Nos Ta Bibando Realmente den “e Último Dianan”?

DOS klase di desaroyo ta yuda nos identifiká loke Beibel ta yama e último dianan. E Skritura a profetisá tokante susesonan ku lo tuma lugá durante e tempu di e “konklushon di e sistema di kosnan.” (Mateo 24:3, NW) Beibel ta papia tambe di kambionan den aktitut i komportashon di hende ku ta biba den “e último dianan.”—2 Timoteo 3:1.

Susesonan mundial kombiná ku e aktitut i komportashon di hende ta duna prueba ku nos ta bibando den e último dianan i ku pronto e Reino di Dios lo trese bendishonnan eterno pa esnan ku ta stima Dios. Laga nos kuminsá na analisá tres karakterístika ku segun Hesus lo a marka e último dianan.

“Prinsipio di Dolónan di Parto”

Hesus a bisa: “Nashon lo lanta kontra nashon, i reino kontra reino. I na vários lugá lo tin hamber i temblor.” Anto el a agregá: “Tur e kosnan aki ta e prinsipio di dolónan di parto.” (Mateo 24:7, 8) Laga nos analisá “e kosnan aki” un pa un.

Den siglo pasá, un kantidat enorme di hende a pèrdè nan bida den guera- i konfliktonan étniko. Segun un informe di ekspertonan di Worldwatch Institute, “tres biaha mas tantu hende a bira víktima di guera den siglo [20] ku den tur guera for di e promé siglo AD [di nos era] pa 1899.” Jonathan Glover ta skirbi den su buki Humanity—A Moral History of the Twentieth Century (Humanidat—Un Historia Moral di Siglo Binti): “Segun kálkulonan, durante e periodo di 1900 pa 1989, guera a mata 86 mion hende. . . . E gran eskala riba kua mortonan a kai den e gueranan di siglo 20 ta difísil pa imaginá. Siendo ku rònt di dos tersera parti (58 mion) a ser matá den e dos gueranan mundial, no tin muchu sentido pa saka un promedio di e kantidat aki. Pero si a plama e mortonan aki riba henter e periodo aki, guera lo a mata rònt di 2.500 hende pa dia. Esei ta mas ku 100 hende pa ora, 24 ora pa dia, nònstòp, pa nobenta aña largu.” Bo por imaginá bo e tristesa i doló ku esaki lo mester a kousa e miónes di famia- i amigunan di esnan ku a pèrdè nan bida?

Apesar di e echo ku mundu ta produsí kuminda na abundansia, un di e karakterístikanan di e último dianan ta skarsedat di kuminda. Ekspertonan ta bisa ku durante e último 30 añanan produkshon di kuminda a krese mas lihé ku oumento di poblashon. No opstante, den áreanan grandi di mundu tin skarsedat di kuminda pasobra hopi hende no tin sufisiente tereno pa planta òf nan no tin sufisiente plaka pa kumpra kuminda. Den paisnan den desaroyo, rònt di 1,2 mil mion hende ta biba di ménos ku un dòler merikano pa dia. Di esakinan, rònt di 780 mion ta sufri di hamber króniko. Segun e Organisashon Mundial di Salú, malnutrishon ta un di e faktornan prinsipal ku ta hiba na morto di mas ku sinku mion mucha pa aña.

Kiko nos por bisa di e temblornan profetisá? Segun e Departamento di Investigashon Geológiko di Merka, desde 1990 so kaba un  averahe di 17 temblor pa aña tabatin sufisiente potensia pa kousa daño na edifisio. Komo averahe, tur aña tabatin temblor sufisiente fuerte pa kousa destrukshon total di edifisionan. Segun un otro fuente, “temblor a kosta bida di sientos di míles di hende den e último 100 añanan.” Un motibu pa esaki ta ku for di 1914 e poblashonnan ku ta biba den zonanan di temblor a krese formalmente.

Otro Desaroyonan Signifikativo

Hesus a bisa: ‘Lo tin pestilensia na vários lugá.’ (Lukas 21:11) Awe siensia médiko ta mas avansá ku nunka. Tòg, tantu enfermedatnan eksistente komo nobo ta sigui asotá humanidat. Un dokumento di e Konseho Nashonal di Inteligensia Merikano ta deklará: “For di 1973 padilanti, binti enfermedat bon konosí kaba—entre kua tuberkulósis (TB), malaria i kólera—a bolbe lanta kabes òf plama geográfikamente, hopi bes den formanan mas maligno i mas resistente kontra remedi. Por lo ménos 30 vírus kousante di enfermedat ku anteriormente tabata deskonosí a ser identifiká desde 1973, inkluso e vírus di HIV, Ébola, hepatítis C i Nipa, pa kua no tin kura disponibel.” Segun un informe di Krus Kòrá di 28 di yüni 2000, e kantidat di hende ku a muri di enfermedatnan kontagioso e aña anterior tabata mas o ménos 160 biaha mas tantu ku e kantidat ku a muri den desasternan natural.

