Nos Ta Bibando Realmente den “e Ultimo Dianan”?

DOS clase di desaroyo ta yuda nos identifica loke Bijbel ta yama e ultimo dianan. E Scritura a profetisa tocante sucesonan cu lo tuma luga durante e tempo di e “conclusion di e sistema di cosnan.” (Mateo 24:3, NW) Bijbel ta papia tambe di cambionan den actitud y comportacion di hende cu ta biba den “e ultimo dianan.”—2 Timoteo 3:1.

Sucesonan mundial combina cu e actitud y comportacion di hende ta duna prueba cu nos ta bibando den e ultimo dianan y cu pronto e Reino di Dios lo trece bendicionnan eterno pa esnan cu ta stima Dios. Laga nos cuminsa na analisa tres caracteristica cu segun Hesus lo a marca e ultimo dianan.

“Principio di Dolornan di Parto”

Hesus a bisa: “Nacion lo lanta contra nacion, y reino contra reino. Y na varios luga lo tin hamber y temblor.” Anto el a agrega: “Tur e cosnan aki ta e principio di dolornan di parto.” (Mateo 24:7, 8) Laga nos analisa “e cosnan aki” un pa un.

Den siglo pasa, un cantidad enorme di hende a perde nan bida den guera- y conflictonan etnico. Segun un informe di expertonan di Worldwatch Institute, “tres biaha mas tanto hende a bira victima di guera den siglo [20] cu den tur guera for di e prome siglo AD [di nos era] pa 1899.” Jonathan Glover ta skirbi den su buki Humanity—A Moral History of the Twentieth Century (Humanidad—Un Historia Moral di Siglo Binti): “Segun calculonan, durante e periodo di 1900 pa 1989, guera a mata 86 miyon hende . . . E gran cantidad di morto cu a cai den e gueranan di siglo 20 ta di tal magnitud cu ta dificil pa imagina. Siendo cu rond di dos tercera parti (58 miyon) a ser mata den e dos gueranan mundial, no tin mucho sentido pa saca un promedio di e cantidad aki. Pero si a plama e mortonan aki riba henter e periodo aki, guera lo a mata rond di 2.500 hende pa dia. Esei ta mas cu 100 hende pa ora, 24 ora pa dia, nonstop, pa nobenta aña largo.” Bo por imagina bo e tristesa y dolor cu esaki lo mester a causa e miyones di famia- y amigonan di esnan cu a perde nan bida?

A pesar di e echo cu mundo ta produci cuminda na abundancia, un di e caracteristicanan di e ultimo dianan ta scarsedad di cuminda. Expertonan ta bisa cu durante e ultimo 30 añanan produccion di cuminda a crece mas lihe cu aumento di poblacion. No obstante, den areanan grandi di mundo tin scarsedad di cuminda pasobra hopi hende no tin suficiente tereno pa planta of nan no tin suficiente placa pa cumpra cuminda. Den paisnan den desaroyo, rond di 1,2 mil miyon hende ta biba di menos cu un dollar Mericano pa dia. Di esakinan, rond di 780 miyon ta sufri di hamber cronico. Segun e Organisacion Mundial di Salud, mal nutricion ta un di e factornan principal cu ta hiba na morto di mas cu cinco miyon mucha pa aña.

Kico nos por bisa di e temblornan profetisa? Segun e Departamento di Investigacion Geologico di Merca, desde 1990 so caba un  averahe di 17 temblor pa aña tabatin suficiente potencia pa causa daño na edificio. Como averahe, tur aña tabatin temblor suficiente fuerte pa causa destruccion total di edificionan. Segun un otro fuente, “temblor a costa bida di cientos di miles di hende den e ultimo 100 añanan.” Un motibo pa esaki ta cu for di 1914 e poblacionnan cu ta biba den zonanan di temblor a crece formalmente.

Otro Desaroyonan Significativo

Hesus a bisa: ‘Lo tin pestilencia na varios luga.’ (Lucas 21:11) Awe ciencia medico ta mas avansa cu nunca. Toch, tanto enfermedadnan existente como nobo ta sigui asota humanidad. Un documento di e Conseho Nacional di Inteligencia Mericano ta declara: “For di 1973 padilanti, binti enfermedad bon conoci caba—entre cua tuberculosis (TB), malaria y colera—a bolbe lanta cabes of plama geograficamente, hopi bes den formanan mas maligno y mas resistente contra remedi. Por lo menos 30 virus causante di enfermedad cu anteriormente tabata desconoci a ser identifica desde 1973, incluso e virus di HIV, Ebola, hepatitis C y Nipah, pa cua no tin cura disponibel.” Segun un informe di Crus Cora di 28 di juni 2000, e cantidad di hende cu a muri di enfermedadnan contagioso e aña anterior tabata mas o menos 160 biaha mas tanto cu e cantidad cu a muri den desasternan natural.

