Oqqannik aqutsinikkut asannittuliorlutillu ataqqinnigit

„Tamassi immikkut nuliasi immissisut asasussaavasi, nuliaasullu uini mianerisussaavaa [ataqqingaassavaa, NV].“ — EFESOSIMIUT 5:33.

1, 2. Aappallit tamarmik apeqqut pingaarutilik suna imminut apeqqutigisariaqarpaat, aamma sooq?

TAKORLOORIARUK tunissutisillutit kusanartumik poortorneqarsimasumik imatullu allagartalimmik: „Qajassuussassaq!“ Poortugaq sussagaluarpiuk? Qularnanngitsumik sapinngisat tamaat ajoqusernaveersaassagaluarpat. Aappariinnermimmi tunissut?

² Uillarnerup Israelikkuusup No’omip arnat inuusuttut Orpa Ruthilu ima oqarfigai: „Qanortoq [Jehovap] isumannaatsumik atugaqartillisi tamassi immikkut uissi illuani.“ (Ruthi 1:3-9) Taamaalilluni No’omip oqaatigimisaarpaa ueq Jehovamit tunissutaasoq. Aamma nuliaalluartoq pillugu Biibilimi ima allassimasoqarpoq: „Illu pigisallu ataatamit kingornussaasarput, nuliarli silassorissoq [Jehovamit] tunissutaavoq.“ (Ussatit 19:14) Tassa aappaqaruit aappat Guutimit tunissutaasutut isigisariaqarpat. Illit Guutimit tunissutisiat qanoq pisarpiuk?

3. Aappariit Efesosimiunut allakkani siunnersuut suna malittarunikku silatusaassappat?

³ Ukiuni hundredelinni siullerni kristumiut apustili Paulusip ima allaffigai: „Tamassi immikkut nuliasi immissisut asasussaavasi, nuliaasullu uini mianerisussaavaa [ataqqingaassavaa, NV].“ (Efesosimiut 5:33) Maanna misissussavarput uiusup nuliani oqaluukkaangamiuk nuliaasullu uini oqaluukkaangamiuk siunnersuut tamanna qanoq ilillutik malissinnaaneraat.

Oqaq ’ajortumeeriniartuartoq’ mianersorfigisiuk

4. Oqaq qanoq ililluni ajoqutaasinnaallunilu iluaqutaasinnaava?

⁴ Biibilimik allattoq Jaaku allappoq oqaq ’ajortumeeriniartuartuusoq toqunartumillu toqussutaasartumik ulikkaartoq’. (Jaaku 3:8) Jaakup ilumoortoq pingaarutilik manna eqqumaffigaa: Oqaq ajortumeeriniartuartuusoq aserorsaataavoq. Qularnanngitsumik eqqarsariaqqaarani oqaaserisat ’panatut kapisisarnerat’ pillugu ussat Biibilimiittoq nalunngilaa. Ussammili tassani aamma allassimavoq ’ilisimasup oqaa katsorsaataasartoq’. (Ussatit 12:18) Aap, oqaatsit sunniinertusinnaapput. Annersitsisinnaallutillu katsorsaataasinnaapput. Illit oqaatsitit aappannut qanoq sunniuteqartarpat? Illit aappannut tamanna apeqqutigisuugukku qanormita akissagaluarpa?

5, 6. Suut pissutigalugit inuit ilaasa oqartik aqukkuminaatittarpaat?

⁵ Ilissi aappariinnissinni annernartunik oqaluttalersimagussi, pissutsit pitsaanerulersissinnaavatit. Iliuuseqarnissarli pisariaqarpoq. Sooq? Ilaatigut uinipput naammalluinnanngitsoq akiortariaqaratsigu.  Ajorti kingornussarput eqqarsartaatsitsinnut oqaloriaatsitsinnullu ajortumik sunniuteqartarpoq. Jaaku ima allappoq: „Oqalunnermigut kukkussuteqartanngitsoq naammalluinnartuuvoq timiminillu tamarmiusumik naalatsitsisinnaasuulluni.“ — Jaaku 3:2.

