“Nos Mester Obedece Dios Mas Cu Hende”

‘Nos No Por Laga di Papia Tocante Hesus’

TA AÑA 33 di nos era, y e luga ta e impresionante sala di corte di e tribunal nacional Hudiu na Jerusalem. Den e escenario aki, e Concilio of Sanedrin ta cla pa husga 12 siguido di Hesucristo. Pa ki motibo? Pasobra nan a predica tocante Hesus. Apostel Pedro y Juan ta para dilanti e corte pa di dos biaha. Pa loke ta e otro apostelnan esaki ta nan prome huicio.

E sumo sacerdote ta dirigi su mes na e 12 apostelnan relaciona cu e orden di corte emiti na e ocasion anterior. E dia ei, ora a ordena nan pa stop di siña hende tocante Hesus, apostel Pedro y Juan a contesta: “Boso husga si ta corecto den bista di Dios pa scucha na boso mas cu na Dios; pasobra nos no por laga di papia loke nos a mira y tende.” Despues cu Hesus su discipelnan a pidi Dios duna nan curashi, nan a sigui proclama e bon nobo.—Echonan 4:18-31.

Mirando cu su menasanan anterior no a surti efecto, e sumo sacerdote ta declara na e di dos huicio aki: “Nos a taha boso strictamente pa no sigui siña den e nomber aki, y mira, boso a yena Jerusalem cu boso siñansa, y boso tin intencion di trece sanger di e homber aki riba nos.”—Echonan 5:28.

Determinacion Firme

Yen di curashi, Pedro y e apostelnan ta contesta y ta bisa: “Nos mester obedece Dios mas cu hende.” (Echonan 5:29) Si, en bes di obedece simpel hende, nos tin cu obedece Jehova ora e exigencianan di hende ta bai contra su mandamentonan. *

En realidad, e palabranan di e apostelnan cu a confirma nan lealtad na Dios lo mester a impresiona e miembronan di e Concilio. Si a puntra nan ken nan mester obedece, e lidernan aki di e sociedad Hudiu lo mester a responde unanimamente: “Obedece Dios.” Al fin y al cabo, nan ta kere cu Dios ta Señor Soberano di universo, toch?

Papiando aparentemente na nomber di tur e apostelnan, Pedro ta declara cu pa loke ta nan ministerio, nan ta obedece Dios mas cu hende. Cu esei e ta mustra cu e acusacion relaciona cu nan supuesto desobediencia no tin base. For di e historia di nan mes nacion, e miembronan di e Concilio sa cu tin biaha ta obviamente corecto pa obedece Dios mas cu hende. Por ehempel, dos partera na Egipto a teme Dios, no Farao, y a demostra esei dor di conserva bida di e yiu hombernan cu e muhernan Hebreo a haya. (Exodo 1:15-17) Rei Ezekias a obedece Jehova, no Rei Senakerib, ora el a wordo presiona pa entrega. (2 Reinan 19:14-37) E Scritura Hebreo, cu e miembronan di e Concilio tabata conoce hopi bon, ta enfatisa cu Jehova ta spera di su pueblo pa nan obedec’e.—1 Samuel 15:22, 23.

Obediencia Ta Duna Fruta

Por lo menos un miembro di e corte supremo aparentemente ta keda impresiona cu e palabranan  “nos mester obedece Dios mas cu hende.” Gamaliel, un hues altamente respeta den e Concilio, ta combence e corte pa scucha e conseho sabi cu e ta duna den un sesion tras di porta sera. Citando ehempelnan di pasado, Gamaliel ta mustra cu no ta sabi pa interferi cu e trabou di e apostelnan. E ta termina bisando: “Keda leu di e hombernan aki y laga nan na pas; . . . [sino] boso por haya boso ta bringa contra Dios.”—Echonan 5:34-39.

E palabranan rasonabel di Gamaliel ta combence e corte supremo pa laga e apostelnan bai. Aunke e apostelnan ta ser suta, nan no ta laga e experencia aki intimida nan di ningun manera. En bes di esei, segun e registro biblico: “Tur dia, den tempel y di cas pa cas, nan tabata sigui siña hende y predica Hesus como e Cristo.”—Echonan 5:42.

Jehova a bendiciona e apostelnan pa e manera firme cu nan a mustra cu su autoridad ta supremo. Awe cristiannan berdadero tin e mesun actitud. Testigonan di Jehova ta sigui mira Jehova como nan Gobernante Supremo. Si nan haya ordo pa bai contra loke Dios ta manda, nan ta responde mescos cu e apostelnan: “Nos mester obedece Dios mas cu hende.”

[Nota]

[Cuadro/​Plachi na pagina 9]

BO A YEGA DI PUNTRA BO MES?

Con Lucas, e escritor di Bijbel, a haya sa kico Gamaliel a declara den un sesion di e Concilio tras di porta sera? Talbes Dios a revela esaki directamente na Lucas. Ta existi e posibilidad tambe cu Pablo (un exalumno di Gamaliel) a informa Lucas tocante e contenido di Gamaliel su discurso, of kisas Lucas a consulta cu un miembro bondadoso di e corte supremo.