‘Matuku a ku nshikidilu’, mmatuku kayi?

UDI uditatshisha bua kumanya tshidi mua kukufikila wewe ne balela ne balunda bebe mu matuku atshilualua anyi? Bantu ba bungi badi balonda ngumu ku tudiomba anyi mu bikandakanda bua kumona mushindu udi malu adi enzeka lelu mua kushintulula nsombelu wabu. Kadi tudi tumvua malu bimpe patudi tuteleja Dîyi dia Nzambi, bualu dikavua dimanyishe katshia kuonso aku malu adi enzeka lelu ne makuabu enzeka kumpala eku.

Tshilejilu, patshivua Yezu Kristo pa buloba, wakakula bikole bua Bukalenge bua Nzambi. (Luka 4:43) Nunku mpindieu tudi tumvua bua tshinyi bantu bavua bamuteleja bakakeba bua kumanya tshikondo tshivua Bukalenge bulengele ebu ne bua kulua. Matuku asatu kumpala kua kushipabu Yezu kapayi bualu, bayidi bende bakamukonka ne: ‘Ntshinyi tshikala tshimanyinu tshia dikalaku diebe [mu bukokeshi bua Bukalenge] ne tshia nshikidilu wa ndongoluelu eu wa malu?’ (Matayo 24:3, NW) Yezu wakabambila ne: anu Yehowa Nzambi nkayende ke uvua mumanye dîba ne tshikondo bivua Bukalenge ebu ne bua kuangata malu onso a pa buloba mu bianza. (Matayo 24:36; Mâko 13:32) Nansha nanku, Yezu ne bayidi bende bakamanyisha amue malu avua ne bua kuenzeka pa buloba avua ne bua kujadika se: Kristo ukavua ukokesha mu Bukalenge.

Kadi bangabanga ne tuetu kukonkonona tshijadiki tshidi tshimueneka tshia se: tudi mu ‘matuku a ku nshikidilu’ kua ndongoluelu wa malu eu, tuanjayi kumona kakese bualu bunene buakenzeka mu diulu. (2 Timote 3:1) Yezu Kristo wakalua Mukalenge mu diulu mu tshidimu tshia 1914. * (Danyele 7:13, 14) Diakamue kunyima kua yeye mumane kudia Bukalenge, Yezu wakenza bualu kampanda. Bible udi utuambila ne: ‘Mvita minene yakadi mu diulu; Mikaele ne banjelu bende bakaya kuluangana mvita ne dragon; ne dragon ne banjelu bende bakaluangana nabu.’ (Buakabuluibua 12:7) ‘Mikaele, muanjelu mutambe bakuabu bunene’ n’Yezu Kristo mu muanzu udiye nawu mu diulu. * (Yuda 9; 1 Tesalonike 4:16) Dragon n’Satana Diabolo. Ntshinyi tshiakafikila Satana ne banjelu bende babi (anyi bademon) mu mvita eyi? Bakabatshimuna ne ‘bakedibua panshi,’ anyi bakabipata mu diulu ne kubelabu pabuipi ne buloba. (Buakabuluibua 12:9) Bua bualu ebu, ‘diulu ne badi bashikamamu,’ mmumue ne: banjelu ba Nzambi ba lulamatu, bakasanka. Kadi bantu bavua pa buloba bobu kabakasanka nanku to. Bible ukavua mumanyishe ne: ‘Mulawu wikale pa buloba, bualu bua Diabolo wakupueka kunudi, muikale ne tshiji tshikole, mumanye ne: udi ne musangu muîpi.’​—Buakabuluibua 12:12.

Bu mudi Satana muikale ne tshiji tshikole, mmutuadile badi pa buloba mulawu, anyi ntatu ne makenga. Kadi mulawu eu kawena ne bua kunenga to, newikale anu wa ‘musangu muîpi.’ Musangu muîpi eu ke udi Bible ubikila ne: ‘matuku a ku nshikidilu.’ Tudi mua kusanka bua mukadibu pa kumbusha bukokeshi buonso budi nabu Diabolo pa buloba. Kadi ntshinyi tshidi tshitujadikila ne: tudi mu matuku a ku nshikidilu?

[Mêyi adi kuinshi]