“Alegra Bo den e Esposa di Bo Hubentud”

“Alegra bo den e esposa di bo hubentud. Mi yiu, pakico bo mester ta encanta cu un adultera?”—PROVERBIONAN 5:18, 20.

1, 2. Dicon nos por bisa cu e amor romantico entre un esposo y esposa ta bendiciona?

BIJBEL ta papia abiertamente tocante relacion sexual. Na Proverbionan 5:18 y 19 nos ta lesa: “Laga bo fuente ta bendiciona, y alegra bo den e esposa di bo hubentud. Manera un bina amabel y un gazel gracioso, laga su pechonan satisface bo tur ora; sea semper encanta cu su amor.”

² Aki e expresion “fuente” ta referi na e fuente di satisfaccion sexual. E ta bendiciona den e sentido cu e sintimento di amor romantico y extasis cu parehanan casa ta disfruta di dje ta un regalo di Dios. Sinembargo, e intimidad aki mester ser experencia solamente denter di e areglo matrimonial. P’esei Rei Salomon di antiguo Israel, un escritor di Proverbionan, a haci un pregunta retorico: “Mi yiu, pakico bo mester ta encanta cu un adultera, y brasa pecho di un muher stranhero?”—Proverbionan 5:20.

3. (a) Kico ta e tristo realidad di hopi matrimonio? (b) Con Dios ta mira adulterio?

³ Riba dia di casamento, un homber y un muher ta haci e promesa solem di stima otro y keda fiel na otro. Sinembargo, adulterio ta destrui hopi matrimonio. De echo, despues di a analisa binticinco estudio, un investigado a conclui cu “25 porciento di esposa y 44 porciento di esposo tabatin relacion sexual pafo di matrimonio.” Apostel Pablo a declara: “No laga nan gaña boso; ni fornicado, ni adorado di dios falso, ni adultero, ni sodomita, ni homosexual . . . lo no hereda e reino di Dios.” (1 Corintionan 6:9, 10) Pues no tin duda tocante esaki. Adulterio ta un pica serio den bista di Dios, y adoradonan berdadero tin cu tene cuidou pa nan no comete infidelidad matrimonial. Kico lo yuda nos tene nos ‘matrimonio honorabel, y e cama matrimonial sin mancha’?—Hebreonan 13:4.

 Tene Cuidou cu un Curason Engañoso

4. Cua ta algun manera cu un cristian casa lo por hay’e envolvi den un relacion romantico pafo di matrimonio sin cu ta su intencion?

⁴ Den e ambiente moralmente degrada djawe, tin hopi hende “cu wowo yen di adulterio y cu nunca ta stop di haci pica.” (2 Pedro 2:14) Deliberadamente nan ta busca relacionnan romantico pafo di matrimonio. Den algun pais, un cantidad grandi di hende muher a drenta e forsa laboral, y awor cu hende di ambos sexo ta traha hunto esei a crea un ambiente fertil pa romance inapropia desaroya na trabou. Ademas, via chat room riba Internet a bira masha facil pa asta e personanan di mas timido sera amistadnan intimo via computer. Hopi persona casa ta cai den e trampanan aki sin cu nan ta realisa kico ta pasando.

5, 6. Con un ruman muher cristian a haya su mes den un situacion peligroso, y kico nos ta siña for di esaki?

⁵ Considera con un cristian cu nos lo yama Maria a hay’e envolvi den un situacion cu casi a pon’e comete inmoralidad sexual. Su esposo, cu no ta un Testigo di Jehova, tabata mustra masha tiki cariño pa e famia. Maria ta corda con algun aña pasa el a topa un colega di su casa. E homber tabata masha cortes, y na un otro ocasion el a asta expresa interes den Maria su creencianan religioso. Maria a conta: “E tabata un persona masha amabel, completamente otro for di mi casa.” Poco despues Maria cu e colega di su casa a desaroya sintimentonan romantico pa otro. Maria a rasona: “Mi no a comete adulterio, y e homber ta interesa den Bijbel. Podise mi por yud’e.”

⁶ Prome cu Maria su laso romantico a hiba na adulterio, el a realisa den ki peliger e tabata. (Galationan 5:19-21; Efesionan 4:19) Su consenshi a cuminsa funciona, y el a dal paso pa rectifica e asunto. Maria su experencia ta ilustra cu “e curason ta mas engañoso cu tur cos y ta totalmente corupto.” (Jeremias 17:9) Bijbel ta conseha nos: “Warda bo curason riba tur cos.” (Proverbionan 4:23) Con nos por haci esei?

