Nkonko ya babadi

Ntshinyi tshidi tshisumbu ne bua kuenza bikala muena Kristo udi wendesha mashinyi mukebeshe njiwu idi mishipeshe bantu bakuabu?

Tshisumbu tshidi ne bua kutangila bikala kanyemesha mupie dibanza dia mashi bua kuepula tshisumbu tshijima ku dibanza dia mashi. (Dutelonome 21:1-9; 22:8) Kanyemesha udi mukebeshe njiwu idi mishipeshe bantu udi mua kupia dibanza dia mashi bikalaye kavua ne ntema anyi mushipe umue wa ku mikenji ya Kaisa ya dikuba bantu anyi ya diendesha mashinyi. (Mâko 12:14) Kadi kudi malu makuabu a kutangila.

Mu Isalele bavua ne bua kulumbuluisha muntu uvua ushipangana ne uvua unyemena mu umue musoko wa tshisokomenu. Pavua balumbuluishi basangana ne: kavua mushipe muntu ku bukole, bavua bamuanyishila bua kushala mu musoko au bua kudikuba kudi musombuedi. (Nomba 35:6-25) Nunku bikala muena Kristo mushipeshe muntu mu njiwu ya mashinyi, bakulu badi ne bua kukonkonona tshilumbu bua kumona ni mmupie dibanza dia mashi. Tshisumbu katshiena anu ne bua kulonda dipangadika dia ku kabadi anyi mmuenenu wa mbulamatadi bua kumona tshia kuenza to.

Tshilejilu, kabadi kadi mua kuamba ne: kanyemesha mmupile bualu mmushipe imue mikenji ya mu diendesha, kadi bakulu badi balondesha tshilumbu badi mua kumona ne: ki mmupie dibanza dia mashi bualu uvua anu ne bukokeshi bukese pa tshivua tshikebeshe njiwu anyi kavua mene nabu to. Kadi, nansha bikala kabadi koku kalekele tshilumbu etshi, bakulu badi mua kuamba ne: muntu mmupie dibanza dia mashi.

Dipangadika dia bakulu badi batangila tshilumbu etshi didi ne bua kuimanyina mu Mukanda wa Nzambi ne pa bijadiki bijalame; tshilejilu, kanyemesha nkayende mmuitabe mudiye mupile anyi bamonyi ba bualu ba kueyemena babidi anyi basatu badi bajadika tshilumbu etshi. (Dutelonome 17:6; Matayo 18:15, 16) Bikala muntu mmupie dibanza dia mashi, bakulu nebenze komite wa dilumbuluisha. Bikala komite eu mumone ne: kanyemesha eu mmunyingalale bua bubi buende, nebamunyoke bilondeshile Bible ne nebamumbushe majitu adiye nawu mu tshisumbu. Kakuikala kabidi mukulu anyi musadidi wa mudimu to. Badi mua kumukandika bua kenji amue malu. Udi kabidi ne bua kudiambuila bujitu buende ku mêsu kua Nzambi bua dipangila ntema anyi kalengu kadi kafikishe ku njiwu ne ku lufu lua bantu.​—Galatia 6:5, 7.

Tuangate tshilejilu: Bikala kulu kuvua kubi pavua njiwu mienzeke, kanyemesha uvua ne bua kuikala ne ntema ya bungi kupita pa tshibidilu. Bu yeye ubungila, uvua ne bua kuikala muimanyike mashinyi ne muikishe too ne pavua tulu ne bua kumujika, anyi uvua ne bua kuikala mushile muntu mukuabu bua endeshe.

Fuanyikijabi ne: kanyemesha uvua mu lubilu lukole. Bikala muena Kristo mupitshishe mikalu ya lubilu, mmupangile bua kupesha “Kaisa bintu bia Kaisa.” Bidi bileja kabidi mudiye kayi wangata muoyo bu tshintu tshia tshijila, bualu lubilu lukole ludi mua kufikisha ku njiwu ya lufu. (Matayo 22:21) Nunku, mbimpe kutangila bualu bukuabu kabidi. Ntshilejilu kayi tshidi mukulu mua kupesha tshisumbu bikalaye mulengulule mikenji ya Kaisa ya diendesha mashinyi anyi mubenge kuyilonda ku bukole?​—1 Petelo 5:3.

Bena Kristo kabena ne bua kulomba bena Kristo bakuabu bua kuikala muaba kampanda pa dîba dijadika didi ne bua kubasaka bua kushipa mikenji ya lubilu lua mashinyi bua kufikabu pa dîba to. Kadi misangu ya bungi, mbimpe kutuadija luendu kumpala kua dîba anyi kushintulula ndongamu bua kupeta dîba dikumbane dia kuenza luendu. Bikala muena Kristo wenza nunku, kakupona mu diteta dia kuendesha mashinyi ne lubilu lukole kupita pa mukenji, kadi neikale ne mushindu wa kulonda mikenji ya diendesha miela kudi “bakokeshi badi ku mutu” kua mbulamatadi. (Lomo 13:1, 5) Nebiambuluishe kanyemesha bua kudilama ku njiwu ya lufu idi mua kumupisha dibanza dia mashi. Nebimuambuluishe kabidi bua kuikala tshilejilu tshilenga ne bua kulama kondo ka muoyo kimpe.​—1 Petelo 3:16.