A Zeova Gomdã vɩɩme

Yɩɩl Sõamyã sebrã babg a tãab-n-soab la a naas-n-soabã tags-kãsemse

PƲƲSG pʋgẽ, yɩɩl-gʋlsdã soka Wẽnnaam woto: “B togsda yãmb nonglem yaoog pʋgẽ bɩ, bɩ b togsda yãmb sɩda yell kɩɩm-kulgu?” (Yɩɩl Sõamyã 88:12) Yaa vẽeneg tɩ leoorã yaa ayo. D sã n pa vɩ, d pa tõe n pẽg a Zeova ye. Yaa a Zeova pẽgrã yĩng la d sẽn baood n na n vɩɩmdã, la d sẽn vɩyã yĩng me yaa bʋʋm sẽn sek d na pẽg a Zeova.

Yɩɩl Sõamyã sebrã babg a tãab-n-soab la a naas-n-soabã, rat n yeel tɩ yɩɩl 73 n tɩ tãag yɩɩl 106 kõta tõnd bʋʋm wʋsg tɩ d pẽgd d Naandã la d waoogd a yʋʋrã. D sã n bʋgs yɩɩl kãensã zutu, segd n kɩtame tɩ d nong Wẽnnaam Gomdã n paase, la d manegd d sẽn pẽgd Wẽnnaam to-to wã sõmblem n paasdẽ. (Hebre dãmba 4:12) Bɩ d reng n vaees Yɩɩl Sõamyã sebrã babg a tãab-n-soabã neere.

“MAM SÃ N KOLG WẼNNAAM N YAA SÕAMA”

(Yɩɩl Sõamyã 73:1-89:53)

Yaa a Azaf bɩ a rooga neb n gʋls Yɩɩl Sõamyã babg a tãab-n-soabã pipi yɩɩl 11 wã. Bab-kãngã sɩngda ne yɩɩll 73 soabã sẽn wilgd bũmb ning sẽn fãag a Azaf ne tagsg sẽn pa zems sẽn da na n menemsa wã. La zu-noogo yɩɩlã baasgẽ a yeela woto: “La ne maam, mam sã n kolg Wẽnnaam n yaa sõama.” (Yɩɩl Sõamyã 73:28) Yɩɩl Sõamyã 74 soabã yaa sũ-toog yɩɩlle, b sẽn sãam Zerizalɛma yĩngã. Yɩɩl Sõamyã 75, 76 la 77 wilgdame t’a Zeova yaa Bʋ-kaood sẽn yaa tɩrga, sik-m-mens rãmbã Fãagda la t’a kelgda pʋʋsgo. Yɩɩl Sõamyã 78 soabã pʋgẽ, b lebg n tẽegda Israɛll nebã vɩɩm sẽn yɩ to-to, sẽn sɩng ne a Moiiz wakatẽ wã n tall n wa hal a Davɩɩd wakatẽ wã. Yɩɩll 79 soabã yaa sũ-toog yɩɩlle, b sẽn sãam wẽn-doogã yĩnga. Yɩɩl Sõamyã 80 soabã yaa pʋʋsg b sẽn pʋʋsd n kot Wẽnnaam t’a fãag a nin-buiidã tɩ b lebg n wa b ba-yirã. Yɩɩl Sõamyã 81 soabã pʋgẽ b sagenda Israɛll nebã tɩ b sak Wẽnnaam. Yɩɩl Sõamyã 82 ne Yɩɩl Sõamyã 83 soab yaa pʋʋsgo. B kota Wẽnnaam t’a kao bʋ-kaoodb nins sẽn kaood bʋʋd kɛgrã, la Wẽnnaam bɛɛbã bʋʋdo.

