РАГОН Израилы паддзах Соломон «радзырдта ӕртӕ мин ӕмбисонды» (3 Паддзахӕдты 4:32). Уыцы зондджын ныхӕстӕ нӕ бон искуы ссарын у? О. Соломоны ӕмбисӕндтӕй бирӕтӕ бакӕсӕн ис Библийы Ӕмбисӕндты чиныджы. Уый фыст фӕцис н. э. агъоммӕ 717 азы. Ӕрмӕст фӕстаг дыууӕ сӕрӕй дзурынц, зӕгъгӕ сӕ ныффыстой Иакейы фырт Агур ӕмӕ паддзах Лемуил. Иуӕй-иутӕ та хъуыды кӕнынц, Лемуил кӕй у Соломоны нӕмттӕй иу.

Ӕмбисӕндты чиныг фыст ӕрцыд дыууӕ хъуыддаджы тыххӕй – «цӕмӕй адӕймаг базона зонд ӕмӕ зондамынд» (Ӕмбисӕндтӕ 1:2). Уым цы ӕмбисӕндтӕ ис, уыдон фыст ӕрцыдысты Хуыцауы сыгъдӕг удӕй ӕмӕ нын дӕттынц зонд – ӕххуыс нын кӕнынц, алцӕмӕ дӕр раст цӕстӕй кӕсынӕн ӕмӕ цы базыдтам, уый фӕрцы зын фарстатӕ скъуыддзаг кӕнынӕн. Уыдоны руаджы ма исӕм зондамынд, ома ахуыр кӕнӕм хӕрзӕгъдаудзинадыл. Уыцы ӕмбисӕндтӕ куы кӕсӕм ӕмӕ дзы цы уынаффӕтӕ ис, уыдонмӕ нӕ хъус куы дарӕм, уӕд нӕ зӕрдӕмӕ хъардзысты, амондджындӕр уыдзыстӕм ӕмӕ нын царды фылдӕр ӕнтысдзӕн (Дзуттытӕм 4:12).

АМАЛ КӔН ЗОНД ӔМӔ ЗОНДАМЫНДЫЛ НЫХХӔЦ

(Ӕмбисӕндтӕ 1:1–9:18)

«Ӕцӕг зонд хъӕрӕй дзуры уынджы»,– дзуры Соломон (Ӕмбисӕндтӕ 1:20). Цӕмӕн нӕ хъӕуы хъусын, хъӕрӕй ӕмӕ бӕлвырд цы дзуры, уымӕ? Дыккаг сӕры нымад цӕуынц, зонд амал кӕнын цы арфӕдзинӕдтӕ хӕссы, уыдон. Иегъовӕмӕ куыд баввахс уӕм, уый тыххӕй дзырд цӕуы ӕртыккаг сӕры. Дарддӕр та Соломон дзуры: «Сӕйрагдӕр у зонд. Амал кӕн зонд, ӕмӕ цыдӕриддӕр амал кӕнай, уыимӕ амал кӕн ӕмбаргӕдзинад дӕр. Зондамындыл ныххӕц ӕмӕ йӕ ма суӕгъд кӕн» (Ӕмбисӕндтӕ 4:7, 13).

Цы нын баххуыс кӕндзӕн, цӕмӕй ацы дунейы ӕнӕгъдау митӕй нӕхи хизӕм? Ӕмбисӕндты чиныджы фӕндзӕм сӕр нын уымӕн дзуапп дӕтты, зӕгъгӕ, ӕрхъуыдыдзинады фӕлтӕр ӕмӕ дӕ зӕрдыл дар, дуне дӕ цӕмӕй сайы, уый. Ахъуыды ма кӕн, ӕнӕгъдау ми бакӕнын адӕймагӕн куыд зынаргъ слӕууы, ууыл дӕр. Иннӕ сӕр нӕ фӕдзӕхсы, нӕ хӕлардзинадӕн Иегъовӕимӕ тӕссаг цы хъуыддӕгтӕ ӕмӕ цы зӕрдӕйы фӕндтӕ сты, уыдонӕй. Ӕвдӕм сӕр нын ӕвдисы, ӕнӕгъдау адӕймаг куыд фӕархайы, уый. Ӕстӕм сӕры зӕрдӕмӕхъаргӕ ныхӕстӕй фыст ис, зонд куыд ахсджиаг у ӕмӕ йын куыд стыр нысаниуӕг ис, уый фӕдыл зонд йӕхӕдӕг куыд дзуры, уый. Фарӕстӕм сӕр у хорз кӕронбӕттӕн, йӕ размӕ сӕрты цы ӕмбисӕндтыл цыд дзырд, уыдонӕн. Уый у, зонд агурынмӕ нӕ чи разӕнгард кӕны, ахӕм ирд цӕвиттон.

