A Rengedel A Dios​—Kot el Ngar er a Bab er a Bek el Rolel

A JESUS KRISTUS a ullisechakl er a rultirakl er ngii el kmo: “Misei e moluluuch el ua ika el kmo: A Demmam el ngara eanged, le mechedaol a ngklem. A rengedem le mei, ma uldesuel a rengum le meruul ra belulechad el ua chomerellel ra eanged.” (Matteus 6:9, 10) Tia el nglunguuch, el lodengelii a rebetok el chad el kmo Nglunguchel a Rubak, a mesaod el kirel a moktek er a Rengedel a Dios.

Ngoeak itia el Renged, e a ngklel a Dios a mo mechedaol. Ngmo mekikiid er aike el rokui el mekngit el mlo er ngii el oeak sel ultok er a delongelel a Satan ma chad. Tiang a kmal klou a ultutelel. A deurreng er a rokui el mellomes a rengrir el bleob a ultuil er a osengir er a cheledolel a ngklel a Dios e dirrek el kongei er tia el llemeltel a omengederederel.​—Chocholt 4:11.

Ma lmuut el tang, a Renged a meketmokl me bo lsebechel a ‘uldesuel a rengul [a Dios] le meruul ra belulechad el ua chomerellel ra eanged.’ E ngera isel soal a rengul? Ngmo mesumech er sel deleuill er a delongelel a Dios ma klechad, el lurridii a Adam. Me sel Renged a dirrek el mo oltaut er a moktek er ngike el Chimong el Kedidai, el Jehovah, el mo kutmeklii a paradis er tia el chutem el bo loldeu a rengrir er ngii a rungil el chad er a klengar el diak a ulebengelel. Chochoi, a Rengedel a Dios a mo mesmechokl aike el rokui el telemall el mlo er ngii el oeak a klengit e mo kutmeklii a moktek er a Dios el kirel tia el chutem. (1 Johanes 3:8) Tia el Renged ma ike el bo loruul a kot el klou a ultutelel el klumech er a Biblia.

Ngkot el Ngar er a Bab er a Ngera el Rolel?

A Rengedel a Dios a mera el kabelment el ngar er ngii a klou el klisichel. A profet el Daniel a milskid a di kekerei el siasing er a klungel a klisichel. A irechar, e ngulemlaoch el kmo: “A Dios el ngar a eanged a mo toketekii a rengedel el mo . . . okngemed a ikel bebil er a renged [er a klechad] el rokui.” Ma lmuut el tang, ngdiak bo leua ika el kabelment er a klechad, el mo er ngii e mo diak, e a Rengedel a Dios “a mo medechel el mo cherechar.” (Daniel 2:44) Ngdiak di letiaikid e lemerekong. Ngar er a bek el rolel, e tia el Renged a kot el ngar er a bab er a rokui el kabelment er a klechad.

A Rengedel a Dios a ngar er ngii a kot el ngar er a bab el King er ngii. Ka di molatk el kmo ngtecha ngika el King er ngii. A Daniel a “ulemerrous e milsa ues,” er ngike el Merreder er a Rengedel a Dios el “ua ngelekel a chad” el mlo er a medal ngike el Kot el Mesisiich el Dios e ngiluu a “klisiich, ma omengull, ma klisichel omerreder.” (Daniel 7:1, 13, 14) Ngika el Ngelekel a chad a Jesus Kristus​—el Messias. (Matteus 16:13-17) A Jehovah el Dios a ngileltii a Ngelekel, el Jesus, el mo King er a Rengedel. Sera lengar er tia el chutem, e a Jesus a millekoi er tirke el mekngit el Refarisee el kmo: “A rengedel a Dios a di ngara delongeliu,” el belkul a kmo ngii, el ngike el mo King er sel Renged, a mle ngar er a delongelir.​—Lukas 17:21.

Ngtechang er a delongelir a rechad a sebechel el mo ua Jesus el mo Merreder? A Jesus a mla ochotii el kmo ngkmal melemalt e ultebechel e chubechub el Merreder. Aike el Evangkelio a ochotii el ua chad el blechoel el oltaut a tekoi e dirrek el oba delemedemek el reng. (Matteus 4:23; Markus 1:40, 41; 6:31-34; Lukas 7:11-17) Ma lmuut el tang, e ngike el mla mekiis er a  kodall el Jesus a diak bo lemechitechut er a kodall ma ngii di el ngera el ngelsengesel a klechad.​—Isaia 9:6, 7.