A Koore kambã yɩɩl a ye yeela woto: “Zusoaba [a Zeova] samand datem tara maam hal tɩ mam pãng rat n sɛ.” (Yɩɩl Sõamyã 84:3) Yɩɩl Sõamyã 85 soabã yaa kosg b sẽn kot Wẽnnaam t’a ning neb nins sẽn yi-b yembdã n wa wã barka. Yɩɩn-kãng wilgda vẽeneg tɩ bark nins Wẽnnaam sẽn ningd tõnd tẽebã wɛɛngẽ wã tara yõod n yɩɩd bark a taabã fãa. Yɩɩl Sõamyã 86 soabã pʋgẽ, a Davɩɩd kosa Wẽnnaam t’a kogl-a la a wilg-a sore. Yɩɩl b sẽn yɩɩnd Siõ la neb nins sẽn dog-b be wã yĩng n be Yɩɩl Sõamyã 87 soabã pʋgẽ. Yɩɩl ning sẽn pʋgda wã pʋgẽ, b pʋʋsda a Zeova. Yɩɩl Sõamyã 89 soabã pʋgẽ, b wilgda vẽeneg tɩ kaool ning a  Zeova sẽn maan ne a Davɩɩdã yaa kaset t’a Zeova yaa nonglem soaba. Yaa a Etã n gʋls yɩɩn-kãnga. Tõe t’a ra yaa a Salomo wakatẽ yam dãmb a naasã ned a yembre.—1 Rĩm dãmba 5:11.

Sogsg sẽn tik verse rãmb zut n paam leokre:

73:9—B sẽn yet tɩ nin-wẽnsã “zẽkda b noor hal tɩ ta saasẽ; la bãmb zɛlma gõoda dũniyã pʋgẽ” wã võor yaa bõe? Nin-wẽnsã sẽn pa nand Wẽnnaam la b pa nand ned baa a ye tẽnga zugã yĩnga, b tʋʋsda Wẽnnaam n pa yaeesdẽ ye. Ne b zɩlmã, nin-wẽnsã le kãnegda ninsaalbã ne taaba.

74:13, 14—Yɩɩ wakat bʋg la a Zeova wã ‘bõn-vɩ-bɛda sẽn be koom pʋsẽ wã zutu’ la a ‘wã piryãong zugu’? B boonda Ezipt rĩm a Faraõ tɩ bõn-vɩ-bedr sẽn tẽeg a meng n gãe Nil kʋɩlgã pʋgẽ. (Ezekɩɛll 29:3) Tõe tɩ piryãongã makda a Faraõ nin-kãsemsã. (Yɩɩl Sõamyã 74:14) B zutã wãab tog n makda a Zeova sẽn sãam a Faraõ ne a sodaasã a sẽn da wa n na n yiis Israɛll nebã Ezipt yembdã wakatã.

75:5, 6, 11—Bõe yĩng tɩ d segd n lak-d mens ne wuk-m-mengã? A Zeova zẽkda a sõgen dãmb hakɩkã. La a ‘sãamda nin-wẽnsã pãng fãa.’ B keoogd-d lame tɩ d ra wuk d mens bɩ n zẽk d mens ye. Sẽn yaa a Zeova n zẽkd nedã yĩngã, d segd n bãngame tɩ taoor-sobend fãa b sẽn bobend-d tigingã pʋgẽ yita yẽ nengẽ.—Yɩɩl Sõamyã 75:8.

76:11—Wãn to la ninsaalbã tõe n pẽg a Zeova “bãmb mens sũ-kãbr pʋgẽ”? Wẽnnaam sã n bas tɩ nebã yikd b sũur ne tõnd d sẽn yaa a sõgen dãmbã yĩnga, baasgã tõe n yɩ sõma. Toog ning fãa sẽn paam tõnd tõe n kibl-d lame. Yaa sẽn na yɩl n kibl-d tɩ d yɩ sõma yĩng la a Zeova sẽn mi n bas tɩ d namsdẽ wã. (1 Pɩɛɛr 5:10) Wakat n wat tɩ Wẽnnaam na n bob nin-wẽnsã sũ-kãbre. La d sã n nams hal n tɩ ki? Rẽ me tõe n pẽga a Zeova, bala neb nins sẽn yã tõnd sẽn tõog toogã n kell n kɩs Wẽnnaam sɩdã me tõe n sɩnga a pẽgre.