⁶ Inuttut naammalluinnanngitsuunerup saniatigut ilaqutariit peroriartorfigisimasat oqqamik atueriaatsimut sunniuteqarsinnaapput. Inuit ilaasa angajoqqaat ’saammartitassaanngitsut, naammatsiuitsut qiningasullu’ peroriartorfigisarpaat. (2 Timotheusi 3:1-3) Amerlanertigut meeqqat taamaattunik avatangiiseqarlutik peroriartorsimasut inersimasunngoraangamik assingusumik pissuseqalertarput. Soorunalimi naammalluinnanngissuseq perorsarnerlunneqarnerluunniit allat inussiarniitsumik oqaluunnissaannut utoqqatsissutaasinnaanngilaq. Tamakkuninngali eqqumaffiginninneq ajoqutaasumik oqalunnaveersaarnissaq inuit ilaannut sooq taama ajornakusoorsinnaatiginerata paasinissaanut iluaqutigissavarput.

Ajuallannartumik oqalunnaveersaarit

7. Petrusimuna suna pigaa kristumiut oqaaqqissaaramigit ’ingutsinermik iperaaqqullugit’?

⁷ Aapparmut inussiarniitsumik annernartumillu oqaluttarnermut sunaluunniit pissutaagaluarpat, tamanna aapparmik asannippiannginnermut ataqqinnippiannginnermullu ersiutaasinnaavoq. Petrusip kristumiut pissutissaqarluarluni oqaaqqissaarpai ’ingutsineq iperaqqullugu’. (1 Petrusi 2:1) Oqaaseq grækerisooq matumani „ingutsineq“-mik nutserneqarsimasoq „ajuallannartumik oqalunneq“-mik isumaqavippoq. Aamma ’oqaatsit atorlugit inunnik eqqaassinermik’ isumaqarpoq. Oqqap ajortumeeriniartuartup sunniutaanik allaatiginninneq torrangaarami! Peter Schindlerip nutsigaani oqaaseq taanna „mamarliineq“-mik nutserneqarpoq.

8, 9. Ajuallannartumik oqalunneq qanoq kinguneqarsinnaava, aamma sooq aappariit taamatut oqalunnaveersaartariaqarpat?

⁸ Imaassinnaavoq inuit ilaannaasa sorraatsumik oqaluuteriaaseqarneq ajornartorsiutitut ilungersunartutut isigigaat, eqqarsaatigeriarulli uiusoq nuliaasorluunniit annernartunik oqaaseqaraangat qanoq pisoqartarnersoq. Aappaq nalusuuneraraanni, eqiasuttuuneraraanni namminissarsiortuuneraraanniluunniit, taava oqaaseq nikassaarpasissoq ataaseq taanna atorlugu taassuma inuttut taamatut pissuseqarnerarneqarsinnaanera oqaatigimisaarneqartarpoq. Tamanna asannittuliornerunngilluinnarpoq. Unnerluutiginnissutimmi ingasattut aappap sanngiissutaanik ersersitsisut? Oqaatsimmi soorlu „Inortuiuaannavipputit!“ imaluunniit „Tusarnaanngisaannarparma!“ ingasattajaarnerunngillat? Tamakku qularnanngitsumik aappaasup imminut illersornialissutigissavai, tamannalu oqqannersuannguussinnaavoq. — Jaaku 3:5.

⁹ Ajuallannartumik nikassaarpaluttumillu oqalunneq aappariinnermut nanertuutaasarpoq kingunipiloqarsinnaallunilu. Ussatit 25:24-mi ima allassimasoqarpoq: „Illup qaavani teqeqqumi ineqarneq pitsaaneruvoq arnamik saqitsaassiumatuumik illoqateqarnermit.“ Soorunalimi aamma angut saqitsaassiumatooq pillugu taamatut oqartoqarsinnaavoq. Aappaasup aappani sakkortuumik oqaluuttaruniuk, tamanna attaveqaqatigiinnerannut ajoqutaalissaaq aappaasorlu narrugineqartutut, immaqalu allaat asaneqarnissaminut qinngaqqunnartutut, misigilissalluni. Taamaammat oqqap aqunnissaa pingaaruteqarpoq. Qanorli ililluni taamaaliortoqarsinnaagami?

’Oqaq naalatsittariaqarparput’

10. Sooq oqqap aqunnissaa pingaaruteqarpa?

¹⁰ Jaaku 3:8-mi ima allassimavoq: „Inoqanngilaq oqqamik naalatsitsisinnaasumik.“ Taamaakkaluartorli naalatsinniarlugu sapinngisarput tamaat iliuuseqartariaqarpugut. Jaaku aamma ima allappoq: „Guutisiortuusorisoq oqqaminilli naalatsitsinani imminik salloqittarpoq; taassuma guutisiornera sussaanngilaq.“ (Jaaku 1:26; 3:2, 3) Oqaatsini taakkunani erserpoq oqqannik qanoq atuisarnerit assut pingaaruteqartoq. Illit aappallu attaveqaqatigiinnissinnut sunniuteqaannarnani, aammali illit Jehova Guutimut attaveqarninnut sunniuteqarpoq. — 1 Petrusi 3:7.

