O Loo Ola le Afioga a Ieova

Manatu Tāua Mai le Vaega Lona Tolu ma le Fā o le Tusi a Salamo

I SE tatalo i le Atua, na fesili ai le faisalamo e faapea: “E taʻua ea lou alofa i le tuugamau? pe taʻua lou faamaoni i le mea e malaia ai?” (Salamo 88:11) O le tali moni i ai o le leai. Pe a aunoa ma le ola, e lē mafai ona tatou vivii atu iā Ieova. O le vivii iā Ieova o se māfuaaga lelei lea e ola ai, ma o le faaauau pea ona ola, o se māfuaaga lelei lea e vivii ai iā te ia.

O le tusi Lona Tolu ma le lona Fā o Salamo, o loo aofia ai le Salamo e 73 seʻia oo i le 106, ma o loo aumaia ai iā i tatou ni māfuaaga tatau mo le viiaina o Lē na Foafoaina Mea ma faamanū i lona suafa. O le mafaufau loloto i nei salamo, e ao ona faalolotoina ai lo tatou loto talisapaia mo “afioga a le Atua” ma uunaʻia ai i tatou e faatele atu ma faaleleia a tatou faaupuga e viiviia ai o ia. (Eperu 4:12) O lea la, seʻi o tatou muamua ona suʻeina ma le naunau le Tusi Lona Tolu o Salamo.

O LE “FAALATALATA ATU I LE ATUA OU TE LELEI AI”

(Salamo 73:1–89:52)

O uluaʻi salamo e 11 o le vaega lona tolu, o tusi ia a Asafo po o tagata o lona aiga. O le pese muamua o loo faamatalaina ai le mea na faasaoina ai Asafo mai le taʻitaʻiina sesē e mafaufauga lē saʻo. Na oo ina faasaʻoina lona mafaufau. Na ia pese e faapea: “A o aʻu nei, ou te faalatalata atu i le Atua ou te lelei ai.” (Salamo 73:28) O loo sosoo ai ma auēga i le faaumatiaina o Ierusalema i le Salamo 74. O loo faaata i le Salamo 75, 76, ma le 77 Ieova o le Faamasino tonu, o le Faaola o ē puapuagatia, ma o le Faafofoga tatalo. O loo toe autaluina i le Salamo 78, Isaraelu i aso ua tuanaʻi i le taimi o Mose seʻia oo i le taimi o Tavita. O loo aumaia i le Salamo 79 auēga i le faaumatiaina o le malumalu. O le salamo e sosoo ai, o le tatalo mo le toe faafoʻisia o tagata o le Atua. O le Salamo e 81 o se faalaeiauga ia usiusitai iā Ieova. O le Salamo 82 ma le 83 o tatalo mo le faaooina atu o iʻuga faafaamasinoga a le Atua i faamasino amioleaga aemaise lava i fili o le Atua.

Na taʻua e pese a le fanau a Kora e faapea: “O loo naunau loʻu agaga, ma ua lailoa i le fia alu atu i lotoā o Ieova.” (Salamo 84:2) O le Salamo 85 o se talosaga mo le faamanuiaga a le Atua iā i latou na toe faafoʻisia mai le tafeaga. O loo faamamafa i le salamo lenei le sili atu ona tāua faamanuiaga faaleagaga i lo le faaletino. I le Salamo e 86, na ōle ai Tavita i le Atua ina ia leoleo ma faatonu o ia. O le Salamo 87, o se pese e faatatau iā Siona ma i latou na fananau i inā, lea e sosoo ai ma se tatalo iā Ieova i le Salamo 88. O loo faailoa le alofa agalelei o Ieova i le feagaiga ma Tavita lea e faamamafa i le Salamo 89, lea na tusia e Etano, atonu o se tasi o tagata popoto e toʻafā i aso o Solomona.—1 Tupu 4:31.

