Fesili Mai le ʻAufaitau

O le ā e ao ona faia e le faapotopotoga pe a lavea se taavale na aveina e se Kerisiano, ma iʻu ina maliliu ai nisi?

E ao i le faapotopotoga ona iloilo pe nofosala le avetaavale i le toto o lē ua maliu ona e lē manaʻomia ona nofosala le faapotopotoga pe tuuaʻia e tagatānuu i le nofosala i le toto. (Teuteronome 21:1-9; 22:8) E ono tuuaʻia se avetaavale i le nofosala i le toto, pe afai e faamaonia lona faatamala po o le solia ma le iloa o tulafono a Kaisara mo auala ma le saogalemu. (Mareko 12:14) Peitaʻi, e iai nisi vala e ao ona iloilo.

Pe afai e sola atu se fasioti tagata i se aai o sulufaʻiga i Isaraelu, sa manaʻomia ona faia sona faamasinoga. Pe afai e faamaonia o le fasioti tagata paʻivalea, sa faataga ona ia nofo i le aai ina ia malupuipuia ai mai lē o loo fia tauia le toto na leiloa. (Numera 35:6-25) O lea la, afai e maliu se tasi ona o se isi Kerisiano i se faalavelave, e ao i toeaina ona iloilo totoʻa pe ono iai sina tuuaʻiga o le nofosala i le toto. E lē faavaea atoatoa se faaiʻuga o le a faia e le faapotopotoga i manatu o le malo po o le faamasinoga.

Mo se faaaʻoaʻoga, e ono faasalaina e le faamasinoga le avetaavale ona o le solia o nisi tulafono, ae ono manatu toeaina o loo iloiloina le mataupu, e lē o nofosala le avetaavale ona sa faigatā pe leai sana mea na mafai i tulaga na iʻu ai i le faalavelave matuiā. Pe atonu foʻi e solofua e le faamasinoga le mataupu, ae e ono faamaonia e toeaina o loo nofosala lava le avetaavale.

E ao ona faavae le faaiʻuga a toeaina i le Tusi Paia ma faamatalaga moni o le mea na tupu. Atonu o se taʻutinoga a le avetaavale lava ia, po o faamatalaga a ni molimau faatuatuaina se toʻalua pe toʻatolu. (Teuteronome 17:6; Mataio 18:15, 16) Pe afai e faamaonia le nofosala i le toto, e ao loa ona taulimaina e se komiti tau faafaamasinoga. Pe afai e faaalia le salamō o le tagata nofosala i le toto, ua tatau iā te ia ni aʻoaʻiga mai le Tusi Paia ma taofia ni ona faaeaga i totonu o le faapotopotoga. E lē toe auauna o ia o se toeaina po o se auauna o le faiva, faapea ma nisi ituaiga o tofiga. E tali atu o ia i luma o le Atua ona o lona faatamala, faatalalē, ma le lē faaeteete ua iʻu ai i se faalavelave matuiā.—Kalatia 6:5, 7.

Ina ia faataʻitaʻi: Pe afai sa leaga le tau i le taimi o le faalavelave, sa tatau ona matuā faaeteete le avetaavale. Pe afai sa ia lagona le fia moe, sa tatau ona taofi le taavale ma mālōlō lelei seʻia teʻa lona fia moe, pe tuu i se isi tagata le taavale na te aveina.

Ae seʻi faapea, na saosaoa tele le taavale. Pe afai e soona faasaoasaoa e se Kerisiano le taavale, o lona uiga ua ia lē usitai i le avatu o “mea a Kaisara iā Kaisara.” E faaalia ai foʻi lona manatu faatauvaa i le paia o le ola, auā sa tatau ona manatu e ono tupu se faalavelave matuiā i le soona saosaoa. (Mataio 22:21) Pe afai o le tulaga lea, seʻi manatu i se isi mea e ao ona iloiloina. Faamata o le ā se ituaiga o faaaʻoaʻoga o faataatia e se toeaina, pe afai na te lē manatu mamafa pe lē usitai ma le loto i ai i tulafono a Kaisara mo le auala?—1 Peteru 5:3.

E lē tatau i Kerisiano ona faatonuina se isi tagata ia iai i se nofoaga patino, i se taimi e iloa e ono solia ai le saosaoa faatulafonoina. O le tele o taimi e manaʻomia ai ona vave faia se mea pe suia foʻi le faasologa ina ia lava ai le taimi mo femalagaaʻiga. Pe a faia faapena, o le a lē faaosoosoina ai se Kerisiano ina ia avetaavale masau ae o le a ia usitaia ai foʻi tulafono o le auala ua faataatia e le malo po o “faipule silisili.” (Roma 13:1, 5) O le a puipuia ai foʻi le avetaavale mai faalavelave matuiā ma le nofosala i le toto. O le a mafai ai foʻi ona avea o ia ma faaaʻoaʻoga lelei, ma tausia ai se lotofuatiaifo mamā.—1 Peteru 3:16.