) Mane ona Mubuso wo ni ze u ka peta ki lona lushango lo lutuna lwa Bibele.

U Fita Mibuso Ye Miñwi Mwa Lika Mañi?

Mubuso wa Mulimu ki mulonga luli ona ni m’ata a matuna. Mupolofita Daniele na lu file monyehelo ye bonisa butuna bwa m’ata a ona Mubuso wo. Kale-kale ko, na sinuzi kuli: “Mulimu wa mwa lihalimu u ka tahisa mubuso o . . . ka ketula ni ku feza mibuso [ya batu] kaufela.” Hape ka ku sa swana ni mibuso ya batu, ye tomiwanga ni ku fela hamulaho wa nakonyana, Mubuso wa Mulimu ha u “na ku sinyeha ku ya ku ile.” (Daniele 2:44) Ku sa na ni ze ñwi ze bonisa kuli Mubuso wo u ipitezi. Mwa likalulo kaufela, Mubuso wo u fitela kwahule mubuso ufi kamba ufi wa batu.

Mulena wa Mubuso wa Mulimu ki Mulena yo mutuna. Mu nyakisise kuli yena Mulena yo ikaba mañi. Mwa ‘tolo’ ya na filwe, Daniele na boni Mubusi wa Mubuso wa Mulimu sina “yo muñwi ya swana sina mwan’a mutu” a sutelezwa ku Mulimu ya M’ata Ote mi a fiwa “bulena, kanya, ni mubuso.” (Daniele 7:1, 13, 14) Mwan’a mutu yo ki Jesu Kreste—yena Mesiya. (Mateu 16:13-17) Jehova Mulimu na ketile Mwan’a hae ka sibili, yena Jesu, kuli a be Mulena wa Mubuso wa Hae. Ha na li fa lifasi-mubu, Jesu na bulelezi bafalisi ba ba maswe kuli: “Mubuso wa Mulimu u mwa lipilu za mina,” sa na talusa fo kikuli, Mulena wa kwapili wa ona Mubuso wo, na li mwahal’a bona.—Luka 17:21.

Ki ko ku lenga ni mutu ona fa lifasi fa ya na ni tulemeno tu to swana ni twa Jesu twa ku ba Mubusi. Jesu u bonisize kale hande kuli ki Mueteleli  ya lukile, ya sepeha, ni ya na ni mufelañeke. Libuka za Evangeli li bonisa Jesu sina mutu ya na sebeza ka t’ata ni ya na na ni sishemo ni kutwelo-butuku. (Mateu 4:23; Mareka 1:40, 41; 6:31-34; Luka 7:11-17) Mi hape bakeñisa kuli Jesu na zuhile kwa bafu mi u kwa lihalimu, ha koni ku shwa kamba ku ba ni mifokolo ye miñwi ye ba na ni yona batu.—Isaya 9:6, 7.

Jesu ni ba busa ni bona ba busa ku zwelela kwa liluko le li pahami. Mwa tolo ya na boni mwa pono, Daniele hape na boni kuli “Mubuso ni bulena, . . . li ka fiwa sicaba sa ba ba kenile.” (Daniele 7:27) Jesu ha busi a nosi. Ku na ni ba bañwi ba ba ka busa ni yena sina malena ni baprisita. (Sinulo 5:9, 10; 20:6) Ha na bulela za bona, muapositola Joani na ñozi kuli: “Na talima, mi na bona Ngunyana a yemi fa lilundu la Sioni, a na ni batu ba ba eza 144,000, . . . ili ba ba liuluzwi mwa lifasi.”—Sinulo 14:1-3.

Ngunyana ki Jesu Kreste ha sa bile mwa situlo sa hae sa Bulena. (Joani 1:29; Sinulo 22:3) Lilundu la Sione le li bulelwa fa ki lihalimu. * (Maheberu 12:22) Jesu ni ba 144,000 ba busa ni bona ba buseza kwa lihalimu. Ba buseza kwa sibaka se si pahami luli! Ka ku ba mwa lihalimu, ba bona lika kaufela. Bakeñisa kuli u kwa lihalimu, “mubuso wa Mulimu” hape u bizwa “mubuso wa kwa lihalimu.” (Luka 8:10; Mateu 13:11) Ha ku na lilwaniso, mane nihaiba litasezo za nyukiliya, ze kona ku fumbela kamba ku tulula ona mulonga wo wa kwa lihalimu. Ki mubuso o sa koni ku tulwa mi u ka taleleza mulelo wa na u tomezi Jehova.—Maheberu 12:28.