11. Immaqa qanoq ililluni isumaqatigiinnginneq oqqannersuanngortinnaveersaarneqarsinnaava?

¹¹ Illit aappat qanoq oqaluuttarnerlugu eqqarsaatigigukku silatusaassaatit. Pissutsit sukanganarsippata, taava sukanganarunnaarsinniarsarikkit. Iisaap Rebekkallu inuuneranni pisimasoq  sammilaariartigu. Pisimasoq Mosesimik allakkat siulliit 27:46–28:4-mi allaatigineqarpoq. „Rebekka Iisaamut oqarpoq: ’Hittikkut arnartaat pissutaallutik inuunera uannut avaanngunarsilerpoq! Taamaattumik aamma Jaaku Hittikkut maanimiut paniisa ilaannik nuliartaaraluarpat taava toquinnaruma pitsaanerussaaq.’“ Iisaap sakkortuumik akineranut takussutissaqanngilaq. Taassumali ernertik Jaaku aallartippaa Guutimik mianerinnittumik, Rebekkamik aliasuutissiigunnanngitsumik, nuliassarsioqqullugu. Takorlooriaruk uiusoq nuliaasorlu isumaqatigiinngilersut. Aappaq appiunnagu ajornartorsiutigineqartorpiaq isiginiarneruneqarpat, isumaqatigiinngissutimininnguup oqqannersuanngornissaa pinngitsoortinneqarsinnaavoq. Imatut oqarnani: „Piffissaqarfiginngisaannarparma!“ ima oqartoqarsinnaavoq: „Immitsinnut piffissaqarfiginerussagaluaratta.“ Inuk pinnagu ajornartorsiut sammiuk. Kina ilumoornersoq kinalu ilumuunnginnersoq pingaartippallaarnaveersaaruk. Romamiunut allakkat 14:19-imi imaattumik kajumissaaruteqarpoq: „Eqqissinartut ineriartorteqatigiinnerlu noqqaassutiginiartigit.“

’Narrutsatsitsinerit, puffajanerit kamannerillu’ soraarussigik

12. Oqaq aqussinnaajumallugu suna qinnutigisariaqarparput, aamma sooq?

¹² Oqqamik aqutsineq tassaaginnanngilaq oqaasissanik mianersuutiginninneq. Oqaatsivummi uummammeersuupput qanermeersuunatik. Jiisusi ima oqarpoq: „Inuup ajunngitsup uummatimi toqqorsivianit ajunngitsumit ajunngitsut saqqummertarpai, inuullu ajortup toqqorsivimminit ajortumit ajortut saqqummertarpai. Uummatimmi ulikkaarutaanik qaneq oqaluttaraaq.“ (Lukasi 6:45) Taamaammat oqaq aqussinnaajumallugu Daavitut ima qinunissaq pisariaqarsinnaavoq: „Uummammik minguitsumik pinngortitsiviginnga, Guuti, aammaarlutit anersaamik aalajaatsumik tuninnga.“ — Tussiaat 51:12.

13. Narrutsassimaneq, puffajaneq kamannerlu qanoq ilillutik mitalleerpaluttumik annernartumillu oqaaseqarnermik kinguneqarsinnaappat?

¹³ Paulusip Efesosimiut kajumissaaginnanngilai annernartunik oqalunnaveersaaqqullugit, aammali kajumissaarpai misigissutsit annernartunik oqarusulersitsisut akioqqullugit. Taanna ima allappoq: „Narrutsatsitsinerit, puffajanerit, kamannerit, nipiliornerit [nillianerillu, 1900/1961] mitalliinerillu, tassami ajorsutsit suulluunniit, eqqaasassanngilasiluunniit.“ (Efesosimiut 4:31) Malugiuk Paulusip ’nillianerit mitalliinerillu’ eqqaannginneranni ’narrutsatsitsinerit, puffajanerit kamannerillu’ eqqaagai. Kamassaqaraanni naggataagut misigissutsinik ersersitsisoqaratarsinnaavoq oqaatsinik annernartorpassuarnik aniatitsilluni. Taamaammat imminut ima aperigit: ’Qamuuna narrutsassimallungalu kamassaqarpunga? ’Puffajavunga’?’ (Ussatit 29:22) Taamaappat Guutimut qinusariaqarputit taamatut misigeqqajaaninnik pissuseqaqqajaaninnillu akiuinissamut imminullu naalakkersinnaanissamut ikioqqullutit kamalinnginniassagavit. Tussiaat 4:5-imi ima allassimasoqarpoq: „Kamassimariannguaritsi, kisiannili ajortuliornasi! Innanngavissinni eqqarsarallaritsi, nipangersimagitsilu!“ Kissaammeqqajaaguit imminullu naalakkersinnaajunnaaqqajaasutut misigiguit, taava Ussatit 17:14-imi kajumissaarut una maliguk: „Nipangiinnartarit saqitsaattoqalinnginnerani!“ Nipangerallaat kamaqqajaanerit qaangiutserlugu.

