Sâm Bu 3-na leh Bu 4-na Aṭanga Thu Pawimawh Hrilhfiahna
Jehova Thu Chu A Nung
Sâm Bu 3-na leh Bu 4-na Aṭanga Thu Pawimawh Hrilhfiahna
FAKNA hla phuahtu chuan Pathian hnêna a ṭawngṭainaah: “I ngilneihzia chu thlânah hriattîrin, i rinawmzia chu Boralna Hmunah hriattîrin a awm dâwn em ni?,” tiin a zâwt a. (Sâm 88:11) A chhânna chu, A awm lo vang, tih a ni. Nunna tel lovin Jehova kan fak thei lo. Jehova fak chu kan nun chhan tûr ṭha tak a ni a; tin, kan nunna chu amah kan fak chhan tûr ṭha tak a ni bawk.
Sâm Bu 3-na leh Bu 4-na, Sâm 73 aṭanga 106 thleng chuan Siamtu fak chhan tûr leh a hming chawimawi chhan tûr tam tak min pe a. Hêng fakna hlate ngaihtuahna hian “Pathian thu” avânga kan lâwmna chu a tizual tûr a ni a; tin, chu chuan nasa zâwk leh ṭha zâwka fak tûrin min chêttîr tûr a ni. (Hebrai 4:12) Ngaihven tak chungin Sâm Bu 3-na chu ilo en hmasa ang u.
“KEI ATAN ERAWH ZAWNG PATHIAN HNAIH HI A ṬHA A NI”
(Sâm 73:1–89:52)
Sâm Bu 3-na hmasa lama fakna hla 11-te chu Asapha phuah emaw, Asapha chhûngkaw zînga mite phuah emaw a ni a. A hawnna hla chuan ngaihtuahna sual ata Asapha humtu chu a hrilhfiah a ni. Tichuan, thu tlûkna dik chu a siam a. “Kei atân erawh zawng Pathian hnaih hi a ṭha a ni,” tiin a zai a ni. (Sâm 73:28) Jerusalem tihchhiatna avânga sûnna hla Sâm 74 chuan a zui a. Sâm 75, 76, leh 77-te chuan Jehova chu Rorêltu fel, mi thuhnuairawlhte Chhandamtu, leh ṭawngṭaina Ngaithlatu angin a târ lang a ni. Sâm 78 chuan Mosia hun aṭanga Davida hun thlenga Israelte chanchin chu a chhui a. Sâm 79 chu biak in tihchhiat avânga tawrhna hla a ni. A dawtleh chu Pathian mite din thar lehna tûra ṭawngṭaina a ni. Sâm 81 hi Jehova thu âwih tûra fuihna a ni a. Sâm 82 leh 83-te hi rorêltu sualte leh Pathian hmêlmate chunga rorêl tûra Pathian ngenna a ni.
“Ka nunna hian LALPA biak in hung chhûng kawtlaite chu a ngai êm êm a, a ni; a chauh phah hial a,” tiin Kora fapate fakna hla chuan a sawi. (Sâm 84:2) Sâm 85 hi an sal tânna ata lo kîr lehte tâna Pathian malsâwmna dîlna hla a ni. He fakna hla hian thlarau lam malsâwmnate hi tisa lam malsâwmnate aia nasa taka a hlut zâwk dân a târ lang. Sâm 86-ah Davida chuan Pathian hnênah amah vêng tûr leh zirtîr tûrin a dîl a. Sâm 87-a Zion leh chuta piangte chawimawina hla chu Sâm 88-a Jehova hnêna ṭawngṭainain a zui a ni. Davida thuthlunga târ lan Jehova ngilneihna chu Ethana phuah Sâm 89 hian a sawi uar a, ani chu Solomona hun laia mi fing palite zînga mi a nih a rinawm a ni.—1 Lalte 4:31.
Bible Chungchânga Zawhnate Chhânna:
73:9—Engtin nge mi suaksualte chuan ‘an kâ chu vânahte khian an dah a, an lei chuan leilung hi a fan tlang’? Mi suaksualte chuan lei leh vânah hian tumah zahpah rêng an neih loh avângin, an kâa Pathian sawi chhiat chu an hreh lo va. Mihringte chu an leiin an sawi chhe bawk a ni.
74:13, 14—Engtik khân nge Jehova chuan ‘tuia drakonho lûte leh liviathan lûte chu a tihkeh sawm’? “Aigupta lal Pharaoa” chu “luipuite laia awlepui [“drakon,” King James Version] ropui tak,” tia koh a ni a. (Ezekiela 29:3) Drakon chuan Pharaoa a entîr avângin, liviathan chuan Pharaoa mi chakte a entîr ngei ang. An lûte tihkeh sawmna chuan Jehova’n Aigupta sal tânna ata Israelte a chhan chhuah laia Pharaoa leh a sipai rualte a nuai chimihna chu a kawh ngei a rinawm.