“Oumento di maldat” ta otro karakterístika notabel di e último dianan. (Mateo 24:12, NW) Na mayoria lugá rònt mundu awe, hende no ta sali nan kas sin sera nan porta na yabi, ni nan no ta sinti nan sigur riba kaya anochi. I kiko di e kontaminashon di aire, awa i tera ku nos ta mira ta tumando lugá, hopi biaha pa motibu di práktikanan ilegal? Esaki tambe ta un kumplimentu di loke Beibel a profetisá. E buki di Revelashon ta papia di e tempu señalá di Dios pa “destruí esnan ku ta destruí e tera.”—Revelashon 11:18.

Kon Hende Ta den e Último Dianan?

Sea asina bon di habri bo Beibel na 2 Timoteo 3:1-5 i les’é. Apòstel Pablo a skirbi: “Den e último dianan tempunan trabahoso lo bin.” Despues el a menshoná 20 karakterístika di personalidat ku lo tabata típiko di hende malbado. Bo a ripará algun di e karakterístikanan aki den e hendenan di bo komunidat? Konsiderá loke vários fuente a bisa resientemente tokante hende djawe.

“Stimadó di nan mes.” (2 Timoteo 3:2) “Awe mas ku nunka promé [hende] ta insistí pa hasi loke nan kier. [Nan] ta birando manera dios i ta spera ku bo ta trata nan komo tal.”—Financial Times, korant, Inglatera.

“Stimadó di plaka.” (2 Timoteo 3:2) “Último tempu e spiritu egoista di materialismo a dominá e spiritu di modestia. A ménos ku bo ta wòrdu mirá komo hende riku den sosiedat, no ta bale la pena biba.”—Jakarta Post, korant, Indonesia.

“Desobedesidu na mayornan.” (2 Timoteo 3:2) “Mayornan ta keda babuká ora nan yu di 4 aña duna nan òrdu manera ta [e rei franses] Louis XIV e ta òf nan yu di 8 aña grita: ‘Mi tin rabia riba bo!’”—American Educator, revista, Merka.

“Desleal.” (2 Timoteo 3:2, NW) “Tal bes e kambio di mas grandi den norma- i balornan moral durante e [último 40 añanan] ta e echo ku awe hòmbernan ta hopi mas inkliná pa bandoná nan partner i yunan.”—Wilson Quarterly, revista, Merka.

“Sin amor.” (2 Timoteo 3:3) “Violensia den famia ta e faktor dominante den e bida di tur dia di komunidatnan rònt mundu.”—Journal of the American Medical Association, revista, Merka.

“Sin dominio propio.” (2 Timoteo 3:3) “Hopi artíkulo riba promé página di korantnan di tur mainta ta reflehá mentenan ku falta di dominio propio, integridat moral i  kompashon ku nan próhimo i asta ku nan mes. . . . Si nos sosiedat sigui tolerá agreshon den e forma aki, pronto lo e pèrdè tur sentido moral.”—Bangkok Post, korant, Tailandia.

“Grosero.” (2 Timoteo 3:3) “Rabia irashonal i deskontrolá [ta] bisto riba kaya, den maltrato den famia . . . i den e violensia aparentemente sin motibu i innesesario ku hopi bes ta kompañá aktonan kriminal. Hende no sa nunka ki ora ta presentá un akto violento i víktimanan ta sinti nan emoshonalmente isolá i vulnerabel.”—Business Day, korant, Suráfrika.

‘Stimadó di plaser mas bien ku stimadó di Dios.’ (2 Timoteo 3:4) “Liberashon seksual a bira un bataya moral, den kua e enemigu ta moralidat kristian.”—Boundless, un revista di Internet.

“Ku tin aparensia di ta religioso bèrdè, ma ku ta nenga su poder.” (2 Timoteo 3:5) “[Un eks-prostituta na Hulanda] a rekonosé ku e oposishon kontra legalisashon [di prostitushon] ta bini prinsipalmente di gruponan religioso. El a pousa, anto a bisa ku un smail riba su kara ku tempu e tabata prostituta tabatin vários lider religioso entre su klientenan regular. ‘Semper prostitutanan ta bisa ku nan mihó klientenan ta di e komunidat religioso,’ el bisa hariendo.”—National Catholic Reporter, korant, Merka.

Kiko Tin den Futuro?

