Tok Blong Jeova i Wan Samting We i Laef

Ol Bigfala Poen Long Buk Tri Mo Fo Blong Ol Sam

MAN blong raetem Sam i mekem wan prea i go long God mo i askem se: “?Oltaem yu yu lavem man tumas, mo yu stap holem ol promes blong yu, be olgeta we oli stap finis long beregraon oli save talemaot ol fasin ya?” (Ol Sam 88:11) I tru se ansa blong kwestin ya, hemia se nogat. Yumi no save presem Jeova sipos yumi ded. Bigfala risen from wanem yumi stap laef, i blong presem Jeova. Mo wan gud risen blong presem Jeova hemia from we Hem i givim laef long yumi.

Buk Tri mo Fo blong Ol Sam we hemia Sam namba 73 kasem 106, i givim plante risen long yumi blong presem mo leftemap nem blong Man ya we i Wokem yumi. Taem yumi tingting dip long ol Sam ya, samting ya bambae i pusum yumi blong gat moa tangkiu from “tok blong God,” mo bambae i pulum yumi blong presem hem moa, mo blong kamgud moa long ol toktok blong yumi blong presem hem. (Hibrus 4:12) Ale, yumi intres bigwan blong luk fastaem long Buk Tri blong Ol Sam.

‘TAEM MI KAM STAP KLOSAP LONG GOD, MI HAREM SE I GUD TUMAS LONG MI’

(Ol Sam 73:​1–89:52)

Asaf mo sam famle blong hem oli wokem ol faswan 11 Sam long Buk Tri. Faswan sing i eksplenem samting we i givhan long Asaf blong sakemaot ol rong tingting. Mo hem i mekem olsem, hem i sakemaot ol rong tingting we hem i gat fastaem. Hem i singsing se: “Taem we mi mi kam stap klosap long yu, mi harem se i gud tumas long mi.” (Ol Sam 73:28) Sam 74 i tokbaot sore blong ol man Isrel long taem we ol enemi blong olgeta oli spolem Jerusalem. Ol Sam 75, 76, mo 77 oli tokbaot Jeova olsem Jaj we i gat stret fasin, mo Man blong Sevem ol man we oli gat tingting daon, mo Man blong lesin long prea. Sam 78 i tokbaot ol man Isrel long taem blong Moses kasem taem blong Deved. Sam 79 i tokbaot sore blong ol man Isrel long taem we ol enemi oli spolem haos blong God. Sam 80 i wan prea blong ol man blong God, oli askem long Hem blong i tekem olgeta oli kambak long hem. Sam 81 i leftemap tingting blong yumi blong obei long Jeova. Ol Sam 82 mo 83 oli ol prea blong askem God blong i jajem mo finisim ol rabis jaj mo ol enemi blong Hem tu.

Wan singsing we ol laen blong Kora oli wokem i talem se: ‘!Mi wantem tumas blong go stap long haos blong God! Hae God, mi wantem tumas blong stap oltaem long haos blong yu.’ (Ol Sam 84:2) Sam 85 i wan sing blong askem long God blong i blesem ol man Isrel we oli kamfri long wok slef long Babilon. Sam ya i soemaot klia we ol blesing long saed blong spirit oli gud moa i winim ol blesing long saed blong bodi. Long Sam 86, Deved i askem long God blong i lukaot long hem mo i tijim hem. Sam 87 i wan singsing long saed blong Saeon mo olgeta we oli bon long Saeon. Sam 88 i wan prea long Jeova bakegen. Etan we maet hem i wan long ol fo waes man long taem blong Solomon, i raetem Sam 89. Hem i tokbaot kaengud fasin blong Jeova we hem i soemaot tru long kontrak we hem i mekem wetem Deved.​—1 King 4:31.

 Ansa Blong Sam Kwestin Long Saed Blong Baebol:

73:​9 (NW )​—?I minim wanem se ol rabis man oli “putum maot blong olgeta long heven mo tang blong olgeta i stap wokbaot olbaot long wol”? From we ol rabis man oli no tingbaot eni man long heven no long wol, oli no fraet blong tok nogud long God mo oli talem ol giaman toktok long saed blong ol narafala man tu.

74:​13, 14​—?Wetaem Jeova i ‘smasem hed blong ol bigbigfala anamol ya blong solwota mo i smasem ol hed blong bigfala anamol ya Leviatan’? Baebol i tokbaot ‘Fero, we i king blong Ijip’ olsem ‘bigfala algita we i stap slip long botom blong Nael Reva.’ (Esikel 29:3) Maet Leviatan i pija blong ol “strong man blong Fero.” (Ol Sam 74:​14, futnot NW ) Taem Baebol i talem se Jeova i smasem hed blong ol anamol ya hemia i minim we Jeova i winim Fero mo ol ami blong hem taem hem i sevem ol man Isrel oli aot long Ijip.