“Aumento di maldad” ta otro caracteristica notabel di e ultimo dianan. (Mateo 24:12, NW) Na mayoria luga rond mundo awe, hende no ta sali for di nan cas sin lok nan porta, ni nan no ta sinti nan sigur riba caya anochi. Y kico di e contaminacion di aire, awa y tera cu nos ta mira ta tumando luga, hopi biaha pa motibo di practicanan ilegal? Esaki tambe ta un cumplimento di loke Bijbel a profetisa. E buki di Revelacion ta papia di e tempo señala di Dios pa “destrui esnan cu ta destrui e tera.”—Revelacion 11:18.

Con Hende Ta den e Ultimo Dianan?

Sea asina bon di habri bo Bijbel na 2 Timoteo 3:1-5 y les’e. Apostel Pablo a skirbi: “Den e ultimo dianan temponan trabahoso lo bin.” Despues el a menciona 20 caracteristica di personalidad cu lo tabata tipico di hende malbado. Bo a ripara algun di e caracteristicanan aki den e hendenan di bo comunidad? Considera loke varios fuente a bisa recientemente tocante hende djawe.

“Stimado di nan mes.” (2 Timoteo 3:2) “Awe mas cu nunca prome [hende] ta insisti pa haci loke nan kier. [Nan] ta birando manera dios y ta spera cu bo ta trata nan como tal.”—Financial Times, corant, Inglatera.

“Stimado di placa.” (2 Timoteo 3:2) “Ultimo tempo e spirito egoista di materialismo a domina e spirito di modestia. A menos cu bo ta wordo mira como hende rico den sociedad, no ta bale la pena biba.”—Jakarta Post, corant, Indonesia.

“Desobedecido na mayornan.” (2 Timoteo 3:2) “Mayornan ta keda babuca ora nan yiu di 4 aña duna nan ordo manera ta [e rei Frances] Louis XIV e ta of nan yiu di 8 aña grita: ‘Mi tin rabia riba bo!’”—American Educator, revista, Merca.

“Desleal.” (2 Timoteo 3:2, NW) “Talbes e cambio di mas grandi den norma- y balornan moral durante e [ultimo 40 añanan] ta e echo cu awe hombernan ta hopi mas inclina pa bandona nan partner y yiunan.”—Wilson Quarterly, revista, Merca.

“Sin amor.” (2 Timoteo 3:3) “Violencia den famia ta e factor dominante den e bida di tur dia di comunidadnan rond mundo.”—Journal of the American Medical Association, revista, Merca.

“Sin dominio propio.” (2 Timoteo 3:3) “Hopi articulo riba prome pagina di corantnan di tur mainta ta refleha mentenan cu falta di dominio propio, integridad moral y  compasion cu nan prohimo y asta cu nan mes . . . Si nos sociedad sigui tolera agresion den e forma aki, pronto lo e perde tur sentido moral.”—Bangkok Post, corant, Tailandia.

“Grosero.” (2 Timoteo 3:3) “Rabia iracional y descontrola [ta] bisto riba caya, den maltrato den famia . . . y den e violencia aparentemente sin motibo y innecesario cu hopi bes ta compaña actonan criminal. Hende no sa nunca ki ora ta presenta un acto violento y victimanan ta sinti nan emocionalmente isola y vulnerable.”—Business Day, corant, Zuid Africa.

‘Stimado di placer mas bien cu stimado di Dios.’ (2 Timoteo 3:4) “Liberacion sexual a bira un bataya moral, den cua e enemigo ta moralidad cristian.”—Boundless, un revista di Internet.

“Cu tin aparencia di ta religioso . . . ma cu ta nenga su poder.” (2 Timoteo 3:5) “[Un exprostituta na Hulanda] a reconoce cu e oposicion contra legalisacion [di prostitucion] ta bini principalmente di gruponan religioso. El a pausa, anto a bisa cu un smile riba su cara cu tempo e tabata prostituta tabatin varios lider religioso entre su clientenan regular. ‘Semper prostitutanan ta bisa cu nan mihor clientenan ta di e comunidad religioso’, el a bisa hariendo.”—National Catholic Reporter, corant, Merca.

Kico Tin den Futuro?

