နယပုံပြင်ကျမ်းမှ ပေါ်လွင်ချက်များ
ယေဟောဝါ၏နှုတ်မြွက်စကားတော်သည် အသက်ရှင်၏
နယပုံပြင်ကျမ်းမှ ပေါ်လွင်ချက်များ
ရှေးဣသရေလဘုရင် ရှောလမုန်သည် ‘ပညာရှိစကားသုံးထောင်’ ကို စီရင်နိုင်ခဲ့သည်။ (၃ ဓမ္မရာဇဝင် ၄:၃၂) သူ၏ပညာရှိစကားများကို ကျွန်ုပ်တို့ဖတ်ရှုလေ့လာနိုင်သလော။ ဖတ်ရှုလေ့လာနိုင်ပါသည်။ ဘီစီ ၇၁၇ ခန့်တွင် ရေးသားပြီးစီးခဲ့သော နယပုံပြင်ကျမ်းတွင် ရှောလမုန်၏ပညာရှိစကားများစွာ မှတ်တမ်းတင်ထားသည်။ နောက်ဆုံးအခန်းကြီးနှစ်ခန်းကိုသာ အခြားကျမ်းရေးသူများဖြစ်သော ယာကေသား အာဂုရနှင့် လေမွေလမင်းကြီးတို့ ရေးသားခဲ့သည်ဟုဆို၏။ သို့သော် လေမွေလသည် ရှောလမုန်၏နာမည် နောက်တစ်မျိုးဖြစ်သည်ဟု အချို့ယူဆကြ၏။
မှုတ်သွင်းခံနယပုံပြင်ကျမ်းမှ ပညာရှိစကားများ၏ဦးတည်ချက်နှစ်ရပ်မှာ “ဉာဏ်ပညာနှင့် ဆုံးမသွန်သင်ခြင်းကို သိကျွမ်း” ရန် ဖြစ်သည်။ (သု. ၁:၁၊ သမ) ယင်းပညာရှိစကားများသည် ကိစ္စရပ်များကို ရှင်းလင်းစွာသိမြင်နိုင်စွမ်းနှင့် ပြဿနာများကို အသိပညာရှိရှိဖြေရှင်းနိုင်စွမ်းဖြစ်သော ဉာဏ်ပညာကိုရရှိစေသည်။ ထို့ပြင် ဆုံးမသွန်သင်မှု သို့မဟုတ် ကိုယ်ကျင့်တရားလေ့ကျင့်ပေးမှုတို့ကိုလည်း ရရှိစေသည်။ ပညာရှိစကားများကို ဂရုမူကာ ယင်းအကြံပေးချက်များကိုလိုက်နာခြင်းက စိတ်နှလုံးကိုပုံသွင်းပေးနိုင်ပြီး ပျော်ရွှင်အောင်မြင်စေနိုင်မည်ဖြစ်၏။—ဟေဗြဲ ၄:၁၂။
‘ပညာကိုဆည်းပူးပြီး ဥပဒေသကိုကိုင်ဆွဲလော့’
“ပညာသည် ပြင်မှာကြွေးကြော်၍ လမ်းခရီးတို့၌ မိမိစကားသံကို လွှင့်တတ်၏” ဟုရှောလမုန်ဆိုသည်။ (သု. ၁:၂၀) ယင်းကြွေးကြော်သံကို အဘယ်ကြောင့်နားထောင်သင့်သနည်း။ ဉာဏ်ပညာဆည်းပူးခြင်းသည် အကျိုးများစွာရှိကြောင်း အခန်းကြီး ၂ တွင်ဖော်ပြ၏။ အခန်းကြီး ၃ တွင် ယေဟောဝါနှင့်ရင်းနှီးကျွမ်းဝင်နိုင်ပုံကို ဖော်ပြထားသည်။ ထို့နောက် ရှောလမုန် ဤသို့ဆိုသည်– “ပညာသည် အမြတ်ဆုံးသောအရာဖြစ်၏။ ပညာကိုဆည်းပူးလော့။ ဆည်းဖူးသမျှသောဥစ္စာတို့တွင် ဉာဏ်ကိုဆည်းပူးလော့။ ဥပဒေသကိုကိုင်ဆွဲလော့။ မလွှတ်နှင့်။”—သု. ၄:၇၊ ၁၃။