Фарстытӕн дзуаппытӕ:

1:7; 9:10 – Иегъовӕйӕ тӕрсын «зонды ӕмӕ зонындзинӕдты райдиан» куыд у? Иегъовӕйӕ куы нӕ тӕрсӕм, уӕд зонындзинӕдтӕ не ссардзыстӕм, уымӕн ӕмӕ уый у Дунескӕнӕг, стӕй Фыстад дӕр ныффыссын кодта уый (Ромӕгтӕм 1:20; 2 Тимофеймӕ 3:16, 17). Уый у ӕппӕт ӕцӕг зонындзинӕдты Суадон. Уӕдӕ зонындзинӕдты райдиан у Иегъовӕйӕ тӕрсын. Хуыцауӕй тӕрсын ма у зонды райдиан дӕр, уымӕн ӕмӕ ӕнӕ зонындзинӕдтӕй зонд нӕй. Уымӕй уӕлдай, Иегъовӕйӕ чи нӕ тӕрсы, уымӕ цыфӕнды зонындзинӕдтӕ дӕр куы уа, уӕддӕр сӕ уый никуы спайда кӕндзӕн Сфӕлдисӕджы скадджын кӕнынӕн.

5:3 – Хӕтаг сылгоймаг «ӕцӕгӕлон сылгоймаг» цӕмӕн хуыйны? Ӕмбисӕндты 2:16, 17 «ӕцӕгӕлон сылгоймаг» ӕвдыст цӕуы, «йӕ Хуыцауы бадзырд чи ферох кодта», ахӕм адӕймаджы хуызӕнӕй. Мӕнг хуыцӕуттӕн чи куывта кӕнӕ Моисейы Закъон чи ницӕмӕуал дардта, ахӕм адӕймаджы, стӕй хӕтаг сылгоймаджы дӕр хуыдтой ӕцӕгӕлон (Иереми 2:25; 3:13).

7:1, 2 – Цы сты «мӕ ныхӕстӕ» ӕмӕ «мӕ фӕдзӕхстытӕ»? Библийы ахуырӕдтӕй  уӕлдай ма уыдон сты, ныййарджытӕ сӕ бинонты хӕрзӕбонӕн сӕ хӕдзары цы ӕгъдӕуттӕ сӕвӕрынц, уыдон. Сывӕллӕттӕ сӕ хъуамӕ ӕххӕст кӕной, стӕй ма хъуамӕ ӕххӕст кӕной, сӕ ныййарджытӕ сын Фыстадӕй цы амонынц, уый дӕр.

8:30 – Чи у «дӕсны кусӕг»? Зонд ӕвдыст цӕуы адӕймаджы хуызы ӕмӕ йӕхи хоны дӕсны кусӕг. Ам дзырд ӕрмӕст ууыл нӕ цӕуы, ӕмӕ аив ӕвзагӕй фыст ӕрцыдысты, зонд цы хъуыддӕгтӕй бӕрӕг кӕны, уыдон. Зонд адӕймаджы хуызы фӕсномыгӕй ӕвдисы Хуыцауы фыццаггуырд Фырты, Йесо Чырыстийы, цалынмӕ зӕхмӕ не ’рцыд, уӕдмӕ. Зӕххыл куы райгуырд, уымӕй йӕ бирӕ раздӕр Хуыцау «сфӕлдыста йӕ фӕндаджы райдианӕй» (Ӕмбисӕндтӕ 8:22). Уый уыд «дӕсны кусӕг» ӕмӕ йӕ Фыдимӕ зӕрдиагӕй фӕлдыста ӕппӕт дӕр (Колоссӕгтӕм 1:15–17).

9:17 – Цы сты «давӕггаг дӕттӕ» ӕмӕ «адджын» цӕмӕн сты? Ӕмкъайады лӕг ӕмӕ усы ’хсӕн цы ӕхцон ахастытӕ вӕййы, уыдон Библи бары, суадоны дон нуазын куыд ӕхсызгон вӕййы, уыимӕ. Давӕггаг дӕттӕ та ӕвдисынц ӕнӕгъдау сусӕг ахастытӕ (Ӕмбисӕндтӕ 5:15–17). Ахӕм ӕнӕгъдау ми чи бакӕны, уый афтӕ фенхъӕлы, ӕмӕ йӕ ничи базондзӕн, ӕмӕ йӕм уыцы дӕттӕ адджын дӕр уымӕн фӕкӕсынц.