75:​4, 5, 10 (NW )​—?Tok ya “hon” i pija blong wanem samting? Hon blong wan anamol i olsem wan strong tul blong faet blong hem. Taswe, tok ya “hon” i pija blong paoa. Jeova i leftemap hon blong ol man blong hem, i min se hem i leftemap olgeta, be hem i ‘brekemdaon hon blong ol man nogud.’ Yumi kasem woning ya blong no ‘leftemap hon blong yumi i go antap tumas,’ i min se yumi no mas kam flas mo tinghae tumas long yumi wan. Yumi mas luk ol wok we yumi kasem insaed long kongregesen se oli kam long Jeova from we Jeova nao i stap leftemap ol man.​—Ol Sam 75:​7, NW.

76:​10 (NW )​—?Olsem wanem ‘kros blong man’ i save presem Jeova? Taem God i letem ol man blong oli kros long yumi from we yumi ol man blong Hem, gudfala frut i save kamaot. Ol hadtaem we maet yumi kasem from kros blong olgeta, oli save trenem yumi no stretem yumi. Jeova i letem yumi safa go kasem mak nomo we i tijim yumi long sam samting. (1 Pita 5:10) ‘Lashaf blong kros blong ol man, God bambae i holemtaet.’ ?Olsem wanem sipos yumi kasem wan traem we yumi save ded from? Hemia tu i save leftemap Jeova from we taem ol man oli luk we yumi stanap strong long bilif blong yumi, samting ya i save pulum olgeta tu blong oli presem Jeova.

78:​24, 25​—?From wanem Baebol i talem se mana i “kakae ya we i kamaot long heven” mo ‘kakae blong ol enjel’? Tufala tok ya i no minim se ol enjel oli stap kakae mana. Mana i “kakae we i kamaot long heven” from we stamba ples we kakae ya i kamaot long hem hemia heven. (Ol Sam 105:40) From we ol enjel oli stap long heven, ating tok ya ‘kakae blong ol enjel’ i minim nomo se God we i stap long heven, hem nao i givim kakae ya. (Ol Sam 11:4) Maet Jeova i bin yusum ol enjel blong givim mana ya long ol man Isrel.

82:​6 (Nyutesteman wetem Ol Sam long Bislama)​—?Hu ya we Baebol i talem se oli ol “god” mo ol “pikinini blong God ya we i Antap Tumas”? Tufala tok ya i blong tokbaot ol jaj blong Isrel. Ol tok ya oli stret long ol jaj ya from we olgeta oli olsem ol man blong talemaot ol tok blong God mo we God i jusumaot olgeta blong mekem wok blong hem.​—Jon 10:​33-36.

83:​2 (NW)​—?I minim wanem se “leftemap hed”? Fasin ya blong leftemap hed i minim se man i rere blong yusum paoa no tekem aksen, we plante taem i blong blokem narafala, no blong faet, no blong agensem narafala.

Ol Lesen Blong Yumi:

73:​2-5, 18-20, 25, 28. Yumi no mas jalus long ol man nogud from ol samting we olgeta oli gat, mo yumi no mas folem rod we olgeta oli stap folem. Ol man nogud oli stap stanap long ples we i glis. I sua we bambae oli “foldaon, oli  kam nogud olgeta.” Antap long hemia, i blong nating nomo we yumi traehad blong finisim ol rabis fasin ya from we rul blong ol sinman i no save karemaot rabis fasin. Olsem Asaf, yumi waes sipos yumi ‘stap klosap long God’ nomo, mo yumi glad blong frengud wetem Hem.

73:​3, 6, 8, 27. Yumi mas lukaot blong no gat fasin blong tok flas, praod, laf jikim narafala mo trikim man. Yumi mas blokem ol fasin ya nating we i luk olsem se oli save halpem yumi long sam rod.

73:​15-17. Taem tingting blong yumi i fasfas, yumi no mas talemaot ol tingting ya we oli olbaot. ‘Sipos yumi stap tok olsem’ bambae yumi daonem tingting blong ol narafala nomo. Yumi mas holem kwaet tingting mo tingting dip long ol wari ya blong yumi mo yumi mas joen oltaem wetem ol Kristin brata sista blong yumi. Samting ya bambae i givhan long yumi blong stretem tingting blong yumi.​—Ol Proveb 18:1.

