Jehovap oqaasia uumavoq

Ussatinit pingaarnersat

ISRAELIMI kunngi Salomo „ussatiliorpoq 3.000-inik“. (1 Kunngit 5:12) Ussatit pitsaasut taakkua ullumikkut atuarsinnaavavut? Aap. Taakkua ilarpassui Biibilimi Ussatini, ukiup 717-ip u.n.s. missaani naammassineqartuni, allassimapput. Kapitalit kingulliit marluk kisimik allanit — Jakep erneranit Agurimit kunngimillu Lemuelimit — allataasorineqarput. Isumaqartoqarporli Salomo aamma Lemuelimik ateqartoq.

Oqaatsit isumassarsiarititaasut Ussatiniittut marlunnik siunertaqarput — ’ilisimassusermik ajoqersuussutinillu paasinnissinaaqqulluta’. (Ussatit 1:2) Taakkua iluaqutigissavavut ilisimassuseqalernissatsinnut, ilisimassusermi tassaavoq paasinnilluarsinnaaneq ajornartorsiutinillu aaqqiiniarnermi ilisimasanik atuisinnaaneq. Ussatit aqqutigalugit aamma perorsarneqartarpugut, imaluunniit ileqqorissaarnissamik ilinniartinneqartarpugut. Ussatit taakkua soqutigigutsigik siunnersuutillu taakkunaniittut maleruarutsigik uummatikkut killinneqaatigissavavut, nuannaarnerulissutigissavavut ajunngitsumillu kinguneqassalluni. — Hebræerit 4:12.

’ILISIMASSUSEQ PISIARIUK AJOQERSUUSSUTILLU TAMATIGUT AALAJANGIUSIMANIAKKIT’

(Ussatit 1:1–9:18)

„Ilisimassuseq aqqusinermi nipituumik torlulavoq,“ Salomo oqarpoq. (Ussatit 1:20) Sooruna nipi nipitooq erseqqissorlu tusarnaartariaqaripput? Kapitali 2-mi ilisimassuseqalernerup pitsaaquterpassui eqqaaneqarput. Kapitali 3-mi eqqartorneqarpoq qanoq Jehovamut qanimut attaveqartoqalersinnaanersoq. Taava Salomo ima oqarpoq: „Ilisimassuseq pingaarnerpaatillugu! Ilisimassuseq pisiariuk, paasisimasaqassuseq pisiariuk pigisatit tamaasa akigalugit; Ajoqersuussutit tamatigut aalajangiusimaniakkit.“ — Ussatit 4:7, 13.

Silarsuarmi inuunerlunnerit akiornissaannut suut iluaqutigissavavut? Ussatini kapitalit tallimaanni tamanna akineqarpoq: Eqqarsarsinnaassuserput atortariaqarparput silarsuullu matuma nakutitseriaasii eqqumaffigisariaqarlugit. Aamma eqqarsaatigiuk inuunerlunnerup ilungersunartumik kinguneqartarnera. Kapitalit tulliini mianersoqqussutigineqarput iliuutsit isummallu Jehovamut attaveqarnermut ajoqutaasinnaasut. Kapitalit arfineq-aappaanni inuup inuunerluttup periaaserisartagai piviusorsiortumik allaaserineqarput. Kapitali 8-mi ilisimassutsip naleqangaassusia tamatumalu tamatsinnut kajumissinartui nuanningaartumik allaatigineqarput. Kapitalit qulingiluaanni kapitalini siullerni sammineqartut isummerfigineqarput, isummernerlu pissanganartumik assersuusianngorlugu  ilisimassuseqalernissamik anguniagaqarusulersilluta saqqummiunneqarpoq.