Зондзонӕнтӕ махӕн

1:10–14. Мах хъуамӕ нӕхи хъахъхъӕнӕм, цӕмӕй нын тӕригъӕдджынтӕ ныфсытӕ куы ӕвӕрой, схъӕздыг уыдзыстут, зӕгъгӕ, уӕд се ’взӕр фӕндӕгтӕм ма адзӕгъӕл уӕм.

3:3. Мах хъуамӕ стыр аргъ кӕнӕм ӕнувыд уарзт ӕмӕ ӕцӕгадӕн, ӕмӕ цыма зынаргъ фӕрдгуытӕ сты, уыйау сӕ ӕргомӕй ӕвдисӕм. Хъуамӕ сӕ нӕ зӕрдӕйыл ныффыссӕм, ӕмӕ нӕ удыхъӕды ныффидар уой.

4:18. Хуыцауы Ныхасы цы зонындзинӕдтӕ ис, уыдон бӕлвырдӕй-бӕлвырддӕр кӕнынц. Цӕмӕй рухсы цӕуӕм, уый тыххӕй хъуамӕ дарддӕр дӕр уӕм сӕрныллӕг ӕмӕ бонзонгӕ.

5:8. Мах хъуамӕ нӕхи дард ласӕм ӕнӕгъдау ӕндӕвдадӕй – музыкӕйӕ цӕуа, хиирхӕфсӕнтӕй, Интернетӕй ӕви чингуытӕ ӕмӕ журналтӕй.

5:21. Цымӕ Иегъовӕйы чи уарзы, уый йӕ хӕлардзинад йемӕ ӕхцондзинады цалдӕр минутыл баивдзӕн? Кӕй зӕгъын ӕй хъӕуы, нӕ! Сыгъдӕгдзинад хъахъхъӕнын та нӕ ӕппӕты тынгдӕр уымӕн фӕнды, ӕмӕ зонӕм, цыдӕриддӕр аразӕм, уый Иегъовӕ кӕй уыны ӕмӕ йӕ разы дзуапп кӕй дӕттӕм.

6:1–5. Ацы стихты цӕй хорз уынаффӕ ис, цӕмӕй искӕй бӕсты нӕхимӕ бӕрндзинад ма исӕм, кӕнӕ та ӕхцайы хъуыддаджы искӕй бӕсты дзырд ма дӕттӕм! Цы сарӕзтам, ууыл лӕмбынӕг куы ахъуыды кӕнӕм ӕмӕ куы бамбарӕм, раст нӕ бакодтам, уӕд хъуамӕ ӕвӕстиатӕй архайӕм: уыцы адӕймагӕн лӕгъстӕ кӕнӕм ӕмӕ нӕ бон цы у, уый аразӕм хъуыддӕгтӕ сраст кӕнынӕн.

6:16–19. Адон сты авд сӕйраг хъуыддаджы, ӕмӕ сӕм, зӕгъӕн ис, хауынц ӕппӕт ӕвзӕр митӕ дӕр. Хъуамӕ сӕ нӕхицӕн ӕнӕуынон скӕнӕм.

 6:20–24. Сывӕллон гыццылӕй фӕстӕмӕ Библийы уагӕвӕрдтӕм гӕсгӕ куы хъомыл кӕна, уӕд ӕй уый, гӕнӕн ис, ӕнӕгъдаудзинады къӕппӕгӕй бахиза. Ныййарджыты сӕ сывӕллӕттӕн зонд амонын кӕй хъӕуы, уымӕ хъуамӕ куыдфӕндыйы цӕстӕй ма кӕсой.

7:4. Мах хъӕуы бауарзын зонд ӕмӕ ӕмбаргӕдзинад.

ХИЦӔН ӔМБИСӔНДТӔ НЫН ДӔТТЫНЦ РАЗАМЫНД

(Ӕмбисӕндтӕ 10:1–29:27)

Соломоны иннӕ ӕмбисӕндтӕ сты хицӕн цыбыр хъуыдытӕ. Фыст сты ныхмӕвӕрдтӕ ӕмӕ абарстыты хуызы ӕмӕ хорз зондамындтӕ сты, адӕймаг йӕхи куыд хъуамӕ дара, куыд хъуамӕ дзура ӕмӕ цардмӕ цы цӕстӕй хъуамӕ кӕса, уымӕн.

