“Nan A Convoca e Sanedrin”

E SUMO sacerdote y e gobernantenan Hudiu tabata man na cabes. Kico nan por a haci pa plakia tur e conmocion cu tabatin rond di Hesucristo? Nan a logra cu el a ser ehecuta, pero awor Hesus su discipelnan tabata cana papia rond Jerusalem cu el a resusita. Con nan por a silencia su discipelnan? Pa tuma un decision, e sumo sacerdote hunto cu su assistentnan a “yama e Concilio hunto”, [“convoca e Sanedrin”, NW] e corte supremo di e pueblo Hudiu.—Echonan 5:21.

Den Israel di prome siglo, gobernador Romano Poncio Pilato tabatin autoridad supremo. Pero con e Sanedrin y Pilato a traha hunto? Con leu nan cada un su autoridad a yega? Ken a forma e Sanedrin y con e tabata funciona?

Con e Sanedrin A Desaroya

E palabra Griego traduci como “Sanedrin” ta nifica literalmente “cai sinta cu.” Esei tabata un termino general pa un asamblea of un reunion. Den tradicion Hudiu, por lo general e tabata referi na un corte of cuerpo hudicial religioso.

Escritornan di e Talmud, cu a ser compila durante e siglonan despues di e destruccion di Jerusalem na aña 70 di nos era, a describi e Sanedrin como un cuerpo cu tabata existi pa hopi tempo caba. Nan a pensa cu semper el a consisti di expertonan cu tabata bini hunto pa debati riba puntonan di e lei Hudiu, y cu e ta data for di tempo cu Moises a convoca 70 anciano pa yud’e dirigi Israel. (Numbernan 11:16, 17) Historiadonan  ta rechasa e teoria aki. Nan ta bisa cu ta despues cu Israel a bin cai bou di e dominio di Persia, algo cu a parce e Sanedrin di prome siglo a cuminsa desaroya. Ademas, segun nan, e concepto cu e Talmud tabatin di e cuerpo aki como un academia di experto ta parce mas e asambleanan rabinico di siglo 2 y 3 y no e Sanedrin di prome siglo. Pues, na ki tempo e Sanedrin a ser forma?

Bijbel ta revela cu e exiliadonan cu a regresa Juda for di Babilonia na aña 537 prome cu nos era tabatin un sistema di gobernacion na nivel nacional. Nehemias y Esdras ta menciona prins-, anciano-, noble- y gobernantenan—talbes e cuminsamento di loke den futuro a bira e Sanedrin.—Esdras 10:8; Nehemias 5:7.

E periodo cu a transcuri entre e tempo cu a completa e Scritura Hebreo y e tempo cu a skirbi e Evangelio di Mateo tabata un periodo di hopi disturbio pa e Hudiunan. Na aña 332 prome cu nos era, Alehandro e Grandi a tuma control riba Judea. Despues di Alehandro su morto, Judea a bin cai bou di dos di e reinonan Griego di su imperio; prome bou di e dinastia di e Tolomeonan y despues bou di e Seleucidonan. Den relatonan tocante e dominio Seleucido, cu a cuminsa na aña 198 prome cu nos era, nos ta haya e prome referencia na un senado di e Hudiunan. Probablemente e asamblea aki tabatin autoridad limita, pero el a duna e Hudiunan e sintimento cu ta nan tabata goberna nan mes.

Na aña 167 prome cu nos era, e Rei Seleucido Antioco IV (Epifanes) a purba impone cultura Griego riba e Hudiunan. El a profana e tempel di Jerusalem dor di sacrifica riba su altar un porco na Zeus. Esaki a provoca un rebelion durante cua e Macabeonan a libra nan mes for di e gobernacion Seleucido y a establece e dinastia Asmoneo. * Na e mesun tempo, e escribanan y e farizeonan—lidernan di e masa cu a respalda e rebelion—a haya mas poder den e gobernacion di nan nacion, locual a pone e clase sacerdotal perde cierto autoridad.

E Sanedrin, manera e Scritura Griego ta describie, a cuminsa haya forma. Lo el a bira un conseho nacional di gobernacion y e corte supremo pa interpretacion di lei Hudiu.

Balansa di Poder

Den prome siglo, Judea tabata den man di Roma. Sinembargo, e Hudiunan tabatin cierto libertad. E politica di Roma tabata pa duna e nacionnan bou di su dominio e derecho pa scohe nan mes forma di gobernacion. P’esei, oficialnan Romano no tabata mete den e tareanan cu cortenan local tabata efectua, y asina nan a evita problemanan cu por a surgi pa motibo di diferencianan di cultura. E idea tabata pa promove pas y e lealtad di e pueblonan di su provincianan dor di permiti nan sigui cu nan mes custumbernan y basicamente goberna nan mes. Fuera di nombra y baha e sumo sacerdote—kende tabata presidente di e Sanedrin—y cobra impuesto, e Romanonan no tabata interveni den asunto di e Hudiunan a menos cu nan  propio soberania y interesnan a rekeri esaki. Manera a sali na cla den e huicio contra Hesus, ta parce cu Roma so tabatin e autoridad di duna castigo di morto.—Juan 18:31.

