O Loo Ola le Afioga a Ieova

Manatu Tāua Mai le Tusi o Faataoto

SA MAFAI e Solomona, le tupu anamua o Isaraelu ona faia ni ‘ana faataoto e tolu afe.’ (1 Tupu 4:32) Pe mafai ona tatou iloa ana upu atamai? E mafai. Na māeʻa ona tusia le tusi o Faataoto i le tusa o le 717 T.L.M., ma e tele faataoto a Solomona o loo faamauina ai. Na o mataupu mulimuli e lua na tusia e isi tusitala, o Akuru le atalii o Iake ma le tupu o Lemuelu. Ae manatu nisi, o Lemuelu o le isi igoa o Solomona.

E valalua le fuafuaga mo afioga faagaeeina o loo tuufaatasia i le tusi o Faataoto—“ina ia iloa ai le poto ma ia aʻoaʻoina.” (Faataoto 1:2) O afioga nei ua mafai ai ona tatou maua le poto, po o le tomai e manino ai i mea, ma faatatauina le malamalama e foʻia ai faafitauli. Ua mafai ai foʻi ona tatou maua aʻoaʻiga, po o le aʻoaʻoina o amioga tatau. Pe a tatou uaʻi i nei faataoto ma utagia a latou timaʻiga, e iai ni aafiaga i o tatou loto, e tatou te fiafia ma iʻu ai i le manuia.—Eperu 4:12.

‘IA MAUA LE POTO MA TAOFI MAU I UPU E AʻOAʻOINA AI’

(Faataoto 1:1–9:18)

Fai mai Solomona: “O loo alaga le poto i fafo.” (Faataoto 1:20) Aiseā tatou te faalogo atu ai i lenei leotele ma le manino? E tele aogā o le mauaina o le poto, e pei ona taʻua e le mataupu e 2. I le mataupu e 3, o loo taʻu mai ai le auala e maua ai se faiā māfana ma Ieova. Ona faapea mai lea o Solomona: “O le poto o le mea sili lea, ia maua le poto; o mea uma e te maua ia maua mai ai le atamai.”—Faataoto 4:7, 13.

E faapefea ona tatou teena amioga lē mamā a le lalolagi? Ua tali mai le mataupu e 5: Ia faaaogā le mafaufau poto, ma mātau lelei faatosinaga a le lalolagi. Ia utagia foʻi āuga mataʻutia o le faia o amioga lē mamā. I mataupu o loo sosoo ai, o loo lapataʻi mai i gaoioiga ma uiga e ono lamatia ai la tatou faiā ma Ieova. O loo taʻua i le mataupu e 7 se faamatalaga moni o le auala e gaoioi ai le tagata o loo faia amioga lē mamā. E matagofie le auala o loo faailoa mai ai i le mataupu e 8, le aogā ma le lelei o le poto. I le mataupu e 9, o se faaiʻuga faagaeeloto i faataoto uma sa talanoaina i mataupu muamua atu, o loo aumai o se talafaatusa e uunaʻia ai i tatou e saʻili le poto.

 Taliina o Fesili Faale-Tusi Paia:

1:7; 9:10—E faapefea i le mataʻu iā Ieova ona avea ma ‘amataga o le poto’? A leai se mataʻu iā Ieova, e leai foʻi se malamalamaga, auā o Ieova o Lē na Foafoaina mea uma ma o ia o le Tusitala o le Tusi Paia. (Roma 1:20; 2 Timoteo 3:16, 17) O ia le Puna o le malamalamaga moni. E faatoʻā amata ona iai se malamalamaga i se tasi, pe afai e iā te ia le mataʻu ma le migao iā Ieova. O le mataʻu i le Atua o inā foʻi e amata mai ai le poto, auā e lē mafai ona iai le poto pe a leai se malamalamaga. Aemaise o le tagata e lē mataʻu iā Ieova o le a lē taitai ona ia faaaogāina se malamalamaga o iā te ia e avatu ai le mamalu i Lē na Foafoaina Mea.

5:3—Aiseā ua taʻua ai le fafine talitane o “le fafine ese”? O loo faamatala e le Faataoto 2:16, 17 se “fafine ese” e faapea, o se tasi ‘ua galo iā te ia le feagaiga a lona Atua.’ So o se tagata na tapuaʻi i atua sesē pe na faatuatuanaʻi i le Tulafono a Mose, e aofia ai ma le fafine talitane, sa taʻua o se tagata ese.—Ieremia 2:25; 3:13.

