Nso Idi “Mme Akpatre Usen”?

NDI afo emekere mme nso iditịbe inọ fi ye mbonima fo ke ini iso? Ediwak owo ẹsinen̄ede ẹkpan̄ utọn̄ ẹnọ mbụk n̄kpọntịbe man ẹfiọk nte mme n̄kpọ oro ẹtịbede ke ererimbot ẹkemede nditụk uwem mmọ. Nte ededi, ndikpan̄ utọn̄ nnọ Ikọ Abasi oro ẹkedade odudu spirit esie ẹwet, anam nnyịn inyene ata ifiọk. Emi edi sia Bible ama ebem iso etịn̄ anyan ini ko aban̄a nte n̄kpọ editiede mfịn ye se iditịbede ke ini iso.

Ke uwụtn̄kpọ, ke ini Jesus Christ okodude ke isọn̄, enye ama etịn̄ ekese aban̄a Obio Ubọn̄ Abasi. (Luke 4:43) Nte ido edide, mme owo oro ẹkekpan̄de utọn̄ ẹnọ enye ẹma ẹyom ndifiọk ini emi utịbe utịbe Obio Ubọn̄ oro edidide. Ke nditịm ntịn̄, usen ita mbemiso ẹkewotde Jesus ke unana ntak, mme mbet esie ẹma ẹbụp enye ete: ‘Nso ididi idiọn̄ọ edidu fo nte Edidem Obio Ubọn̄ ye eke utịt editịm n̄kpọ emi?’ (Matthew 24:3) Jesus ama asian mmọ ke Jehovah Abasi ikpọn̄ ọfiọk nnennen ini emi Obio Ubọn̄ oro edikarade isọn̄ ofụri ofụri. (Matthew 24:36; Mark 13:32) Nte ededi, Jesus ye mbon eken ẹma ẹtịn̄ mme n̄kpọ oro ẹditịbede ke isọn̄ ndiwụt ke Christ ke akara nte Edidem Obio Ubọn̄.

Mbemiso idụn̄ọrede mme n̄kpọ oro ẹwụtde ke idu ke “mme akpatre usen” editịm n̄kpọ emi, ẹyak ikere esisịt iban̄a ata akpan n̄kpọ oro eketịbede ke heaven. (2 Timothy 3:1) Jesus Christ akakabarede edi Edidem ke heaven ke isua 1914. * (Daniel 7:13, 14) Ke ndondo oro ẹkeyaride Jesus ntinya nte Edidem Obio Ubọn̄, enye ama anam n̄kpọ. Bible asian nnyịn ete: “Ekọn̄ asiaha ke heaven: Michael ye mme angel esie ẹn̄wana ekọn̄ ye dragon, dragon ye mme angel esie ẹnyụn̄ ẹn̄wana ekọn̄.” (Ediyarade 12:7) “Michael etubom mme angel” edi Jesus Christ ke itie ubọn̄ esie ke heaven. * (Jude 9; 1 Thessalonica 4:16) Dragon edi Satan kpa Devil. Nso iketịbe inọ Satan ye ndiọi angel esie oro ẹkotde mme demon ke ekọn̄ oro? Ẹma ẹkan mmọ ẹnyụn̄ ẹsion̄o mmọ ke heaven “ẹduọn̄ọ” ke isọn̄. (Ediyarade 12:9) Ke ntak emi, “mme heaven ye [mbon] emi ẹdụn̄de ke esịt,” oro edi nditọ Abasi eke spirit oro ẹsọn̄ọde ẹda, ẹma ẹdara. Edi mme owo ikopke utọ idatesịt oro. Bible ama ebem iso etịn̄ ete: “Mbọm isọn̄ ye inyan̄, koro Devil omosụhọde etiene mbufo, asan̄ade ye akwa iyatesịt, sia ọfiọkde ete ini imọ edi ibio.”—Ediyarade 12:12.

Satan ada akwa ifụtesịt an̄wan̄a afanikọn̄ ofụk mbon oro ẹdụn̄de ke isọn̄. Nte ededi, afanikọn̄ emi edidi ke ‘ibio ini.’ Bible okot ini emi “mme akpatre usen.” Enem nnyịn ndifiọk ke ẹyebọ Devil kpukpru odudu oro enye enyenede ke isọn̄. Edi nso iwụt ke idu ke mme akpatre usen?

[Mme Ikọ idakisọn̄]

 [Ebiet ẹdade ndise ẹto ke page 2]

IKPAEDEM: Iso iso: © Ndise Chris Stowers/Panos; edem edem: FAROOQ NAEEM/AFP/Getty Images