လောက၏အကျင့်ယိုယွင်းသည့်လမ်းစဉ်များကို အဘယ်အရာက တွန်းလှန်စေနိုင်သနည်း။ အခန်းကြီး ၅ တွင် ဤသို့ဖြေဆိုထားသည်– စဉ်းစားဆင်ခြင်နိုင်စွမ်းကို လေ့ကျင့်ပေးပါ၊ လောက၏နည်းပရိယာယ်များကို သိရှိထားပါ။ အကျင့်ယိုယွင်းခြင်း၏ ကြောက်မက်ဖွယ်ဆိုးကျိုးများကိုလည်း ထည့်သွင်းစဉ်းစားပါ။ နောက်အခန်းကြီးက ယေဟောဝါနှင့်ကျွန်ုပ်တို့၏ဆက်ဆံရေးကို အန္တရာယ်ပြုသည့် အပြုအမူ၊ သဘောထားများကိုရှောင်ရန် သတိပေးထားသည်။ အကျင့်ပျက်ပြားသူ၏လုပ်ဆောင်ပုံကို ဖော်ထုတ်ထားသော အခန်းကြီး ၇ သည် တန်ဖိုးမဖြတ်နိုင်သောဆုံးမစကားဖြစ်သည်။ အခန်းကြီး ၈ တွင် ဉာဏ်ပညာ၏တန်ဖိုးနှင့် မေတ္တာရပ်ခံချက်ကို စိတ်ဝင်စားဖွယ်ဖော်ပြထားသည်။ အထက်ပါနယပုံပြင်ကျမ်းများ၏ နိဂုံးချုပ်အခန်းကြီး ၉ တွင် ဉာဏ်ပညာဆည်းပူးရန် လှုံ့ဆော်ပေးသော စိတ်လှုပ်ရှားဖွယ်ပုံဆောင်ချက်ကို တင်ဆက်ထားသည်။
ကျမ်းစာမေးခွန်းများအဖြေ–
၁:၇; ၉:၁၀၊ ကဘ—ယေဟောဝါကိုကြောက်ရွံ့သောသဘောသည် အဘယ်နည်းဖြင့် “အသိပညာ၏အချုပ်အခြာ” နှင့် “ဉာဏ်ပညာ၏မူလအမြစ်” ဖြစ်သနည်း။ ယေဟောဝါသည် အရာခပ်သိမ်းကိုဖန်ဆင်းပြီး သမ္မာကျမ်းစာကိုလည်း မှုတ်သွင်းခဲ့သောကြောင့် ကိုယ်တော်ကိုမကြောက်ရွံ့ပါက အသိပညာလည်း မရှိနိုင်ပေ။ (ရောမ ၁:၂၀; ၂ တိမောသေ ၃:၁၆၊ ၁၇) ကိုယ်တော်သည် စစ်မှန်သောအသိပညာခပ်သိမ်း၏ ရင်းမြစ်ဖြစ်တော်မူသည်။ ထို့ကြောင့် ယေဟောဝါကိုကြောက်ရွံ့ရိုသေခြင်းသည် အသိပညာ၏အချုပ်အခြာဖြစ်၏။ ဘုရားသခင်ကိုကြောက်ရွံ့ခြင်းသည် ဉာဏ်ပညာ၏မူလအမြစ်လည်း ဖြစ်သည်၊ အကြောင်းမှာ အသိပညာမရှိဘဲ ဉာဏ်ပညာရှိနိုင်မည်မဟုတ်ချေ။ ထို့ပြင် ယေဟောဝါကိုမကြောက်ရွံ့သူသည် သူ၏အသိပညာကို ဖန်ဆင်းရှင်အားဂုဏ်တင်ရန် အသုံးပြုမည်မဟုတ်ပေ။