73:​21-24. Man we i jalus long ol man nogud from we hem i luk se laef blong olgeta i rongud nomo, hem i olsem ol anamol we oli no gat hed. Man ya i no tingting gud, hem i letem ol filing blong hem nomo oli lidim hem. Defren olgeta, yumi mas letem ol advaes blong Jeova i lidim yumi, yumi mas trastem hem fulwan se Hem bambae i ‘holem yumi long han blong hem’ mo givhan long yumi. Antap long samting ya, taem yumi frengud wetem Jeova, i olsem we Hem i ‘tekem yumi i go stap wetem hem.’

77:6. I nidim taem blong stadi mo tingting dip. Long rod ya yumi soemaot we yumi rili tinghae long ol trutok blong Baebol mo yumi traehad blong faenem ol trutok ya. !I impoten tumas we yumi makemaot taem mo yumi stap long wan ples we i kwaet blong yumi save mekem ol samting ya!

79:9. Jeova i stap lesin long ol prea blong yumi, speseli taem ol prea blong yumi oli long saed blong samting we i mekem nem blong Hem i tabu.

81:​13, 16. Sipos yumi lesin long voes blong Jeova mo wokbaot folem ol rod blong hem, bambae yumi kasem plante blesing.​—Ol Proveb 10:22.

82:​2, 5 (NW ). Fasin we i no stret i spolem ‘fandesen blong wol ya.’ Ol wok we oli no stret oli spolem ol man.

84:​1-4, 10-12. Ol man blong raetem Ol Sam oli laekem tumas haos wosip blong Jeova mo oli haremgud long ol wok we oli stap mekem i go long Hem. Oli givim gudfala eksampol long yumi.

86:​5 (NW ). !Yumi glad tumas we Jeova i “rere blong fogivim man”! Hem i stap lukaot janis blong soemaot sore long ol man we oli tanem tingting blong olgeta from ol sin blong olgeta.

87:​5, 6. ?Olsem wanem? ?Olgeta we oli kasem laef long Paradaes long wol ya bambae oli save nem blong olgeta we oli laef bakegen long heven? Ol vas ya oli soemaot se i luk olsem se yes bambae oli save.

88:​13, 14. Taem yumi luk we Jeova i tektaem blong ansa long ol prea blong yumi long saed blong wan problem, maet hemia i min se Jeova i wantem we yumi soemaot tru se yumi fasgud long Hem.

“YUMI TALEM TANGKIU LONG HEM, YUMI LEFTEMAP NEM BLONG HEM”

(Ol Sam 90:​1–106:48)

Tingbaot plante risen blong presem Jeova we i stap long buk fo blong Ol Sam. Long Sam 90, Moses i tokbaot olsem wanem laef blong ‘King we rul blong hem i stap gogo i no save finis’ i defren long laef blong ol man we i sot nomo. (1 Timoti 1:17) Folem Sam 91:2 (NW ), Moses i tokbaot Jeova olsem ‘sefples blong hem mo strongfala ples blong haed blong hem,’ i min se hem i lukluk i go long Jeova blong i lukaotgud long hem. Ol nekis Sam oli tokbaot ol nambawan fasin blong God, ol tingting blong hem we oli hae, mo ol nambawan wok blong hem. I gat tri sing we oli stat wetem tok ya se ‘Jeova yu yu king.’ (Ol Sam 93:1; 97:1; 99:1) Taem man blong raetem ol Sam ya i tokbaot Jeova olsem Man we i Wokem yumi, hem i pulum yumi blong ‘talem tangkiu long hem, mo leftemap nem blong hem.’​—Ol Sam 100:4.

?Wan rula we i fraetgud long Jeova i rul long wanem fasin? Ol Sam 101 we King Deved i raetem, i givim ansa long kwestin ya. Nekis Sam i talem se Jeova “bambae hem i harem prea blong yumi, bambae hem i lesin long yumi.” (Ol Sam 102:17) Sam 103 i pulum tingting blong yumi i go long kaengud fasin mo sore blong Jeova. Man blong raetem Sam ya i tokbaot ol wok we God i mekem long wol ya i se: “Hae God. Yu yu mekem plante naranarafala samting, mo olgeta evriwan oli stap soemaot we fasin blong yu blong wokem olgeta i waes we i  waes.” (Ol Sam 104:24) Tufala laswan sing long Buk Fo oli presem Jeova from ol nambawan wok blong hem.​—Ol Sam 105:​2, 5; 106:​7, 22.

Ansa Blong Sam Kwestin Long Saed Blong Baebol:

91:​1, 2 (NW)​—?Wanem ya “ples haed blong Hae God,” mo olsem wanem yumi save “stap” long hem? Hemia i minim fasin blong Jeova blong lukaotgud long yumi blong yumi stap gud mo sef long saed blong spirit. Ol man we oli no trastem God oli no save ples ya, taswe, Baebol i talem se ples ya i haed. Yumi save stap long ples haed blong Jeova sipos yumi lukluk i go long hem olsem sefples mo strongfala haos blong yumi, yumi presem hem olsem Hae Rula blong heven mo wol, mo yumi talemaot gud nius blong Kingdom. Yumi harem we yumi sef long saed blong spirit from we yumi save se Jeova i rere oltaem blong halpem yumi.​—Ol Sam 90:1.

