‘Tudi ne bua kutumikila mêyi a Nzambi kumpala kua mêyi a bantu’

‘Katuena mua kulekela kuambila bantu malu a Yezu’

ELABI meji ne: tudi mu tshidimu tshia 33 mu bikondo bietu ebi, ne tudi munda mua tshilumbuluidi tshinene tshia bena Yuda mu Yelushalema. Mu muaba eu, bena tshilumbuluidi etshi bakadi pa kulumbuluisha bayidi 12 ba Yezu Kristo. Mbua bualu kayi? Bualu bavua bambila bantu malu a Yezu. Eu mmusangu muibidi udi mupostolo Petelo ne Yone bikale ku kabadi. Kadi bua bapostolo bakuabu dikumi, eu mmusangu wabu wa kumpala.

Muakuidi munene udi ukonka bapostolo 12 pa bidi bitangila dîyi divua kabadi aka kele musangu wa kumpala. Musangu au, pavuabu batumine mupostolo Petelo ne Yone dîyi bua kulekela kulongesha bantu malu a Yezu, bavua bandamune ne: ‘Nusungule budi buakane ku mêsu kua Nzambi, kutumikila dîyi dienu anyi dîyi dia Nzambi; bualu bua katuena bamanye mua kuenza bualu bukuabu, anu kuambila bantu malu atuakumona ne atuakumvua.’ Bayidi ba Yezu bakalomba Nzambi bua abapeshe dikima. Pashishe, bobu kutungunuka ne kumanyisha lumu luimpe.​—Bienzedi 4:18-31.

Padi muakuidi munene umanya ne: mikanu ya kumpala eyi kayivua mipatule tshipeta tshimpe, udi wamba mu dibalumbuluisha dia musangu muibidi eu ne: ‘Tuakunukandika bikole ne: Kanuyishi bantu mu dîna edi; ne tangilayi, nuenu nuakuuja Yelushalema tente ne diyisha dienu, nudi basue kuteka mashi a muntu eu pambidi petu.’​—Bienzedi 5:28.

Dipangadika dishindame

Ne dikima dionso, Petelo ne bapostolo bakuabu badi bandamuna ne: ‘Tudi ne bua kutumikila mêyi a Nzambi kumpala kua mêyi a bantu.’ (Bienzedi 5:29) Bushuwa, tuetu petu pamutu pa kutumikila mêyi a bantu ba patupu, tudi ne bua kutumikila mêyi a Yehowa padi mikenji ya bantu ibengangana ne mikenji yende. *

Mêyi a bapostolo adi ajadika mudibu balamate Nzambi adi ne bua kutuisha bena mu tshilumbuluidi etshi. Bu bobu mua kukonka balombodi ba bena Yuda aba pa bidi bitangila eu udi muakanyine kutumikila, bavua mua kuandamuna ne dîyi dimue ne: “Tumikilayi mêyi a Nzambi.” Tuamba eku tuela eku, bobu kabatuku bitaba ne: Nzambi udi Mfumu Munene wa diulu ne buloba anyi?

Mbimueneke ne: Petelo udi wakula mu dîna dia bapostolo bonso padiye wamba bua mudimu wabu ne: badi batumikila mêyi a Nzambi pamutu pa mêyi a bantu. Udi wela nunku panshi dibanda didibu babanda bapostolo bua mudibu kabayi batumikila. Bena mu tshilumbuluidi etshi mbamanyine ku malu a kale a ditunga diabu ne: kutu bikondo bitu bimueneka biakane bua kutumikila Nzambi pamutu pa kutumikila bantu. Tshilejilu, baleleshi babidi ba mu Ejipitu bakatshina Nzambi pavuabu balama ne muoyo bana ba balume bavua bakaji bena Ebelu balela, kadi kabakatshina Palô to. (Ekesode 1:15-17) Mukalenge Hezikiya wakatumikila mêyi a Yehowa, kadi ki mmêyi a Mukalenge Saneheliba uvua umuambila bua yeye kudifila kudi baluishi nansha. (2 Bakelenge 19:14-37) Mifundu ya tshiena-Ebelu idi bena mu tshilumbuluidi etshi bamanye bimpe idi yamba ishindika ne: Yehowa mmutekemene bua bantu bende bikale batumikila mêyi ende.​—1 Samuele 15:22, 23.

Ditumikila mêyi didi difuta

Bidi bimueneka ne: mêyi adi bapostolo bamba aa: ‘Tudi ne bua kutumikila mêyi a Nzambi kumpala kua mêyi a bantu,’ mmalenge bikole umue wa  ku bena mu tshilumbuluidi tshinene etshi. Gamaliele, mulumbuluishi udibu banyisha bikole mu tshipangu etshi, udi ufikisha benamu ku diteleja mubelu wende muimpe udiye ubapeshila ku luseke, biibi bikanga. Gamaliele udi wanji kutela bilejilu bia kale, pashishe udi ubaleja ne: ki mbimpe bua bobu kupumbishisha mudimu wa bapostolo. Udi ujikija ne mêyi aa wamba ne: ‘Epukayi kudi bantu aba, kanubenzedi bualu; [tshianana] nebanusangane nuluisha Nzambi mvita.’​—Bienzedi 5:34-39.

Mêyi a meji a Gamaliele adi atuisha bena ku kabadi aka ne abafikisha ku dilekela bapostolo. Nansha mudibu batuta bapostolo mfimbu, bualu ebu kabuena bubatshinyisha nansha kakese. Kadi Bible udi wamba ne: ‘Ku dituku ku dituku, mu ntempelo ne mu nzubu yabu, kabakalekela kuyisha bantu ne kubambila lumu luimpe ne: Yezu udi Kristo.’​—Bienzedi 5:42.

Bushuwa bapostolo bakabeneshibua bikole bua muvuabu baleje anu ne: bukokeshi bua Nzambi budi ku mutu kua bionso! Bena Kristo balelela badi ne mmuenenu wa muomumue lelu. Bantemu ba Yehowa badi batungunuka ne kuangata Yehowa bu Mfumu wabu Mutambe bunene. Bobu babatumine dîyi bua kuenza malu adi abengangana ne mikenji ya Nzambi, badi bandamuna anu bu muakandamuna bapostolo ne: ‘Tudi ne bua kutumikila mêyi a Nzambi kumpala kua mêyi a bantu.’

[Mêyi adi kuinshi]

[Kazubu/​Bimfuanyi mu dibeji 9]

UKATUKU MUDIEBEJE ANYI?

Mmunyi muvua mufundi wa Bible Luka mufike ku dimanya malu avua Gamaliele muambile bena mu tshilumbuluidi ku luseke? Nzambi nkayende nguvua mua kuikala mumanyishe Luka mêyi a Gamaliele ku diambuluisha dia nyuma wende. Bidi mua kuikala kabidi se: Paulo (uvua kale mulongi wa Gamaliele) ke uvua mumanyishe Luka malu avua Gamaliele muambe au. Peshi Luka uvua mua kuikala muyukile ne umue wa ku bena mu tshilumbuluidi atshi uvua wanyisha bapostolo.