10–24 сӕрты дзырд цӕуы, Иегъовӕйӕ тӕрсын куыд ахсджиаг у, уый тыххӕй. 25–29 сӕрты цы ӕмбисӕндтӕ ис, уыдон рафыстой «Иудӕйы паддзах Езекийы адӕм» (Ӕмбисӕндтӕ 25:1). Ацы ӕмбисӕндтӕй ахуыр кӕнӕм нӕ ныфс Иегъовӕйыл дарын ӕмӕ ма бирӕ ӕндӕр ахсджиаг хъуыддӕгтыл.

Фарстытӕн дзуаппытӕ:

10:6 (НД) – Куыд ӕмбарын хъӕуы «фыдзӕрдӕ адӕмы дзых фыдми ӕмбӕхсы»? Ӕвӕццӕгӕн, уый афтӕ ӕмбарын хъӕуы, ӕмӕ фыдзӕрдӕ адӕм адджын ныхӕстӕй фембӕхсынц, иннӕты тыххӕй сӕм цы фыдвӕндтӕ вӕййы, уыдон. Кӕнӕ та афтӕ, ӕмӕ сӕхӕдӕг иннӕты ныхмӕ куыд цӕуынц, афтӕ сын сӕхи ныхмӕ куы рацӕуынц, уӕд ныхъхъус вӕййынц.

10:10 – «Йӕ цӕст чи ныкъулы», уый маст куыд хӕссы? «Ницӕйаг адӕймаг» ӕрмӕст «мӕнг ныхӕстӕ нӕ кӕны», фӕлӕ ма йӕ зӕрдӕйы цы ис, уый ӕмбӕхсы йӕ буары змӕлдӕй дӕр, зӕгъӕм, «йӕ цӕст ныкъулы» (Ӕмбисӕндтӕ 6:12, 13). Йӕ амӕттагӕн уыцы мӕнгарддзинад, гӕнӕн ис, стыр маст ӕрхӕсса.

10:29 – «Иегъовӕйы фӕндаг» цы у? Ацы стихы фӕндаг у, мах кӕуыл хъуамӕ цӕуӕм, уыцы царды фӕндаг нӕ, фӕлӕ Иегъовӕ адӕмӕн куыд у, уый. Уыцы хъуыддаг, ӕнаипп чи у, уыдонӕн нысан кӕны, ӕдас кӕй уыдзысты, фыдгӕнджытӕн та – кӕй фесӕфдзысты.

11:31 – Фыдгӕнӕг рӕстгӕнӕгӕй фылдӕр цӕмӕн хъуамӕ райса? Ам, райса, зӕгъгӕ, амоны ӕфхӕрдмӕ, ома алкӕмӕ дӕр цы ӕфхӕрд ӕрхауы, уымӕ. Рӕстгӕнӕг куы фӕрӕдийы, уӕд йӕ рӕдыдтыты тыххӕй райсы ӕфхӕрд. Фыдгӕнӕг тӕригъӕд кӕны барӕй ӕмӕ йӕ нӕ фӕнды йе ’взӕр митӕ уадзын. Уымӕ гӕсгӕ уый вӕййы карз ӕфхӕрды аккаг ӕмӕ йӕ бавзары.

12:23 – Адӕймаг зонындзинӕдтӕ куыд ӕмбӕхсы? Зонындзинӕдтӕ ӕмбӕхсын ууыл дзурӕг нӕу, ӕмӕ адӕймаг цы зоны, уый хъуамӕ ӕппындӕр ма дзура. Уый нысан кӕны, адӕймаг кӕй у ӕмбаргӕ ӕмӕ, кӕм цы зӕгъа, ууыл кӕй хъуыды кӕны ӕмӕ йӕ зонындзинӕдтӕй кӕй не ’ппӕлы.