78:24, 25—Bõe yĩng tɩ b ra boond mannã tɩ “ki sẽn yi yĩngri,” la “pãens rãmb dɩɩbo”? Ka wã pãens rãmbã yaa malɛgsã sẽn be saasẽ wã. La woto ra pa rat yell tɩ mannã ra yaa malɛgs rɩɩb ye. Yaa “ki sẽn yi yĩngri,” bala a yita saasẽ n dʋʋgdẽ. (Yɩɩl Sõamyã 105:40) Malɛgsã b sẽn boond tɩ ‘pãens rãmbã’ sẽn be saasẽ wã yĩngã, b sẽn yet tɩ ‘pãens rãmb dɩɩbã’ võor rat n yeelame tɩ yaa Wẽnnaam sẽn be saasẽ wã n da kõt rɩ-kãnga. (Yɩɩl Sõamyã 11:4) Tõe me t’a Zeova ra kɩtdame tɩ malɛgsã kõt Israɛll nebã mannã.

82:1, 6—Yaa ãnd dãmb la b sẽn da boond tɩ “wẽnnaam dãmba” la “Sẽn-ka-to kambã?” Yaa Israɛll bʋ-kaoodbã la b sẽn da boond tɩ “wẽnnaam dãmba” la “Sẽn-ka-to kambã. La rẽ ra zemsame, bala b ra yaa Wẽnnaam koe-taasdba n gomd Wẽnnaam yʋʋrã yĩngã.—Zã 10:33-36.

83:3—Ka wã ‘zugã zẽkr’ võor yaa bõe? Zugã zẽkr wilgdame t’a soabã yikame n dat n dɩ naam bɩ n tʋm tʋʋmde. Naoor wʋsgo nong n yaa sẽn na yɩl n wilg t’a pa sake, n sɩng zabre, bɩ n weoog neba.

Zãmsg tõnd yĩngã:

73:2-5, 18-20, 25, 28. D pa segd n maand sũ-kiir ne nin-wẽnsã b arzɛgsã yĩnga, la d tũud b manesma sẽn pa tat Wẽnnaam yamã ye. Nin-wẽnsã be zĩ-saals pʋsẽ. Vẽenega, bãmb na n ‘lʋɩya sãoong pʋgẽ.’ Sẽn  paase, wẽngã sẽn pa tõe n sa ninsaalb sẽn pa zems zãng goosneema rãmb pʋsẽ wã yĩngã, d sẽn maand modgr to-to fãa n dat tɩ wẽngã sa, yaa zaalem. Wala a Azafe, d sã n “kolg Wẽnnaam” la d wilg tɩ d sũur nooma zood ning d sẽn tar ne-a wã yĩnga, d na n tõog n yalsa kãn-kãe n da lʋɩ wẽnema pʋgẽ ye.

73:3, 6, 8, 27. D segd n gũusa d mens ne wuk-m-menga, tɩtaam, neb laado la b wẽgbo. Baa nebã sã n tagsdẽ tɩ woto maneg tõe n naf-b lame, d segd n laka d mens ne manesem kãensã.

73:15-17. Tõnd tagsã sã n pa vẽeneg d yamẽ wã, d segd n gũusa d mens n da wa yiis tags-kãens zãma sʋk ye. Tags-kãensã buud togsg komsda neb a taabã raood bala. D segd n maaga d mens n bʋgs d yɛlã zutu, la d kɩt tɩ d tẽed-n-taasã sõng-d tɩ d welg-ba.—Yelbũna 18:1.