၅:၃—ပြည့်တန်ဆာမကို “အမျိုးပျက်သော [“သူစိမ်း၊” ကဘ] မိန်းမ” ဟု အဘယ်ကြောင့်ခေါ်ထားသနည်း။ နယပုံပြင် ၂:၁၆၊ ၁၇ တွင် ‘သူစိမ်းမိန်းမ’ ကို “မိမိဘုရားသခင်၏ ပဋိညာဉ်တရားကိုမေ့လျော့သော မိန်းမ” အဖြစ် ဖော်ပြထားသည်။ မှားယွင်းသောဘုရားများကိုဝတ်ပြုသူ သို့မဟုတ် ပြည့်တန်ဆာလုပ်ခြင်းအပါအဝင် မောရှေပညတ်ကို လျစ်လျူရှုသူ မည်သူကိုမဆို အမျိုးပျက်သူ [“သူစိမ်း၊” ကဘ] ဟုခေါ်ထားသည်။—ယေရမိ ၂:၂၅; ၃:၁၃။
၇:၁၊ ၂—“ငါ့စကား၊” “ငါ့ပညတ်” တို့တွင် အဘယ်အရာပါဝင်သနည်း။ ကျမ်းစာသွန်သင်ချက်များအပြင် မိသားစုကောင်းကျိုးအတွက် မိဘတို့ချမှတ်ပေးသော စည်းမျည်းစည်းကမ်းများပါဝင်သည်။ ယင်းစည်းကမ်းများအပြင် မိဘများ၏ ကျမ်းစာနှင့်အညီ သွန်သင်ပေးမှုတို့ကိုလည်း သားသမီးတို့လိုက်နာရမည်။
၈:၃၀၊ ကဘ—“ကျွမ်းကျင်လုပ်သား” ကား မည်သူနည်း။ ဉာဏ်ပညာကို လူပုဂ္ဂိုလ်သဖွယ်တင်စားကာ ကျွမ်းကျင်လုပ်သားအဖြစ် ခေါ်ဆိုခြင်းဖြစ်၏။ ထိုသို့ ပုဂ္ဂိုလ်သဖွယ်တင်စားချက်သည် ဉာဏ်ပညာ၏သရုပ်ကို ဖော်ပြရုံမျှမကဘဲ လူသားဘဝမတိုင်မီ ဘုရားသခင့်သားဦးယေရှုခရစ်ကို ပုံဆောင်သည်။ ကိုယ်တော်သည် လူသားတစ်ဦးအဖြစ် မွေးဖွားမလာမီ အချိန်များစွာကတည်းက၊ ရှေးအမှုတော်တို့ကိုမပြုမီကပင် ဘုရားသခင် “ပိုင်တော်မူ” သည်။ (သု. ၈:၂၂) ကိုယ်တော်သည် အရာခပ်သိမ်းကိုဖန်ဆင်းရာတွင် “ကျွမ်းကျင်လုပ်သား” တစ်ဦးအဖြစ် ခမည်းတော်နှင့်အတူ တက်ကြွစွာလုပ်ဆောင်ခဲ့သည်။—ကောလောသဲ ၁:၁၅-၁၇။
၉:၁၇—“ခိုးသောရေ” ကား အဘယ်နည်း၊ အဘယ်ကြောင့် “ချို” ရသနည်း။ သမ္မာကျမ်းစာ၌ အိမ်ထောင်တွင်းလိင်ဆက်ဆံခြင်းကို ရေတွင်းမှခပ်ယူသည့် အေးမြသောရေသောက်ရခြင်းနှင့် နှိုင်းယှဉ်ထားသောကြောင့် ခိုးသောရေမှာ တိတ်တိတ်ပုန်းလိင်အကျင့်ယိုယွင်းခြင်းကို ပုံဆောင်သည်။ (သု. ၅:၁၅-၁၇) တိတ်တိတ်ပုန်းအကျင့်ယိုယွင်းခြင်းက သူတို့အတွက် ချိုမြိန်ဖွယ်ဖြစ်ပုံရသည်။
ကျွန်ုပ်တို့အတွက် သင်ခန်းစာ–
၁:၁၀-၁၄။ ချမ်းသာကြွယ်ဝမည်ဟု လူဆိုးတို့ကတိပေးခြင်းကြောင့် သူတို့၏ဆိုးညစ်သောလမ်းစဉ်ထဲ မကျရောက်စေရန် သတိထားသင့်သည်။
၃:၃။ ကျွန်ုပ်တို့သည် ကရုဏာတရား သို့မဟုတ် ချစ်ခင်ကြင်နာခြင်းကို အလွန်တန်ဖိုးထားသင့်ပြီး အဖိုးထိုက်သောလည်ဆွဲသဖွယ် အထင်အရှားတင်ပြသင့်သည်။ ထိုအရည်အသွေးများကို မရှိမဖြစ်သောအရာများအဖြစ် နှလုံးသွင်းရမည်။