‘E Hende Prudente Ta Sconde’

7. Aplicando cua conseho biblico ta un proteccion ora di yuda un persona cu tin dificultad matrimonial?

⁷ Apostel Pablo a skirbi: “Laga esun cu ta kere cu e ta para tene cuidou pa e no cai.” (1 Corintionan 10:12) Anto Proverbionan 22:3 ta declara: “Un hende prudente ta mira maldad [of, “calamidad”, NW] y ta sconde.” En bes di tin demasiado confiansa den bo mes y pensa: ‘Ai no, nada lo no pasa cu mi’, lo ta sabi di bo parti pa anticipa situacionnan cu lo por hiba na problema. Por ehempel, evita di bira e unico persona di confiansa di un hende di e sexo opuesto cu ta pasando dor di dificultadnan complica den su matrimonio. (Proverbionan 11:14) Bisa e persona cu ta mihor pa e papia tocante su problemanan matrimonial sea cu su casa, cu un cristian maduro di su mes sexo cu ta desea pa su matrimonio  funciona of cu e ancianonan. (Tito 2:3, 4) E ancianonan den e congregacionnan di Testigonan di Jehova ta pone un bon ehempel den esaki. Ora cu un anciano tin cu papia den priva cu un ruman muher cristian, e ta haci esei caminda tin publico, manera na Salon di Reino.

8. Ki precaucion ta esencial na trabou?

⁸ Na trabou y otro luganan, tene cuidou cu situacionnan cu lo por stimula intimidad. Por ehempel, trahando oranan extra den estrecho compania di un persona di e sexo opuesto por hiba na tentacion. Como un homber of muher casa, lo bo kier mustra bon cla na bo manera di papia y na bo comportacion cu definitivamente bo no ta disponibel pa ningun relacion romantico. Como un persona cu ta sigui tras di devocion na Dios, sigur lo bo no kier atrae indebido atencion dor di flirt of dor di bisti of aregla bo mes na un manera inmodera. (1 Timoteo 4:8; 6:11; 1 Pedro 3:3, 4) Ta bon pa pone potretnan di bo casa y di bo yiunan na bo trabou pa sirbi como un recordatorio visual tanto pa bo como pa otro hende, cu bo famia ta importante pa bo. Sea determina pa nunca stimula—ni sikiera tolera—proposicionnan romantico di otro hende.—Job 31:1.

‘Gosa di Bida cu e Muher Cu Bo Ta Stima’

9. Ki serie di acontecimento por haci un relacion romantico nobo parce masha atractivo?

⁹ Proteha nos curason ta exigi mas cu djis evita situacionnan peligroso. Atraccion romantico pa un persona pafo di e matrimonio lo por ta un indicacion cu un esposo y esposa no ta prestando atencion na e necesidadnan di otro. Podise un homber ta ignora su esposa continuamente of un muher ta critica su esposo constantemente. Diripiente un otro persona—sea na trabou of asta den e congregacion cristian—ta parce di tin net e cualidadnan cu ta falta den bo casa. Den poco tempo un laso ta forma, y e relacion nobo ta bira casi iresistiblemente atractivo. E serie di acontecimentonan sutil aki ta confirma e berdad di e declaracion biblico: “Cada un ta wordo tenta ora cu e wordo atrai y seduci dor di su mes pasion.”—Santiago 1:14.

10. Con esposo- y esposanan por haci nan relacion mas firme?

¹⁰ Esposo- y esposanan mester traha pa fortalece e relacion amoroso cu nan mes casa en bes di busca pafo di nan matrimonio pa satisface nan deseonan, sea ta nan deseo pa cariño, amistad of pa sosten durante un situacion dificil. Pues, haci tur boso esfuerso pa pasa tempo hunto, y hala mas cerca di otro. Reflexiona riba loke a pone boso enamora di otro. Purba experencia di nobo e cariño cu bo a sinti pa e persona cu a bira bo casa. Pensa riba e temponan bon cu boso a pasa hunto. Haci oracion na Dios tocante e asunto. E salmista David a roga Jehova: “Crea den mi un curason limpi, o Dios, y renova un spirito recto den mi.” (Salmo 51:10) Sea dicidido pa ‘gosa di bida cu e esposa of esposo cu bo ta stima tur e dianan di bo bida cu Dios a duna bo bou di solo.’—Eclesiastes 9:9.