14. Ajuallassimaarneq aappariinnermut qanoq sunniuteqarsinnaava?

¹⁴ Kamannerup aqunnissaa imaannaanngilaq, ingammik Paulusip ’narrutsassimanermik’ taasaanik aallaaveqaruni. Oqaaseq grækerisooq Paulusip matumani atugaa „anersaamut ajuallatsinneqarsimasumut saammaanneqarumananilu saammaassiumanngitsumut“ ilisarnaataasutut aamma ’eqqunngitsuliorfigineqarnernik nalunaarsuilluni puttarsinertut’ nassuiarneqarpoq. Akeqqersimaarneq ilaannikkut uiusup nuliaasullu akornanni putsuarissutullusooq ilersinnaavoq, pissutsillu sivisuumik taamaassinnaapput. Aappaasup ajuallaatigisimasaa oqaloqatigiissutigilluarsimanngikkaanni narruginnittoqalersinnaallunilu misigissuseeruttoqarsinnaavoq. Eqqunngitsuliorfigineqarsimanerli pillugu ajuallassimajuarneq iluaqutaanngilaq. Pereersut allanngortinneqarsinnaanngillat, isumakkeerfiginnereersimagaannilu tamanna puiorneqartariaqarpoq. Asanninneq ’puttarsisaqartarinngilaq’. — 1 Korinthimiut 13:4, 5.

15. Sakkortuumik oqalunnermik sungiussisimasut oqaloriaatsiminnik allannguinissamut suna iluaqutigissavaat?

 ¹⁵ Taavami illit peroriartorfinni sakkortuumik oqalunneq nalinginnaasimappat, taamaammallu illit tamanna ileqquliutiinnarsimagukku? Tamatumunnga tunngatillugu allannguisinnaavutit. Inuunermimi amerlasuutigut qanoq pissusilersussanerlutit qanorlu pissusilersussannginnerlutit aalajangereernikuuvutit. Oqaloriaatsinnut tunngatillugu qanoq aalajangissavit? Sakkortuunik oqalulinnginninni nipangissavit? Qularnanngitsumik siunnersuut Efesosimiunut allakkat 4:29-mi allassimasoq malikkumassavat: „Oqaatsinik mikiarsimasunik qanissinnit aniatitaqarniaqinasi.“ Tamanna maleruarsinnaajumallugu ’inuttut pissusitoqqatit ileqqui ilanngullugit peertariaqarpatit, atillugulu inuttut pissuseq nutaaq, eqqorluartumik ilisimasaqarnikkut pinngortitsisini assilillugu nutartertoq’. — Kolossemiut 3:9, 10, NV.

’Isumalioqatigiinnissaq’ pisariaqarpoq

16. Sooq oqaloqatigiikkumannginneq aappariinnermut ajoqutaava?

¹⁶ Iluaqutaaneq ajorpoq — aamma ajoqutaasorujussuusinnaavoq — uiusup nuliaasulluunniit aappani oqaloqatigiumanngikkaangagu. Oqaloqatiginnikkumannginneq aapparisamik pillaaniarnerujuaannanngilaq, paatsiveerunnermulli pakatsinermullu ersiutaasinnaavoq. Oqaloqatigiikkumanngikkaannili attaveqaqatigiinneq suli najummassimanarnerulissaaq, tamannalu ajornartorsiutinut aaqqiissutaanavianngilaq. Nuliaasoq ima oqarsimavoq: „Oqaloqatigiileqqituaraangatta ajornartorsiut oqaloqatigiissutigineq ajorparput aaqqissanagulu.“

