E Palabra di Jehova Ta Bibo

Puntonan Sobresaliente di Buki Tres y Cuater di Salmonan

DEN un oracion na Dios, e salmista a puntra: “Bo misericordia ta wordo declara den graf, bo fieldad den e luga di destruccion?” (Salmo 88:11) Ta mas cu claro cu e contesta ta no. Sin bida, nos no por alaba Jehova. Alaba Jehova ta un bon motibo pa nos keda na bida, y e echo cu nos tin bida ta un bon motibo pa alab’e.

Buki Tres y Cuater di Salmonan, cu ta consisti di Salmo 73 te cu 106, ta duna nos masha hopi motibo pa alaba e Creador y bendiciona su nomber. Ora nos reflexiona riba e salmonan aki, nan mester aumenta nos aprecio pa “e palabra di Dios” y motiva nos pa amplia y mehora nos expresionnan di alabansa na Dios. (Hebreonan 4:12) Cu gran interes, laga nos considera na prome luga Buki Tres di Salmonan.

“TA BON PA MI KEDA CERCA DI DIOS”

(Salmo 73:1–89:52)

E prome 11 salmonan di e di tres coleccion ta composicionnan di Asaf of di miembronan di e cas di Asaf. E cantica di apertura ta splica loke a scapa Asaf di ser desvia dor di pensamentonan robes. El a saca e conclusion corecto. El a canta: “Pa loke t’ami, ta bon pa mi keda cerca di Dios.” (Salmo 73:28) Salmo 74 ta sigui cu un lamento tocante e destruccion di Jerusalem. Salmo 75, 76 y 77 ta describi Jehova como e Hues husto, e Salbador di e humildenan y Scuchador di oracion. Salmo 78 ta repasa Israel su historia for di tempo di Moises te cu tempo di David. Salmo 79 ta lamenta destruccion di e tempel. E salmo despues di dje ta un oracion cu ta pidi pa Dios su pueblo ser restaura. Salmo 81 ta un apelacion pa obedece Jehova. Salmo 82 y 83 ta oracionnan cu ta pidi Dios ehecuta huicio riba respectivamente huesnan corupto y Dios su enemigonan.

‘Mi alma ta anhela, si, ta antoha pa e pationan di Jehova’, ta loke un melodia di e yiu hombernan di Core ta declara. (Salmo 84:2) Salmo 85 ta un peticion pa Dios bendiciona e exiliadonan cu a regresa. E salmo aki ta enfatisa cu bendicionnan spiritual ta hopi mas valioso cu bendicionnan fisico. Den Salmo 86, David ta pidi Dios preserv’e y siñ’e. Den Salmo 87, un melodia tocante Sion y esnan cu a nace einan ta ser sigui pa un oracion na Jehova den Salmo 88. Salmo 89 ta enfatisa Jehova su bondad amoroso manera esei a keda expresa den e aliansa cu David. E salmo ei a ser componi pa Etan cu kisas tabata un di e cuater hombernan sabi den tempo di Salomon.—1 Reinan 4:31.

Contesta Riba Pregunta Biblico:

73:9—Den ki sentido e malbadonan “a habri nan boca contra e shelonan; y nan  lenga ta keiro tur rond di mundo”? Siendo cu e malbadonan no tin respet pa ni un persona ni den shelo ni riba tera, nan ta cla pa blasfema Dios cu nan boca. Tambe nan ta calumnia hende cu nan lenga.

74:13, 14—Ki tempo Jehova a ‘kibra cabes di e dragonnan [of, “monsternan”, NW] den e awanan y plecha e cabesnan di Leviatan’? Bijbel ta yama “Farao, rei di Egipto, e monster grandi cu ta drumi meimei di su riunan.” (Ezekiel 29:3) Leviatan kisas ta representa e hombernan fuerte di Farao. Plechamento di nan cabes probablemente ta referi na e derota aplastante di Farao y su ehersito ora cu Jehova a libra e Israelitanan for di sclabitud Egipcio.

75:4, 5, 10—Kico e expresion “cacho” kiermen? E cachonan di un bestia ta un arma poderoso. Pues, e expresion “cacho” figurativamente ta indica poder of fortalesa. Jehova ta hisa e cachonan di su pueblo, y asina ta laga nan ser halsa, mientras cu e ta ‘corta kit’afo e cachonan di e malbadonan.’ Nos ta haya e spiertamento pa no ‘halsa nos cacho te na shelo’ den e sentido cu nos no mester tuma un actitud orguyoso of arogante. Siendo cu ta Jehova ta esun cu ta halsa hende, nos mester mira asignacionnan di responsabilidad den e congregacion como algo cu a bin di Jehova.—Salmo 75:7.

76:10—Con “e furia di hende” por alaba Jehova? Ora cu Dios permiti hende expresa nan furia contra nos pasobra nos ta su sirbidornan, esei por hiba na un resultado positivo. Cualkier situacion dificil cu kisas nos ta pasa den por entrena nos den un manera of otro. Jehova ta permiti sufrimento solamente te na e grado cu esei ta duna nos tal entrenamento. (1 Pedro 5:10, NW) ‘Cu e restante di furia di hende, Dios lo faha su mes.’ Kico si nos sufri te na e punto di muri? Esaki tambe por alaba Jehova pasobra e hendenan cu mira nos persevera fielmente, tambe lo por cuminsa glorifica Dios.

