Anto so ‘Kaunoran Iran Agew’?
Anto so ‘Kaunoran Iran Agew’?
IISIPEN mo ta no anto so manatalaran ed sika tan saray inad-arom diad arapen? Iimanoen a maong na dakel a totoo iray balita ed media pian naamtaan da no panon a mangapekta ed bilay da iray nagagawa ed mundo. Balet, sikatayo so nawalaan na suston pakatalos no imanoen tayo so impuyan a Salita na Dios. On, lapud say Biblia so abayag lan angipasakbay ed aliwa labat a saray kaplesan a nagagawa noagta pati say nagawa ni labat.
Alimbawa, sanen wadiad dalin si Jesu-Kristo, naynay ton sasalambiten so nipaakar ed Panarian na Dios. (Lucas 4:43) Natural labat a labay a naamtaan na saray totoon akadngel ed sikato no kapigan so isabi na satan ya alay abig a Panarian. Diad tua, taloy agew antis na samay agmakatunongan ya impamatey ed si Jesus, sikatoy tinepetan na saray babangatan to: “Anto kasi so tanda ed isabim [ed pakayari na Panarian] tan say anggaan na mundo?” (Mateo 24:3) Imbaga nen Jesus ed sikara a si Jehova a Dios lambengat so makaamta ed eksakton panaon no kapigan so sigpot a panuley na Panarian diad dalin. (Mateo 24:36; Marcos 13:32) Balet, impasakbay nen Jesus tan arum nira so pigaran ebento diad dalin ya onkanan paneknek a manuuley lay Kristo ed pakayari na Panarian.
Sakbay tayon usisaen so nanengneng ya ebidensya a manbibilay itayo la ed ‘kaunoran iran agew’ na peles a sistema na bengabengatla, konsideraen tayo nin magano so sakey ya importantin ebento ya agawa ed agnanengneng ya ayaman na saray espiritu. (2 Timoteo 3:1) Si Jesu-Kristo so nagmaliw ya Ari ed tawen nen 1914. * (Daniel 7:13, 14) Kapangawat nen Jesus ed pakayari na Panarian, sikatoy kinmiwas a tampol. Oniay ibabaga ed sikatayo na Biblia: “Agawa so sakey a baleg a bakal ed tawen: si Miguel tan saray anghel to pinmaway iran akibakal ed dragon: et samay dragon tan saray anghel to akibakal ira.” (Apocalipsis 12:7) Say “arkanghel Miguel” et si Jesu-Kristo diad mangatatawen a posisyon to. * (Judas 9; 1 Tesalonica 4:16) Say dragon et si Satanas a Diablo. Anto so nansumpalan nen Satanas tan saray marelmeng a papatumbok ton anghel, a tinawag a dedemonyo, diad satan a bakal? Sikaray atalo tan apagit ed tawen odino “nibantak” diad kaliberliber na dalin. (Apocalipsis 12:9) Lapud saya et nanliket so “katawenan, tan [saramay] manaayam ed sikara,” salanti, saray matoor ya espiritun ananak na Dios. Balet, ag-akaeksperiensya so katooan na ontan a liket. “Kasi la ra so dalin,” so impasakbay na Biblia, “ta say Diablo inmakseb ed sikayo, a wala ed baleg a sanok to, ya amta to a daiset la so panaon to.”—Apocalipsis 12:12.
Lapud pirmin sanok nen Satanas, intarok to so gonigon—kairapan tan segsegang—ed saramay manaayam ed dalin. Balet satan a gonigon et maganggano, a ‘daiset labat a panaon.’ Say Biblia so anukoy ed satan a panaon bilang ‘kaunoran iran agew.’ Makapanliket itayo lapud agmanbayag et sigpot lan naandi so impluensya na Diablo diad dalin. Balet anto so prueba tayo a manbibilay itayo la ed kaunoran iran agew?
[Saray paimano ed leksab]
^ par. 4 Nengnengen so Say Panag-Bantayan, Hulyo 15, 2006, pahina 6-7.
^ par. 4 Parad kaaruman ya impormasyon, nengnengen so Anto so Peteg ya Ibabangat na Biblia? pahina 218-19, ya impalapag na saray Tasi nen Jehova.
[Picture Credit Lines ed pahina 2]
APIS: Walad arap a litrato: © Chris Stowers/Panos Pictures; background: FAROOQ NAEEM/AFP/Getty Images