Mubuso wa Mulimu u na ni bayemeli ba ba sepahala fa lifasi. Lu ziba cwañi yona taba ye? Samu 45:16 i li: “U ka ba beya manduna mwa naha kaufela.” Linzwi la “U” mwa bupolofita bo li supa ku Mwan’a Mulimu. (Samu 45:6, 7; Maheberu 1:7, 8) Kacwalo, Jesu Kreste ka sibili u ka beya manduna kuli ba be bayemeli ba mulonga wo. Lwa kolwa hande kuli ba ka latelela litaelo za hae ka ku sepahala. Nihaiba lona la kacenu le, banna ba ba fitile ku ze konisa ba ba sebeza sina maeluda mwa liputeho za Sikreste ba lutilwe kuli ba sileleze, ku katulusa, ni ku omba-omba balumeli ka bona, isiñi ku ba “busa ka tata.”—Mateu 20:25-28; Isaya 32:2.

Mubuso wo u na ni babusiwa ba ba lukile. Ba eza niti mi ha ba nyazahali fapil’a Mulimu. (Liproverbia 2:21, 22) Bibele i li: “Ba ba ishuwa ba ka luwa naha, ba ka ikola kozo ye tuna.” (Samu 37:11) Babusiwa ba Mubuso wo ki ba ba ishuwa—bona ba ba kona ku lutiwa ni ba ba ikokobeza, ba ba musa ni ba ba bunolo. Nto ya pili ye ba iseza hahulu pilu mwa bupilo bwa bona ki litaba za kwa moya. (Mateu 5:3) Ba bata ku eza ze lukile mi ba latelela litaelo za Mulimu.

Mubuso wa Mulimu u zamaiswa ka milao ye ipitezi. Milao ni likuka ze itusiswa mwa Mubuso wo li zwa ku Jehova Mulimu yena ka sibili. Milao ni likuka zeo ha li lu beyeli mikwalelo ka ku sa swanela, kono za lu tusa. (Samu 19:7-11) Nihaiba cwale buñata bwa batu ba tusiwa ka ku pila ka lipimo ze lukile za Jehova. Ka mutala, ku mamela kelezo ya Bibele ye fiwa kwa banna, basali, ni bana ku kondolokisa bupilo bwa lubasi lwa luna. (Maefese 5:33–6:3) Ha lu utwa mulao wa ku ‘apala lilato,’ lu ka ba ni silikani se sinde ni ba bañwi. (Makolose 3:13, 14) Ha lu nze lu pila ka ku lumelelana ni likuka za mwa Mañolo, hape lu ka belekanga misebezi ya luna ka swanelo mi lu ka nga masheleñi hande. (Liproverbia 13:4; 1 Timotea 6:9, 10) Ku ambuka butakwa, buhule, ku zuba kwai ya licakana, ni milyani ye kola ku ka lu tusa ku ba ni buikangulo bo bunde.—Liproverbia 7:21-23; 23:29, 30; 2 Makorinte 7:1.

Mubuso wa Mulimu ki mulonga o tomilwe ki Mulimu. Mulena wa mulonga wo—yena Mesiya, Jesu Kreste—ni ba busa ni bona kaufela ba sepahala ku Mulimu ka ku yemela milao ya Hae ye lukile ni likuka za Hae za lilato. Babusiwa ba Mubuso wo, ku kopanyeleza cwalo ni bayemeli ba ona ba fa lifasi-mubu, ba tabela ku  pila ka milao ya Mulimu. Kacwalo, babusi ni babusiwa ba Mubuso wo ba iyakatwa hahulu za Mulimu. Mi ka lona libaka leo, Mubuso wo ki mulonga wa luli o busiwa ki Mulimu. Mubuso wo u ka kondisa ku peta mulelo o ne u tomezwi. Kono Mubuso wa Mulimu, ili o bizwa hape kuli Mubuso wa Mesiya u ka kala lili ku busa?