14:17 – Ӕрхъуыдыдзинад кӕмӕ ис, уыцы адӕймаг ӕнӕуынон цы хуызы у? «Ӕрхъуыдыдзинад»-ӕй цы дзуттаг дзырд ратӕлмац кодтой, уый нысан кӕны ӕмбаргӕдзинад дӕр ӕмӕ фыдвӕндтӕ дӕр. Кӕй зӕгъын ӕй хъӕуы, фыдвӕндтӕ чи кӕны, уыцы адӕймаг иннӕтӕн ӕнӕуынон у. Фӕлӕ ӕнӕуынон у ӕмбаргӕ адӕймаг дӕр, «ацы дунеимӕ» иумӕйагӕй кӕмӕн ницы ис (Иоанны 15:19).

18:19 – Кӕй ныхмӕ фӕрӕдыдысты, уыцы ӕфсымӕр фидар сахарӕй ӕнӕбасӕтгӕдӕр куыд у? Фидар сахар басӕттӕн куыд нӕ вӕййы, афтӕ ахӕм адӕймаг дӕр, гӕнӕн ис, ӕмӕ йӕ бафхӕрӕгӕн йӕ рӕдыд ныххатыр кӕнын ма кома. Цӕуыл фӕбыцӕу сты, уыцы хъуыддаг ӕнцонтӕй свӕййы «фидар мӕсыджы ӕвдузӕнау» зын батонӕн.

Зондзонӕнтӕ махӕн:

10:11–14. Цӕмӕй нӕ ныхӕстӕ иннӕтӕн ныфсы хос уой, уый тыххӕй хъуамӕ нӕ сӕр дзаг уа раст зонындзинӕдтӕй, нӕ зӕрдӕйы уа уарзондзинад, стӕй кӕм цы зӕгъӕм, ууыл хъуыды кӕнӕм.

10:19; 12:18; 13:3; 15:28; 17:28. Исты зӕгъыны размӕ-иу хъуамӕ ахъуыды кӕнӕм, стӕй бирӕ ма дзурӕм.

11:1; 16:11; 20:10, 23. Иегъовӕйы фӕнды, цӕмӕй куысты хъуыддӕгты ӕнӕзӕрдӕхудт уӕм.

11:4. Ӕнӕзонд ми у, хъӕздыгдзинад ӕмбырд кӕныныл бафтын ӕмӕ уый тыххӕй ныууадзын Библи ахуыр кӕнын, фембӕлдтӕм цӕуын, кувын ӕмӕ хъусын кӕнын.

 13:4. Адӕймаджы ӕмбырды исты хӕстӕ ӕххӕст кӕнын кӕнӕ ног дунейы цӕрын «фӕнда», ӕрмӕст уый фаг нӕу. Мах хъуамӕ зивӕг ма кӕнӕм ӕмӕ зӕрдӕбынӕй архайӕм, цӕмӕй уый аккаг суӕм.

13:24; 29:15, 21. Уарзӕгой ныййарджытӕ сӕ сывӕллоны нӕ къулбадӕг кӕнынц ӕмӕ йын йӕ хъӕндзинӕдтӕм куыдфӕндыйы цӕстӕй нӕ кӕсынц. Уыдон ӕвӕстиатӕй архайынц, цӕмӕй уыцы хъӕндзинӕдтӕ сывӕллоны удыхъӕды ма ныффидар уой.

14:10. Нӕ зӕрдӕйы ӕнкъарӕнтӕ алы хатт нӕ бон ӕххӕстӕй зӕгъын кӕй нӕ вӕййы стӕй сӕ иннӕтӕ дӕр алы хатт, мах куыд фӕфӕнды, афтӕ кӕй нӕ бамбарынц, уымӕ гӕсгӕ нын сӕ бон кӕронмӕ баххуыс кӕнын нӕу. Хатт ахӕм уавӕрты бахауӕм, ӕмӕ нӕ ныфс фӕдарӕм ӕрмӕстдӕр Иегъовӕйыл.

15:7. Зӕхкусӕг йӕ мыггӕгтӕ иу ран куыд нӕ ныккалы, афтӕ мах дӕр цы зонӕм, уый адӕймагӕн уыцы иу хатт хъуамӕ ма радзурӕм. Зондджын адӕймаг дӕр йӕ зонындзинӕдтӕ «фӕпарахат кӕны» гыццылгай, цас фӕхъӕуы, уымӕ гӕсгӕ.

15:15; 18:14. Алцӕмӕ дӕр раст цӕстӕй куы кӕсӕм, уӕд зын уавӕрты дӕр нӕ циндзинад нӕ сафдзыстӕм.