Pues e Sanedrin tabata maneha mayoria asunto interno di e Hudiunan. E tabatin oficialnan pa aresta hende. (Juan 7:32) Cortenan mas abou a husga casonan civil y crimennan menor sin interferencia Romano. Ora e cortenan mas abou no por a yega na un decision den un caso, nan tabata manda e caso pa e Sanedrin. E sentencianan di e Sanedrin tabata definitivo.

Pa por a keda cu su autoridad, e Sanedrin tabatin cu mantene pas den Judea y sostene e gobernacion Romano. Pero si e Romanonan a haya e sospecho cu e Sanedrin a comete cierto fayonan politico, nan tabata interveni y tuma e medidanan cu nan a haya ta apropia. Un ehempel di esei tabata e aresto di apostel Pablo.—Echonan 21:31-40.

Miembronan di e Corte

E Sanedrin tabatin 71 miembro—e sumo sacerdote y 70 homber prominente di e nacion. Den tempo di e Romanonan e tabata consisti di noblenan di e clase sacerdotal (principalmente saduceo), aristocratnan laico y escribanan experto di e partido di e farizeonan. E aristocratnan di e clase sacerdotal, apoya pa laiconan prominente, a domina e corte. * Mientras e saduceonan tabata mas conservado, e farizeonan tabata mas liberal y tabata principalmente hende comun cu tabatin hopi influencia riba e pueblo. Segun e historiado Josefo, e saduceonan no tabata gusta cumpli cu e exigencianan di e farizeonan. Pablo a probecha di e rivalidad y e diferencianan den creencia cu tabatin entre e gruponan aki ora el a defende su mes dilanti e Sanedrin.—Echonan 23:6-9.

E echo cu e Sanedrin tabata consisti principalmente di aristocrat ta nifica cu probablemente e miembronan tabata permanente y cu ora un puesto a bira vacante, e miembronan existente tabata nombra un miembro nobo. Segun e Mishna, miembronan nobo mester tabata “sacerdote, Levita y Israelita kende nan yiu muhernan tabata permiti pa casa cu sacerdotenan”, esta, Hudiu cu por a presenta un registro genealogico cu a proba di cua famia nan a bini. Siendo cu e corte supremo a supervisa e sistema hudicial di henter e pais, ta parce logico cu ta e hombernan cu tabatin un bon reputacion den e cortenan mas abou lo a haya promocion pa tuma asiento den e Sanedrin.

Area di Autoridad

E Hudiunan tabatin hopi respet pa e Sanedrin, y huesnan den e cortenan mas abou tabata obliga na acepta su decisionnan, sino nan lo a haya castigo di morto. E corte tabata ocupa su mes principalmente cu e cualificacionnan di e sacerdotenan y cu asuntonan cu tabatin di aber cu Jerusalem, su tempel y e adoracion cu tabata rindi einan. De echo, e Sanedrin tabatin autoridad civil solamente riba Judea. Pero dor cu e Sanedrin tabata e autoridad supremo pa interpreta e Lei, el a eherce tambe autoridad moral den e comunidadnan Hudiu na otro partinan di mundo. Por ehempel, e sumo sacerdote y su concilio a instrui lidernan di e sinagoganan na Damasco pa coopera cu e aresto di e siguidonan di Cristo. (Echonan 9:1, 2; 22:4, 5; 26:12) Ademas, e Hudiunan cu a bishita Jerusalem pa e fiestanan probablemente a regresa nan pais cu e decretonan di e Sanedrin.

Segun e Mishna, e Sanedrin so tabatin e autoridad pa atende asuntonan di importancia nacional, pa atende cu huesnan cu a desafia su decisionnan y pa husga profetanan falso. Hesus y Esteban a aparece dilanti e corte acusa como blasfemado, Pedro y Juan como conspirado contra e nacion, y Pablo como un persona cu a profana e tempel.—Marco 14:64; Echonan 4:15-17; 6:11; 23:1; 24:6.