75:4, 5, 10—“Kî” tih thu mal hian eng nge a entîr? Ran tân a kîte chu râlthuam thiltithei tak a ni a. Chuvângin “kî” tih thu mal chuan thiltihtheihna leh chakna a entîr a ni. Jehova chuan a mite chu chawimawiin an kî a tihsânsak a, ‘mi suaksualte kî erawh a tansak’ thung a ni. Mahni ‘kî tisâng lo’ tûra hrilh kan ni a, chu chu induhna leh chapona rilru put hmang kan nei tûr a ni lo tihna a ni. Chawimawitu chu Jehova a nih avângin, kohhrana mawhphurhna chanvo neihte chu a hnên aṭanga lo kal anga thlîr tûr a ni.—Sâm 75:7.
76:10—Engtin nge ‘mihring thinurna’ chuan Jehova a tihropui? Pathianin a chhiahhlawhte kan nih avânga mite’n kan chunga an thinurna an hrîkthlâk a phal hian, rah ṭha tak a lo chhuak thei a. Harsatna kan tawh engpawh hian kawng engemaw takin thil min zirtîr thei a. Jehova chuan chutiang zirtîrna min pêk thlengin hrehawm tawrhna chu a awm a phal a ni. (1 Petera 5:10) A nih leh thih thlengin lo tuar ta ila? Rinawm taka kan tawrh chhuah dân hretute’n Pathian an chawimawi theih avângin, hei pawh hian Jehova a tiropui thei a ni.
78:24, 25—Engvângin nge manna chu “vân buh” leh “mi chakte chhang” tia koh a nih? Heta “mi chakte” tih hi vântirhkohte sawina a ni a. Nimahsela, he ṭawngkam a enga mah hian manna hi vântirhkohte chaw a ni a ti lo. “Vân buh” a nih chhan chu vân aṭanga pêk a nih vâng a ni a. (Sâm 105:40) Vântirhkohte, a nih loh leh “mi chakte” chu vâna an awm avângin, “mi chakte chhang” tih hi vân Pathian pêk a ni tihna mai a ni thei. (Sâm 11:4) Jehova chuan Israelte hnêna manna pêk nân vântirhkohte a hmang pawh a ni thei bawk.
82:1, 6—Tute nge “Pathiante” leh “Chungnungbera fate” tia kohte chu? A pahnih hian Israel rama rorêltu mihringte sawina a ni ve ve a. Pathian tâna thusawitu leh aiawhtu an nih avângin, hei hi thil inâwm tak a ni.—Johana 10:33-36.
83:2—“Dâk hrâw hrâw” tih hian eng nge a entîr? He an lan dân hian thuneihna hmang tûr emaw, thil ti tûr emawa inrâlrinna a kâwk a, a tlângpui thuin dodâl tûr, do tûr, a nih loh leh hnehchhiah tûra inrâlrinna a ni.
Kan Zir Tûrte:
73:2-5, 18-20, 25, 28. Mi suaksualte chu kan awtin, an Pathian ngaihsak lohna nun kawng chu kan chhawm tûr a ni lo. Anni chu hmun nâl takah an ding a. “Chhiatnaa paih thlâk” an ni ngei ang. Chu bâkah, mihring ṭha famkim lote rorêlna hnuaiah chuan suahsualna chu paih bo theih a nih dâwn loh avângin, paih bo tuma kan thawhrimna eng pawh chu a thlâwn mai a ni ang. ‘Pathian hnaihna’ leh Amah nêna inlaichînna ṭha tak neihna hmanga suahsualna kan hmachhawn chuan, Asapha ang bawka fing kan ni ang.
73:3, 6, 8, 27. Uanthuanna te, chapona te, nuihsanna te, leh inbumna te lakah kan invêng tûr a ni. Chutiang miziate neih a ṭangkai anga a lan hunah pawh kan invêng reng tûr a ni.
73:15-17. Kan ngaihtuahna a buai chângin, tlâng hriatah kan puang zâr tûr a ni lo. Chutiang thil sawi chuan mi dangte tân lunghnualna bâk a thlen lo vang. Rilru fîm taka kan thil veizâwngte chu chhûtin, rinpuite nêna inkawmna hmanga tihven chu thiltih âwm tak a ni.—Thufingte 18:1.
