’Wi no man tapu fu taki fu Yesus’
„Fu di Gado na wi tiriman, meki wi musu gi yesi na en na presi fu libisma”
’Wi no man tapu fu taki fu Yesus’
A YARI na 33 G.T., èn a Sanhedrin de fu krutu 12 bakaman fu Yesus Krestes na ini a bun bigi krutu-kamra fu a Dyu krutubangi na ini Yerusalem. Fu san ede? Fu di den bakaman ben e preiki fu Yesus. Den apostel Petrus nanga Yohanes de na fesi krutu fu a di fu tu leisi. Gi den tra apostel, disi na a fosi leisi di den kon na fesi krutu.
A granpriester e taigi den 12 apostel taki a krutubangi ben warskow den kaba wan leisi. Na a ten dati, di a krutubangi ben komanderi den apostel fu tapu fu leri sma sani fu Yesus, den apostel Petrus nanga Yohanes taki: „Efu a de so trutru taki Gado feni en bun taki wi e arki unu na presi fu En, dati unsrefi musu sabi. Ma wi no man tapu fu taki fu den sani di wi si èn di wi yere.” Baka di den disipel fu Yesus begi fu kisi deki-ati, dan den tan meki a bun nyunsu bekènti.—Tori fu den Apostel 4:18-31.
Fu di a granpriester sabi taki den disipel no gi yesi na a warskow fu en, meki na a di fu tu leisi te a e krutu den, a e taigi den : „Wi taigi unu krin taki unu no musu gi sma leri moro na ini a nen disi, ma toku unu panya a leri fu unu na ini heri Yerusalem, èn unu de nomonomo fu tyari a brudu fu a man disi kon na wi tapu.”—Tori fu den Apostel 5:28.
Den ben abi wan fasti bosroiti
Sondro fu frede, Petrus nanga den tra apostel taki: „Fu di Gado na wi tiriman, meki wi musu gi yesi na en na presi fu libisma” (Tori fu den Apostel 5:29). Iya, te libisma wani wi fu du sani di no e kruderi nanga den komando fu Yehovah, dan wi no musu gi yesi na libisma, ma wi musu gi yesi na Yehovah. *
Di den apostel taigi den memre fu a Sanhedrin krin taki den ben o tan loyaal na Gado, dan a sani dati ben musu fu overtoigi den memre disi. A no de fu taki dati ibriwan fu den fesiman disi fu a Dyu libimakandra ben sabi taki ala ten sma ben musu gi yesi na Gado. Te yu e luku en bun, dan den ben e bribi taki Gado na a Moro Hei Masra fu hemel nanga grontapu, a no so?
Soleki fa a sori, dan Petrus ben taki gi ala den apostel, di a sori den krutuman taki te a ben abi fu du nanga a diniwroko, dan den musu gi yesi na Gado na presi fu libisma. Sobun, a sori den krutuman taki den no ben abi leti fu taki dati den apostel ben trangayesi. Den memre fu a Sanhedrin ben sabi taki na son okasi sma musu fu gi yesi na Gado na presi fu libisma, èn a historia fu den eigi pipel ben leri den dati. Na ini Egepte, yu ben abi tu uma di ben abi a wroko fu yepi trawan di de fu meki pikin, èn den tu uma disi no ben frede Farao, ma den ben abi frede gi Gado. Fu dati ede den no kiri den beibi boi fu den Hebrew uma (Exodus 1:15-17). Di Kownu Sanherib ben e dwengi Kownu Heskia fu gi abra, dan Heskia no gi yesi na en, ma a gi yesi na Yehovah (2 Kownu 19:14-37). Den Hebrew Buku fu Bijbel di den memre fu a Sanhedrin ben sabi, e sori krin taki Yehovah e fruwakti taki a pipel fu en e gi yesi na en.—1 Samuel 15:22, 23.
Den kisi blesi fu di den gi yesi na Gado
Soleki fa a sori, dan den wortu „wi musu gi yesi na Gado na presi fu libisma”, ben abi krakti tapu wan memre fu a hei krutubangi. Di Gamalièl, wan lespeki krutuman na ini a Sanhedrin, ben de en wawan nanga den tra krutuman, dan a taki-go-taki-kon nanga den so taki te fu kaba den arki a koni rai fu en. Gamalièl taki fu fositen eksempre fu sori taki a de wan don sani fu gens a wroko fu den apostel. A taki te fu kaba: „No fruferi den man disi, ma libi den; . . . bika un musu luku bun taki unu no e feti nanga Gado srefi.”—Tori fu den Apostel 5:34-39.
Den buweisi di Gamalièl gi, meki a hei krutubangi kon frustan taki den musu lusu den apostel. Aladi sma fon den apostel, toku a sani disi no e tapu skreki gi den kwetikweti. Na presi fu dati, Bijbel e taki: „Ibri dei den ben e tan gi sma leri na ini a tempel èn na ibri oso, èn den ben e fruteri sma a bun nyunsu fu Yesus, a Krestes.”—Tori fu den Apostel 5:42.
Den apostel kisi bun furu blesi fu di den tan sori trawan taki a tiri fu Gado na a moro heiwan! Tru Kresten na ini a ten disi abi a srefi denki disi. Yehovah Kotoigi e tan si Yehovah leki a Moro Hei Tiriman fu den. Te sma e komanderi den fu du sani di no e kruderi nanga den tirilin fu Gado, dan den e taki a srefi sani di den apostel ben taki, namku: „Wi musu gi yesi na Gado na presi fu libisma.”
[Futuwortu]
^ paragraaf 7 Luku a Kalender van Jehovah’s Getuigen 2006, september/oktober.
[Faki/Prenki na tapu bladzijde 9]
OITI YU AKSI YUSREFI DISI?
Fa na Evangelie skrifiman Lukas kon sabi san Gamalièl ben taki di den krutuman fu a Sanhedrin ben de den wawan? Kande Yehovah ben gebroiki en santa yeye fu meki Lukas kon sabi san Gamalièl ben taki. A kan de so tu taki Paulus, di ben kisi leri fu Gamalièl, ben fruteri Lukas san Gamalièl ben taki. Noso, kande Lukas ben taki nanga wan memre fu a hei krutubangi, di ben e agri nanga den apostel.