Mga Pangutana Gikan sa mga Magbabasa

Unsay himoon sa kongregasyon kon ang usa ka Kristohanon nga nagdrayb ug sakyanan naaksidente nga nagpahinabog kamatayon sa uban?

Kinahanglang tagdon sa kongregasyon kon ang drayber sad-an ba sa dugo aron ang kongregasyon dili makaambit sa pagkasad-an sa dugo. (Deuteronomio 21:1-9; 22:8) Ang drayber nga responsable sa aksidente mahimong sad-an sa dugo kon wala siya mag-amping o kon siya tinuyong naglapas sa mga balaod sa gobyerno bahin sa kahilwas ug trapiko. (Marcos 12:14) Apan aduna pay laing mga butang nga tagdon.

Ang usa ka mamumuno nga miikyas ngadto sa siyudad nga dalangpanan sa Israel kinahanglang husayon. Kon ang pagpatay mapamatud-ang wala tuyoa, siya tugotan nga magpabilin sa siyudad, nga luwas gikan sa tigpanimalos sa dugo. (Numeros 35:6-25) Busa kon ang usa ka Kristohanon maoy nakaingon sa kamatayon sa usa ka tawo tungod sa aksidente, kinahanglang susihon sa mga ansiyano kon siya ba sad-an sa dugo. Ang panglantaw sa gobyerno o ang desisyon sa korte dili bug-os makaapektar sa aksiyon nga himoon sa kongregasyon.

Pananglitan, mahimong ideklarar sa korte nga ang usa nakalapas ug pipila ka balaod sa trapiko, apan ang mga ansiyano nga nag-imbestigar mahimong modesisyon nga ang drayber dili sad-an sa dugo tungod kay siya wala kaayoy mahimo o wala gayoy kontrol sa mga kahimtang nga miresulta sa kamatayon. Sa laing bahin, bisag gidismis sa korte ang kaso, ang mga ansiyano mahimong modesisyon nga siya sad-an gayod sa dugo.

Ang desisyon sa mga ansiyano nga nag-imbestigar sa kaso angayng ipasukad sa Kasulatan ug sa tin-aw nga mga ebidensiya—ang pag-admitir sa drayber ug/o ang pamatuod sa duha o tulo ka mga saksi. (Deuteronomio 17:6; Mateo 18:15, 16) Kon mapamatud-an nga sad-an sa dugo, kinahanglan magporma ug hudisyal nga komite. Kon matino sa komite nga mahinulsolon ang tawo nga sad-an sa dugo, siya makadawat ug nahiangay nga Kasulatanhong pagbadlong ug matangtangan sa mga pribilehiyo sa kongregasyon. Siya dili na mag-alagad ingong ansiyano o ministeryal nga alagad. Ang ubang mga restriksiyon ipahamtang usab. Ug siya may tulubagon sa Diyos tungod sa iyang wala pag-amping ug pagpasagad nga misangpot sa aksidente ug kamatayon.—Galacia 6:5, 7.

Sa pag-ilustrar: Kon dili maayo ang panahon sa dihang naaksidente, ang drayber mas nag-amping unta. Kon siya nagduka, mihunong na lang unta siya ug nagpahulay hangtod mawala ang iyang pagduka, o lain na lang unta ang iyang gipadrayb.

Ibutang ta nga kusog kaayo ang padagan sa drayber. Kon ang usa ka Kristohanon nagpadagan ug sobra sa gitakda sa balaod, siya napakyas sa paghatag kang ‘Cesar sa mga butang ni Cesar.’ Kini nagpakita usab nga wala siya magtagad sa pagkasagrado sa kinabuhi, tungod kay posible nga mosangko kini sa makamatay nga aksidente. (Mateo 22:21) Niining kahimtanga, tagda ang lain pang butang. Unsang matanga sa panig-ingnan ang ikahatag sa usa ka ansiyano ngadto sa panon kon siya wala magtagad sa mga balaod sa gobyerno maylabot sa trapiko o tinuyo nga naglapas niana?—1 Pedro 5:3.

Dili angay tagalan sa mga Kristohanon ang uban nga makaabot sa usa ka dapit kon imposible nga makaabot siya nga dili magpadagan ug sobra ka kusog. Apan kasagaran, malikayan ang problema kon molakaw nga mas sayosayo o usbon ang eskedyul aron adunay igong panahon sa pagbiyahe. Kon buhaton kana, ang usa ka Kristohanon dili matental sa pagdrayb nga paspas ra kaayo, kondili makahimo siya sa pagsunod sa balaod sa trapiko sa “labaw nga mga awtoridad.” (Roma 13:1, 5) Kini makatabang sa drayber nga malikayan ang makamatay nga mga aksidente ug ang pagkasad-an sa dugo. Siya makahatag usab ug maayong panig-ingnan ug makabatog hinlong tanlag.—1 Pedro 3:16.