Allassimaffiit pillugit apeqqutit akineqartut:

1:7; 9:10 — Qanoq ililluni Jehovamik mianerinninneq „ilisimasaqarnermut“ aamma ’ilisimassusermut aallarniutaava’? Jehovamik mianerinnittoqanngippat eqqortumik ilisimasaqartoqarsinnaanngilaq, taassumami suut tamaasa pinngortippai Biibilimillu atuakkiortuulluni. (Romamiut 1:20; 2 Timotheusi 3:16, 17) Jehova ilisimasaqarnermut eqqortumut tamarmut pilerfiuvoq. Taamaattumik Jehovamik mianerinninneq ilisimasaqarnermuttaaq aallarniutaasarpoq. Guutimik mianerinninneq aamma ilisimassusermut aallarniutaasarpoq, ilisimassuseqartoqarsinnaanngilarmi ilisimasaqartoqanngippat. Aammami Jehovamik mianerinninngitsup Pinngortitsisup ataqqinaatigisaanik ilisimasaqarnini atorsinnaanngilaa.

5:3 — Sooruna atortittartoq ’arnamik takornartamik’ taaneqartoq? Ussatit 2:16, 17-imi ’arnaq takornartaq’ allaatigineqarpoq ’Guutiminut angerutsiminik puiguisimasutut’. Guutipilussiortoq imaluunniit Mosesip inatsisaanik sumiginnaasoq, soorlu atortittartuunermigut, kinaluunniit takornartamik taaneqartarpoq. — Jeremia 2:25; 3:13.

7:1, 2 — „Oqaatsikka“ aamma „inassutikka“ sunik imaqarpat? Biibilimi ajoqersuutit saniatigut aamma taakkununnga ilaapput angajoqqaajusut najoqqutassiaat ilaqutariinniittut tamarmik iluaqutissaat. Meeqqat inuusuttullu illumi malittarisassat taamaattut najoqqutassiallu Biibilimeersut angajoqqaamik ilinniartitsissutigisaat maleruartariaqarpaat.

8:30, 1900/1961. — ’Suliortoq’ kinaava? Ilisimassutsip kinaassusilikkap imminut suliortutut taanera, ilisimassutsip pissusiinik paasititsiniutaannaanngilaq. Kinaassusiliineq tamanna Guutip angajulliliaanut, Jiisusi Kristusimut, inuttut inunngunngikkallarmat piuneranut assersuutaavoq. Taanna ’suliaminut aallaqqaatigitillugu Jehovap pinngortippaa’ nunami inuttut inunngornera sioqquterujussuarlugu. (Ussatit 8:22) Sunik tamanik pinngortitsinermi Ataatani ’suliortutut’ suleqatigisimavaa. — Kolossemiut 1:15-17.

9:17 — „Imeruersaatissaq tillitaq“ suugami, aamma sooq ’mamarnerua’? Aappariit kinguaassiuutitigut atoqatigiinnerminnik nuannaarutiginninnerat Biibilimi imermik puilasuliameersumik inuummarissinartumik imernermut assersuunneqarpoq. Taamaattumik imeq tillitaq kinguaassiuutitigut inuunerlunnermut assersuutaavoq. (Ussatit 5:15-17) Taamatununa kinguaassiuutitigut attaveqarnermik kingunerlutsitsinani isertuussinermik eqqarsaat imermik taamaattumik mamarnerorpasitsisisartoq imaluunniit nuannernerorpasitsitsisartoq.

Ilinniarfigisinnaasavut:

1:10-14. Mianersortariaqarpugut ajortuliortut pisuunngornissamik neriorsuinerat ajortulioqatigilernissaannut nakutitaassutigeqqunagu.

3:3. Pissuserisariaqakkat ilumoorsuseq, imaluunniit ilumoorfiginnilluni tunniusimaneq, sallusuissuserlu pingaartittariaqarpavut ujamittullu akisuutut nittarsaakkusutatut ersersittarlugit. Pissuserisariaqakkat taakkua uummatitsinnut ’allattariaqarpavut’, ima paasillugu pissuserilivittariaqarpavut.

4:18. Anersaakkut paasinninneq siumukarpoq. Qaamasumiiginnassagutta maniguuttuujuartariaqarlutalu qanilaartuujuartariaqarpugut.

