“Nos Mester Obedesé Dios Mas ku Hende”

‘Nos No Por Laga di Papia Tokante Hesus’

TA AÑA 33 di nos era, i e lugá ta e impreshonante sala di korte di e tribunal nashonal hudiu na Yerusalèm. Den e esenario aki, e Konsilio òf Sanedrin ta kla pa husga 12 siguidó di Hesukristu. Pa ki motibu? Pasobra nan a prediká tokante Hesus. Apòstel Pedro i Juan ta pará dilanti e korte pa di dos biaha. Pa loke ta e otro apòstelnan esaki ta nan promé huisio.

E sumo saserdote ta dirigí su mes na e 12 apòstelnan relashoná ku e órden di korte emití na e okashon anterior. E dia ei, ora a ordená nan pa stòp di siña hende tokante Hesus, apòstel Pedro i Juan a kontestá: “Boso husga si ta korekto den bista di Dios pa skucha na boso mas ku na Dios; pasobra nos no por laga di papia loke nos a mira i tende.” Despues ku Hesus su disipelnan a pidi Dios duna nan kurashi, nan a sigui proklamá e bon nobo.—Echonan 4:18-31.

Mirando ku su menasanan anterior no a surti efekto, e sumo saserdote ta deklará n’e di dos huisio aki: “Nos a taha boso estriktamente pa no sigui siña den e nòmber aki, i mira, boso a yena Yerusalèm ku boso siñansa, i boso tin intenshon di trese sanger di e hòmber aki riba nos.”—Echonan 5:28.

Determinashon Firme

Yen di kurashi, Pedro i e apòstelnan ta kontestá i ta bisa: “Nos mester obedesé Dios mas ku hende.” (Echonan 5:29) Sí, en bes di obedesé simpel hende, nos tin ku obedesé Yehova ora e eksigensianan di hende ta bai kontra su mandamentunan. *

Eigenlijk, e palabranan di e apòstelnan ku a konfirmá nan lealtat na Dios lo mester a impreshoná e miembronan di e Konsilio. Si a puntra nan ken nan mester obedesé, e lidernan aki di e sosiedat hudiu lo mester a respondé unánimamente: “Obedesé Dios.” Al fin i al kabo, nan ta kere ku Dios ta Señor Soberano di universo, tòg?

Papiando aparentemente na nòmber di tur e apòstelnan, Pedro ta deklará ku pa loke ta nan ministerio, nan ta obedesé Dios mas ku hende. Ku esei e ta mustra ku e akusashon relashoná ku nan supuesto desobedensia no tin base. For di e historia di nan mes nashon, e miembronan di e Konsilio sa ku tin biaha ta opviamente korekto pa obedesé Dios mas ku hende. Por ehèmpel, dos partera na Egipto a teme Dios, no Fárao, i a demostrá esei dor di konserbá bida di e yu hòmbernan ku muhénan hebreo a haña. (Eksodo 1:15-17) Rei Ezekias a obedesé Yehova, no Rei Senakerib, ora el a wòrdu preshoná pa entregá. (2 Reinan 19:14-37) E Skritura Hebreo, ku e miembronan di e Konsilio tabata konosé hopi bon, ta enfatisá ku Yehova ta spera di su pueblo pa nan obedes’é.—1 Samuel 15:22, 23.

Obedensia Ta Duna Fruta

Por lo ménos un miembro di e korte supremo aparentemente ta keda impreshoná ku e palabranan  “nos mester obedesé Dios mas ku hende.” Gamaliel, un hues altamente respetá den e Konsilio, ta konvensé e korte pa skucha e konseho sabí ku e ta duna den un seshon tras di porta será. Sitando ehèmpelnan di pasado, Gamaliel ta mustra ku no ta sabí pa interferí ku e trabou di e apòstelnan. E ta terminá bisando: “Keda leu di e hòmbernan aki i laga nan na pas; . . . [sino] boso por haña boso ta bringa kontra Dios.”—Echonan 5:34-39.

E palabranan rasonabel di Gamaliel ta konvensé e korte supremo pa laga e apòstelnan bai. Ounke e apòstelnan ta ser sutá, nan no ta laga e eksperensia aki intimidá nan di ningun manera. En bes di esei, segun e registro bíbliko: “Tur dia, den tèmpel i di kas pa kas, nan tabata sigui siña hende i prediká Hesus komo e Kristu.”—Echonan 5:42.

Yehova a bendishoná e apòstelnan pa e manera firme ku nan a mustra ku su outoridat ta supremo. Awe kristiannan berdadero tin e mesun aktitut. Testigunan di Yehova ta sigui mira Yehova komo nan Gobernante Supremo. Si nan haña òrdu pa bai kontra loke Dios ta manda, nan ta respondé meskos ku e apòstelnan: “Nos mester obedesé Dios mas ku hende.”

[Nota]

[Plachi na página 9]

BO A YEGA DI PUNTRA BO MES?

Kon Lukas, e eskritor di Beibel, a haña sa kiko Gamaliel a deklará den un seshon di e Konsilio tras di porta será? Tal bes Dios a revelá esaki direktamente na Lukas. Ta eksistí e posibilidat tambe ku Pablo (un eks-alumno di Gamaliel) a informá Lukas tokante e kontenido di Gamaliel su diskurso, òf kisas Lukas a konsultá ku un miembro bondadoso di e korte supremo.