A Jesus me tirke el mo obengkel a mengedereder el ngar er a kot el ngar er a bab el deruchall. Ngar er a ues er a berrusel, e a Daniel a dirrek el milsa el kmo a “klisiich ma klebkellel a rokui el renged er a beluulchad a bo le besterir a re chedal a Kot el Ngarbab el Dios.” (Daniel 7:27) A Jesus a diak lebo longedereder el di ngii el tang. Ngar er ngii a rebebil el mo obengkel el mo mengedereder el ua king e mesiou el ua repriist. (Chocholt 5:9, 10; 20:6) A apostol el Johanes a milluches el kirir el kmo: “E a ksal omes, e mesang, a Ngelekel a sib a dechor ra Rois el Zion, ma dart ma chokouang ma cheual telael el chad el obengkel, . . . el mlengubet ra belulechad.”​—Chocholt 14:1-3.

A Ngelekel a sib a Jesus Kristus el ngar er sel deruchellel er a Renged. (Johanes 1:29; Chocholt 22:3) E a Rois el Sion a melutk el mo er a eanged. a (Hebru 12:22) A Jesus me tirke el obengkel el 144,000 a mengedereder el ngar er a eanged. Ngkol ua ngera el ngar er a bab el deruchall el lengar er ngii e mengedereder! Tir el ngar er a eanged a uchul me ngklou a techellir el omes a bek el tekoi. E le eanged a kingelel, misei a uchul e “a rengedel a Dios” a dirrek el okedongall el kmo “rengedel a eanged.” (Lukas 8:10; Matteus 13:11) Ngdiak a klekedall er a mekemad, el mo lmuut er a kenzibakudang, el sebechel el tomellii sel kabelment el ngar er a eanged. Ngdiak el sebechel el mo metemall e ngbai mo otaut a moktek er a Jehovah el kirel.​—Hebru 12:28.

A rultebechel el chad a omtechei er a Rengedel a Dios el ngar er tia el chutem. Kede mekerang e mo medengelii tia el tekoi? Psalm 45:16 a kmo: “Ke mo rulleterir el mo merreder er a beluulechad el rokir.” A tekoi el “ke” el ngar er tia el ulaoch a melutk el mo er a Ngelekel a Dios. (Psalm 45:6, 7; Hebru 1:7, 8) Me nguaisei, a Jesus Kristus a mo melilt er a merreder el mo omtechei er ngii. E kid a kmal ulterekokl a rengud el kmo ngmo blak a rengrir el oltirakl er a ulekrael er ngii. Me chelechang el dirrek, e tirke el rredemellel el mechuodel el mesiou er a ongdibel er a Rekristiano a mosisechakl el kmo, ngdiak el kirir el “mengedereder” er a rechad el lekaukledem er a klaumerang, te bai mo omekerreu, e melisiich, e mengelaod er tir.​—Matteus 20:25-28; Isaia 32:2.

A Renged a ngar er ngii a remelemalt el chedal. Te diak a telemellir e melemalt er a osengel a Dios. (Osisechakl 2:21, 22) A Biblia a kmo: “Tirkel medemedemek a mo ungilbesrir el kiei el ngar a beluu el ungil a rengrir er a cherrungel budech.” (Psalm 37:11) A rechedal a Renged a medemedemek​—el mechechedereder, e ngar er a eou a rengrir, e chubechub. A tekoi er a klereng a kot el klou a ultutelel el tekoi el kirir. (Matteus 5:3) Te blechoel el sorir el meruul a llemalt e kongei el oltirakl a ulekrael er a Dios.

 A Rengedel a Dios a oltirakl a ngar er a bab el llach. A llach ma uleklatk el ousbech a Renged a mla er a Jehovah el Dios el mei, el mo uchul a klungioled, el diak lomekringel er kid. (Psalm 19:7-11) Te betok el chad er a chelechang a mla ngmai a klungiaol e le tir el kiei el oltirakl er a melemalt el ulekrael er a Jehovah. El ua itiang, a lsekum a rechad a oltirakl a omellach er a Biblia el kirel a chedam ma chedil ma rengalek, e ngsebechel el mo uchul a ungil el klengar er a telungalek. (Efesus 5:33–6:3) Ma dolengesenges er a llach el kmo “modekiar a bltikerreng,” e ngsebechel el toketekii a ungil el deleongel er kid ma rebebil. (Kolose 3:13, 14) A dekiei el oltirakl er a Bades, e ngsebeched el mekurulii a ungil el blekerdeled er a ureor ma tabesul el osenged el kirel a udoud. (Osisechakl 13:4; 1 Timoteus 6:9, 10) A dongeroid er kid er a omelim el rrom ma deleboes el omeruul ma omelamech el dekool ma usbechellel a mekngit el kar a sebechel el omekerreu er kid.​—Osisechakl 7:21-23; 23:29, 30; 2 Korinth 7:1.