Puso ya Mubuso Ya Kalisa

Manzwi a na bulezi Jesu a kona ku lu tusa ku utwisisa fo i ka kalela puso ya Mubuso. Na inze: “Jerusalema u ka hatikelwa ki bamacaba, mane ku felelele linako za bamacaba.” (Luka 21:24) Jerusalema ne li ona muleneñi u nosi mwa lifasi kaufela o ne u bulelwa kuli kona mo ne ku fumaneha libizo la Mulimu. (1 Malena 11:36; Mateu 5:35) Ne li ona muleneñi o mutuna wa mubuso wa fa lifasi o ne u lumelelizwe ki Mulimu. Muleneñi wo ne u ka hatikelwa ki bamacaba lipuso za batu ha ne li ka yemisa puso ya Mulimu. Ki lili fo ne i ka kalela taba yeo?

Mulena wa mafelelezo ya na inzi fa lubona lwa Jehova lwa mwa Jerusalema, na bulelezwi kuli: “Tubula lisila le li tatilwe kwa toho, zwisa kuwani ya bulena! . . . Ku fitela ha ku ka taha yo ya na ni tukelo ya ku atula; mi ni ka mu fa yona.” (Ezekiele 21:25-27) Mulena yo na ka tubulwa kuwana ya bulena, mi puso ya Mulimu ya ku busa batu ba hae ne i ka yemiswa. Taba yeo ne i ezahezi ka 607 B.C.E. Mababilona ha ne ba sinyize Jerusalema. Mwahal’a “linako za bamacaba” ku zwa ka 607 B.C.E., Mulimu n’a si ke a ba ni mulonga fa lifasi o ne u ka yemela bubusi bwa hae. Linako zeo ha se li fitile kwa maungulo Jehova kihona cwale ha na ka fa m’ata a ku busa ku yo “ya na ni tukelo ya ku atula”—yena Jesu Kreste. Kono zona linako zeo ne li ka ba za butelele bo bu kuma kai?

Bupolofita bwa mwa buka ya Bibele ya Daniele bu li: “A mu leme kota, mu i sinye; kono mu siye sisina sa mibisi ya yona mwa mubu, mi si hulehwe ka mawenge a sipi ni a kopa . . . mane mwaha u y’o fela ha 7 fahalimu a sona.” (Daniele 4:23) Sina ha lu ka bona, ‘myaha ye 7’ ye pundilwe fa i likana ni butelele bwa “linako za bamacaba.”

Mwa Bibele, fokuñwi likota li yemela batu, babusi, ni mibuso. (Samu 1:3; Jeremia 17:7, 8; Ezekiele, kauhanyo 31) Kota yeo ya swanisezo “n’e bonwa ni kwa mafelelezo kamukana a lifasi.” (Daniele 4:11) Kacwalo puso ye ne yemelwa ki kota ye ne ka lemiwa ni ku tamiwa sisina ne i ka busa ku yo fita “kwa mafelelezo kamukana a lifasi,” ili ku busa mibuso kaufela ya batu. (Daniele 4:17, 20, 22) Kacwalo kota yeo i yemela puso ye pahami ya Mulimu, sihulu ku amana ni lifasi-mubu. Jehova na busize ka nakonyana ka ku itusisa mubuso wa na tomile mwa sicaba sa Isilaele. Kota ya swanisezo yeo ne i lemilwe mi sisina sa yona sa tamiwa ka mawenge a sipi ni kopa ilikuli si si ke sa shoshela. Taba yeo i bonisa kuli Mubuso wa na itusisa Mulimu fa lifasi ne u ka tuhela ku busa, mi seo ne si ezahezi ka 607 B.C.E.—kono ne u si ke wa tuheliswa ku ya ku ile. Sisina sa kota yeo ne si  ka tamiwa ku fitela ‘myaha ye 7’ i fela. Kwa mafelelezo a yona nako yeo, Jehova na ka fa puso ku mucalifa ya na ni tukelo ya ku busa, yena Jesu Kreste. Kwa iponahaza hande kuli ‘myaha ye 7’ ni “linako za bamacaba” li supa kwa nako ye swana.