17:24. Йӕ цӕстытӕ ӕмӕ йӕ хъуыдытӕ ахсджиаг хъуыддӕгтӕм здӕхт кӕмӕн не сты, фӕлӕ алы рӕтты кӕмӕн хӕтынц, уыцы «ӕдылыйӕ» хъауджыдӕр мах хъуамӕ агурӕм ӕмбаргӕдзинад, цӕмӕй зонджынӕй архайӕм.

23:6–8. Нӕ уазӕгуарзондзинад хъуамӕ цӕстмӕхъус ма уа.

27:21. Ӕппӕлӕн ныхас равдисы, ӕцӕгӕй чи стӕм, уый. Цы хъуыддӕгты тыххӕй нӕ ӕппӕлынц, уыдон нӕ къухы ӕрмӕстдӕр Иегъовӕйы фӕрцы кӕй ӕфтынц, уый куы ӕмбарӕм ӕмӕ нӕ уыцы ӕппӕлд дарддӕр дӕр лӕггад кӕнынмӕ куы разӕнгард кӕна, уӕд уымӕй бӕрӕг уыдзӕн, сӕрныллӕг кӕй стӕм. Фӕлӕ кӕмӕй раппӕлой, уый йӕхицӕй куы ныббуц уа, уӕд уый ууыл дзурӕг уыдзӕн, ӕмӕ йӕм фаг сӕрныллӕгдзинад нӕй.

27:23–27. Ацы ӕмбисӕндты цы хъӕууон царды нывтӕ ис, уыдонӕй зыны, куыд хорз у, адӕймаг зӕрдӕбынӕй куы фыдӕбон кӕна ӕмӕ йӕ хуымӕтӕг цардӕй разы куы уа, уый. Фӕлӕ нӕ сӕйраджыдӕр ахуыр кӕнынц, нӕ цард Хуыцауӕй кӕнгӕ кӕй у, ууыл *.

28:5. Кувгӕйӕ ӕмӕ Библи ахуыр кӕнгӕйӕ Иегъовӕйы куы агурӕм, уӕд бамбардзыстӕм, раст ын лӕггад кӕнӕм, уымӕн нӕ цы хъӕуы, ӕппӕт уыдӕттӕ.

АХСДЖИАГ ХАБӔРТТӔ

(Ӕмбисӕндтӕ 30:1–31:31)

Ӕмбисӕндты чиныг фӕуд кӕны дыууӕ ахсджиаг хабарӕй (Ӕмбисӕндтӕ 30:1; 31:1). Агур спайда кодта хъуыдытыл ӕфтауӕг абарстытӕй: куыд ӕнӕфсис у кӕрӕфдзинад ӕмӕ куыд зын рахатӕн сты, ӕнӕцыд чызджы чи рӕдийын кӕны, ахӕм нӕлгоймаджы митӕ *. Уый ма нӕ фӕдзӕхсы хиппӕлой ӕмӕ мӕстыгӕр ныхасӕй дӕр.

Лемуил йӕ мады зондджын уынаффӕтӕй базыдта, кӕй хъӕуы бӕрц зонын сӕн стӕй ӕндӕр карз нозтытӕй ӕмӕ кӕй хъӕуы рӕстӕй тӕрхон кӕнын. Дарддӕр дзырд цӕуы, хорз ус цавӕр у, ууыл. Фӕстагмӕ дзы ис ахӕм ныхӕстӕ: «Йӕ къухты бӕркадӕй йын схай кӕнут, ӕмӕ йӕ йӕ хъуыддӕгтӕ скадджын кӕнӕнт» (Ӕмбисӕндтӕ 31:31).

Амал кӕн зонд, хъус зондамындмӕ, ахуыр кӕн Хуыцауӕй тӕрсын, дӕ ныфс дар Иегъовӕйыл. Цӕй диссаджы зондзонӕнтӕ ис Хуыцауы сыгъдӕг удӕй фыст ӕмбисӕндты! Уӕдӕ сын сӕ уынаффӕтӕй нӕ царды пайда кӕнӕм ӕмӕ афтӕмӕй «Хицауӕй чи тӕрсы, уыцы лӕгау» амондджын уӕм (Псалом 111:1, МГТ).

[Фиппаинӕгтӕ]

[Нывтӕ 8 фарсыл]

Иегъовӕ у ӕцӕг зонындзинӕдты Суадон

[Ныв 10 фарсыл]

Куыд ӕмбаргӕ у «зонындзинӕдтӕ парахат кӕнын»?