78:24, 25—Dicon mana ta ser yama “cuminda for di shelo” y “pan di angel”? Ningun di e dos expresionnan aki ta nifica cu mana tabata cuminda di angel. E tabata “cuminda for di shelo” den e sentido cu su fuente tabata celestial. (Salmo 105:40) Ya cu e angelnan ta biba den shelo, e frase “pan di angel” simplemente por nifica cu ta Dios, cu ta biba den shelo, a percur’e. (Salmo 11:4) Kisas tambe Jehova a uza angel pa percura e mana pa e Israelitanan.

82:1, 6—Ken ta ser yama “diosnan” y “yiunan di e Haltisimo”? Ambos expresion ta referi na huesnan humano den Israel. Esaki ta na su luga, ya cu nan ta sirbi como Dios su vocero y representante.—Juan 10:33-36.

83:2, NW—Kico ‘lanta bo cabes’ ta indica? E gesto ta nifica cu bo ta cla pa eherce poder of tuma accion, por lo general pa opone, bringa of oprimi.

Les pa Nos:

73:2-5, 18-20, 25, 28. Nos no mester envidia e prosperidad di e malbadonan ni adopta nan manera corupto di actua. E malbadonan ta den luganan cu ta slip. Sigur nan lo cai “den destruccion.” Ademas, ya cu maldad no por ser elimina bou di gobernacion humano imperfecto, lo ta en vano pa purba caba  cu ne. Mescos cu Asaf, lo ta sabi di nos parti pa siña trata cu maldad dor di “keda cerca di Dios” y dor di tin un relacion intimo cu ne.

73:3, 6, 8, 27. Nos tin cu tene cuidou pa nos no tin e actitud di broma, di ta orguyoso, di haci bofon y di oprimi otro hende. Esaki mester ta e caso asta ora cu por parce bentahoso pa adopta e caracteristicanan ei.

73:15-17. Ora cu nos ta tur confundi, nos mester frena nos mes di expresa publicamente e pensamentonan cu ta tolondra nos. Si nos mester conta cosnan asina esei solamente lo descurasha otro hende. Nos tin cu medita trankilamente riba e cosnan cu ta precupa nos y resolve nan den asociacion cu rumannan den fe.—Proverbionan 18:1.

73:21-24. Bira un persona cu ‘curason yen di amargura’ pasobra e malbadonan aparentemente ta prospera ta ser compara cu reacciona manera un bestia cu no por rasona. Esaki ta un reaccion impulsivo, basa strictamente riba emocion. Na luga di esei, nos mester laga Jehova su conseho guia nos, cu e pleno confiansa cu lo e ‘cohe nos man drechi tene’ y sostene nos. Ademas, Jehova lo ‘ricibi nos den gloria’, es decir, den un relacion intimo cu ne.

77:6. Nos tin mester di tempo pa studia y medita pa nos por demostra interes sincero den berdadnan spiritual y pa investiga nan cuidadosamente. Ta masha importante anto pa nos traha tempo den nos bida pa de bes en cuando nos por ta so.

79:9. Jehova ta scucha nos oracionnan, specialmente ora cu nan tin di aber cu santificacion di su nomber.

81:13, 16. Scucha Jehova su bos y cana den su camindanan ta hiba na hopi bendicion.—Proverbionan 10:22.

82:2, 5. Inhusticianan ta pone “e fundeshinan di tera” sacudi. Actonan inhusto ta perturba e stabilidad di sociedad humano.

84:1-4, 10-12. E aprecio cu e salmistanan tabatin pa Jehova su luga di adoracion y nan sintimento di ta satisfecho y contento cu nan privilegionan di sirbishi ta un bon ehempel pa nos.

86:5. Esta gradicido nos por ta cu Jehova ta “cla pa pordona”! E ta busca pa haya cualkier evidencia cu lo dun’e un base pa mustra misericordia na un malechor cu arepenti.

87:5, 6. E hendenan cu haya bida den e Paradijs riba tera lo yega di sa nomber di e personanan cu a ser resusita pa bida celestial? E versiculonan aki ta indica cu muy probablemente cu si.

88:13, 14. Si nos tarda pa haya contesta pa nos oracionnan relaciona cu un cierto problema, esei probablemente ta nifica cu Jehova kier pa nos demostra e sinceridad di nos devocion na dje.

“DUN’E GRADICIMENTO, BENDICIONA SU NOMBER”

(Salmo 90:1–106:48)

Considera e varios motibonan pa alaba Jehova cu ta ser menciona den e di cuater coleccion di salmonan. Den Salmo 90, Moises ta indica e contraste entre hende su bida pasahero y e existencia di “e Rei eterno.” (1 Timoteo 1:17) Segun Salmo 91:2, Moises ta referi na Jehova como ‘su refugio y su baluarte’, esta, su Fuente di siguridad. E salmonan despues di esei ta papia di Dios su cualidadnan bunita, pensamentonan superior y obranan maraviyoso. Tin tres salmo cu ta cuminsa cu e expresion ‘Jehova ta reina.’ (Salmo 93:1; 97:1; 99:1) Papiando di Jehova como Esun cu a traha nos, e salmista ta invita nos pa “dun’e gradicimento, bendiciona su nomber.”—Salmo 100:4.