 Huicio di Hesus y Su Discipelnan

Cu excepcion di sabat y dianan santo, tur dia e Sanedrin tabata reuni pa tuma decision, for di ora di e sacrificio di mainta te na ora di e ofrenda di atardi lat. Nan tabata husga casonan solamente durante oranan di dia. Siendo cu tabata dicta sentencia di morto te e dia despues di e huicio, no tabata trata e casonan ei bispo di un sabat of dia di fiesta. Tabata spierta esnan cu a para como testigo fuertemente tocante e seriedad di drama sanger inocente. P’esei, e huicio cu nan a tene anochi contra Hesus—y e sentencia cu nan a dicta—na cas di Caifas bispo di un dia di fiesta tabata ilegal. Pa colmo, e huesnan mes a busca testigo falso y a combence Pilato pa laga ehecuta Hesus.—Mateo 26:57-59; Juan 11:47-53; 19:31.

Segun e Talmud, e huesnan cu a sirbi den casonan di castigo di morto tabata trata na scapa un acusado y a tuma nan tempo pa analisa e pruebanan cuidadosamente. Pero ni Esteban, y prome cu ne ni Hesus, no a ricibi un huicio asina. Esteban su defensa dilanti e Sanedrin a hiba na su morto na man di un grupo di hende cu a piedr’e mata. Y si no tabata pa e Romanonan cu a interveni, apostel Pablo tambe lo a wordo mata bou di circunstancianan similar. De echo, huesnan di e Sanedrin a traha un complot pa mat’e.—Echonan 6:12; 7:58; 23:6-15.

Pero ta parce cu por lo menos un par di miembro di e corte ei tabata hombernan di principio. E gobernante Hudiu hoben cu a papia cu Hesus probablemente tabata miembro di e Sanedrin. Aunke e rikesa di e homber ei tabata un obstaculo p’e, e mester tabatin bon cualidadnan ya cu Hesus a invit’e pa bira Su siguido.—Mateo 19:16-22; Lucas 18:18, 22.

Miedo di loke otro huesnan por a pensa lo a pone Nicodemo, “un gobernante di e Hudiunan”, bishita Hesus ora tabata scur. Asina mes, Nicodemo a defende Hesus dilanti e Sanedrin, puntrando: “Acaso nos Lei ta husga hende sin tend’e prome y sin sa kico e ta haci?” Mas despues Nicodemo a trece “un mescla di mirra y aloe” pa prepara e curpa di Hesus pa entiero.—Juan 3:1, 2; 7:51, 52; 19:39.

Jose di Arimatea, otro miembro di e Sanedrin, a tuma un curashi y pidi Pilato e curpa di Hesus y a pon’e den e graf nobo cu e tabatin. Jose tabata “spera e reino di Dios”, pero miedo di e Hudiunan a strob’e di identifica su mes como un discipel di Hesus. Toch, mester duna merito na Jose pasobra e no a vota na fabor di e complot di e Sanedrin pa laga mata Hesus.—Marco 15:43-46; Mateo 27:57-60; Lucas 23:50-53; Juan 19:38.

E miembro di e Sanedrin, Gamaliel, a duna e otro huesnan e conseho sabi pa laga e discipelnan di Hesus na pas. El a bisa: “Asta boso por haya boso ta bringa contra Dios.” (Echonan 5:34-39) Kico a stroba e corte supremo di reconoce cu Hesus y su discipelnan tabatin e respaldo di Dios? En bes di reconoce e milagernan di Hesus, e Sanedrin a rasona: “Kico nos ta haci? Pasobra e homber aki ta haci hopi milager. Si nos lag’e sigui asina, tur hende lo kere den dje, y e Romanonan lo bin y kita tanto nos luga como nos nacion.” (Juan 11:47, 48) Sed pa poder a corumpi e husticia di e corte supremo Hudiu. Asina tambe, en bes di alegra ora Hesus su discipelnan a cura hende, e lidernan religioso tabata “yen di envidia.” (Echonan 5:17) En realidad como hues, nan lo mester tabata hombernan temeroso di Dios y husto, pero mayoria di nan tabata corupto y deshonesto.—Exodo 18:21; Deuteronomio 16:18-20.

Huicio Divino

Debi cu Israel a desobedece e Lei di Dios y a rechasa e Mesias, Jehova finalmente a rechasa e nacion como su pueblo scohi. Na aña 70 di nos era, e Romanonan a destrui e stad di Jerusalem y su tempel y a pone fin na henter e sistema di cosnan Hudiu, y cu tempo, na e Sanedrin mes tambe.

Jehova su Hues nombra, Hesucristo, lo determina si cualkier miembro di e Sanedrin di prome siglo ta merece un resureccion y ken entre nan a peca contra e spirito santo. (Marco 3:29; Juan 5:22) Nos por ta sigur cu den tumamento di e decisionnan ei, Hesus lo actua cu husticia perfecto.—Isaias 11:3-5.

[Nota]