Taliina o Fesili Faale-Tusi Paia:

73:9—O le ā le auala ua faapea ai ua “upu vale o latou gutu i le lagi; ua feoaʻi foʻi o latou laulaufaiva i le lalolagi”? Ona e lē  manatu le tagata amioleaga mo se tasi i le lagi po o le lalolagi, e latou te lē faatalatū foʻi la e fāifai i le Atua i o latou gutu. E latou te taufaaleaga foʻi i tagata i o latou laulaufaiva.

74:13, 14—O anafea na ‘tuʻimomomoina ai ulu o tānimo o le sami, ma nutininii ai ulu o leviatana’? O loo taʻua ‘Farao le tupu o Aikupito, o le tānimo tele, o lē taoto i totonu o ona vaitafe.’ (Esekielu 29:3) Atonu o leviatana o loo faaata mai ai tagata malolosi a Farao. (Salamo 74:14) O le nutininiia o latou ulu e foliga mai o loo faatatau atu i le toilalopopo o Farao ma ana ʻau, ina ua laveaʻiina e Ieova tagata Isaraelu mai le nofo pologa i Aikupito.

75:4, 5, 10—O le ā o uiga i ai le faaupuga “nifo [seu]”? O nifo po o seu o se manu, o se auupega e malosi tele. O lea la, o le faaupuga “nifo” o loo faaalia ai faafaatusa le mana po o le malosi. E siitia e Ieova le nifo o ona tagata, e ala i le faamaualugaina, a o ia ‘vavaeeseina nifo o ē amio leaga.’ Ua lapataʻia i tatou i le ‘faamaualugaina o tatou nifo’ lea e lē tatau ai ona iā i tatou uiga mimita po o le faamaualuga. Ona o Ieova lea e na te faamaualugaina, o le tofia la o tiute tauave i totonu o le faapotopotoga, e ao ona vaai i ai e sau mai iā te ia.—Salamo 75:7.

76:10—E faapefea ona avea “le ita tele o tagata” ma mea e viia ai Ieova? Pe a faataga e le Atua tagata e faaali mai lo latou ita tele iā i tatou ona o i tatou o ana auauna, e sosoo ai ma se iʻuga lelei. E so o se faigatā e tatou te oo i ai, e aʻoaʻoina ai i tatou i nisi o auala. E faataga e Ieova puapuaga i le mamao lea e mafai ona aʻoaʻoina ai i tatou. (1 Peteru 5:10) ‘E te taofia foʻi le toe ita o tagata.’ Ae faapefea pe a tatou puapuagatia ma oo atu ai i le oti? E viia ai foʻi Ieova, ona o i latou o loo vāai mai iā i tatou o loo tutumau ma le faamaoni, e ono latou viia ai foʻi le Atua.

78:24, 25—Aiseā ua taʻua ai le manai o le “mea e ʻai mai le lagi” ma “le mea e ʻai a ē malolosi [po o agelu]”? O na faaupuga e lua e lē o uiga faapea o le manai o mea ʻai ia a agelu. Ae o le “mea e ʻai mai le lagi” o lona pogai e mai le lagi. (Salamo 105: 40) Ona o agelu, po o “ē malolosi” e nonofo i le lagi o le faaupuga la o “le mea e ʻai a ē malolosi [po o agelu]” o le uiga moni lava o le Atua na saunia mai, lea o loo afio i le lagi. (Salamo 11:4) Atonu na faaaogā foʻi e Ieova agelu e saunia le manai mo tagata Isaraelu.

82:1, 6—O ai o loo taʻua o “atua” ma ‘fanau a lē Silisili ese’? O faaupuga uma na o loo faasino atu i tagata na avea ma faamasino i Isaraelu. Sa talafeagai lenā tulaga, ona sa latou auauna o ni fofoga fetalai ma avea ma sui o le Atua.—Ioane10:33-36.