73:21-24. Mi suaksualte hmuingîlna avânga ‘thinlunga lungngaihna’ neih chu ramsa, ngaihtuahna nei lo nêna khaikhin a ni a. He chhân lêt dân hi rilru veizâwnga innghat tlat ngaihtuah chiang mang lova thiltih a ni. Chutianga chhân lêt ai chuan, Jehova chuan ‘kan kut ding lam chu lo chelhin,’ min ṭanpui dâwn tih ring tlat chungin, a remruatna ang chu kan zui zâwk tûr a ni. Chu bâkah, Jehova chuan “ropuinaah khian min lâwm ang,” chu chu inlaichînna ṭha tak min neihpui ang tihna a ni.
77:6. Thlarau lam thutak tih tak zeta ngaihtuah nân leh zawn nân chuan, zirna leh chhût ngun nâna hun pêk a ngai a ni. Kan nuna awm fâlna hun insiam chu a va pawimawh tak êm!
79:9. Jehova chuan kan ṭawngṭainate chu a hming tihthianghlimna kaihhnawih thil a nihin a ngaithla bîk a ni.
81:13, 16. Jehova thu ngaihthlâk leh a kawnga kal chuan malsâwmna nasa tak a thlen a ni.—Thufingte 10:22.
82:2, 5. Dik lo taka rorêlna chuan “leilung nghahchhan” a tinghîng a. Thiltih dik lo chuan mipui ngêlnghehna a tibuai a ni.
84:1-4, 10-12. Fakna hla phuahtute’n Jehova biakna hmun an ngaihhlutna leh rawngbâwlnaa an chanvo neih chunga an lungawina chu entawn tlâk tak a ni.
86:5. Jehova chu ‘ngaihdam peih’ tak a nih avângin kan va lâwm êm! Ani chuan thil sual ti inlamlêt hnênah zahngaihna lantîr theihna tûr a zawng reng a ni.
87:5, 6. Lei Paradis-a chatuana nunna changte chuan vâna kaihthawhte hming an hre thei ang em? Hêng Bible chângte hian hriat theih a nih a rinawm thu a târ lang.
88:13, 14. Harsatna engemaw chungchânga kan ṭawngṭaina chhân vat a nih loh hian, chu chu Jehova’n a hnêna kan inpêkna takzia lantîr tûra min duh vâng a ni thei.
“A HNENAH LAWM THU SAWI ULA, A HMING CHU FAK RAWH U”
(Sâm 90:1–106:48)
Fakna hla thlankhâwm bu 4-nain a sawi Jehova fak chhan tûr chi hrang hrangte hi han ngaihtuah teh. Sâm 90-ah chuan, Mosia chuan “Lalber chatuana awm” leh mihringte dam rei lohzia chu a khaikhin a. (1 Timothea 1:17) Sâm 91:2 sawi dânin Mosia chuan Jehova chu ‘a inhumhimna leh a kulhpui’—a invênhimna hnâr angin a sawi a. A dawta fakna hlate chuan Pathian mize ṭha tak takte, a ngaihtuahna chungnunnate, leh a thiltih mak ropui takte chu a sawi a. Hla pathum chu “LALPA chu lalah a ṭhu,” tih thu hmangin a inṭan a ni. (Sâm 93:1; 97:1; 99:1) Jehova chu min Siamtu anga sawiin, fakna hla phuahtu chuan ‘a hnêna lâwm thu sawi tûr leh a hming fak’ tûrin min sâwm a ni.—Sâm 100:4.
Engtin nge Jehova ṭihna nei rorêltu chuan ro a rêl ang? Lal Davida phuah Sâm 101-na chuan chhânna a pe a ni. A dawta fakna hla chuan Jehova’n ‘pachhiate ṭawngṭaina chu a ngaihsak ang a, an ṭawngṭaina chu a hmusit lo vang’ tih min hrilh a. (Sâm 102:17) Sâm 103-na chuan Jehova ngilneihna leh lainatna lam a sawi thung. Fakna hla phuahtu chuan leia Pathian thil siam tam takte chungchângah: “Aw, LALPA, i thiltihte chu a va tam êm! Finnain i siam vek a ni,” a ti. (Sâm 104:24) Sâm Bu 4-na hla hnuhnûng ber pahnihte chuan Jehova chu a thilmak tihte avângin a chawimawi a ni.—Sâm 105:2, 5; 106:7, 22.
Bible Chungchânga Zawhnate Chhânna:
91:1, 2—Eng nge ‘Chungnungbera bihrûkna hmun’ chu ni a, engtin nge chutah chuan ka “awm” theih ang? Hei hi entîr nei thlarau lama himna leh inhumhimna hmun—thlarau lama chhiatna laka inhumhimna hmun a ni. Pathian ring lotute’n an hriat loh avângin a hmun hi a biru a. Kan inhumhimna leh kulhpui anga amaha innghahna te, lei leh vân Awptu Chungnungber anga amah fakna te, leh Ram chanchin ṭha puan chhuahna te hmangin Chungnungbera chu kan awmna hmunah kan siam a ni. Jehova chu min ṭanpui tûrin a inpeih reng tih kan hriat avângin thlarau lama him nia inhriatna kan nei bawk.—Sâm 90:1.