၄:၁၈။ ဝိညာဉ်ရေးအသိပညာသည် တိုး၍ထွန်းလင်းနေသည်။ ထိုအလင်းနှင့်အညီ ဆက်လျှောက်လှမ်းနိုင်ရန် နှိမ့်ချမှုနှင့်စိတ်နူးညံ့မှုကို တင်ပြနေရမည်။
၅:၈။ တေးဂီတ၊ အပန်းဖြေမှု၊ အင်တာနက်၊ စာအုပ်၊ မဂ္ဂဇင်းများမှလာသော အကျင့်ယိုယွင်းမှုများကို ဝေးဝေးရှောင်ရမည်။
၅:၂၁။ ယေဟောဝါကိုချစ်မြတ်နိုးသူများသည် ခေတ္တသာယာမှုရရန် ကိုယ်တော်နှင့်အဖိုးထိုက်ဆက်ဆံရေးကို အဆုံးရှုံးခံမည်လော။ ဝေးလေစွ။ ယေဟောဝါသည် ကျွန်ုပ်တို့၏လမ်းစဉ်ကိုသိတော်မူပြီး ကျွန်ုပ်တို့ကို စာရင်းရှင်းတော်မူမည်ဖြစ်ကြောင်းသိရှိခြင်းက ကိုယ်ကျင့်တရားစင်ကြယ်နေရန် အဓိကတွန်းအားပေးသည်။
၆:၁-၅။ ဤအခန်းငယ်များတွင် အခြားသူများအတွက် ‘အာမခံပေး’ ခြင်း သို့မဟုတ် ငွေကြေးအရတာဝန်ခံပေးခြင်းကိုရှောင်ရန် အကြံဉာဏ်ကောင်း ပါရှိသည်။ ကျွန်ုပ်တို့၏လုပ်ရပ်ကို ပြန်ဆန်းစစ်ကြည့်သောအခါ ပညာမဲ့ပုံပေါ်ပါက ချက်ချင်းပင် “အဆွေခင်ပွန်း” ထံသွား၍ ဇွဲမလျှော့တမ်း “နှိုးဆော်” တောင်းပန်သင့်ပြီး ကိစ္စရပ်များ ပုံမှန်ပြန်ဖြစ်စေရန် အတတ်နိုင်ဆုံးလုပ်ဆောင်ရမည်။
၆:၁၆-၁၉။ ဤတွင်ပါသော အခြေခံအမျိုးအစားခုနစ်မျိုးသည် မကောင်းမှုအားလုံးနီးပါးနှင့် ပတ်သက်နေသည်။ ယင်းတို့ကို ရွံမုန်းသင့်သည်။
၆:၂၀-၂၄။ ကျမ်းစာ၏သွန်သင်ပဲ့ပြင်မှုသည် အကျင့်ယိုယွင်းမှုထောင်ချောက်ထဲ မကျရောက်စေရန် ကာကွယ်ပေးနိုင်သည်။ ထိုသို့သွန်သင်လေ့ကျင့်ပေးခြင်းကို မိဘတို့လျစ်လျူမရှုသင့်ပေ။
၇:၄။ ဉာဏ်ပညာနှင့်သိနားလည်မှုကို နှစ်သက်လာအောင် ပြုစုပျိုးထောင်သင့်သည်။
ပညာရှိစကားတစ်ခုစီက ကျွန်ုပ်တို့ကိုလမ်းညွှန်ပေး
ရှောလမုန်၏ပညာရှိစကားများမှ သတိပေးချက်သည် လိုရင်းတိုရှင်းစကားပုံများဖြစ်၏။ အထူးသဖြင့် ခြားနားချက်များ၊ နှိုင်းယှဉ်ချက်များ၊ ဥပမာများကိုတင်ဆက်ပြီး ယင်းတို့သည် အပြုအမူ၊ အပြောအဆိုနှင့် သဘောထားတို့အတွက် ထိရောက်သောသင်ခန်းစာများဖြစ်သည်။