A Rengedel a Dios a kabelment el meldalem er a Dios. Ma King er ngii​—el Messias, el Jesus Kristus​—me tirke el rokui el obengkel el mengedereder a ngar er ngii a ngerechelir er a medal a Dios el mo oltaut a llechul ma uleklatk er Ngii. A rechedal a Renged, el uldimukl er tirke el omtechei er ngii el ngar er a chutem, a dmeu a rengrir el oltirakl a llechul a Dios. Sei a uchul e a remengedereder ma rechederedall er a Renged a dul el omes el bedul a Dios el ua lengike el kot el ngar er a uchei er a rokui el tekoi er a klengar er tir. Ma leuaisei, e a Renged a mera el dereder, el Dios a mengedereder er ngii. Me ngulterekokl el mo merekui a rokui el ruoll el tekoi. Engdi, ngoingerang e a Rengedel a Dios, el dirrek el okedongall el Rengedel a Messias, a mo omuchel el mengedereder?

A Renged a Omuchel el Mengedereder

A bo dodengei el kmo a Rengedel a Dios ngmo omuchel el mengedereder er a oingerang e ngkired el omes er a tekingel a Jesus el dmu el kmo: “Ma Jerusalem a mo merderd rar Chisentail, el dimerkmo le bo le mecherrungel a taem rar Chisentail.” (Lukas 21:24) A Jerusalem a di mle ta el mats el ngar er a chutem el rokir el oba ngklel a Dios. (1 King 11:36; Matteus 5:35) Ngii a mle ua leklou el mats el ngar er tia el chutem el lekilengei er ngii a Dios. Me sel mats el mengedereder er a rechedal a Dios a bo lorderd er ngii aike el kabelment er a klechad. Me tiang ngmo omuchel er a oingerang?

Ngike el ulebongel el king er a Jehovah el ngar er a Jerusalem a ledilu er ngii el kmo: “Bedobed a lechetel a bdelum ma krone er kau . . . el dimerkmo le mei ngikel kirel el oungerachel, e ak mo msang.” (Esekiel 21:25-27) Ma krone a mle kirel el mengai er a bdelul ngike el mle king, ma omengederederel a Dios er a chedal a mo meterob. Me tiang a dilubech er a rak er a 607 B.C.E. er sel taem el Rechad er a Babilon a tilemellii a beluu er a Jerusalem. Ma klteketel aike el “telutk el taem,” e ngmo diak a kabelment er a Dios el ngar er a chutem el omtechei er a omengederederel. Engdi ngar er a ulebengelel aike el taem e a Jehovah a mo nguu sel klisichel a omerreder el msa ngike el “kirel el oungerachel,” el Jesus Kristus. El mo ua ngerang a klemengetel el taem?

A ulaoch el ngar er a babier er a Daniel a kmo: “Mukelii ngii el kerrekar e mtemellii, e ngdi bechere uchul me le medechel er a chutem. Mutechulii er a techull el deel ma brons . . . e bechere me le ngar isei ngii ma charm el euid el rak.” (Daniel 4:23) Me kede mo mesa el kmo, a “euid el rak” el medung er tiang a osisiu a klemengetel el di ua “taem rar Chisentail.”

