“Nakaukolan ya Unoren Mi so Dios, nen Saray Totoo”

‘Agmi Nayarin Agsalitaen so Nipaakar ed si Jesus’

SAY taon ed saman et 33 C.E., tan wala ra’d loob na maaw-awang a silir na nasyonal a korte na saray Judio ed Jerusalem. Diad sayan eksena et usayen la na Sanhedrin so 12 a papatumbok nen Jesu-Kristo. Akin? Lapud ipupulong da so nipaakar ed si Jesus. Komadua lan pankanawnawa parad si apostol Pedro tan Juan ya onalagey ed arap na korte. Balet parad arum ya apostoles, saya so primeron pan-usay ed sikara.

Kakatongtongen na atagey a saserdote so 12 ya apostoles nipaakar ed samay ganggan ya impaakseb la na korte diad primeron inkagawa. Sanen niganggan ed saman iray apostol a di Pedro tan Juan ya ontunda lan manbangat nipaakar ed si Jesus, oniay inkuan da: “No katunongan kasi ed arap na Dios so pangunor a manuna ed sikayo nen say Dios, ukom yo pa. Ta agmi nayarin agsalitaen so anengneng tan nadngel mi.” Kayarin impikasi na saray babangatan nen Jesus a makampakpel ira, nantultuloy ira ed panangiyabawag na maong a balita.—Gawa 4:18-31.

Amta na atagey a saserdote ya aliwan epektibo iramay inmunan impamagyaw to, kanian diad sayan komaduan pan-usay et inkuan to: “Imbilin mi ed sikayo a malet ya agkayo manbangat ed sayan ngaran: et nia, pinano yo so Jerusalem na bangat yo, et getma yo ya ipakasalanan ed sikami so dala na sayan too.”—Gawa 5:28.

Agnagiing a Determinasyon

Si Pedro tan saray arum ya apostol so makmakpel ya inmebat, a kuan da: “Nakaukolan ya unoren mi so Dios, nen saray totoo.” (Gawa 5:29) On, imbes a tuloken iray totoo lambengat, si Jehova so nepeg tayon tuloken sano misumlangan iray igaganggan na totoo ed saray ganggan to. *

Saray imbalikas na saray apostol a mamepekder ed katooran da ed Dios et nepeg lan mangombinse ed saray membro na Sanhedrin. No sarayan lider na saray Judio so natepetan nipaakar ed katutulok ed Dios, oniay pankakasakeyan dan iyebat: “Unoren so Dios.” Tutal, agta sisiaen da a say Dios so Soberanon Katawan na uniberso?

Si Pedro, a mapatnag a pinagkasangiyan na amin ya apostol, so angikuan a no nipaakar ed ministeryo ra, unoren da so Dios nen saray totoo. Diad ontan et pinabitar to ya aliwan tua so akusasyon ya ag-ontutulok iray apostoles. Manlapud awaran na mismon nasyon da, amta na saray membro na Sanhedrin a walaray inkagawa a talagan manepeg ya unoren so Dios nen saray totoo. Duaran manamianak ed Ehipto so tinmakot ed Dios, aliwan diad si Faraon, diad agda impamatey ed ugugaw a lalaki ya inyanak na saray Hebreon bibii. (Exodo 1:15-17) Tinulok nen Arin Ezekias si Jehova, aliwan si Arin Senakerib, sanen dinesdes ya onsuko. (2 Arari 19:14-37) Say Hebreon Kasulatan, a kabkabisado na saray membro na Sanhedrin, so mangidadanet ya iilaloan nen Jehova iray totoo to ya ontulok ed sikato.—1 Samuel 15:22, 23.

Atumangan so Katutulok

Anggan panon et walay sakey a membro na atagey a korte a mapatnag ya atenyeg ed saray salitan “nakaukolan ya unoren mi so Dios, nen saray totoo.” Si Gamaliel, a sakey a dederlengen  ya ukom ed Sanhedrin, so akatangguyor ed korte ya ondengel ed makabat a simbawa to ya imbalikas diad pribadon sesyon. Diad impangidalatdat nen Gamaliel ed saray apalabas ya alimbawa, impabitar to ya aliwan makabat so pibali ed kimey na saray apostoles. Oniay impanampot to: “Agyo pibiangan so sarayan totoo, et paulyan yo ra lambengat: . . . ompan la ingen no ompatnag kayo a misepakan ed Dios.”—Gawa 5:34-39.

Saray makatunongan a balikas nen Gamaliel so angombinse ed atagey a korte pian ibulos iray apostoles. Anggaman nilelewet ira, saray apostol so agbalot tinmalaw lapud sayan asagmakan da. Imbes, oniay inkuan na rekord ed Biblia: “Inagew-agew ed templo tan ed saray kaabungan, ag-ira tinmunda a nambabangat tan nampupulong a si Jesus et Kristo.”—Gawa 5:42.

Agaylan abendisyonan iray apostoles lapud pinansiansia ra a sankatagyan so autoridad na Dios! Ontan met so awawey na saray Kristiano natan. Saray Tasi nen Jehova so lawas manmamatalek ed si Jehova bilang say Supremon Manuley da. No niganggan ira ya onkiwas a sumlang ed saray ganggan na Dios, onebat ira na singa ed inyebat na saray apostoles: “Nakaukolan ya unoren mi so Dios, nen saray totoo.”

[Paimano ed leksab]

[Kahon/Saray litrato ed pahina 9]

KASIN NAUMAMENG YO LA?

Panon kasin nala na managsulat na Ebanghelyo a si Lucas so impormasyon nipaakar ed saray imbaga nen Gamaliel diad pribadon sesyon na Sanhedrin? Nayarin direktan imparungtal na Dios ed si Lucas iray imbaga nen Gamaliel. Posible met a si Pablo (a datin estudyante nen Gamaliel) so angipaamta ed si Lucas no anto iray imbaga nen Gamaliel. Odino nayarin tinmupleg si Lucas ed sakey a masimpatyan membro na atagey a korte.