HESUCRISTO a siña su siguidonan: “Haci oracion anto asin’aki: ‘Nos Tata cu ta den shelo, bo nomber sea santifica. Cu bo reino bin. Cu bo boluntad sosode na tera mescos cu den shelo.’” (Mateo 6:9, 10) E oracion aki cu hopi hende conoce como e Oracion di Nos Tata, ta splica e proposito di e Reino di Dios.

Mediante e Reino, Dios su nomber lo ser santifica. Kiermen, e Reino lo limpia Dios su nomber di tur e deshonor cu e rebelion di Satanas y di hende a montona riba dje. Esaki ta masha importante. Felicidad di tur criatura inteligente ta depende di si nan ta considera Dios su nomber como sagrado y voluntariamente ta acepta su derecho di goberna.—Revelacion 4:11.

Ademas, e Reino ta ser estableci pa laga Dios su “boluntad sosode na tera mescos cu den shelo.” Y kico ta su boluntad? Esei ta pa restaura e relacion entre Dios y humanidad cu Adam a perde. Tambe e Reino lo cumpli cu e proposito di e Soberano Universal, Jehova, pa establece un paradijs riba tera caminda bon hende por disfruta di bida pa semper. Si, e Reino di Dios lo deshaci di tur e daño causa pa e pica original y lo haci Dios su proposito amoroso pa e tera un realidad. (1 Juan 3:8) De echo, e Reino aki y loke lo e logra, ta e mensahe principal di Bijbel.

E Reino di Dios ta un berdadero gobierno cu tin gran poder. Profeta Daniel ta duna nos un idea con poderoso e ta. Hopi tempo pasa, el a predeci: “E Dios di shelo lo lanta un reino cu . . . lo garna y pone un fin na tur e reinonan [humano].” Ademas, na contraste cu gobiernonan humano, cu atrabes di historia a bin na poder y despues a baha, e Reino di Dios si “nunca lo no wordo destrui.” (Daniel 2:44) Pero esei no ta tur cos. E Reino aki den tur aspecto ta hopi mas superior cu cualkier gobierno humano.

E Reino di Dios tin un Rei superior.

Wak ta ken e Rei ei ta. Den “un soño y visionnan” cu a ser duna na Daniel, el a mira con e Gobernante di e Reino di Dios cu tabata “manera un Yiu di hende” a keda presenta dilanti di Dios Todopoderoso y duna “dominio, gloria y un reino” eterno. (Daniel 7:1, 13, 14) E Yiu di hende no ta ningun otro cu Hesucristo, e Mesias. (Mateo 16:13-17) Jehova Dios a apunta su propio Yiu, Hesus, como Rei di Jehova su Reino. Ora cu Hesus tabata riba tera, el a bisa e farizeonan malbado: “E reino di Dios ta meimei di boso.” E tabata kiermen cu e, e futuro Rei di e Reino ei, tabata riba tera hunto cu nan.—Lucas 17:21.

Ken riba tera for di entre humanidad por iguala Hesus su credencialnan como Gobernante? Hesus a demostra caba di ta un Lider completamente husto, confiabel y yen di compasion. E Evangelionan ta present’e como un persona dinamico y tambe como un persona cu tierno cariño y hopi sintimento. (Mateo 4:23; Marco 1:40, 41; 6:31-34; Lucas  7:11-17) Ademas, awor cu Hesus a ser resusita pa biba den shelo, e no ta someti na morto ni na otro limitacionnan humano.—Isaias 9:6, 7.

Hesus y su compañeronan ta reina for di un posicion superior.

Den e vision cu Daniel a haya den un soño, el a mira tambe cu gobernacion of dominio a “wordo duna na e pueblo di e santonan.” (Daniel 7:27) Hesus no ta goberna su so. E tin mas personanan hunto cu ne cu lo goberna como rei y sirbi como sacerdote. (Revelacion 5:9, 10; 20:6) Apostel Juan a skirbi relaciona cu nan: “Mi a wak, y ata e Lamchi tabata para riba Sero Sion, y hunto cu ne 144.000 . . . cu a wordo cumpra for di tera.”—Revelacion 14:1-3.

E Lamchi ta Hesucristo despues cu el a keda instala como Rei di e Reino. (Juan 1:29; Revelacion 22:3) E Sero Sion aki ta referi na shelo. * (Hebreonan 12:22) Hesus cu su 144.000 compañeronan ta goberna for di shelo. Esei ta un posicion masha eleva pa goberna for di dje! Siendo den shelo, nan tin un perspectiva mas amplio. Como cu shelo ta e asiento di “e Reino di Dios”, e ta ser yama tambe “e reino di shelo.” (Lucas 8:10; Mateo 13:11) Ningun arma, ni sikiera atakenan nuclear, por yega na e gobierno celestial ei, corda pa nan tumb’e. E ta invencibel y lo cumpli cu e proposito cu Jehova tin p’e.—Hebreonan 12:28.