73:21-24. D sã n lebg ‘sũ-to-neb’ nin-wẽnsã sẽn wõnd wa b yaa sõma wã yĩnga, d manesma wõnda wa rũng sẽn pa tar yama manesem. Yaa f sẽn na n pa tags tɩ bɩ la f maand woto. D pa segd n maan woto ye, d segd n sak n deega a Zeova saglsã, n tall bas-yard t’a na n ‘gãda d nug rɩtg’ la a teel-do. Sẽn paase, a Zeova ‘na n deeg-d-la ne ziiri’ sẽn dat n yell tɩ d na n paama zood sõma ne-a.

77:7. D sã n baood ne d sũur fãa n na n bãng bũmb nins sẽn be Wẽnnaam Gomdã pʋgẽ wã la nand-ba, d segd n dɩka sẽk n zãms-b la d bʋgs b zugu. Sɩd tara yõod wʋsg tɩ d yãk wakat takɩ n bao zĩig n zĩnd d yembr rẽ yĩngã!

79:9. A Zeova kelgda d pʋʋsgo, sẽn yɩɩd fãa d sã n pʋʋsd n kotẽ t’a yʋʋrã paam waoogre.

81:14, 17. A Zeova koɛɛgã kelgr la a sorã tũub wata ne bark wʋsgo.—Yelbũna 10:22.

82:2, 5. Tɩrlma kaalem yĩnga “dũniyã yẽbgr fãa rigimdame.” Tʋʋm kɛgã kɩtame tɩ ninsaalb sẽn beẽ fãa, bãan kae ye.

84: 2-5, 11-13. Yɩɩl-gʋlsdbã sẽn da nong a Zeova balengã zĩigã, tɩ b sũyã ra noom ne tʋʋm nins b sẽn da bobl-bã yaa mak sõng n kõ-do.

86:5. Ad d sɩd tara mi-beoog ne a Zeova, a sẽn sakd n ‘kõt sugrã’ yĩnga. A baooda bõn-sõng yel-wẽn-maandb nins sẽn tekd yam n kot sugrã nengẽ, n tik rẽ zug n maan-b nimbãan-zoeere.

87:5, 6. Rẽ yĩnga neb nins sẽn na n vɩɩmd tẽngã zug arzãna pʋgẽ wã na n wa bãnga neb nins sẽn na n vʋʋg-b n tɩ vɩɩmd saasẽ wã yʋy bɩ? Verse kãensã wilgdame tɩ wõnda wa b na n bãngame.

88:14, 15. D sã n tar yelle, n pʋʋs a Zeova t’a pa leokd tao-tao, tõe n dat n yeelame t’a Zeova ratame tɩ d wilg tɩ d wẽn-zoeerã yaa hakɩka.

“PƲƲS-Y BÃMB BARK LA Y WAOOG BÃMB YƲƲRE”

(Yɩɩl Sõamyã 90:1–106:48)

D ges bʋʋm wʋsg sẽn be Yɩɩl Sõamyã babg a naas-n-soabã pʋgẽ sẽn kɩt tɩ d segd n pẽga a Zeova. Yɩɩl Sõamyã 90 soabã pʋgẽ, a Moiiz wilgdame tɩ ninsaal vɩɩmã sẽn loogd tao-tao wã pa tõe n mak ne Wẽnnaam vɩɩmã, bala a yaa Rĩm wakat sẽn ka sate. (1 Tɩmote 1:17) Yɩɩl Sõamyã 91:2 pʋgẽ, a Moiiz gomda a Zeova yell n yet t’a yaa a ‘zĩ-lilldga la a pãng zĩiga,’ sẽn dat n yell t’a bãana yita Wẽnnaam nengẽ. Yɩɩl nins sẽn pʋgd yɩɩn-kãnga wã gomda Wẽnnaam zʋgã sẽn yaa sõma wã yelle, a yama sẽn ka to wã la a tʋʋma sẽn be rasãndã me yelle. Yɩɩl a tãab n sɩngd ne “A Zeova lebga Rĩma.” (Yɩɩl Sõamyã 93:1, NW; 97:1, NW; 99:1, NW) Yɩɩl-gʋlsdã gomda a Zeova yell n yet t’a yaa tõnd Naanda, la a yet tõnd tɩ d ‘pʋʋs a Zeova bark la d waoog a yʋʋrã.’—Yɩɩl Sõamyã 100:4.