5:8. Inuunerlunnerup sunniutai nipilersuutineersuugaluarpata, aliikkusersuutineersuugaluarpata, internetineersuugaluarpata atuakkaneersuugaluarpata aviisineersuugaluarpataluunniit tamaasa qanillinaveersaartariaqarpavut.

5:21. Inuup Jehovamik asannittup sivikitsuinnarmik nuannaarneq piinnarlugu taassumunnga ajunngitsumik attaveqarnini isumakkeerusussavaa? Soorunami naamik. Ileqqussatigut minguitsuujuarnissamut kajumississutaanerpaasoq tassaavoq Jehovap iliuutsitsinnik isiginninneranik taassumunngalu akisussaanitsinnik ilisimaarinninneq.

6:1-5. Versini taakkunani siunnersorneqarluarpugut ’qularnaveeqqusiisuunnginnissamut’ imaluunniit sianiilliorluni aningaasatigut ikiuinissamut imminut pisussaaffilinnginnissamut! Misissuinerunikkut paasinarsippat sianiilliorsimasugut taava nangaanata ’[inoqaterput] kimigiiserfigisariaqarparput’ ajornartorsiullu aaqqinniarlugu iliuuserisinnaasavut tamaasa iliuuseralugit.

6:16-19. Tunngaviusut arfineq-marluk taakkua tassaapput eqqunngitsuliarisinnaasat tamangajammik. Taakkualu uumiginissaat ilikkartariaqarparput.

 6:20-24. Biibili tunngavigalugu perorsarneqarsimagaanni inuunerlunnerup napiaaniutaanit pisaritinnissamut illersuutaasinnaavoq. Angajoqqaat qitornaminnik taamatut ilinniartitsinissartik sumiginnassanngilaat.

7:4. Ilisimassutsip paasisimasaqassutsillu nuannarinissaat ilinniartariaqarpavut.

USSATIT ATAASIAKKAAT NAJOQQUTARISINNAASAVUT

(Ussatit 10:1–29:27)

Salomop ussatiliaasa sinneri oqariartaasiupput pikkunartut ataasiakkaajusullu. Eqqarsaatit imminnut illuatungeriissillugit, imminnut assingussuteqartillugit imminnulluunniit sanilliullugit allataammata qanoq pissuseqarnissatsinnik, qanoq oqalunnissatsinnik qanorlu isiginnittaaseqarnissatsinnik uagutsinnut ilinniutissaapput kimittuut.

Jehovamik mianerinninneq qanoq naleqartigisoq kapitalini 10-miit 24-mut erseqqissarneqarpoq. Ussatit kapitalini 25-miit 29-mut allassimasut „Judap kunngiata Hizkijap angutitaanit katersorneqarsimapput“. (Ussatit 25:1) Ussatinit taakkunannga ilinniarfigisinnaasatta pingaaruteqarluinnartut ilaat tassaavoq Jehovamik tatiginninneq.

Allassimaffiit pillugit apeqqutit akineqartut:

10:6 — Qanoq ’iluanngitsut qarnaniippa nakuuserneq’? Iluanngitsut, imaluunniit guutiitsut, akeqqersimaarfigineqarajuttaramik, inussiarniiffigineqarnertik immaqa nipangissutigisarpaat. Hebræerisut allassimaqqaarfia allatut aamma isumaqarsinnaagunarpoq kalaallisuunngortitamimi 1900/1961-imeersumi ima nutserneqarsimavoq: ’Iluaatsut qarnisa iluaatsulinerit matoortarpaat.’ Guutiitsut oqaatsit tusaruminartut atorlugit allanik ajoqusiiniarnerminnik taamatut isertuiniarsinnaapput.

10:10 — „Uisorersarluni usseraasoq“ qanoq ajoqusiisinnaagami? „Naakkittaatsoq“ immaqa „salluliorluni“ oqaluunnarani, aamma pissusilersornermigut soorlu ’uisorersarnermigut’ pissutiginiakkani isertorniarsinnavai. (Ussatit 6:12, 13) Taamatut peqquserlunneq ajoqusiingaarsinnaavoq.