Bibele i lu tusa ku ziba butelele bwa ‘myaha ye 7.’ Bibele i bonisa kuli mazazi a eza 1,260 a likana ni “nako i liñwi, ni nako [linako ze peli], ni nako ye pumwa fahali”—ili palo hamoho ye eza ‘myaha’ ye milalu ni licika. (Sinulo 12:6, 14) Seo si bonisa kuli palo ye ha i kopanyiwa habeli, kamba yona myaha ye 7, i lu fa mazazi a eza 2,520.

Ha lu bala mazazi luli a 2,520 ku zwa ka 607 B.C.E. lu fita fa 600 B.C.E. Kono myaha ye 7 ne ngile nako ye telele hahulu ku fita fo. Jesu ha na bulela za “linako za bamacaba” linako zeo ze eza myaha ye 7 ne li sa zwelapili. Kacwalo myaha ye 7, ki myaha ya bupolofita. Kabakaleo, lu lukela ku itusisa mulao wa mwa Mañolo: “Mwaha mutumbi bakeñisa lizazi li li liñwi.” (Numere 14:34; Ezekiele 4:6) Mi ha lu itusisa mulao wo kona kuli myaha ye 7 yeo lifasi li ka busiwa ki mibuso ya lifasi i sa kauhezwi ki Mulimu ki lilimo ze eza 2,520. Ha lu ka bala lilimo ze 2,520 ku zwa ka 607 B.C.E. lu esha mwa 1914 C.E. Seo kona silimo fo ne li felezi “linako za bamacaba,” kamba yona myaha ye 7. Kona kuli Jesu Kreste na kalile ku busa sina Mulena wa Mubuso wa Mulimu ka 1914.

“Ku Tahe Mubuso wa Hao”

Bakeñisa kuli Mubuso wa Mesiya se u tomilwe mwa lihalimu, kana lwa swanela ku lapela kuli Mubuso wo u tahe, sina mwa na lutezi Jesu mwa tapelo ya hae ye li mutala? (Mateu 6:9, 10) Eni. Kupo yani ya swanela mi i sa sebeza ni kacenu. Ona cwale fa Mubuso wa Mulimu u tuha u yandululela m’ata a ona fa lifasi ni ku li busa kamukana lona.

Mubuso wo ha u ka nga puso u ka tisa limbuyoti ze ñata kwa batu ba ba sepahala. Bibele i li: “Mulimu u ka ba ni bona, Yena luli, ibe Mulimu wa bona; mi u ka takula miyoko kaufela kwa meto a bona; mi lifu ha li sa na ku ba teñi; nihaiba ku tahelwa ki maswabi ni ku lila, ni ku utwa butuku; kakuli za pili li felile.” (Sinulo 21:3, 4) Ka nako yeo, “ha ku na mutu ya yahile mwa [naha] ya ka ipulela kuli: Na kula.” (Isaya 33:24) Batu ba ba tabisa Mulimu ba ka ikola bupilo bo bu sa feli. (Joani 17:3) Ha lu nze lu libelela ku talelezwa kwa litaba ze ni bupolofita bo buñwi bo bu makaza bwa mwa Bibele, haike lu “bate pili mubuso wa Mulimu ni Ku Luka kwa Hae.”—Mateu 6:33.

[Litaluso za kwatasi]

[Manzwi a fa likepe 4]

Jehova u ketile Jesu Kreste ku ba Mulena wa Mubuso wa Hae

[Siswaniso/Maswaniso a fa likepe 6]

Lilimo ze 2,520

October 607 ◀ B.C.E. C.E. ▸ October 1914

Lilimo ze 606 ni likweli ze talu Lilimo ze 1,913 ni likweli ze 9

“Linako za bamacaba” ne li kalile ka 607 B.C.E. ni ku fela ka 1914 C.E.

[Siswaniso se si fa likepe 7]

Babusiwa ba fa lifasi ba Mubuso wa Mulimu ba ka ikola limbuyoti ze ñata