A Biblia a blechoel el ousbech er a kerrekar el omekesiu er a rechad ma remengedereder ma renged el dirrek. (Psalm 1:3; Jeremia 17:7, 8) Me sel okesiu el kerrekar a “mo turkii er a eanged me ng mlo sebechel moues er a re bek el chad er a beluulchad.” (Daniel 4:11) Misei e tia lomengedereder el omekesiu er ngii er a kerrekar el kirel el metuk e melechet el “obereka er a beluulechad el rokir” a uldimukl er ngii aika el rokui el renged er a klechad. (Daniel 4:17, 20, 22) Me tia el kerrekar a omtechei er sel kot el ngar er a bab el omengederederel a Dios, el ileakl el melutk er sel deleongel er ngii el mei er tia el chutem. Me tia el omengedereder a mle duum er sel taem el Jehovah a tileketekii a renged el kirel a beluu er a Israel. Me tia el okesiu el kerrekar a miltuk e merenged er a deel ma brons me lak el  duubech. Me tia olecholt el kmo a renged el ousbech er ngii a Dios el mengedereder el ngar er tia el chutem a mo meterob er a urerel, el dilubech er a 607 B.C.E.​—engdi diak leuaisei el mo cherechar. Sel kerrekar a mle llechotel el kirel “euid el taem.” A uriul er sel taem, e a Jehovah a nguu a omerreder el msa ngike el meltutk er ngii, el Jesus Kristus. Me ngbleketakl el kmo a “euid el taem” ma “telutk el taem rar Chisentail” a melekoi el kirel a osisiu el taem.

A Biblia a ngosukid el mo medengelii a klemengetel a “euid el taem.” Ngomekesiu er a 1,260 el sils el mo er a “tal rak [chimo el taem] ma cherul rak [eru el taem] ma tedobech el rak”​—el uldekial e ngmo edei el “rak” ma tedobech. (Chocholt 12:6, 14) Tiang a belkul a kmo a lemechisois sel ochur e ngmo euid el taem, ma lechub e ngmo 2,520 el sils.

A lsekum e kede omechur a 2,520 el sils el omuchel er a rak er a 607 B.C.E., e kede mo tmurk er a 600 B.C.E. Engdi, a euid el taem a lmuut el mle kemanget er tiang, e dirk millemolem er sera losaod a Jesus el kirel a “telutk el taem rar Chisentail.” Me nguaisei, a euid el taem a mle tekoi er a ulaoch. Me ngkired el oltirakl er a Bades el kirel ‘a tal sils el kirel a tal rak.’ (Ulecherangel 14:32-36; Esekiel 4:4-8) Ma leuaisei, e a euid el taem er a omengedereder er a kabelment er a klechad el ileakl er a Dios a mlo er ngii el 2,520 el rak. E a domechur a 2,520 el rak el omuchel er a 607 B.C.E. e kede mo tmurk er a rak er a 1914 C.E. Me seikid el rak a mlo ulebengelel a “telutk el taem rar Chisentail” ma lechub aike el euid el taem. Tia belkul a kmo a Jesus Kristus a ulemuchel a omengederederel el King er a Rengedel a Dios er sera 1914.

“A Rengedem Le Mei”

A Rengedel a Messias a mla mo mengedereder er a eanged, ma leuaisei e ngdirk kired el meluluuch me lemei el ua lullisechakl a Jesus el ngar er a nglunguchel? (Matteus 6:9, 10) Chochoi. E le sel ongit a melemalt e dirk ngar er ngii a belkul. A Rengedel a Dios a dirkak bo loltaut er a klisichel el rokir el bedul tia el chutem.

Ngkol ua ngera el klengeltengat el mo er a reblak a rengrir sel leduubech aika el tekoi! El ua lolekoi a Biblia el kmo: “A Dios a di ngii el mo obenterir; e mo mesuld a bek el iuosech ra mederir, e mo diak a kodall, ma klengiterreng ma langel ma ringel me ngmo diak, ele ngmla nguemed a ikel dimla ngarngii.” (Chocholt 21:3, 4) Me seikid el taem, “ng mo diak a tal chad el kiei er a beluad el lmuut el mo mengeremrum el kmo ng smecher.” (Isaia 33:24) Tirke el oldeu er a rengul a Dios a mo dmeu a rengrir er a diak a ulebengelel el klengar. (Johanes 17:3) Me sel dongiil er a otutel aikang ma kuk bebil el ulaoch er a Biblia, e “momuchel losiik ra rengedel a Dios ma llemeltel.”​—Matteus 6:33.

[Footnote]

[Blurb er a 3 el llel]

A Jehovah a ngileltii a Jesus Kristus el mo King er a Rengedel

[Siasing er a 4 el llel]

2,520 el rak

October 607 ◀ B.C.E. C.E. ▸ October 1914

606 el rak ma ede el buil 1,913 el rak ma etiu el buil

Sel ‘telutk el taem rar Chisentail’ a ulemuchel er a 607 B.C.E. e mlo tmurk er a 1914 C.E.

[Siasing er a 6 el llel]

A rechedal a Rengedel a Dios el ngar er tia el chutem a mo oldeu a rengrir er a betok el klengeltengat