92:12​—?Olsem wanem ol stret man oli “gru gud olsem pamtri”? Ol man oli savegud pamtri from we hem i stap karem frut oltaem. Stret man i olsem wan pamtri from we fasin blong hem i stret long ae blong Jeova mo hem i stap gohed blong karem “gudfala frut,” we hemia i minim ol gudgudfala wok we hem i stap mekem.​—Matiu 7:​17-20.

Ol Lesen Blong Yumi:

90:​7, 8, 13, 14. Oltaem ol fasin blong yumi we oli no stret oli spolem fasin fren blong yumi wetem trufala God. Ol sin we man i haedem oli no save haed long fes blong God. Be, sipos yumi rili tanem tingting blong yumi from sin mo lego nogud fasin blong yumi, Jeova i save glad long yumi bakegen, mo bambae i ‘mekem yumi savegud we hem i lavem yumi tumas.’

90:​10, 12 (NW ). From we laef blong yumi i sotfala nomo, yumi mas ‘kaontem ol dei blong yumi.’ ?Olsem wanem yumi save mekem olsem? Yumi mas “kam waes,” no soemaot fasin waes blong bambae yumi no westem ol dei blong yumi we oli stap yet be yumi yusum ol dei ya long wan rod we i mekem Jeova i glad. Hemia i minim we yumi mas putum ol samting long saed blong spirit long fasples long laef blong yumi, mo yusum taem blong yumi long waes fasin.​—Efesas 5:​15, 16; Filipae 1:10.

90:17. I stret blong yumi prea long Jeova blong i ‘mekem we yumi stap win oltaem long olgeta samting we yumi stap mekem’ mo blong i blesem ol traehad blong yumi long wok blong prij.

92:​14, 15. Taem ol olfala oli stadi gud long Baebol mo oli joen oltaem wetem ol man blong Jeova, samting ya i mekem se oli gohed strong long wok blong God, olsem “olfala tri we lif blong hem i stap grin oltaem mo i stap karem plante frut yet,” mo oli soemaot we oli ol sas samting blong kongregesen.

94:19. Nating se yumi “wari” long wanem samting, be sipos yumi ridim mo tingting dip long ol tok blong Baebol we oli ‘mekem tingting blong yumi i kam gud bakegen,’ bambae hem i save leftemap tingting blong yumi.

95:​7, 8. Sipos yumi lesin long ol advaes blong Baebol, mo yumi tingting gud mo obei long olgeta advaes ya, samting ya i save givhan long yumi blong blokem fasin stronghed.​—Hibrus 3:​7, 8.

106:​36, 37 (NW). Ol vas ya oli joenem fasin blong wosip long ol aedol wetem fasin blong mekem sakrefaes long ol dimon. Hemia i soemaot se wan man we i yusum ol aedol long wosip blong hem i save kam aninit long paoa blong ol dimon. Baebol i givim woning ya se: “Yufala i mas lukaot gud blong no mekem wosip long ol aedol.”​—1 Jon 5:​21, NW.

“!Yumi Presem Ja!”

Ol laswan trifala sing long Buk Fo blong Ol Sam i finis wetem tok ya se: “!Yumi presem Ja!” Laswan Sam i stat wetem tok ya tu. (Ol Sam 104:​35, NW; 105:​45, NW; 106:​1, 48, NW ) Yes, tok ya “!Yumi Presem Ja!” i kamaot plante taem long Buk Fo blong Ol Sam.

Yumi gat plante risen blong presem Jeova. Ol Sam 73 kasem 106 i givim plante save blong yumi tingting dip long hem, mo i save fulumap hat blong yumi wetem tangkiu long Papa blong yumi long heven. Taem yumi tingbaot olgeta samting we hem i mekem finis blong givhan long yumi mo hemia we bambae i mekem blong givhan long yumi long fiuja, samting ya i mas pusum yumi blong “presem Ja” wetem olgeta paoa blong yumi.

[Tok blong pija long pej 16]

Olsem Asaf, ol rabis fasin oli no save daonem yumi sipos yumi “stap klosap long God”

[Tok blong pija long pej 17]

Jeova i winim Fero long Red Si

[Tok blong pija long pej 17]

?Yu yu save from wanem Baebol i kolem mana se ‘kakae blong ol enjel’?

[Tok blong pija long pej 19]

?Wanem i save halpem yumi blong kwaetem tingting blong yumi taem yumi “wari”?