Wãn to la naab sẽn zoet a Zeova kaood bʋʋdo? Yɩɩl Sõamyã 101 sẽn yaa rĩm a Davɩɩd n gʋlsã, kõta sok-kãngã leoore. Yɩɩl ning sẽn pʋgda wã wilgda tõnd t’a Zeova na n deega ‘namsdbã kosgo, t’a pa na n paoog b kosgã ye.’ (Yɩɩl Sõamyã 102:18) Yɩɩl Sõamyã 103 soabã wilgdame t’a Zeova yaa nonglem soab la nimbãan-zoeta. Yɩɩl-gʋlsdã gomda bũmb wʋsg Wẽnnaam sẽn naan tɩ be tẽngã zug yelle,  n yet woto: “Zusoaba [Zeova], yãmb tʋʋma yaa wʋsgo. Yãmb maana bãmb fãa ne yam.” (Yɩɩl Sõamyã 104: 24) Yɩɩl Sõamyã babg a naas-n-soabã baasg yɩɩl a yiibã pẽgda a Zeova a tʋʋma sẽn tar yamleoogã yĩngã.—Yɩɩl Sõamyã 105:2, 5-6; 106:7, 22.

Sogsg sẽn tik verse rãmb zut n paam leokre:

91:1, 2—“Sẽn-ka-to zĩ-soalgdga” yaa bõe, la wãn to la d tõe n ‘zĩnd’ be? Zĩ-kãng makda bãan zĩiga. Yaa zĩig d sẽn tõe n solg tɩ bũmb ra tõog n sãam d tẽebã ye. A yaa zĩ-soalgdga, bala neb nins sẽn pa teeg Wẽndã pa mi zĩ-kãng ye. Yaa d sẽn na n get a Zeova wa d zĩ-lilldg la d pãng zĩiga, n pẽgd-a t’a yaa ãndũniyã fãa Naaba, n moond a Rĩungã koe-noogo, la d tõe n zĩnd a Zeova zĩ-soalgdgã pʋgẽ. D sẽn mi tɩ wakat fãa a Zeova bee yambẽ n na n sõng-dã yĩnga, d pa yɛɛsd tɩ bũmb na n wa sãam d tẽebã ye.—Yɩɩl Sõamyã 90:1.

92:13—B sẽn yet tɩ “nin-tɩrs yita wa koanga” võor yaa bõe? Koang womda biis wʋsgo. Nin-tɩrg yaa wa koanga, bala a Zeova nifẽ a yaa tɩrga, la a womda “bi-sõama” wakat fãa. A tʋʋm sõma wã naaga bi-sõma kãens pʋsẽ.—Matɩe 7:17-20.

Zãmsg tõnd yĩnga:

90:7, 8, 13, 14. Sẽn yaa wakat ning fãa la d maan yel-wẽnde, sãamda d zoodã d sẽn tar ne sɩd Wẽnnaamã. La a nee yel-wẽnd fãa sẽn solge. La d sã n sɩd tek yam n kos sugr la d bas yel-wẽnã maanego, a Zeova na n le kɩtame tɩ d paam a lohorma, rat n yeel d na n ‘tɩga sũ-noogo, a nonglma yĩnga.’