83:2—O le ā le uiga o le faaupuga “faamaualuluga [po o le tuu i luga o le ulu o se tasi]”? O le tāga lenei, e faailoa ai le sauni e faatino le pule, po o le fai o se gaoioiga, e masani lava ina ia tetee atu, faasagatau, po o le faatigāina o isi.

Lesona mo i Tatou:

73:2-5, 18-20, 25, 28. E lē tatau ona tatou matauʻa i le tamaoaiga o le tagata amioleaga, ma faataʻitaʻi i o latou ala e lē faale-Atua. O loo iai tagata amioleaga i mea māseesee. E mautinoa lo latou ‘paʻuʻū i mea faatafunaina.’ E lē gata i lea, ona e lē mafai ona aveesea le tagata amioleaga e pulega a tagata lē lelei atoatoa, o lo tatou taumafai la e  aveese le amioleaga, o le a lē manuia. I le pei o Asafo, e lelei pe a fai e tatou te faafetaiaʻia le amioleaga e ala i le “faalatalata atu i le Atua” ma olioli i le iai o se faiā māfana ma Ia.

73:3, 6, 8, 27. E ao ona tatou ʻalofia le fiasili, faamaualuga, faatauemu, ma le faaʻoleʻole. E tusa lava po o le faia o na uiga e foliga mai e mo lo tatou lelei.

73:15-17. Pe a tatou lē mautonu i o tatou mafaufauga, e ao ona tatou taofiofi le fai atu o ni o tatou manatu lē mautonu i le lautele. O le “taʻutaʻu atu faapena” e faalotovaivai ai isi. E ao ona tatou manatunatu loloto ma toʻafilemu i mea o tatou popole ai, ma faaleleia na popolega i le aufaatasi ma o tatou uso talitonu.—Faataoto 18:1.

73:21-24. O le ‘tigā o le loto’ ona o le foliga tamaoaiga o tagata amioleaga, ua pei o le gaoioi a meaola e lē mafai ona fetuutuunaʻi mafaufau. O lenei uiga, e faavae patino lava i faalogona. Na i lo le faia faapea, e ao ona taʻitaʻia i tatou i fautuaga a Ieova, ma mautinoa atoatoa o le a ia ‘taofia i tatou i le lima taumatau’ ma fesoasoani iā i tatou. E lē gata i lea, o le a ‘talia mai i tatou i le manuia,’ e Ieova, o lona uiga, o se faiā vavalalata ma ia.

77:6. O le manatu mamafa i upu moni faaleagaga ma saʻilia na mea, e manaʻomia ai se taimi e suʻesuʻe ma mafaufau loloto ai. Maʻeu la le tāua o le faaavanoa o se taimi mo i tatou lava i o tatou olaga!

79:9. E faafofoga Ieova iā tatou tatalo, aemaise lava pe afai o loo faatatau atu i le faapaiaina o lona suafa.

81:13, 16. O le faalogo i le siʻufofoga o Ieova ma savali i ona ala, e maua ai faamanuiaga e tele.—Faataoto 10:22.

82:2, 5. O le lē faamasinotonu e māfua ai ona faagaeetia “faavae uma o le lalolagi.” O gaoioiga lē faamasinotonu e vevesi ai le toʻafilemu o tagata.

84:1-4, 10-12. O le faatāuaina e faisalamo o le nofoaga o le tapuaʻiga iā Ieova, ma lagona o le lotomalie i lo latou faaeaga o le auaunaga, ua avea o se faaaʻoaʻoga iā i tatou.

86:5. Maʻeu lo tatou loto faafetai, ona o loo nofo sauni Ieova e “faamagalo sala”! O loo ia saʻilia avanoa mo so o se faamaoniga e fai ma faavae, e na te faaalia ai le alofa mutimutivale i se tagata agasala ua salamō.

87:5, 6. Po o le a iloa ea e i latou o le a ola i le lalolagi Parataiso, igoa o i latou ua faatutūina i le ola faalelagi? E tusa ai ma nei fuaiupu, e foliga mai o le tulaga lenā e ono iai.