အခန်းကြီး ၁၀ မှ ၂၄ တွင် ဘုရားသခင်အား ရိုသေခန့်ညားခြင်း၏တန်ဖိုးကို အသားပေးထားသည်။ အခန်းကြီး ၂၅ မှ ၂၉ ရှိ ပညာရှိစကားများကို “ယုဒရှင်ဘုရင်ဟေဇကိလူတို့” ကူးရေးခဲ့သည်။ (သု. ၂၅:၁) ထိုပညာရှိစကားများက ယေဟောဝါကိုမှီခိုအားထားတတ်စေပြီး အခြားအရေးကြီးသင်ခန်းစာများကို ရရှိစေသည်။
ကျမ်းစာမေးခွန်းများအဖြေ–
၁၀:၆—‘မတရားသောသူ၏နှုတ်ကို ညှဉ်းဆဲခြင်းအပြစ်’ နှင့် မည်သို့ဖုံးပိတ်ထားသနည်း။ ဆိုးညစ်သူသည် တစ်ဖက်သားအား ထိခိုက်နစ်နာစေသည့် မလိုတမာအကြံအစည်ကို အပြောချိုချိုနှင့် ဖုံးပိတ်ထားသည့်သဘောဖြစ်နိုင်သည်။ သို့မဟုတ် ဆိုးညစ်သူတို့သည် ရန်ငြိုးထားခံရလေ့ရှိသောကြောင့် သူတစ်ပါး၏တန်ပြန်ရန်လိုမှုက သူတို့ကိုနှုတ်ဆိတ်သွားစေခြင်းလည်း ဖြစ်နိုင်သည်။
၁၀:၁၀—“မျက်စိမှိတ်သောသူသည်” မည်သို့စိတ်ပူပင်စေသနည်း။ “ဆိုးယုတ်သောသူ” သည် “ကောက်လိမ်သောစကား” ဖြင့်သာမက မျက်စိမှိတ်ခြင်း သို့မဟုတ် မျက်တောင်ခတ်ခြင်းအစရှိသည့် အမူအရာဖြင့်လည်း သူ၏စိတ်ရင်းကိုဖုံးကွယ်ထားသည်။ (သု. ၆:၁၂၊ ၁၃) ထိုလှည့်စားနည်းသည် တစ်ဖက်သားကို အလွန်စိတ်ပူပင်သောကရောက်စေနိုင်သည်။
၁၀:၂၉—‘ယေဟောဝါ၏တရားလမ်း’ ကား အဘယ်နည်း။ ယင်းသည် ကျွန်ုပ်တို့လိုက်လျှောက်သင့်သည့်ဘဝလမ်းစဉ်ကို မဟုတ်ဘဲ လူသားတို့နှင့်ယေဟောဝါဆက်ဆံပုံကို ပြောနေခြင်းဖြစ်သည်။ လူသားတို့နှင့်ဘုရားသခင်ဆက်ဆံပုံတွင် အပြစ်မဲ့သူများကိုကာကွယ်ပေးခြင်းနှင့် ဆိုးညစ်သူများကိုဖျက်ဆီးခြင်း ပါဝင်သည်။
၁၁:၃၁—မတရားသောသူသည် ဖြောင့်မတ်သောသူထက် အဘယ်ကြောင့် အပြစ်ဒဏ် ပို၍ခံသင့်သနည်း။ ဤတွင်ဖော်ပြထားသော အပြစ်ဒဏ်သည် ၎င်းတို့အသီးသီးခံရသော ဆုံးမပဲ့ပြင်ခြင်းအပြစ်ဒဏ်ဖြစ်သည်။ ဖြောင့်မတ်သူသည် အမှားပြုမိသည့်အခါ ဆုံးမပဲ့ပြင်ခြင်းအပြစ်ဒဏ်ကို ခံရသည်။ မတရားသောသူမူကား တမင်တကာအပြစ်ကျူးလွန်ပြီး လမ်းမှန်ကို ပြန်လှည့်မလာလိုပေ။ ထို့ကြောင့် သူသည် ပြင်းထန်သောအပြစ်ဒဏ်ကို ခံထိုက်သည်။
