“Mazazi a Maungulelo” Ki Nto Mañi?

KANA mwa nahananga kuli bupilo bwa mina ni bwa balatiwa ba mina bu ka ba bo bu cwañi kwapili? Batu ba bañata ba teelezanga hahulu kwa makande kuli ba zibe ka mo likezahalo za lifasi li kana za biseza bupilo bwa bona. Kono ku isa mamelelo kwa Linzwi la Mulimu le li tahile ka moya, ku lu fa buniti luli bwa ze ezahala mwa lifasi. Seo si cwalo bakeñisa kuli Bibele kale-kale ko ne i sinuzi za lika ze ezahala kacenu mane hape ni za ze ka tuha li ezahala kwapili.

Ka mutala, Jesu Kreste ha n’a li fa lifasi, na bulezi hahulu za Mubuso wa Mulimu. (Luka 4:43) Sina fela ka mo ku inezi, batu ba ne ba mu utwile ne ba bata ku ziba kuli ona Mubuso o makaza wo ne u ka tomwa lili. Mane, mazazi a malalu pili Jesu a si ka bulaiwa kale ka mafosisa, balutiwa ba hae ne ba mu buzize kuli: “Ki sifi se si ka ba sisupo sa ku ba teñi kwa hao [sina Mulena wa Mubuso] ni sa ku fela kwa muinelo wa linto?” (Mateu 24:3, NW) Kono Jesu a ba taluseza kuli ki Jehova Mulimu fela a nosi ya na ziba nako luli yeo Mubuso wo ne u ka busa lifasi kaufela. (Mateu 24:36; Mareka 13:32) Nihakulicwalo, Jesu ni batu ba bañwi ne ba polofitile za likezahalo ze ñwi za lifasi ze ne ka bonisa kuli Kreste wa busa sina Mulena wa Mubuso.

Pili lu si ka tatuba kale bupaki bo bu iponahalela bwa kuli lu pila mwa “mazazi a maungulelo” a muinelo wa kacenu wa linto, ha lu nyakisiseñi ka bukuswani kezahalo ya butokwa ye ne ezahezi kwa lihalimu. (2 Timotea 3:1) Jesu Kreste na bile Mulena mwa lihalimu ka silimo sa 1914. * (Daniele 7:13, 14) Ha sa filwe fela m’ata a Mubuso, Jesu a nga muhato. Bibele i lu taluseza kuli: “Ndwa ya lwanwa mwa lihalimu. Mikaele ni mangeloi a hae a lwanisa drakoni. Drakoni ya lwana, i na ni mangeloi a yona.” (Sinulo 12:7) “Mikaele, yena nduna ya mangeloi” ki Jesu Kreste mwa situlo sa hae sa kwa lihalimu. * (Juda 9; 1 Matesalonika 4:16) Drakoni ki Satani Diabulosi. Mwa ndwa yeo, ki lika mañi ze ne ezahezi ku Satani ni kwa mangeloi a hae a maswe, a bizwa badimona? Ne ba tuzwi mwa ndwa mi ba “nepelwa mwa lifasi,” kamba ku lundulwa kwa lihalimu. (Sinulo 12:9) Satani ni badimona ba hae ha ne ba nepezwi mwa lifasi, “mahalimu ni ba ba yahile mwateñi,” bona bana ba Mulimu ba kwa moya ba ba sepahala, ne ba tabile. Kono batu bona ha ba si ka ikola tabo yeo. Bibele ne i sinuzi kuli: “Mu na ni bumai mina ba ba yahile mwa lifasi . . . kakuli Diabulosi u shetumukezi ku mina a halifile maswe, ka ku ziba kuli nako ya hae ki ye nyinyani.”—Sinulo 12:12.

Bakeñisa ku halifa hahulu, Satani u labutulezi bumai—manyando ni matomola—ba ba pila fa lifasi. Kono bona bumai bo, bu ka ba bwa swalelele fela, ‘nako ye nyinyani.’ Bibele i biza nako yeo kuli ki “mazazi a maungulelo.” Lu swanela ku ba ba ba tabile ka ku ziba kuli kukuezo ya Diabulosi fa lifasi i ka tuha i toolwa ku ya ku ile. Kono ki bufi bupaki bo bu bonisa kuli lu pila mwa mazazi a maungulelo?

[Litaluso za kwatasi]

 [Manzwi a bañi ba maswaniso fa likepe 2]

COVER: Foreground: © Chris Stowers/​Panos Pictures; background: FAROOQ NAEEM/​AFP/​Getty Images