Manera Beibel a profetisá, e mundu djawe ta yen di problema. Sin embargo, e profesia tokante “e señal di [Kristu su] presensia i dje konklushon dje sistema di kosnan” tin un aspekto positivo. Hesus a bisa: “E evangelio aki di e reino lo wòrdu prediká den henter mundu komo un testimonio na tur nashon.” (Mateo 24:3, 14) E evangelio òf bon nobo di e Reino di Dios ta ser prediká den mas ku 230 pais. Mas ku seis mion hende ku ta bini di “tur nashon i tur tribu i pueblo i lenga” ta partisipando aktivamente den e proklamashon di e Reino. (Revelashon 7:9) Kiko nan aktividat seloso ta logrando? E ta permití ku práktikamente tur hende riba tera por haña sa kiko ta e mensahe di e Reino, kiko e Reino lo hasi i kon nan por risibí su bendishonnan. Sí, ‘berdadero konosementu lo oumentá den e tempu di fin.’—Daniel 12:4.

Bo tin bon motibu pa probechá di e konosementu aki. Mira kiko lo tuma lugá unabes ku Yehova haña ku e bon nobo a ser prediká sufisientemente. Hesus a bisa: “E ora ei e fin lo yega.” (Mateo 24:14) Esei lo ta e tempu pa Dios eliminá tur maldat riba tera. Proverbionan 2:22 ta bisa: “E malbadonan lo wòrdu kòrtá kitá for di tera, i e traidónan lo wòrdu ranká for di dje ku rais ku tur.” Kiko lo para di Satanas i su demoñonan? Nan lo ser tirá den un abismo kaminda nan lo no por gaña e nashonnan mas. (Revelashon 20:1-3) E ora ei “e rektonan . . . i e perfektonan lo keda” riba tera. I nan lo disfrutá di e maravioso bendishonnan di Reino.—Proverbionan 2:21; Revelashon 21:3-5.

Kiko Abo Por Hasi?

No kabe duda ku fin di e mundu di Satanas ta serka. Hende ku ta ignorá e evidensia ku nos ta bibando den e último dianan lo no ta prepará ora ku e fin yega. (Mateo 24:37-39; 1 Tesalonisensenan 5:2) P’esei, Hesus a bisa su oyentenan: “Tene kuidou pa boso kurason no ta kargá pa kousa di paranda i buracheria i e preokupashonnan di bida, i e dia ei no bin diripiente riba boso manera un trampa; pasobra e lo bin riba tur esnan ku ta biba riba superfisie di henter mundu. Ma sea alerta tur ora bai, hasiendo orashon pa boso por tin forsa pa skapa di tur e kosnan aki ku ta bai tuma lugá, i pa para dilanti di e Yu di hende.”—Lukas 21:34-36.

Ta solamente e personanan ku tin un posishon aprobá dilanti e Yu di hende, Hesus, lo tin e posibilidat di sobrebibí e fin di e sistema di kosnan aki. Ta masha importante anto pa  nos usa e tempu ku a sobra pa buska e aprobashon di Yehova Dios i Hesukristu! Hesus a bisa den orashon na Dios: “Esaki ta bida eterno, ku nan por konosé bo, e úniko Dios berdadero, i Hesukristu, kende bo a manda.” (Juan 17:3) Ta sabí anto di bo parti pa siña mas tokante Yehova Dios i su rekisitonan. Testigunan di Yehova den bo komunidat gustosamente lo yuda bo komprondé loke Beibel ta siña. Nos ta invitá bo kordialmente pa tuma kontakto ku nan òf skirbi e editornan di e revista aki.

[Kuadro/​Plachinan na página 7]

KARAKTERÍSTIKANAN DI E ÚLTIMO DIANAN

DESAROYONAN PRINSIPAL:

▪ Guera.—Mateo 24:6, 7.

▪ Hamber.—Mateo 24:7.

▪ Temblor.—Mateo 24:7.

▪ Pestilensia.—Lukas 21:11.

▪ Oumento di maldat.—Mateo 24:12, NW.

▪ Ruinamentu di e tera.—Revelashon 11:18.

HENDE:

▪ Stimadó di nan mes. —2 Timoteo 3:2.

▪ Stimadó di plaka. —2 Timoteo 3:2.

▪ Arogante.—2 Timoteo 3:2.

▪ Desobedesidu na mayornan.—2 Timoteo 3:2.

▪ Ingrato.—2 Timoteo 3:2.

▪ Desleal.—2 Timoteo 3:2, NW.

▪ Sin amor. —2 Timoteo 3:3.

▪ Sin dominio propio.—2 Timoteo 3:3.

▪ Grosero.—2 Timoteo 3:3.

▪ Stimadó di plaser.—2 Timoteo 3:4.

▪ Hipókrita religioso.—2 Timoteo 3:5.

ADORADÓNAN BERDADERO:

▪ Nan konosementu lo oumentá. —Daniel 12:4.

▪ Ta prediká e bon nobo rònt mundu.—Mateo 24:14.

[Rekonosementu]

UNITED NATIONS/Photo by F. GRIFFING