E Reino di Dios tin representantenan confiabel riba tera.

Con nos por sa esaki? Salmo 45:16 [NW] ta declara: “Lo bo nombra . . . prins riba tur e tera.” E “bo” den e profesia aki ta referi na e Yiu di Dios. (Salmo 45:6, 7, NW; Hebreonan 1:7, 8, NW) Pues, Hesucristo mes lo nombra e representantenan cu ta manera prins. Nos por tin sigur cu nan lo cumpli fielmente cu su instruccion. Awe mes, hombernan cualifica cu ta sirbi como anciano den e congregacion cristian ta ser siña pa no ‘domina’ riba nan rumannan den fe, sino mas bien pa nan proteha, refresca y consola nan.—Mateo 20:25-28; Isaias 32:2.

E Reino tin subditonan husto.

Nan ta personanan recto y sin culpa den bista di Dios. (Proverbionan 2:21, 22) Bijbel ta bisa: “E humildenan lo hereda e tera, y lo deleita nan mes den pas abundante.” (Salmo 37:11) E subditonan di e Reino ta hende manso, dispuesto pa siña, humilde y suave. Nan interes principal ta asuntonan spiritual. (Mateo 5:3, NW) Nan kier haci loke ta corecto y ta reacciona un bes riba Dios su instruccion.

E Reino di Dios ta ser dirigi pa leinan superior.

E leinan y principionan cu ta dirigi e Reino ta bin for di Jehova Dios mes. Na luga di restringi nos inhustamente, e leinan ei ta beneficia nos. (Salmo 19:7-11) Hopi hende ta beneficiando caba di ta biba na harmonia cu Jehova su rekisitonan husto. Por ehempel, si nos haci caso di e conseho biblico duna na esposo-, esposa- y yiunan, nos bida di famia ta mehora. (Efesionan 5:33–6:3) Ora cu nos ta obedece e mandamento pa “bisti amor”, nos relacion cu otro hende ta drecha. (Colosensenan 3:13, 14) Segun cu nos ta biba na harmonia cu principionan biblico, nos ta cultiva tambe bon custumbernan di traha y un punto di bista balansa di placa. (Proverbionan 13:4; 1 Timoteo 6:9, 10) Nos ta evita buracheria, inmoralidad sexual, tabaco y droga, y asina nos ta yuda proteha nos salud.—Proverbionan 7:21-23; 23:29, 30; 2 Corintionan 7:1.

E Reino di Dios ta un gobierno decreta pa Dios. Su Rei—e Mesias, Hesucristo—y tur su cogobernantenan ta responsabel dilanti Dios pa sostene Su leinan husto y principionan amoroso. Pa e subditonan di e Reino, incluso pa su representantenan riba tera, ta un delicia pa biba na harmonia cu e leinan di Dios. Pues, Dios ta e interes principal di e gobernantenan y di e subditonan di e Reino. P’esei  e Reino ta un berdadero teocracia, es decir, un gobernacion eherce pa Dios. Ta sigur cu e gobernacion aki lo cumpli cu e proposito pa cua el a ser estableci. Pero ki tempo e Reino di Dios, conoci tambe como e Reino Mesianico, ta cuminsa goberna?

Den e palabranan di Hesus nos ta haya un factor clave pa compronde ki tempo gobernacion di e Reino ta cuminsa. El a bisa: “Jerusalem lo wordo trapa dor di e paganonan te ora cu e temponan di e paganonan keda cumpli.” (Lucas 21:24) Jerusalem tabata e unico stad riba tera cu tabata directamente asocia cu e nomber di Dios. (1 Reinan 11:36; Mateo 5:35) E tabata e capital di un reino terenal cu Dios a aproba y apoya. E stad ei lo a ser trapa pa e nacionnan pagano den e sentido cu e gobernacion cu Dios a eherce riba su pueblo lo a keda interumpi pa gobiernonan mundano. Na ki tempo esaki lo a cuminsa?

Na e ultimo rei cu a sinta riba e trono na Jerusalem a ser bisa: “Los turband y kita corona . . . Esaki tampoco lo no t’ei mas, te ora cu esun bin cu tin derecho riba dje; y lo mi dun’e esei.” (Ezekiel 21:25-27) E corona lo a ser kita for di cabes di e rei ei, y Dios su gobernacion riba Su pueblo lo a keda interumpi. Esaki a tuma luga na aña 607 prome cu nos era [P.E.C.], ora cu e Babilonionan a destrui Jerusalem. Durante “e temponan di e paganonan” cu lo a sigui, Dios lo no tabatin un gobierno riba tera pa representa su gobernacion. Ta te na final di e periodo di tempo ei Jehova lo a duna e poder di goberna na esun “cu tin derecho riba dje”, esta, Hesucristo. Con largo e periodo ei lo tabata?

