‘Te Kuti Tuleke Ukulanda Pali Yesu’
“Tufwile Ukunakila Lesa Nga Kateeka Ukucila Ukunakila Abantu”
‘Te Kuti Tuleke Ukulanda Pali Yesu’
CILI ni mu mwaka wa 33 C.E., mu cilye ca lulumbi ica baYuda ica Sanhedrini mu Yerusalemu emo abakonshi ba kwa Yesu 12 umo balabalubulwisha. Mulandu nshi balabalubulwishisha? Ni co baleshimikila pali Yesu. Petro na Yohane balebalubulwisha umuku walenga bubili, lelo abatumwa bambi bena e muku wa kubalilapo.
Shimapepo mukalamba acinkulako abatumwa 12 pa fyo icilye cabebele umuku wafumineko. Umuku wa kubalilapo ilyo babebele ukuleka ukusambilisha pali Yesu, Petro na Yohane batile: “Pinguleni mwe bene, nga calungama mu menso ya kwa Lesa ukuumfwa kuli imwe atemwa ukuumfwa kuli Lesa. Lelo ifwe, te kuti tuleke ukulanda ifyo twamwene no kuumfwa.” Nomba ilyo bapepele kuli Lesa ukuti abakoshe, batwalilile ukubila imbila nsuma.—Imilimo 4:18-31.
Apo shimapepo mukalamba alishibe ukuti icintiinya cakwe tacabombele umuku wa kubalilapo, uno muku wena atila: “Ukweba twamwebele ukuti mwilasambilishisha muli ili shina, nomba, moneni! Namwisushamo Yerusalemu isambilisho lyenu, kabili mulefwaya ukuleta umulopa wa uyu muntu pali ifwe.”—Imilimo 5:28.
Tabalenenuka
Ukwabula umwenso, Petro na batumwa bambi batile: “Tufwile ukunakila Lesa nga kateeka ukucila ukunakila abantu.” (Imilimo 5:29) Ca cine, ukucila ukunakila abantu yaweyawe, tufwile ukunakila Yehova nga ca kuti ifyo abantu balefwaya filelwishanya na mafunde ya kwa Lesa. *
Amashiwi abatumwa balandile ukuti bali no kunakila Lesa epela, yafwile yalifikile sana pa mitima ya ba mu cilye ca Sanhedrini. Nga ca kuti ishi ntungulushi sha baYuda balishipwishe ukuti nani benganakila pali Lesa na bantu nasho kuti shayasuka ukuti tuli no “kunakila Lesa,” pantu balisumina ukuti Lesa e Mulopwe uwabumba fyonse.
Cilemoneka kwati umutumwa Petro e ulelandilako abatumwa bonse, mu fintu ifikumine umulimo wabo. Atila bali no kunakila Lesa ukucila abantu. Kanshi alelanda fye apabuuta ukuti umulandu babapeele wali wa bufi. Bashicilye ba mu Sanhedrini nabeshiba bwino sana ku fyacitike kale ukuti kwali inshita lintu abantu ba kwa Lesa balingile ukunakila Lesa ukucila abantu. Banacimbusa babili mu Egupti batiinine Lesa ukucila Farao ilyo bapuswishe abana baume abafyelwe ku banakashi abaHebere. (Ukufuma 1:15-17) Ilyo Imfumu Hisekia baipatikishe ukucimba, yanakile Yehova ukucila Imfumu Sankeribu. (2 Ishamfumu 19:14-37) Bashicilye ba mu Sanhedrini nabeshiba bwino sana ifyo Amalembo ya ciHebere yalanda ukuti Yehova afwaya abantu bakwe ukumunakila.—1 Samwele 15:22, 23.
Balambulwa pa Mulandu Kuba ne Cumfwila
Amashiwi aya kuti, “tuli no kunakila Lesa ukucila ukunakila abantu,” yafika shicilye umo pa mutima. Gamaliele ni kapingula wa cilye ca Sanhedrini, kabili abantu balimucindika. Alikwata amaka pa balepingula imilandu, kabili bafwile ukukonka ifyo abapanda amano ku mbali ilyo bashilapingula imilandu mu cilye. Gamaliele alanda pa fyacitike kale, atila taciweme ukuikumika ku fyo abatumwa balecita, atila: “Mwiikumika kuli aba bantu, lelo balekeni babe; . . . epali, napamo mwasangwa abalwa na Lesa.”—Imilimo 5:34-39.
Ifyo Gamaliele apanda amano aba mu cilye cikalamba fyalenga bafumya abatumwa mu cifungo. Nangu ca kutila abatumwa babafopaula, umwenso wena tabakwete. Baibolo itila: “Cila bushiku mwi tempele na ku ng’anda ne ng’anda batwalilile ukwabulo kuleka ukusambilisha no kubila imbila nsuma pali Kristu, Yesu.”—Imilimo 5:42.
Abatumwa balibapaalile nga nshi pantu balishipile kabili bakoselepo fye ukuti Lesa e wakwatisha amaka! Abena Kristu ba cine na lelo balacita cimo cine. Inte sha kwa Yehova bashintilila pali Yehova ukuti e Kateka Mukalamba. Nga babeba ukupula ifunde lya kwa Lesa, bacita filya fine abatumwa bacitile abatile: “Tufwile ukunakila Lesa nga Kateeka ukucila ukunakila abantu.”
[Amafutunoti]
^ para. 7 Moneni Kalenda ya Nte sha kwa Yehova pa myeshi ya September na October 2006.
[Akabokoshi ne Fikope pe bula 9]
BUSHE MWALITALA AMUTONTONKANYAPO PALI CI?
Bushe ni kwi Luka afumishe ifyebo Gamaliele alandile ku mbali na ba mu cilye ca Sanhedrini ilyo bashilapingula abatumwa? Nalimo Lesa alisokolwele ifyo Gamaliele alandile kuli Luka. Nakalimo ni Paulo (uwali kale umusambi wa kwa Gamaliele) ewa ebele Luka ifyo Gamaliele asosele. Nelyo limbi Luka aipwishe ifyo fyebo kuli umo uwa mu cilye cikalamba uwatemenwe ifyo abatumwa balebomba.