88:13, 14. O le tuai ona maua o se tali i a tatou tatalo e tusa ai o se faafitauli patino, e ono uiga atu faapea, o loo finagalo Ieova e tatou te faailoa atu le moni o lo tatou tuutoina atu iā te ia.

“VIVII ATU IĀ TE IA, IA OUTOU FAAMANŪ ATU I LONA SUAFA”

(Salamo 90:1–106:48)

Seʻi manatu i ni māfuaaga eseese e ao ai ona matuā viia Ieova lea o loo taʻua i le vaega lona fā o salamo. I le Salamo 90, na faia ai e Mose se faaeseesega o le iai o “le Tupu o le vavau” ma le saasaa o le olaga o le tagata. (1 Timoteo 1:17) E tusa ai ma le Salamo 91:2, na faasino atu Mose iā Ieova “o [lona] malu o ia ma [lona] ʻolo”—le Pogai o lona saogalemu. O loo tautala isi salamo o loo sosoo ai i uiga matagofie o le Atua, e silisili ona manatu, ma e ofoofogia ana galuega. E tolu salamo o loo amata i le faaupuga “Ua fai Ieova ma tupu.” (Salamo 93:1; 97:1; 99:1) O le taʻua o Ieova e faapea o Lē na Faia i tatou, ua valaaulia ai i tatou e le faisalamo ina ia tatou “vivii atu iā te ia, ia outou faamanu atu i lona suafa.”—Salamo 100:4.

E faapefea e se taʻitaʻi o loo mataʻu iā Ieova ona pulea ana mataupufai? O loo aumai e le Salamo 101 lea na fatu e le tupu o Tavita, le tali o lea fesili. O loo taʻua Ieova i le salamo o loo sosoo ai e faapea, “E liuliualo mai o ia i le tatalo a lē ua mativa, e lē ʻinoʻino foʻi o ia i la latou tatalo.” (Salamo 102:17) O loo taulaʻi atu le manatu o le Salamo 103 i le alofa agalelei o Ieova ma lona alofa mutimutivale. I le faasino atu i le tele o galuega a le Atua i le lalolagi, na faapea mai le faisalamo: “Ieova e, ua matuā  tele au galuega. Ua e faia ia mea uma i le poto.” (Salamo 104:24) O salamo mulimuli e lua o le Tusi Lona Fā, o loo viiviia ai Ieova mo ana galuega ofoofogia.—Salamo 105:2, 5; 106:7, 22.

Taliina o Fesili Faale-Tusi Paia:

91:1, 2—O le ā le “mea lilo o i ai lē Silisili ese,” ma e faapefea ona tatou ‘nonofo’ ai i inā? O le nofoaga faafaatusa lenei o le saogalemu ma le malupuipuia faaleagaga—o se tulaga o le puipuia mai le faaleagaina faaleagaga. E lilo lenei nofoaga ona e lē iloa e i latou e lē faalagolago i le Atua. E tatou te faia Ieova ma mea e tatou te nonofo ai, e ala i le avea o ia ma o tatou malu ma lo tatou malosi, e ala i le viiviia o ia o le Pule Silisili ese o le vateatea aoao, ma le talaʻia o le tala lelei o le Malo. E tatou te lagona le saogalemu faaleagaga, ona ua tatou iloa o loo nofosauni pea Ieova e fesoasoani iā i tatou.—Salamo 90:1

92:12—O le ā le Auala e “tupu olaola [ai] le tagata amiotonu e pei o le pama”? E iloa le laau o le pama i lona fua mai pea lava pea. Ua pei foʻi le tagata amiotonu o le laau o le pama i se tulaga faapea, e saʻo o ia i fofoga o Ieova ma faaauau pea ona “fua mai i fua lelei,” lea e aofia ai ma galuega lelei.—Mataio 7:17-20.