11. Ki papel conocemento, sabiduria y discernimento ta hunga den fortalece e laso matrimonial?

¹¹ Un cos cu nos no mester pasa por halto ora di fortalece e laso matrimonial ta e balor di conocemento, sabiduria y discernimento. Proverbionan 24:3 y 4 ta declara: “Cu sabiduria un cas ta wordo traha, y cu comprondemento e ta wordo estableci. Y cu conocemento e cambernan ta wordo yena cu tur rikesa precioso y agradabel.” Entre e cosnan precioso cu ta yena un cas felis ta cualidadnan manera amor, lealtad, temor di Dios y fe. Pa adkiri e cualidadnan aki nos mester di e conocemento di Dios. Pues, parehanan casa mester ta studiantenan serio di Bijbel. Anto con importante sabiduria y discernimento ta? Pa nos por trata cu exito cu e problemanan di bida diario nos mester tin sabiduria, esta,  e capasidad di pone conocemento biblico na practica. Un persona cu tin discernimento por compronde e pensamentonan y sintimentonan di su casa. (Proverbionan 20:5) Mediante Salomon, Jehova a bisa: “Mi yiu, paga atencion na mi sabiduria, inclina bo horea na mi comprondemento.”—Proverbionan 5:1.

Ora Cu Tin “Tribulacion”

12. Dicon no ta un sorpresa cu parehanan casa ta experencia problema?

¹² Ningun matrimonio no ta perfecto. Bijbel asta ta bisa cu esposo y esposa lo tin “tribulacion den e bida aki.” (1 Corintionan 7:28) Inkietud, malesa, persecucion y otro factornan por causa tension den un matrimonio. Sinembargo, ora problemanan surgi boso tin cu busca solucion hunto, como casanan leal cu ta haci esfuerso agrada Jehova.

13. Den ki areanan un esposo y un esposa por analisa nan mes?

¹³ Kico si tin tension den e matrimonio debi na e manera cu e pareha ta trata otro? Pa busca un solucion ta rekeri esfuerso. Por ehempel, kisas pocopoco un patronchi di papia malo cu otro a drenta den nan matrimonio y awor ta un parti regular di nan matrimonio. (Proverbionan 12:18) Manera nos a trata den e articulo anterior, esaki por tin efectonan devastador. Un proverbio biblico ta bisa: “Mihor biba den desierto, cu biba hunto cu un muher pleitado y rabiado.” (Proverbionan 21:19) Si bo ta un esposa den un matrimonio asina, puntra bo mes: ‘Ta mi caracter ta pone cu ta dificil pa mi esposo keda den mi compania?’ Bijbel ta bisa esposonan: “Stima boso esposanan, y no sea amarga contra nan.” (Colosensenan 3:19) Si bo ta un esposo, puntra bo mes: ‘Mi comportacion ta friu y sin amor, y ta hinca mi casa den tentacion pa busca consuelo otro caminda?’ Claro cu no tin ningun excuse pa inmoralidad sexual. Sinembargo, e echo cu un tragedia asina por sosode ta bon motibo pa papia francamente tocante problemanan cu tin.

14, 15. Dicon buscamento di consuelo pafo di matrimonio no ta e contesta pa problemanan matrimonial?

¹⁴ Busca consuelo den un romance pafo di matrimonio no ta e contesta pa problemanan matrimonial. Na unda un relacion asina lo por hiba? Na un matrimonio nobo y mas mihor? Tin hende ta pensa cu si. Nan ta argumenta: ‘Con cu bai bin, e otro persona aki tin precies e cualidadnan cu mi tin mester den un casa.’ Pero tal rasonamento ta falso, pasobra ken cu bandona su casa—of cu ta anima bo pa bandona bo casa—tin un falta di respet serio pa e santidad di matrimonio. Ta absurdo pa spera cu e relacion ei si lo resulta den un mihor matrimonio.

¹⁵ Maria, menciona anteriormente, a pensa seriamente riba e consecuencianan di su proceder, incluso riba e posibilidad cu e ta pone su mes of un otro hende perde Dios su aprobacion. (Galationan 6:7) El a bisa: “Segun cu  mi a cuminsa analisa mi sintimentonan pa e colega di mi casa, mi a bin realisa cu si tabatin un chens cu e homber aki lo por a yega na un conocemento di e berdad, mi tabata strob’e di haci esei. Inmoralidad lo a afecta tur hende envolvi y trompica otronan!”—2 Corintionan 6:3.