၁၂:၂၃—လူတစ်ဦးသည် “မိမိသိသောအရာကိုပင်” မည်သို့ “ထိမ်ဝှက်” ထားသနည်း။ မိမိသိသောအရာကိုထိမ်ဝှက်ခြင်းဟူသည် လုံးဝမဖော်ပြခြင်းကို မဆိုလိုပါ။ ယင်းအစား သိရှိထားရာကို ဟိတ်ဟန်ထုတ်ကြွားဝါမည်မဟုတ်ဘဲ ပညာသတိရှိရှိထုတ်ဖော်ခြင်းကို ဆိုလို၏။
၁၄:၁၇—“မကောင်းသောအကြံကိုကြံသော [“စဉ်းစားဆင်ခြင်နိုင်စွမ်းရှိ၊” ကဘ] သူ” သည် အဘယ်နည်းဖြင့် မုန်းတီးခံရသနည်း။ “စဉ်းစားဆင်ခြင်နိုင်စွမ်း” ဟူ၍ပြန်ဆိုထားသော ဟေဗြဲစကားလုံးသည် ပိုင်းခြားသိမြင်မှု သို့မဟုတ် မကောင်းသောအကြံဟူ၍ အဓိပ္ပာယ်နှစ်မျိုးရှိနိုင်သည်။ မကောင်းသောအကြံအစည်ရှိသူသည် အမှန်ပင် မုန်းတီးခံရသည်။ သို့သော် စဉ်းစားဆင်ခြင်နိုင်စွမ်းရှိပြီး ‘ဤလောကနှင့်မဆက်ဆံသော’ ပိုင်းခြားသိမြင်တတ်သူလည်း မုန်းတီးခြင်းခံရ၏။—ယောဟန် ၁၅:၁၉။
၁၈:၁၉—“အငြိုးထားသောညီအစ်ကိုသည်” အဘယ်နည်းဖြင့် “ခိုင်ခံ့သောမြို့ထက်သာ၍ခက်” သနည်း။ ထိုသို့သောသူသည် အဝိုင်းခံထားရသည့် “ခိုင်ခံ့သောမြို့” ကဲ့သို့ လွယ်လွယ်နှင့်အလျှော့မပေးတတ်ပေ။ သူနှင့်ပြစ်မှားသူတို့စပ်ကြား ကတောက်ကဆဖြစ်မှုသည် “ရဲတိုက်တံခါးကျင်ကဲ့သို့” အတားအဆီးကြီး ဖြစ်လာနိုင်သည်။
ကျွန်ုပ်တို့အတွက် သင်ခန်းစာများ–
၁၀:၁၁-၁၄။ ကျွန်ုပ်တို့၏စကားများသည် တည်ဆောက်မှုဖြစ်ရန် ကျွန်ုပ်တို့၏စိတ်တွင် တိကျမှန်ကန်သောအသိပညာများ ပြည့်နေသင့်သည်။ ကျွန်ုပ်တို့၏နှလုံးသည် မေတ္တာ၏စေ့ဆော်မှုခံရသင့်သည်။ ဉာဏ်ပညာရှိရှိ ပြောဆိုသင့်သည်။
၁၀:၁၉; ၁၂:၁၈; ၁၃:၃; ၁၅:၂၈; ၁၇:၂၈။ ကျွန်ုပ်တို့သည် စကားများများပြောသူမဖြစ်သင့်ဘဲ သေချာစွာစဉ်းစားပြောဆိုရမည်။
၁၁:၁; ၁၆:၁၁; ၂၀:၁၀၊ ၂၃။ ကျွန်ုပ်တို့စီးပွားရှာရာတွင် ရိုးသားရန် ယေဟောဝါလိုလားတော်မူသည်။
၁၁:၄။ ကိုယ်ပိုင်ကျမ်းစာလေ့လာခြင်း၊ အစည်းအဝေးတက်ရောက်ခြင်း၊ ဆုတောင်းခြင်းနှင့် လယ်ကွင်းလုပ်ငန်းတွင်ပါဝင်ခြင်းတို့ကို လျစ်လျူရှု၍ စည်းစိမ်ဥစ္စာလိုက်စားခြင်းသည် မိုက်မဲလှသည်။
