“Kinahanglang Among Sugton ang Diyos Ingong Magmamando Inay ang mga Tawo”

‘Dili Kami Makahunong sa Pagsulti Bahin Kang Jesus’

KADTO maoy tuig 33 K.P., ug ang lugar mao ang dakong hawanan sa hukmanan sa nasod sa mga Hudiyo didto sa Jerusalem. Niadtong tungora, hapit nang husayon sa Sanhedrin ang 12 ka sumusunod ni Jesu-Kristo. Ngano man? Tungod kay sila nagsigeg sangyaw bahin kang Jesus. Si apostol Pedro ug Juan miatubang sa hukmanan sa ikaduhang higayon. Kini ang unang husay alang sa ubang mga apostoles.

Gisultihan sa hataas nga saserdote ang 12 ka apostoles bahin sa mando nga gipagawas sa hukmanan sa miagi. Nianang higayona, sa dihang gimandoan sila sa paghunong sa pagpanudlo bahin kang Jesus, si apostol Pedro ug Juan mitubag: “Kon matarong man sa panan-aw sa Diyos sa pagpamati kaninyo inay kay sa Diyos, kamo na ang mohukom. Apan alang kanamo, dili kami makahunong sa pagsulti sa mga butang nga among nakita ug nadungog.” Human makaampo alang sa kalig-on, ang mga tinun-an ni Jesus nagpadayon sa pagmantala sa maayong balita.—Buhat 4:18-31.

Kay nasayod nga ang iyang unang mga bahad wala mosaler, niining ikaduhang husay ang hataas nga saserdote miingon: “Hugot kaming nagmando kaninyo nga dili na magpadayon sa pagpanudlo pinasukad niining ngalana, apan, tan-awa! inyong gipuno ang Jerusalem sa inyong pagtulon-an, ug kamo determinado nga mahianhi kanamo ang dugo niining tawhana.”—Buhat 5:28.

Lig-ong Determinasyon

Sa pagtubag nga maisogon, si Pedro ug ang ubang mga apostoles miingon: “Kinahanglang among sugton ang Diyos ingong magmamando inay ang mga tawo.” (Buhat 5:29) Sa pagkatinuod, inay sugton ang mga tawo lamang, kinahanglang atong sugton si Jehova kon ang gipangayo sa mga tawo mosumpaki sa iyang mga sugo. a

Ang gisulti sa mga apostoles nga nagpamatuod sa ilang pagkamaunongon sa Diyos angay untang makapakombinsir sa mga membro sa Sanhedrin. Kon pangutan-on bahin sa pagkamasinugtanon ngadto sa Diyos, kining maong mga pangulo sa Hudiyong katilingban angay untang magkahiusa sa pagtubag: “Sugta ninyo ang Diyos.” Kon buot hunahunaon, di ba nagtuo man sila nga ang Diyos mao ang Soberanong Ginoo sa uniberso?

Lagmit naghawas sa tanang apostoles, si Pedro miingon nga may kalabotan sa ilang ministeryo, ilang sugton ang Diyos inay ang mga tawo. Busa, iyang gipamatud-an nga bakak ang sumbong bahin sa pagkadili-masinugtanon kono sa mga apostoles. Sumala sa kasaysayan sa ilang nasod, ang mga membro sa Sanhedrin nahibalo nga dihay mga higayon nga angay gayong sugton ang Diyos inay ang mga tawo. Ang duha ka mananabang sa Ehipto nahadlok sa Diyos, dili kang Paraon, pinaagi sa pagluwas sa mga batang lalaki nga gihimugso sa Hebreohanong mga babaye. (Exodo 1:15-17) Si Haring Ezequias nagmasinugtanon kang Jehova, dili kang Haring Senakerib, sa dihang gipugos siya sa pagsurender. (2 Hari 19:14-37) Ang Hebreohanong Kasulatan, nga niana sinati ang mga membro sa Sanhedrin, nagpasiugda nga si Jehova nagdahom nga ang iyang katawhan magmasinugtanon kaniya.—1 Samuel 15:22, 23.

Gigantihan ang Pagkamasinugtanon

Labing menos usa ka membro sa hataas nga hukmanan ang dayag nga natandog sa mga pulong “kinahanglang among sugton ang Diyos ingong magmamando inay ang mga tawo.” Si Gamaliel, usa ka  tinamod nga huwes sa Sanhedrin, nag-awhag sa hukmanan sa pagpatalinghog sa iyang maalamong tambag nga iyang gisulti nga silasila ra. Pinaagi sa pagkutlo sa nangaging mga pananglitan, gipasiugda ni Gamaliel nga dili maalamong hilabtan ang buluhaton sa mga apostoles. Siya mihinapos pinaagi sa pag-ingon: “Ayaw panghilabot niining mga tawhana, hinunoa pasagdi lang sila; . . . kay kon dili, basin baya hinuon nga makaplagan kamo nga mga kaaway diay sa Diyos.”—Buhat 5:34-39.

Ang makataronganong gipanulti ni Gamaliel nakakombinsir sa hataas nga hukmanan nga buhian ang mga apostoles. Bisan tuod gibunalan sila, ang mga apostoles wala gayod mahadlok sa maong kasinatian. Hinunoa, ang rekord sa Bibliya nag-ingon: “Matag adlaw diha sa templo ug sa balay ug balay sila wala mohunong sa pagpanudlo ug sa pagpahayag sa maayong balita bahin kang Kristo, si Jesus.”—Buhat 5:42.

Gipanalanginan gayod ang mga apostoles tungod sa ilang lig-ong pagpamatuod nga ang awtoridad sa Diyos mao ang kinalabwan! Ang matuod nga mga Kristohanon karon adunay susamang tinamdan. Ang mga Saksi ni Jehova nagpadayon sa paglantaw kang Jehova ingong ilang Supremong Magmamando. Kon mandoan sa paglihok nga supak sa mga sugo sa Diyos, sila mosanong sama sa mga apostoles: “Kinahanglang among sugton ang Diyos ingong magmamando inay ang mga tawo.”

[Footnote]

[Kahon/Mga hulagway sa panid 9]

NAHIBULONG KA BA SUKAD?

Sa unsang paagi nakuha sa magsusulat sa Ebanghelyo nga si Lucas ang impormasyon bahin sa gipamulong ni Gamaliel sa dihang nagtigom ang Sanhedrin nga silasila ra? Ang gisulti ni Gamaliel mahimong gipadayag sa Diyos kang Lucas. O tingali, si Pablo (usa sa mga tinun-an kanhi ni Gamaliel) ang nagpahibalo kang Lucas bahin sa unod sa gisulti ni Gamaliel. O si Lucas mahimong mikonsulta sa may-simpatiyang membro sa hataas nga hukmanan.