Lesona mo i Tatou:

90:7, 8, 13, 14. O sesē e tatou te fai e faaleagaina ai la tatou faiā ma le Atua moni. Ma o agasala e natia e lē mafai ona lilo iā te ia. Ae ui i lea, afai e tatou te salamō faamaoni ma lafoaʻi o tatou ala sesē, o le a tatou toe maua le finagalo malie o Ieova ma ‘faamalilie i tatou i lona alofa.’

90:10, 12. Ona o le puupuu o le olaga, e ao ai la ona “faitauina o [tatou] aso.” E faapefea? E ala i le mauaina o le “poto i o [tatou] loto” po o le faatatauina o le poto ina ia lē maumau ai o tatou aso o loo totoe, ae ia faaalu i se auala e finagalo malie mai i ai Ieova. O le faia o lenā mea e ao ona tatou faatulaga muamua mea faaleagaga ma faaaogā tatau o tatou taimi.—Efeso 5:15, 16; Filipi 1:10.

90:17. E talafeagai ona tatou tatalo iā Ieova ina ia ‘faatumauina galuega a o tatou lima’ ma faamanuia taumafaiga o loo tatou fai i le faiva.

92:14, 15. O le maelega i le avea ai o ni tagata aʻoga o le Afioga a le Atua, ma le aufaatasi e lē aunoa ma tagata o Ieova, o loo faaauau ai pea ona “malolosi ma lauolaola” ē matutua ma malolosi faaleagaga, ma ua avea i latou o se faamanuiaga i le faapotopotoga.

94:19. Po o ā lava māfuaaga o ‘manatunatuga o o tatou loto’ o le faitau ma manatunatu loloto i “faamāfanafanaga” o loo iai i le Tusi Paia e faamāfanafanaina ai i tatou.

95:7, 8. O le faalogo i aʻoaʻoga a le Tusi Paia, ma uaʻi atu i ai, ma usitaia na aʻoaʻoga, o le a puipuia ai i tatou mai le oo ina maaa o tatou loto.—Eperu 3:7, 8.

106:36, 37. O loo faafesootaʻi e nei fuaiupu le tapuaʻi i tupua ma taulaga i temoni. O loo faaalia ai faapea o le tagata e faaaogāina tupua, e ono aafia o ia i taaʻiga a temoni. Ua timaʻi i tatou e le Tusi Paia: “Ia leoleo outou iā te outou ia taumamao i tupua.”—1 Ioane 5:21.

“Ia Outou Vivii Atu iā Ioa!”

O pese mulimuli e tolu o le Tusi Lona Fā o Salamo o loo faauma i le faalaeiauga e faapea: “Ia outou vivii atu ia Ioa.” O loo amata ai foʻi le salamo mulimuli i upu na. (Salamo 104:35; 105:45; 106:1, 48) Ioe, o le faaupuga “Ia outou vivii atu iā Ioa” o loo taʻua soo i le Tusi Lona Fā o salamo.

E mautinoa e tele māfuaaga e tatou te vivii atu ai iā Ieova. O le Salamo 73 seʻia oo i le 106 ua tatou maua ai le tele o mea e mafaufau i ai, ma faatumulia ai i tatou i le loto faafetai i lo tatou Tamā o i le lagi. Pe a tatou manatu i mea ua uma ona ia faia, ma mea o le a ia faia mo i tatou i le lumanaʻi, pe lē uunaʻia ai ea i tatou e “vivii atu iā Ioa” ma lo tatou malosi uma?

[Ata i le itulau 10]

I le pei o Asafo, e mafai ona tatou feagai ma tagata amio leaga, e ala i le “faalatalata atu i le Atua”

[Ata i le itulau 11]

Na matuā toʻilalopopo Farao i le Sami Ulaula

[Ata i le itulau 11]

Pe e te silafia le māfuaaga ua taʻua ai le manai o le “mea e ʻai a ē malolosi”?

[Ata i le itulau 13]

O le ā e fesoasoani e faateʻa ese ai ‘manatunatuga o o tatou loto’?