E Motivacion di Mas Fuerte

16. Menciona algun consecuencia di impuresa moral.

¹⁶ Bijbel ta spierta: “Lipnan di un adultera ta gotia miel, y su boca ta mas suave cu azeta; ma na final e ta marga manera absintio, skerpi manera spada di dos fila.” (Proverbionan 5:3, 4) E consecuencianan di impuresa moral ta doloroso y nan por ta mortal. Nan ta entre otro, un mal consenshi, malesanan transmiti sexualmente y e daño emocional causa na e casa di e persona infiel. E cosnan aki sigur ta bon motibo pa no sigui un rumbo cu por hiba na infidelidad matrimonial.

17. Cua ta e motibo di mas fuerte pa mantene fieldad den matrimonio?

¹⁷ Pero e motibo fundamental pakico infidelidad matrimonial ta malo ta pasobra Jehova, e Originador di matrimonio y e Dunador di e capasidad sexual, ta condena esaki. Mediante profeta Malakias, Jehova a bisa: “Lo mi hala cerca boso pa huicio; y lo mi ta lihe pa testifica contra . . . kibradonan di matrimonio.” (Malakias 3:5) Relaciona cu loke Jehova ta mira, Proverbionan 5:21 ta declara: “E camindanan di un hende ta den bista di SEÑOR, y e ta vigila tur su bereanan.” Si, “tur cos ta habri y bisto dilanti di wowo di Esun cu nos tin di aber cu ne.” (Hebreonan 4:13) Pues anto, e motivacion di mas fuerte pa mantene fieldad den matrimonio ta ora nos ta realisa cu cualkier acto di impuresa sexual ta daña nos relacion cu Jehova, pa scondi cu un infidelidad por ta y pa chikito cu su consecuencianan fisico of social lo por parce.

18, 19. Kico nos ta siña for di e experencia di Jose cu e esposa di Potifar?

¹⁸ E ehempel di Jose [Jozef], yiu di patriarca Jacob, ta mustra cu e deseo pa keda na pas cu Dios ta un motivacion poderoso. Debi cu Jose tabatin fabor den bista di Potifar, un oficial di palacio di Farao, el a bin haya un posicion privilegia den Potifar su cas. Ademas, Jose tabatin “bon tipo y bon aparencia”, y e casa di Potifar a tuma nota di esei. Tur dia e muher tabata purba seduci Jose, pero su esfuersonan no a duna resultado. Kico a pone Jose resisti tur su proposicionnan inmoral? Bijbel ta bisa nos: “Jose a nenga y a bisa esposa di su shon: ‘Mira, cu mi akinan mi shon . . . no a nenga mi nada sino abo so, pasobra abo ta su esposa. Con anto mi por haci e maldad grandi aki y peca contra Dios?’”—Genesis 39:1-12.

¹⁹ Siendo soltero, Jose a mantene puresa moral dor di nenga di drenta den un relacion cu esposa di un otro homber. Proverbionan 5:15 ta bisa hombernan casa: “Bebe awa for di bo mes rembak, y awa fresco for di bo mes pos.” Tene cuidou pa bo no forma lasonan romantico pafo di matrimonio asta sin cu ta bo intencion. Haci esfuerso pa fortalece e amor den bo propio matrimonio, y traha duro pa resolve cualkier dificultad matrimonial cu boso ta confronta. En todo caso, “alegra bo den e esposa [of esposo] di bo hubentud.”—Proverbionan 5:18.

Kico Bo A Siña?

• Con un cristian lo por bira envolvi den un relacion romantico sin cu ta su intencion?

• Ki precaucionnan por yuda un persona pa e no forma un laso romantico pafo di matrimonio?

• Kico un pareha casa mester haci ora nan ta confronta problema?

• Cua ta e motivacion di mas fuerte pa mantene fieldad den matrimonio?

[Preguntanan di Estudio]

[Plachi na pagina 26]

Lamentablemente, e luga di empleo por ta un ambiente fertil pa un romance inapropia desaroya

[Plachi na pagina 28]

‘Cu conocemento e cambernan ta wordo yena cu cosnan agradabel’