Kico Ta “e Ultimo Dianan”?

BO SA puntra bo mes kico tin den futuro pa bo y pa bo sernan keri? Hopi hende ta sigui noticia cu sumo atencion pa mira den ki manera sucesonan di mundo lo por bai afecta nan bida. Sinembargo, si nos presta atencion na e Palabra inspira di Dios, nos ta bin compronde realmente kico nan ta nifica. Esaki ta debi cu for di hopi tempo pasa Bijbel a papia no solamente di e condicionnan actual sino tambe di loke mester sosode ainda.

Por ehempel, tempo Hesucristo tabata riba tera, el a papia hopi tocante e Reino di Dios. (Lucas 4:43) Di mes e hendenan cu a tend’e kier a sa na ki tempo e Reino maraviyoso ei lo a bini. De echo, tres dia prome cu Hesus a wordo mata inhustamente, su discipelnan a puntr’e: “Kico lo ta e señal di bo presencia [den poder di Reino] y di e conclusion di e sistema di cosnan?” (Mateo 24:3, NW) Hesus a bisa nan cu ta Jehova Dios so tabata sa na ki momento exacto e Reino lo a tuma pleno control di tera. (Mateo 24:36; Marco 13:32) Sinembargo, loke si Hesus y algun escritor di Bijbel a pronostica ta cierto desaroyonan riba tera cu lo a sirbi como prueba cu Cristo lo ta gobernando den poder di Reino.

Prome cu nos analisa e evidencia visibel cu nos ta bibando den “e ultimo dianan” di e mundo aki su sistema di cosnan, laga nos considera brevemente un suceso importante cu a tuma luga den e region invisibel di spirito. (2 Timoteo 3:1) Hesucristo a bira Rei den shelo na aña 1914. * (Daniel 7:13, 14) Poco despues cu el a ricibi poder di Reino, el a tuma accion. Bijbel ta bisa nos: “Tabatin guera den shelo, Miguel y su angelnan tabata haci guera contra e dragon. Y e dragon y su angelnan tabata haci guera.” (Revelacion 12:7) “E arcangel Miguel” ta Hesucristo den su posicion celestial. * (Judas 9; 1 Tesalonicensenan 4:16) E dragon ta Satanas e Diabel. Kico tabata e resultado di e conflicto aki pa Satanas y e angelnan, of demoñonan, cu a siguie? Nan a perde e guera ei y a ser saca for di shelo, esta, “tira abou” den bisindario di tera. (Revelacion 12:9) Pa e motibo aki, “shelonan y [esnan] cu ta biba den nan”, esta, e yiunan spiritual fiel di Dios, a alegra. Pero hende si no por a alegra, ya cu Bijbel a profetisa: “Ai di tera . . . pasobra Diabel a baha bin cerca boso cu gran furia, sabiendo cu ta ked’e solamente un poco tempo mas.”—Revelacion 12:12.

Satanas, den su furia, a trece calamidad of “ai”—sufrimento y afliccion—pa hende cu ta biba riba tera. Sinembargo, e calamidad ei lo ta cortico, pa “un poco tempo mas.” Bijbel ta referi na e periodo ei como “e ultimo dianan.” Nos por ta contento cu pronto e influencia di Diabel riba tera lo ser elimina completamente. Pero kico ta proba cu nos ta bibando den e ultimo dianan?

[Nota]

 [Reconocemento pa Potret na pagina 2]

COVER: Foreground: © Chris Stowers/​Panos Pictures; background: FAROOQ NAEEM/​AFP/​Getty Images