၁၃:၄။ အသင်းတော်တာဝန်များ သို့မဟုတ် ကမ္ဘာသစ်တွင်ရရှိမည့်အသက်တာကို “တောင့်တ” နေရုံနှင့် မလုံလောက်ပေ။ လိုအပ်သောအရည်အချင်းများပြည့်မီရန် ဇွဲလုံ့လထုတ်ကြိုးစားရမည်။
၁၃:၂၄; ၂၉:၁၅၊ ၂၁။ မေတ္တာရှိသောမိဘသည် ကလေးကို အလိုလိုက်လွန်းမည်မဟုတ်။ သူ၏ဉာဉ်ဆိုးများကို မသိကျိုးကျွန်ပြုမည်မဟုတ်။ ယင်းအစား မိခင် သို့မဟုတ် ဖခင်သည် ကလေး၏ဉာဉ်ဆိုးများအမြစ်မစွဲမီ ဖယ်ရှားနိုင်ရန် ဆုံးမပဲ့ပြင်ပေးမည်ဖြစ်သည်။
၁၄:၁၀။ အချိန်တိုင်း ကျွန်ုပ်တို့၏ရင်တွင်းခံစားချက်ကို အတိအကျမပြောပြနိုင်သည့်နည်းတူ လူတိုင်းလည်း အမြဲနားလည်ပေးနိုင်မည်မဟုတ်သောကြောင့် အခြားသူများပေးနိုင်သည့် နှစ်သိမ့်မှုသည် အကန့်အသတ်သာရှိနိုင်သည်။ ယေဟောဝါကို အကြွင်းမဲ့မှီခိုအားထားခြင်းဖြင့်သာ အခက်အခဲအချို့ကို ခံရပ်နိုင်ပေမည်။
၁၅:၇။ လယ်သမားတစ်ဦးသည် တစ်နေရာတည်းတွင် မျိုးစေ့အားလုံး ကြဲမည်မဟုတ်သည့်နည်းတူ လူတစ်ဦးကို ကျွန်ုပ်တို့သိထားသမျှ တစ်ထိုင်တည်းဖြင့် အိတ်သွန်ဖာမှောက်မပြောဆိုသင့်ပေ။ ပညာရှိသူသည် မိမိ၏အသိပညာကို လိုအပ်သလို နည်းနည်းချင်းစီ ဝေမျှသွားမည်ဖြစ်သည်။
၁၅:၁၅; ၁၈:၁၄။ အပြုသဘောထိန်းထားခြင်းက စိတ်ဆင်းရဲစရာအခြေအနေများကြုံရငြား ပျော်ရွှင်နေစေသည်။
၁၇:၂၄။ အရေးကြီးသောကိစ္စများကို အာရုံစိုက်မည့်အစား နေရာအနှံ့မျက်စိကစားပြီး စိတ်ပျံ့လွင့်နေသည့် “မိုက်သောသူ” နှင့်မတူဘဲ သိနားလည်မှုရှိရန် ကြိုးစားခြင်းဖြင့် ဉာဏ်ပညာရှိရှိပြုမူနိုင်မည်ဖြစ်သည်။
၂၃:၆-၈။ ကျွန်ုပ်တို့သည် လူမြင်ကောင်းအောင် ဧည့်ဝတ်ပျူငှာဟန်ဆောင်ခြင်းကို ရှောင်ကြဉ်သင့်သည်။
၂၇:၂၁။ ချီးမွမ်းခြင်းက ကျွန်ုပ်တို့အဘယ်လူစားမျိုးဖြစ်ကြောင်း ဖော်ပြနိုင်သည်။ နှိမ့်ချမှုရှိပါက ချီးမွမ်းခံရချိန်တွင် ယေဟောဝါထံအကြွေးတင်နေကြောင်း အသိအမှတ်ပြုကာ ကိုယ်တော်အား ဆက်ဝတ်ပြုသွားမည်ဖြစ်သည်။ နှိမ့်ချမှုမရှိပါက ချီးမွမ်းခံရသည့်အခါ စိတ်ကြီးဝင်လာသည်။
၂၇:၂၃-၂၇။ ကျေးလက်ဘဝနောက်ခံကို အသုံးပြုထားသည့် ဤပညာရှိစကားသည် အလုပ်ကြိုးစားပြီး ရိုးရှင်းသောဘဝတွင် ရောင့်ရဲနေခြင်း၏တန်ဖိုးကို အလေးပေးထားသည်။ ဘုရားသခင်ကိုသာ မှီခိုအားထားဖို့လိုကြောင်း အထူးအလေးပေးသည်။ *