7:1, 2—O ā mea o aofia i “aʻu upu” ma “aʻu poloaʻiga”? E lē gata o aʻoaʻoga a le Tusi Paia, ae aofia ai foʻi tulafono po o ni āiāiga e faatulaga e mātua i totonu o aiga mo se lelei o le ʻauaiga atoa. E tatau i talavou ona usitaia nei tulafono, faapea aʻoaʻoga a le Tusi Paia o loo aʻoaʻoina ai e o latou mātua.

8:30—O ai le “tufuga”? O le poto lea e peiseaʻī e iai ni ona uiga faaletagata, ua taʻua o le tufuga. Ua faaaogā e pei o se vaega faalegagana e faamatala ai vala eseese o le poto. Ae o loo faasino atu foʻi faafaatusa i le Alo ulumatua o le Atua, o Iesu Keriso, i lona uluaʻi soifuaga sa iai a o leʻi afio mai e avea ma tagata. A o leʻi taitai fanau mai Iesu o se tagata i le lalolagi, o ia o ‘le amataga o le ala o le Atua.’ (Faataoto 8:22) Ona o ia o le “tufuga,” sa galulue malosi ai ma lona Tamā i le foafoaina o mea uma.—Kolose 1:15-17.

9:17—O ā “vai ua gaoia,” ma aiseā ua “suamalie” ai? E faatusa e le Tusi Paia le fiafiaga e maua e se ulugalii faaipoipo mai a la feusuaʻiga, e peiseaʻī o loo inumia ni vai mamā ma le mālū ua asuina aʻe mai se vaieli. Lona uiga o vai ua gaoia e faasino atu i feusuaʻiga ma amioga lē mamā uma e fai faalilolilo i fafo atu o le faaipoipoga. (Faataoto 5:15-17) O le faia e se tasi o na amioga ma sao mai ai e aunoa ma le faaalialia, ua foliga ai e peiseaʻī o ni vai suamalie.

Lesona mo i Tatou:

1:10-14. Ia faaeteete ina ia lē maileia i tatou e tagata agasala i o latou ala leaga, e ala i a latou folafolaga mo le mauaina o le ʻoa.

3:3. Ia matuā faatāua le alofa ma le faamaoni, ma ia faaalia i lumāmea na uiga e pei ona tatou faaalialia se asoa taugatā. E tatau foʻi ona tatou tusia nei uiga i o tatou loto, ia avea ma vaega o o tatou uiga moni.

4:18. O le malamalamaga faaleagaga o se mea e faasolosolo pea ona faamaninoina. Ae manaʻomia lo tatou lotomaulalo ma agamalu, pe a fia maua pea lenā malamalama.

5:8. E tatau ona tatou matuā faamamao ese mai taaʻiga uma e lē mamā, e ala mai i musika, faafiafiaga, le Initineti, o tusi, mekasini ma nusipepa.

5:21. Po o le a lafoaʻi ea e se tasi e alofa iā Ieova, le la faiā lelei ma lona Atua moni, i ni nai taimi pupuu e faamalie ai ona fiafiaga? E leai! O le uunaʻiga sili ona malosi e tumau ai le mamā tau amio, o le iloaina o loo silafia mai e Ieova mea o loo tatou faia, ma tatou te tali atu iā te ia i le auala o loo tatou ola ai.

6:1-5. Maʻeu ni fautuaga lelei o loo iai i nei fuaiupu ina ia tatou faaeteete mai le vavevave ona fai ma “moni” po o le faia o se feagaiga lē atamai tau tupe mo isi! Afai ua matuā mautinoa le lē atamai o se gaoioiga ua tatou fai, ua tatau loa ona ‘nati’ atu i sa tatou uō ma faia mea uma e mafai ina ia toe faasaʻo le tulaga o mea.

6:16-19. E toetoe lava o amioga sesē uma o loo faavasega atu i vaega autū nei e fitu. E tatau ona faatupu aʻe so tatou ʻinoʻino i nei amioga.

6:20-24. O le tausia aʻe o se tasi i taʻiala a le Tusi Paia mai lava i lona laʻitiiti, o le a puipuia  ai mai le maileia i amioga lē mamā. E lē tatau i mātua ona faatalalē i le sauniaina o lenā tausiga.

7:4. E tatau ona iai ni o tatou lagona māfana mo le poto ma le atamai po o le malamalama.

FAATAOTO TAʻITASI E TAʻITAʻIA AI I TATOU

(Faataoto 10:1–29:27)

O isi faataoto o loo totoe a Solomona, o ni faaupuga tuusaʻo ma pupuu. E tele ina aumai o ni faatusatusaga e tuufaafeagai uiga, o nisi e tutusapau uiga, a o isi e fefaatusatusaaʻi uiga. O loo momoli mai ai ni lesona tāua i le amio, le tautala, ma uiga.