Un profesia den e buki biblico di Daniel ta declara: “Basha e palo abou y destru’e, ma laga e troncon cu su raiznan keda den tera, ma cu un banchi di hero y brons rond di dje . . . te ora shete periodo di tempo pasa riba dje.” (Daniel 4:23) Manera nos ta bai mira, e “shete periodo di tempo” menciona den e versiculo aki ta mesun largo cu “e temponan di e paganonan.”

Den Bijbel, tin biaha palo ta representa personanan individual, gobernantenan y reinonan. (Salmo 1:3; Jeremias 17:7, 8; Ezekiel, capitulo 31) E palo simbolico “tabata visibel te na e fin di henter tera.” (Daniel 4:11) Pues, e gobernacion representa pa e palo cu lo a ser basha abou y mara cu banchi rond di dje, a extende “te na e fin di henter tera”, loke a ensera henter e reino di humanidad. (Daniel 4:17, 20, 22) Kiermen, e palo ta representa Dios su gobernacion supremo, particularmente pa cu tera. Pa un tempo Jehova a eherce e gobernacion aki riba tera mediante e reino cu el a pone riba e nacion di Israel. Pero a basha e palo simbolico abou, y a pone banchi di hero y brons rond di e troncon pa asina strob’e di crece. Esaki a indica cu e reino cu Dios tabata uza pa goberna riba tera lo a stop di funciona —manera a pasa na aña 607 P.E.C.—pero no pa tempo indefini. E palo lo a keda cu banchi rond di dje te ora cu “shete periodo di tempo” a pasa. Na fin di e periodo ei, Jehova lo a duna gobernacion na e heredero legitimo, Hesucristo. Claramente anto, e “shete periodo di tempo” y “e temponan di e paganonan” ta referi na e mesun periodo.

Bijbel ta yuda nos determina e largura di e “shete periodo di tempo.” Bijbel ta indica cu 1.260 dia ta igual cu “un tempo y temponan [dos tempo, plural] y mitar di un tempo”, pa un total di tres “tempo” y mitar. (Revelacion 12:6, 14) Esaki ta nifica cu dos biaha e cantidad ei, esta, shete tempo, ta 2.520 dia.

Ora nos conta 2.520 dia literal for di aña 607 P.E.C., nos ta yega na aña 600 P.E.C. Sinembargo, e shete periodo di tempo a dura hopi mas largo cu esei. E tabata den progreso ainda ora cu Hesus a papia di “e temponan di e paganonan.” P’esei e shete periodo di tempo ta profetico. Pues nos tin cu aplica e regla biblico: “Un aña pa cada dia.” (Numbernan 14:34; Ezekiel 4:6) Den tal caso, e shete periodo di tempo cu mundo a ser domina pa podernan mundano sin interferencia divino ta suma 2.520 aña. Si nos conta 2.520 aña for di 607 P.E.C., nos ta yega na aña 1914 di nos era [E.C.]. Esei ta e aña ora cu “e temponan di e paganonan”, of shete periodo di tempo, a termina. Esaki ta nifica cu Hesucristo a cuminsa goberna como Rei di e Reino di Dios na aña 1914.

Ya cu e Reino Mesianico a ser estableci den shelo caba, nos lo tin cu sigui pidi den oracion pa e bin, manera Hesus a siña den e oracion modelo? (Mateo 6:9, 10) Si. E peticion ei ta na su luga y te ainda e ta valido. E Reino di Dios pronto lo demostra su pleno poder pa cu e tera aki.

Humanidad lo experencia bendicionnan grandi ora cu esei sosode! Bijbel ta bisa: “Dios mes lo ta meimei di nan, y e lo seca tur lagrima kita for di nan wowo; y lo no tin morto mas; lo no tin lamento mas, ni yoramento, ni dolor; e prome cosnan a pasa.” (Revelacion 21:3, 4) Na e tempo ei, “ningun habitante lo no bisa: ‘Mi ta malo.’” (Isaias 33:24) E personanan cu ta agrada Dios lo haya bida eterno. (Juan 17:3) Segun cu nos ta warda riba cumplimento di e profesianan biblico aki y otro profesianan maraviyoso, laga nos sigui “busca prome e reino di Dios y Su husticia.”—Mateo 6:33.