O ā “Aso e Gata Ai”?

PO O e tomānatu i se mea o le a tupu i a oe ma ē pele i le lumanaʻi? E toʻatele e uaʻi atu i tala fou e iloa ai, po o le a faapefea i mea o loo tutupu i le lalolagi ona aafia ai o latou soifua. Ae o le uaʻi atu i le Afioga a le Atua, e aumaia ai iā i tatou le malamalamaga saʻo. Talu ai ua loa ona valoia i le Tusi Paia e lē na o mea e tutupu i le taimi nei, ae faapea foʻi mea o le a tutupu mulimuli mai.

O se faaaʻoaʻoga a o iai Iesu i le lalolagi, sa tele ina talanoa i le Malo o le Atua. (Luka 4:43) O le mea moni, na mananaʻo ē na faalogo iā te ia e fia iloa po o afea o le a oo mai ai lenā Malo matagofie. I le toe tolu aso a o leʻi fasiotia ma le lē tonu Iesu, na fesili ai ona soo iā te ia: “Pe se ā foʻi le faailoga o lou maliu mai [i le mana o le Malo], ma le gataaga o le lalolagi?” (Mataio 24:3) Na taʻu e Iesu iā i latou, e na o Ieova e silafia le taimi tonu o le a pulea atoa ai e le Malo le lalolagi. (Mataio 24:36; Mareko 13:32) Ae na valoia e Iesu ma isi mea e tutupu i le lalolagi e faamaonia ai na pule Iesu i le mana o le Malo.

A o leʻi iloiloina faamaoniga vaaia e iloa ai o loo tatou ola i “aso e gata ai” o lenei lalolagi, seʻi tau ina tatou tilofaʻia se mea tāua na tupu i le lagi. (2 Timoteo 3:1) Na avea Iesu ma Tupu i le lagi i le 1914. * (Tanielu 7:13, 14) Na ia faia se gaoioiga a o leʻi leva talu ona ia maua le mana o le Malo. Ua taʻu mai i le Tusi Paia iā i tatou: “Ua tau foʻi le taua i le lagi; o Mikaele ma ana agelu ua latou tau ma le tarako, ua ʻau foʻi le tarako ma ana agelu e tau ai le taua.” (Faaaliga 12:7) O ‘Mikaele le agelu silisili,’ o Iesu Keriso lea i lona tulaga i le lagi. * (Iuta 9; 1 Tesalonia 4:16) O le tarako, o Satani le Tiapolo. O le ā le iʻuga o le taua ma Satani ma ana agelu leaga, ua taʻua o temoni? Na latou toʻilalo i le taua ma na “lafo ifo” mai le lagi i le lalolagi. (Faaaliga 12:9) O lea, na olioli ai le ‘lagi atoa ma i latou o nonofo ai,’ o agelu faamaoni ia a le Atua. Ae e leʻi olioli faapea tagata. Na valoia i le Tusi Paia: “Oi talofa iā te oulua le fanua ma le sami, auā ua alu ifo iā te oulua le tiapolo ua lotoa tele, auā ua na iloa ua saasaa ona pō.”—Faaaliga 12:12.

O le ita tele o Satani, ua ia aumaia ai mafatiaga ma puapuaga i ē o loo nonofo i le lalolagi. Ae o le a puupuu le taimi o na mafatiaga e pei ona taʻua i le mau, “ua saasaa ona pō.” O loo faasino le Tusi Paia i nei taimi, o “aso e gata ai.” E tatou te fiafia auā ua toeitiiti ona aveesea atoatoa lea o taaʻiga a le Tiapolo i le lalolagi. Ae o le ā le faamaoniga e iloa ai o loo tatou ola i aso e gata ai?

[Faamatalaga pito i lalo]