Manera Bijbel a profetisa, e mundo djawe ta yen di problema. Sinembargo, e profesia tocante “e señal di [Cristo su] presencia y di e conclusion di e sistema di cosnan” tin un aspecto positivo. Hesus a bisa: “E evangelio aki di e reino lo wordo predica den henter mundo como un testimonio na tur nacion.” (Mateo 24:3, 14) E evangelio of bon nobo di e Reino di Dios ta ser predica den mas cu 230 pais. Mas cu seis miyon hende cu ta bini di “tur nacion y tur tribu y pueblo y lenga” ta participando activamente den e proclamacion di e Reino. (Revelacion 7:9) Kico nan actividad celoso ta logrando? E ta permiti cu practicamente tur hende riba tera por haya sa kico ta e mensahe di Reino, kico e Reino lo haci y con nan por ricibi su bendicionnan. Si, ‘berdadero conocemento lo aumenta den e tempo di fin.’—Daniel 12:4.

Bo tin bon motibo pa probecha di e conocemento aki. Mira kico lo tuma luga unabes cu Jehova haya cu e bon nobo a ser predica suficientemente. Hesus a bisa: “E ora ei e fin lo yega.” (Mateo 24:14) Esei lo ta e tempo pa Dios elimina tur maldad riba tera. Proverbionan 2:22 ta bisa: “E malbadonan lo wordo corta kita for di tera, y e traidornan lo wordo ranca for di dje cu raiz cu tur.” Kico lo para di Satanas y su demoñonan? Nan lo ser tira den un abismo caminda nan lo no por gaña e nacionnan mas. (Revelacion 20:1-3) E ora ei “e rectonan . . . y e perfectonan lo keda” riba tera. Y nan lo disfruta di e maraviyoso bendicionnan di Reino.—Proverbionan 2:21; Revelacion 21:3-5.

Kico Abo Por Haci?

No cabe duda cu fin di e mundo di Satanas ta cerca. Hende cu ta ignora e evidencia cu nos ta bibando den e ultimo dianan lo no ta prepara ora cu e fin yega. (Mateo 24:37-39; 1 Tesalonicensenan 5:2) P’esei, Hesus a bisa su oyentenan: “Tene cuidou pa boso curason no ta carga pa causa di paranda y buracheria y e precupacionnan di bida, y e dia ei no bin diripiente riba boso manera un trampa; pasobra e lo bin riba tur esnan cu ta biba riba superficie di henter mundo. Ma sea alerta tur ora bai, haciendo oracion pa boso por tin forsa pa scapa di tur e cosnan aki cu ta bai tuma luga, y pa para dilanti dje Yiu di hende.”—Lucas 21:34-36.

Ta solamente e personanan cu tin un posicion aproba dilanti e Yiu di hende, Hesus, lo tin e posibilidad di sobrevivi e fin di e sistema di cosnan aki. Ta masha importante anto pa  nos uza e tempo cu a resta pa busca e aprobacion di Jehova Dios y Hesucristo! Hesus a bisa den oracion na Dios: “Esaki ta bida eterno, cu nan por conoce bo, e unico Dios berdadero, y Hesucristo, kende bo a manda.” (Juan 17:3) Ta sabi anto di bo parti pa siña mas tocante Jehova Dios y su rekisitonan. Testigonan di Jehova den bo comunidad gustosamente lo yuda bo compronde loke Bijbel ta siña. Nos ta invita bo cordialmente pa tuma contacto cu nan of skirbi e editornan di e revista aki.

[Cuadro/​Plachi na pagina 7]

CARACTERISTICANAN DI E ULTIMO DIANAN

DESAROYONAN PRINCIPAL:

▪ Guera.—Mateo 24:6, 7.

▪ Hamber.—Mateo 24:7.

▪ Temblor.—Mateo 24:7.

▪ Pestilencia.—Lucas 21:11.

▪ Aumento di maldad.—Mateo 24:12, NW.

▪ Ruinamento di e tera.—Revelacion 11:18.

HENDE:

▪ Stimado di nan mes. —2 Timoteo 3:2.

▪ Stimado di placa. —2 Timoteo 3:2.

▪ Arogante.—2 Timoteo 3:2.

▪ Desobedecido na mayornan.—2 Timoteo 3:2.

▪ Ingrato.—2 Timoteo 3:2.

▪ Desleal.—2 Timoteo 3:2, NW.

▪ Sin amor. —2 Timoteo 3:3.

▪ Sin dominio propio.—2 Timoteo 3:3.

▪ Grosero.—2 Timoteo 3:3.

▪ Stimado di placer.—2 Timoteo 3:4.

▪ Hipocrita religioso.—2 Timoteo 3:5.

ADORADONAN BERDADERO:

▪ Nan conocemento lo aumenta. —Daniel 12:4.

▪ Ta predica e bon nobo rond mundo.—Mateo 24:14.

[Reconocemento]

UNITED NATIONS/Photo by F. GRIFFING