O mataupu e 10 e oo i le 24 o loo faamamafa mai ai le tāua o le mataʻu faaaloalo iā Ieova. O faataoto i mataupu e 25 e oo i le 29 na toe sii mai e “tagata o Esekia le tupu o Iuta.” (Faataoto 25:1) O loo aʻoaʻo mai ai le tatau ona faalagolago iā Ieova, ma isi foʻi lesona tāua.

Taliina o Fesili Faale-Tusi Paia:

10:6—E faapefea ona ‘ufitia gutu o ē amio leaga i le faasauā’? Atonu o loo faauiga lenei manatu faapea, o upu susua a tagata amio leaga e ufitia ai o latou faanaunauga leaga ina ia faaleagaina isi. Pe atonu talu ai o tagata leaga e masani lava ona inosia, o le itagia la o i latou e isi e avea ma itu e gūgū ai ma lē toe fia tautatala.

10:10—E faapefea i “lē ua genogeno ona mata” ona ia faatupuina le tigā? O le “tagata ulavale” atonu e lē gata ina fai mana auupega le “gutu faapiʻopiʻo” ae taumafai foʻi e nanā uunaʻiga moni o ana gaoioiga, e ala i ana tāga e pei o le ‘genogeno o ona mata.’ (Faataoto 6:12, 13) O uiga taufaasesē na e iʻu ina matuā mafatia ai se tasi ua afaina ai.

10:29—O le ā “le ala o Ieova”? O inei e faasino atu i le ala o loo feutagaʻi ai Ieova ma tagata, ae lē o le ala o le olaga lea e tatau ona tatou mulimuli ai. O feutagaʻiga a le Atua ma tagata e iʻu i le saogalemu mo ē sao a latou amio, ae o le faasalaga mo ē amio leaga.

11:31—Aiseā e tatau ai ona sili atu le taui o lē amio leaga na i lo lē amiotonu? O le taui o loo taʻua i inei, o faasalaga e maua e tagata taʻitoʻatasi. Pe a fai e le tagata amiotonu se mea sesē, o le a tauia o ia i se aʻoaʻiga. Ae o le tagata amio leaga e fai ma le loto i ai ana agasala, ma e lē fia manaʻo e fai se mea lelei. Ua tatau ai la ona matuā tauia o ia i se faasalaga mamafa.

12:23—E faapefea e se tasi ona ia ‘ufiufi i le poto’? O le ufiufi o le poto e lē o uiga faapea, e matuā lē o faaalia lava e se tasi le poto. Ae o loo faasino i se tagata na te faaalia le poto i se uiga faautauta, e lē fia faalialiavale ai ma gugutu.

14:17—Ua faapefea ona ‘inosia le tagata e fai togafiti leaga’? O le faaupuga Eperu ua faaliliu i le “fai togafiti leaga,” e mafai ona faauiga atu a lē i le faautauta, pe i mafaufauga leaga. O le mea mautinoa, e inosia se tagata e leaga ona mafaufauga. Peitaʻi e inosia foʻi le tagata faautauta, pe afai na te faaaogā lona mafaufau ma filifili ai ina ia ‘lē so le lalolagi o ia.’—Ioane 15:19.

18:19—Ua faapefea i ‘le tagata ua agaleagaina ona sili atu lona faigatā i lo se ʻolo’? I le pei o se ʻolo po o se aai malosi ua faatoʻilaloina, e faapena le tagata e maumauaʻi lava e musu e faamagalo atu. O feteenaʻiga i lo la va ma le tagata faimea sesē e faigofie lava ona oo ina avea o se papupuni telē e pei o ‘le faamaufaalava o le ʻolo.’

 Lesona mo i Tatou:

10:11-14. Ina ia faalaeiau a tatou upu, e tatau ona faatumulia o tatou mafaufau i le poto saʻo, ia uunaʻia o tatou loto e le alofa, ma ia faatonutonu e le poto upu o loo tatou tautala ai.

10:19; 12:18; 13:3; 15:28; 17:28. Ia muamua ona mafaufau lelei a o leʻi tautala atu, ma aua le soona tautala soo.

11:1; 16:11; 20:10, 23. E finagalo Ieova ia tatou faamaoni i a tatou mataupu faapisinisi.

11:4. O se mea valea le alu uma o lo tatou malosi e saʻili ai le ʻoa faaletino, ae lafoaʻi ai le suʻesuʻeina o le Tusi Paia, le auai i sauniga, ma le faiva i le fanua.