90:10, 12. D vɩɩmã sẽn pa kaoosdã yĩnga, d segd n ‘sõda d rasma neere.’ Wãn to? Yaa d sẽn na n kɩt tɩ d “sũyã zãms yam” rat n yeel tɩ d tall yam sẽn na yɩl tɩ d rasmã sẽn ketã pʋgẽ, d sẽn na n maan bũmb ning fãa ta a Zeova yam la d ra wa sãam d vɩɩma sẽn ketã ye. Woto maaneg baoodame tɩ d yãk bũmb nins d sẽn dat n maan tẽebã tʋʋm pʋgẽ wã takɩ, la d rɩkd d sẽkã n tʋʋm ne yam.—Efɛɛz rãmba 5:15, 16; Filip rãmba 1:10.

90:17. Zemsame tɩ d pʋʋs a Zeova n kos-a t’a kɩt tɩ “d nus tʋʋma yalse” la a ning d koe-noogã mooneg barka.

92:15, 16. Neb nins sẽn kʋʋlã sã n modgd ne Wẽnnaam Gomdã zãmsg la b baood a Zeova nin-buiidã tũud-n-taar wakat fãa, na n kɩtame tɩ b ket n yaa “maasa la sõama” sẽn dat n yeel tɩ b na n talla pãng wʋsg tẽebã pʋge, la b tall yõod wʋsg me tigingã pʋgẽ.

94:19. Baa sẽn yaa sabab ning fãa n kɩt tɩ tõnd tagsa wã namsd-do, d sã n karemd ‘belsg’ nins sẽn be Biiblã pʋgẽ wã la d bʋgsd-b zutu, d na n paama sũ-noogo.

95:7, 8. D sã n kelgd sagls nins sẽn yit Biiblã pʋgẽ wã, la d sak n tũud-b ne yamleoogo, na n sõng-d lame tɩ d ra yɩ sũ-kɛgems rãmb ye.—Hebre dãmba 3:7, 8.

106:36, 37. Verse kãensã wilgdame tɩ bõn-naands pʋʋsg yaa wa maand b sẽn kʋʋd zĩn dãmba yĩnga. Tɩ rẽ rat n yeel tɩ ned sã n pʋʋsd bõn-naandse, tõe n wa kɩtame tɩ zĩn dãmb soog-a. Biiblã keoogda tõnd woto: “Gũus-y y mense n da pʋʋs bõn-naands ye.”—1 Zã 5:21.

‘Pẽg-y-yã a Zeova’

Yɩɩl Sõamyã babg a naas-n-soab baasg yɩɩl a yiibã, rat n yeel tɩ Yɩɩl Sõamyã 105 ne 106 baasda ne sagl kãnga: ‘Pẽg-y-yã a Zeova.’ Tɩ Yɩɩl Sõamyã 106 soabã sɩngd ne gom-kãensa me. (Yɩɩl Sõamyã 105:45; 106:1, 48) Sɩda, Yɩɩl Sõamyã 90 soabã n tɩ tãag 106 soabã pʋgẽ, yaa naoor wʋsg la b yet woto: ‘Pẽg-y-yã a Zeova.’

Vẽenega, d tara bʋʋm wʋsg n na n pẽg a Zeova. Yɩɩl Sõamyã 73 soabã n tɩ tãag 106 soabã gomda bũmb wʋsg yelle, tɩ d toẽ n tags b zutu, n tall mi-beoog wʋsg ne d saasẽ Ba wã. D sã n tags n ges a Zeova sẽn zoe n maan bũmb nins fãa n kõ-dã, la a sẽn na n maan beoog daar n kõ-dã, na n kɩtame tɩ d pẽgd-a ne d sũur fãa.

[Foto, seb-neng a 8]

Wala a Azafe, d sã n “kolg Wẽnnaam” d tõe n yalsa kãn-kãe n da lʋɩ wẽngã pʋgẽ ye

[Foto, seb-neng a 9]

B sãama a Faraõ Mog-miuugã pʋgẽ

[Foto, seb-neng a 9]

Yãmb mii b sẽn da boond mannã tɩ ‘pãens rãmb rɩɩbã’ võor bɩ?

[Foto, seb-neng 11]

Yaa bõe n tõe n sõng-y tɩ y tags-wẽnsã sa?