၂၈:၅။ ကျွန်ုပ်တို့သည် ဆုတောင်းခြင်း၊ ကျမ်းစာလေ့လာခြင်းအားဖြင့် ‘ယေဟောဝါကိုရှာ’ ပါက ကိုယ်တော်နှစ်သက်လက်ခံသည့်နည်းဖြင့် ဝတ်ပြုနိုင်ရန် လိုအပ်သည့်အရာအားလုံးကို “နားလည်” နိုင်ပေသည်။
“ဆုံးမသောတရားစကား”
နယပုံပြင်ကျမ်းကို “ဆုံးမသောတရားစကား” နှစ်မျိုးဖြင့် နိဂုံးချုပ်ထားသည်။ (သု. ၃၀:၁; ၃၁:၁) အာဂုရ၏တရားစကားများတွင် လိုဘမပြေနိုင်ခြင်းကို စဉ်းစားတွေးတောစေသောဥပမာများဖြင့် ပုံဖော်၍ အပျိုမတစ်ဦးအား သွေးဆောင်ဖြားယောင်းပုံကို ခြေရာခံဖို့ မည်မျှခက်ကြောင်း ဖော်ပြထားသည်။ * ကိုယ့်ကိုယ်ကိုချီးမြှောက်ခြင်းနှင့် ဒေါသတကြီးပြောဆိုခြင်းတို့ကိုလည်း သတိပေးထားသည်။
မိခင်ထံမှ လေမွေလရရှိသော တရားစကားများတွင် စပျစ်ရည်နှင့်သေရည်သေရက် သောက်သုံးခြင်းအပြင် ဖြောင့်မတ်စွာစီရင်ခြင်းနှင့်ပတ်သက်၍ အကြံဉာဏ်ကောင်းများ ပါရှိသည်။ သီလနှင့်ပြည့်စုံသောမိန်းမအကြောင်းဖော်ပြချက်ကို ဤသို့အဆုံးသတ်ထားသည်– “ထိုသို့သောမိန်းမကျင့်ရာ အကျိုးကိုပေးလော့။ သူပြုသောအမှုသည် မြို့တံခါးတို့၌ သူ၏အသရေကိုထင်ရှားစေသတည်း။”—သု. ၃၁:၃၁။
ဉာဏ်ပညာကို ရယူပါ၊ ဆုံးမသွန်သင်မှုကို လက်ခံပါ၊ ဘုရားသခင်အားကြောက်ရွံ့စိတ်ကို ပျိုးထောင်ပါ၊ ယေဟောဝါကို မှီခိုအားထားပါ။ အလွန်အဖိုးထိုက်လှသော သင်ခန်းစာများပါတကား! သို့ဖြစ်၍ ထိုအကြံပေးချက်ကို ကျင့်သုံးခြင်းဖြင့် ‘ယေဟောဝါကိုကြောက်ရွံ့သောသူ’ ရရှိသည့် ပျော်ရွှင်မှုကို ခံစားကြပါစို့။—ဆာလံ ၁၁၂:၁။
[အောက်ခြေမှတ်ချက်များ]
^ အပိုဒ်၊ 12 ၁၉၉၁၊ ဩဂုတ် ၁ ရက်ထုတ် ကင်းမျှော်စင် စာမျက်နှာ ၃၁ ကိုရှု။
^ အပိုဒ်၊ 14 ၁၉၉၂၊ ဇူလိုင် ၁ ရက်ထုတ် ကင်းမျှော်စင် စာမျက်နှာ ၃၁ ကိုရှု။
[စာမျက်နှာ ၁၆ ပါ ရုပ်ပုံ]
ယေဟောဝါသည် စစ်မှန်သောအသိပညာခပ်သိမ်း၏ ရင်းမြစ်ဖြစ်
[စာမျက်နှာ ၁၈ ပါ ရုပ်ပုံ]
“ပညာအတတ်ကိုစွန့်ကြဲ” ခြင်းဟူသည် အဘယ်အရာကို ဆိုလိုသနည်း