17. Kristumiut aappariittut ajornartorsiutillit qanoq iliortariaqarpat?

¹⁷ Aappariinnermi pissutsit najummassimanartuarpata, ajornartorsiutit imaaliallaannaq aaqqinneqarsinnaanngillat. Ussatit 15:22-mi ima allassimavoq: „Isumalioqatigiittoqanngikkaangat pilersaarutit  asuliinnartarput, amerlasuunilli siunnersuisoqarsimagaangat iluatsittarput.“ Aappallu ajornartorsiut oqaloqatigiissutigisariaqarparsi. Isummereernak tusarnaarit. Aaqqiinissaq ajornarluinnarpasippat, soormi ilagiinni kristumiuni utoqqaanertanut ikiortissarsiorussi? Taakku Biibilimik ilisimasaqarluarput tassanilu najoqqutassianik atuineq misilittagaqarfigalugu. Angutit taamaattut soorlu tassa „anorersuarmut oqquiffik sialussuarmullu oqqiffik“. — Esaja 32:2.

Ajugaaffigisinnaavat

18. Sumut akiuunneq Romamiunut allakkat 7:18-23-mi allaatigineqarpa?

¹⁸ Oqqamik aqutsiniarneq ilungersunartuuvoq. Aamma iliuutsinik aqutsiniarneq eqqarsaatigalugu taamaappoq. Apustili Paulusip unamminiarnartutut isigisani ima allaatigaa: „Nalunngilara uanni, tassa uininni, ajunngitsoqanngitsoq. Piumassuseqaraluarpunga, ajunngitsumilli iliuuseqarneq saperpunga. Ajunngitsormi piumasarigaluara iliuuserinngitsoortarpara ajortorli piumanngisara iliuuserisarlugu. Kisianni piumasarinngisannik ilioruma taama iliortoq tassaajunnaarpoq uanga, tassaallunili ajorti ilunniittoq.“ ’Ajortip inatsisai avatitsinniittut’ pissutigalugit oqarput timittalu avatai allat atornerloqqajaasarpavut. (Romamiut 7:18-23) Akiuuttariaqarpugulli — Guutillu ikiuineratigut ajugaasinnaavugut.

19, 20. Uiusut nuliaasullu Jiisusip maligassiaa oqqaminnik aqutsinissamut qanoq iluaqutigisinnaavaat?

¹⁹ Aappariinnermi asanninnermik ataqqinninnermillu ilisarnaatilimmi eqqarsariaqqaarani oqaaserisat oqaatsillu sakkortuut atorneqartussaanngillat. Eqqarsaatigeriaruk Guutip ernerata tamatumunnga tunngatillugu maligassiuinera. Jiisusip ajoqersukkani oqaatsiminik annersinngisaannarpai. Jiisusip nunarsuarmi inuttut inuunermini unnummi kingullermi apustilit kina arlartik ilaminit annerunersoq oqqassutigigaluaraat appisaluutinngilai. (Lukasi 22:24-27) Biibilimi imaattumik oqaaqqissaaruteqarpoq: „Angutit, nuliasi asassavasi soorlu Kristusip ilagiit asagai imminullu tunniulluni taakku pillugit.“ — Efesosimiut 5:25.

²⁰ Nuliaasormi? „Nuliaasup uini mianerisussaavaa [ataqqingaassavaa, NV].“ (Efesosimiut 5:33) Nuliaasup uiminik ataqqinnittup uini nillialluni oqalorujuffigissavaa? Paulusi ima allappoq: „Ilisimaqquara angutip kialuunniit Kristusi niaqorimmagu, arnap angut niaqorimmagu, Kristusillu niaqua Guutiummat.“ (1 Korinthimiut 11:3) Nuliaasut niaqquminnut naalatsigitissapput, soorluttaaq Missiarsi Niaqquminut naalatsigitittoq. (Kolossemiut 3:18) Inuk naammalluinnanngitsoq kinaluunniit Jiisusimik ilaarsilluinnarsinnaanngikkaluartoq, uiusut nuliaasullu taassuma ’tumaanik peqqissaartumik atuaaniarlutik’ ilungersornertik oqqamik atornerluinermut akiuunnermi ajugaanissamut iluaqutigissavaat. — 1 Petrusi 2:21, NV.

Suna ilikkarpiuk?

• Oqaq ajortumeeriniartuartoq aappariinnermut qanoq ajoqutaasinnaava?

• Sooq oqaq aqukkuminaappa?

• Oqqatta aqunnissaanut suna iluaqutigissavarput?

• Aappariittut ajornartorsiuteqaraanni qanoq iliortoqartariaqarpa?

[Atuaqqissaarnermi apeqqutit]

[Qupp. 26-mi assiliartaq]

Utoqqaanertat Biibili tunngavigalugu siunnersuisarput