11:31 — Sooruna iluanngitsup ’akissarsiassani’ iluartup akissarsiassaanik suli qularnannginnerusumik pisassariumaaraa? Akissarsiassaq pineqartoq tassaavoq taakkua tamarmik immikkut pillaatisiassaat assigiinngitsut. Naapertuilluartoq kukkugaangat perorsaatissinneqartarpoq. Guutiitsoq piaaraluni ajortuliortarpoq allanngorumasarnanilu. Taamaattumik sakkortunerusumik pillagaasariaqarpoq taamatullu pillarneqartarluni.

12:23 — Qanoq ililluni ’ilisimasat nipangiusimaneqarsinnaagamik’? Ilisimasanik nipangiusimanninneq isumaqanngilaq ilisimasanik oqaatigisaqanngivinneq. Isumaqarporli ilisimasat usorsitsaarutiginagit pissuserilluni ilisimasanik allanik avitseqateqarneq.

14:17, NV — Qanoq ’angut eqqarsarsinnaassuseqartoq uumigineqartarpa?. Oqaaseq hebræerisooq ’eqqarsarsinnaassusermik’ nutserneqartoq silappaarissusermik imaluunniit ajortumik eqqarsartaaseqarnermik isumaqarsinnaavoq. Angut ajortumik eqqarsartaasilik soorunami uumigineqartarpoq. Aammali siuneqassuseqartoq eqqarsarsinnaassutsini atorlugu ’silarsuarmut ilaaniarnani’ aalajangertoq uumigineqartarpoq. — Johannesi 15:19, NV.

18:19 — ’Qatanngutaasup ajuallatsinneqartup illoqarfik pallittaalisalik assigigaa’ qanoq paasisariaqarpa? Inuk ajuallatsinneqarsimasoq illoqarfittut unguneqarsimasutut malartitassaanani isumakkeerfiginnikkumanngissinnaavoq. Ajuallatsitsisullu akunnerminni saqitsaassutaat ’pallittaalisap matorsuisa sannerutaattulli’ akimmiffiulersinnaavoq.

 Ilinniarfigisinnaasavut:

10:11-14. Oqalunnerput ineriartornartuussappat eqqorluartumik ilisimasaqartariaqarpugut, uummaterput asanninnermik kajumississuteqartariaqarpoq, ilisimassuserlu qanitsinnit anisussanut aalajangiisuusariaqarluni.

10:19; 12:18; 13:3; 15:28; 17:28. Eqqarsaqqaarluta oqaluttassaagut, oqaaserpassuillu atornagit.

11:1; 16:11; 20:10, 23. Niuernerup tungaatigut unneqqarissuunissarput Jehovap kissaatigaa.

11:4. Nammineerluni Biibilimik atuaqqissaarneq, ataatsimiinnernut najuunneq, qinuneq oqaluusseqataanerlu tunulliullugit pisuunngorniarneq sianiitsuliorneruvoq.

13:4. Ilagiinni akisussaaffeqarusukkaanni silarsuassamiluunniit nutaami inoorusukkaanni ’piummartuneq’, kissaateqangaarnerluunniit, naammanngilaq. Eqiasuitsuusariaqarpugut piumasaqaatillu eqqortinnissaat noqqaassutigisariaqarlugu.

13:24; 29:15, 21. Angajoqqaat asannittut qitornaminnik nukatsitsineq ajorput kukkussutaannilluunniit sumiginnaaneq ajorlutik, kukkussutilli taamaattut sorlanitsinnagit ataataasup anaanasulluunniit meeraq oqaaqqissaartarpaat.

14:10. Misigissutsivut ilorlerpaat eqqoqqissaartumik ersersittuaannannginnatsigik, misigissutsitsinnillu allat paasinnittuaannanngimmata allat tuppallersaasinnaanerat killeqarsinnaavoq. Ajornartorsiuteqalersinnaavugut Jehovamuinnaq annertoqqutissarsiorsinnaalluta.