92:12—Eng kawngin nge mi fel chu “tûm angin a duah hluah hluah”? Tûm thing chu kum tam tak chhûng a rah rengna avânga hriat hlawh tak a ni a. Mi fel chu Jehova mithmuha mi ngîl tak a nihna leh “rah ṭha” a chhuah reng avângin tûm thing ang a ni a, chu mi zîngah chuan hnathawh ṭha a tel a ni.—Matthaia 7:17-20.
Kan Zir Tûrte:
90:7, 8, 13, 14. Kan thil sual tihte chuan Jehova nêna kan inlaichînna a tichhe fo va. Sual zêp rûk chu a laka thup theih a ni lo. Amaherawhchu, inchhîr tak zeta kawng sual kan kalsan chuan, Jehova chuan a duhsakna min pe leh ang a, ‘a ngilneihnain min titlai ang.’
90:10, 12. Nun hi a tawi êm avângin, ‘kan dam chhûng nîte chu kan chhiar’ tûr a ni. Engtin nge? ‘Finna thinlung neihna,’ a nih loh leh kan dam chhûng nî a la awmte khawhral lo va, Jehova lâwmzâwng anga kan hman theihna tûra finna neihna hmangin kan chhiar thei a ni. Chutianga ti tûr chuan thlarau lam thil dah pawimawh leh kan hun fing taka hman a ngai a ni.—Ephesi 5:15, 16; Philippi 1:10, 11.
90:17. Rawngbâwlnaa “kan kut hnathawh . . . tinghet” tûr leh kan thawhrimna malsâwm tûra Jehova dîl chu thil tihâwm tak a ni.
92:14, 15. Pathian Thu zirlai taima tak nihna leh Jehova mite nêna inkawm ziahna hmangin, tarte chu “tui pai ṭeuhvin an hring hluah hluah”—thlarau lamah an chak hle—theiin, kohhran tâna mi ṭangkai tak an ni thei a ni.
94:19. Kan ‘rilrua ngaihtuahna a tam’ chhan chu eng pawh ni se, Bible-a kan hmuh “thlamuannate” chhiarna leh ngun taka chhûtna chuan min thlamuan ang.
95:7, 8. Bible thununna thute ngaihthlâkna te, ngaihsakna te, leh zawm nghâlna te chuan thinlung khauh nei lo tûrin min vêng ang.—Hebrai 3:7, 8.
106:36, 37. Hêng Bible chângte hian milem biakna chu ramhuai hnêna inthawina nên a thlunzawm a. Hei hian milem hmangtu chu ramhuai thununna hnuaiah a awm thei tih a târ lang. Bible chuan: “Milem lakah inthiarfihlîm rawh u,” tiin min fuih a ni.—1 Johana 5:21.
“LALPA Chu Fak Rawh U”
Sâm bu 4-naa a hnuhnûng ber hla pathumte chu: “LALPA chu fak rawh u,” tih fuihna hmanga tihtâwp a ni a. A hla hnuhnûng ber pawh chu, chu mi thu hmang bawka ṭan a ni. (Sâm 104:35; 105:45; 106:1, 48) A nihna takah chuan “LALPA chu fak rawh u” tih thu hi Sâm Bu 4-na chhûngah hian vawi engemaw zât a lang a ni.
Jehova fak chhan tûr kan nei chiang hle. Sâm 73 aṭanga 106 hian thil ngaihtuah tûr tam tak min pe a, kan thinlung chu kan Pa vâna mi chunga lâwmnain a tikhat a ni. Kan tâna a thil tih zawng zawng, tûn hmaa a thil tih tawhte, nakina a la tih tûrte kan ngaihtuah hian, kan chakna zawng zawng hmanga ‘LALPA fak’ tûra chêttîrin kan awm a ni lâwm ni? (w06 7/15)
[Phêk 4-naa milem]
Asapha anga ‘Pathian hnaihna’ hmangin suahsualna kan do thei
[Phêk 5-naa milem]
Pharaoa chu Tuipui Sen-ah a tlâwm
[Phêk 5-naa milem]
Manna chu “mi chakte chhang” tia koh a nih chhan i hria em?
[Phêk 6-naa milem]
Engin nge kan “rilrua ngaihtuah tam tak” hnawt chhuak tûrin min ṭanpui?