13:4. E lē lava le tau ina ‘faanaunau’ i se tiute tauave i le faapotopotoga pe i le olaga i le lalolagi fou. Ae tatau ona tatou toʻaʻaga ma taumafai malosi ina ia ausia na mea manaʻomia.

13:24; 29:15, 21. O se matua e alofa, e na te lē faia faaleaga sana tama pe tuufau foʻi ana mea sesē o loo fai. Na i lo lea, e gaoioi se tamā po o se tinā e faasaʻo na mea sesē a o leʻi mauaa.

14:10. Talu ai e lē mafai i taimi uma ona faamatala ma le saʻo atoatoa o tatou faalogona loloto, e lē o taimi uma foʻi la e malamalama mai i ai isi, lona uiga e faatapulaa foʻi faamāfanafanaga tau faalogona e mafai e isi ona ofoina mai. Tatou te ono onosaia nisi faigatā e ala i le faalagolago tasi atu iā Ieova.

15:7. E lē tatau ona tatou lofitūina se tagata i manatu uma lava ua tatou iloa, e pei lava ona lē sasaaina uma e se faifaatoʻaga ana fatu laau i se nofoaga e tasi. O le tagata poto e faasoasoa mālie atu lava lona malamalama pe a tulaʻi mai se manaʻoga.

15:15; 18:14. O le iai pea o se vaaiga mautinoa o le a tatou maua ai le olioli, e tusa lava po o tatou iai i ni tulaga e sili ona mafatia ai.

17:24. Ia lē pei i tatou o “le vale,” e feoaʻi solo ona mata ma tafao solo le mafaufau na i lo le taulaʻi atu i mea tāua. E tatau ona tatou saʻili le malamalama ina ia gaoioi ai ma le atamai.

23:6-8. E tatau ona tatou ʻalofia le faaalia pepelo o se uiga faatagā talimālō.

27:21. O viiviiga e mafai ona faaalialia ai le tagata moni e iai i tatou. E iloa lo tatou lotomaulalo pe a avea viiga ma uunaʻiga tatou te amanaʻia ai lo tatou nofo aitalafu iā Ieova, ma atili ai ona naunau e auauna pea iā te ia. E iloa le leai o se lotomaulalo pe a avea viiga ma itu e atili ai ona iā i tatou lagona fia mata muamua.

27:23-27. I le faaaogāina o se faatulagaga faaleoleo mamoe, ua faamamafa ai e nei faataoto le tāua o le loto malie i se olaga faigofie, e maua pe a filigā e galue. Ua matuā faamautinoa mai ai le manaʻomia ona faalagolago i le Atua. *

28:5. Afai tatou te “saʻili iā Ieova” e ala i le tatalo ma le suʻesuʻeina o lana Afioga, ona tatou lagona ai lea ma malamalama i mea uma e manaʻomia i la tatou tapuaʻiga ina ia talia mai e ia.

“VALOAGA”

(Faataoto 30:1–31:31)

E lua “valoaga” po o feʻau tāua o loo faaiʻu ai le tusi o Faataoto. (Faataoto 30:1; 31:1) I le faaaogāina e Akuru o ni faatusatusaga e faagaee ai o tatou mafaufauga, ua faaalia ai e lana valoaga le lē faamalieina o le tagata manaʻo tele, ma le faalilolilo o ala e faatosina ai e se tamāloa se taupou. * O loo fautua mai foʻi i le leaga o le faamaualuga ma upu e fai ma le ita.

O valoaga po o feʻau tāua na aʻoaʻoina ai Lemuelu e lona tinā, o loo iai ni fautuaga aogā i le faaaogāina o le ʻava ma le onā, faapea le faia o le faamasinoga ma le tonu. O loo faaiʻu le faamatalaina o se avā lelei i le fuaitau lenei: “Avatu iā te ia le fua o ona lima; o ana galuega foʻi e viia ai o ia i faitotoʻa.”—Faataoto 31:31.

Ia maua le poto, ia talia aʻoaʻiga, ia mataʻu i le Atua, ia faalagolago iā Ieova. Maʻeu ni lesona tautele ua aʻoaʻo mai e nei faataoto faagaeeina! Ua matuā ono ma tatau ai la ona tatou faatatauina a latou fautuaga, ma tatou tofo ai i le fiafiaga o loo maua e “le tagata o lē mataʻu iā Ieova.”—Salamo 112:1.

[Faamatalaga pito i lalo]

[Ata i le itulau 16]

O Ieova le Puna o le malamalamaga moni

[Ata i le itulau 18]

O le ā le uiga o le faaupuga ua ‘faasalalauina le poto’?