15:7. Allat ilisimasatsinnik tamanik ataatsikkut oqaluttuutariaqanngilavut, soorlu naasorissaasup naatsiiassaatini tamaasa sumiiffimmut ataatsimut siaruarterneq ajorai. Silatuup ilisimasani annikitsukkuutaarlugit siaruartertarpai, pisariaqartinneqartut naapertorlugit.

15:15; 18:14. Isumalluartuujuarutta nuannaarutissarseriaannaanerussaagut, allaat ajornartorsiuteqarnitsinni atugarliornitsinnilu.

17:24. ’Sianiitsutut’, pingaaruteqartunik aallussaqaratik aalajangersimasumik nakkussaqarsinnaanngitsutut eqqarsaateqarsinnaanngitsutullu, pinnata silatusaarsinnaaqqulluta paasisimasaqassuseq ujartariaqarparput.

23:6-8. Peqqusersuut inoroorsaarnerat mianersorfigiuk.

27:21, 1900/1961. Nersualaartinneq kinaassutsitsinnik qulaarisinnaavoq. Nersualaarneqarnerup nassuertippatigut Jehovamut akiitsugaqartugut taassumunngalu kiffartortuarnissamut kajumissuseqalersippatigut maniguuttuunitsinnut ersiutaassaaq. Nersualaarneqarnerli pingaakujuttunnguutigigutsigu maniguuttuunnginnermut ersiutaassaaq.

27:23-27. Paarsisutut inuuneq aallaavigalugu ussatini taakkunani erseqqissarneqarpoq pilimanianngitsumik inuunikkut eqiasuillunilu sulinikkut nalerisimaarnerup naleqangaassusia. Ingammik Guutip tatigilluinnarnissaata pisariaqarneranik puiuikkiussitittariaqarpaatigut. *

28:5. Jehovamut qinunikkut oqaasianillu atuaqqissaarnikkut ’Jehova ujarutsigu’, taassumunnga iluarisaasumik kiffartussagaanni paasisariaqartut ’tamaasa paasilluassavavut’.

„OQAAQQISSAARUTIT KIMITTUUT“

(Ussatit 30:1–31:31)

Biibilimi Ussatit ’oqaaqqissaarutinik kimittuunik’ naggaserneqarput. (Ussatit 30:1; 31:1, NV) Agurip sanilliussinerit eqqarsalernartut atorlugit oqaaqqissaarutimini erseqqissarpai piumatussutsip qanoq naammatsiuitsiginera, qanorlu angutip arnamik inuusuttumik kanngunartuliorfiginninniarsarinerata paasiuminaatsigisinnaanera. * Mianersoqquneqarpuguttaaq imminut qutsissisinnginnissatsinnik allanullu kamalluta oqalunnginnissatsinnik.

Lemuelip arnaata Lemuelimut oqaaqqissaarutai kimittuut viinnimik imigassanillu kimittuunik atuineq pillugu naapertuilluartumillu eqqartuussineq pillugu iluaqutaasunik siunnersuutitaqarput. Nuliaalluartup allaaserineqarnera ima naggaserneqarpoq: „Suliami inerititai inuulluutiginiarligit; suliani pillugit nersorneqarli isaaffinni.“ — Ussatit 31:31.

Ilisimassuseqalerit, perorsarneqarneq ilassiuk, Guutimik mianerinninneq ineriartortiguk, Jehovalu tatigiuk. Ilaatigut tamakkuupput ussatinit isumassarsiarititaasunit ilinniarsinnaasavut. Taakkunani siunnersuutit maleruartigik taamaalillutalu oqaatsit uku ilumoorneri paasitigik: „Pilluarpoq [Jehovamik] mianerinnittoq.“ — Tussiaat 112:1. (wE 9/15 06)

[Quppernerup ataani ilanngussat]

[Qupp. 18-mi assiliartaq]

Jehova ilisimasaqarnermut eqqortumut tamarmut pilerfiuvoq

[Qupp. 20-mi assiliartaq]

’Ilisamasanik siaruarterineq’ qanoq paasisariaqarpa?