Con un gobernante cu ta teme Jehova mester maneha su asuntonan? Salmo 101, componi pa Rei David, ta duna e contesta. E salmo cu ta siguie ta conta nos cu Jehova “a considera e oracion di esnan desampara y no a desprecia nan oracion.” (Salmo 102:17) Salmo 103 ta hala atencion na Jehova su compasion  y misericordia. Referiendo na e tantisimo produccionnan di Dios riba tera, e salmista a declara: “O SEÑOR, ki numeroso bo obranan ta! Cu sabiduria bo a traha tur.” (Salmo 104:24) E ultimo dos canticanan di Buki Cuater di Salmonan ta alaba Jehova pa su echonan maraviyoso.—Salmo 105:2, 5; 106:7, 22.

Contesta Riba Pregunta Biblico:

91:1, 2—Con nos por “biba” bou di e proteccion di e Haltisimo? Esaki ta un estado den cua nos ta ser proteha contra daño spiritual. Hende cu no ta confia den Dios no ta haya tal proteccion. Nos ta biba cerca Jehova dor di acudi na dje como nos refugio y baluarte, dor di alab’e como e Gobernante Soberano di universo, y dor di predica e bon noticia di e Reino. Nos ta sinti nos spiritualmente proteha pasobra nos sa cu Jehova semper ta cla pa yuda nos.—Salmo 90:1.

92:12—Den ki manera hende husto ta “florece manera palma”? Palma ta conoci pa su productividad. Un persona husto ta manera un palma den e sentido cu e ta recto den bista di Jehova y ta sigui duna “bon fruta”, locual ta inclui bon obra.—Mateo 7:17-20.

Les pa Nos:

90:7, 8, 13, 14. Nos malechonan semper ta daña nos relacion cu e Dios berdadero. Anto nos no por sconde picanan secreto p’e. Sinembargo, si di berdad nos a arepenti y bandona nos mal caminda, Jehova lo restaura nos na su fabor y ‘satisface nos cu su misericordia.’

90:10, 12. Ya cu bida ta cortico, nos tin cu “conta nos dianan.” Con? Dor di ‘presenta un curason yen di sabiduria’, es decir, eherce sabiduria di tal manera cu e dianan cu a resta nos no ta ser malgasta, sino uza den un manera cu ta agrada Jehova. Pa por haci esaki nos mester fiha prioridadnan spiritual y uza nos tempo na un manera sabi.—Efesionan 5:15, 16; Filipensenan 1:10, NW.

90:17. Ta na su luga pa nos pidi den oracion pa Jehova “confirma”, of establece firmemente “e obra di nos mannan” y bendiciona nos esfuerso den e ministerio.

92:14, 15. Rumannan di edad ta keda “yen di vigor y berde-berde”, es decir, yen di vigor spiritual, ora nan ta studiantenan diligente di e Palabra di Dios y ora nan ta asocia cu regularidad cu e pueblo di Jehova. Asina nan ta demostra di ta miembronan masha valioso pa e congregacion.

94:19. Sin importa kico ta e causa di nos “precupacionnan”, nos lo ser consola dor di lesa e “consuelonan” cu tin den Bijbel y medita riba nan.

95:7, 8. Nos ta evita cu nos curason ta bira duro ora nos ta scucha conseho biblico, presta atencion na dje y ta cla pa obedec’e.—Hebreonan 3:7, 8.

106:36, 37. E versiculonan aki ta conecta adoracion di idolo cu sacrificio na demoño. Esaki ta indica cu un persona cu ta uza idolo of imagen por bin bou di influencia di demoño. Bijbel ta urgi nos: “Warda boso di idolonan.”—1 Juan 5:21.

“Alaba Jah!”

E ultimo tres canticanan di Buki Cuater di Salmonan ta termina cu e instruccion: “Alaba Jah!” [NW] E ultimo salmo tambe ta habri cu ne. (Salmo 104:35; 105:45; 106:1, 48) De echo, e expresion “Alaba Jah!” ta aparece cu frecuencia den Buki Cuater di Salmonan.

Definitivamente nos tin motibo pa alaba Jehova. Salmo 73 te cu 106 a duna nos hopi cos pa medita ariba, yenando nos curason cu gratitud pa nos Tata celestial. Ora nos pensa riba tur loke el a haci caba pa nos y lo bai haci pa nos den futuro, nos no ta sinti nos conmovi pa “alaba Jah” cu tur nos forsa?

[Plachi na pagina 10]

Mescos cu Asaf, nos por supera maldad dor di “keda cerca di Dios”

[Plachi na pagina 11]

Farao a sufri derota na Lama Cora

[Plachi na pagina 11]

Bo sa dicon Bijbel ta yama mana “pan di angel”?

[Plachi na pagina 13]

Kico ta yuda kita nos “precupacionnan”?