Aksi fu leisiman

San a gemeente musu du te wan Kresten di ben e rèi oto meki taki wan ongoloku pasa di abi leki bakapisi taki wan sma lasi en libi?

A gemeente musu ondrosuku efu a Kresten dati abi brudu-paiman fu di a gemeente musu luku bun taki a no e tyari brudu-paiman kon na en tapu (Deuteronomium 21:1-9; 22:8). Te wan sma di ben e rèi oto, meki taki wan trawan lasi en libi, dan a kan abi brudu-paiman efu a no ben e luku bun, noso efu a pasa den wet fu Caesar fu espresi (Markus 12:14). Ma a gemeente musu ondrosuku tra sani tu.

Wan kiriman di ben lowe go na wan fu den loweman foto na ini Israel, ben musu go na fesi krutu. Efu den krutuman ben feni taki a no ben kiri a trawan fu espresi, dan a ben e kisi primisi fu tan na ini a foto pe a sma di ben e suku fu kiri en no ben kan du en ogri (Numeri 35:6-25). Sobun, efu wan Kresten meki taki wan ongoloku pasa di abi leki bakapisi taki wan sma lasi en libi, dan den owruman musu ondrosuku a tori fu kon sabi efu a sma abi brudu-paiman. A no de so ala ten taki a gemeente sa handri akruderi a bosroiti di skowtu, noso krutubangi teki.

Fu eksempre, krutubangi kan feni taki a sma pasa wan wet, aladi den owruman di e ondrosuku a tori kan bosroiti taki a sma no abi brudu-paiman, fu di a no ben man yepi taki so wan ongoloku pasa. Ma awansi krutubangi e taki dati a sma no abi fowtu ini a tori, toku den owruman kan feni taki a sma abi brudu-paiman trutru.

A bosroiti di den owruman e teki musu kruderi nanga Bijbel èn nanga a fruklari fu a sma di ben e rèi na oto, noso nanga a fruklari fu tu noso dri opregtisma di si san pasa (Deuteronomium 17:6; Mateyus 18:15, 16). Efu den owruman kon si taki a sma abi brudu-paiman, dan den musu seti wan krutu komte. Efu a komte e si taki a sma di abi brudu-paiman e sori berow, dan den sa gebroiki Bijbel fu gi en a piri-ai di a abi fanowdu, èn a sa lasi son frantwortu di a abi na ini a gemeente. A sma dati no sa dini moro leki wan owruman, noso leki wan dinari ini a diniwroko. A sa lasi tra grani tu. Boiti dati a musu tyari frantwortu na fesi Gado taki a meki wan sma lasi libi fu di a no ben e luku bun.—Galasiasma 6:5, 7.

Fu eksempre: Efu hebi alen ben e fadon na a ten di na ongoloku pasa, dan a sma di ben e rèi na oto ben musu luku moro bun. Efu sribi ben e kiri en, dan a ben musu stop na oto èn rostu pikinso teleki a ben kisi ensrefi baka, noso a ben musu meki wan tra sma rèi na oto.

Kon meki wi taki dati a sma ben e rèi bun tranga. Efu iniwan Kresten ben e rèi moro tranga leki a mag rèi, dan a no pai „Caesar den sani di de fu Caesar”. A sani disi e sori tu taki a no abi lespeki gi a santafasi fu a libi, bika a fasi fa a e rèi kan abi leki bakapisi taki wan sma lasi en libi (Mateyus 22:21). Luku ete wan tra sani di abi fu du nanga a tori disi. Sortu eksempre wan owruman ben o gi na ipi efu a no e hori ensrefi na den wet fu Caesar, noso efu a e pasa den wet dati fu espresi?—1 Petrus 5:3.

Kresten no musu fruwakti fu trawan taki den e rèi moro tranga leki den mag rèi, soso fu de na wan presi na wan spesrutu ten. Ma nofo tron a de so taki a sma musu komoto na oso biten, noso a musu seti sani na so wan fasi taki a no sa doro lati na a presi pe a musu go. Efu dati e pasa, dan a Kresten no sa prakseri fu rèi moro tranga leki a mag rèi, ma a sa man hori ensrefi na den wet fu „den tiriman” (Romesma 13:1, 5). Disi sa yepi a sma disi fu luku bun taki ongoloku no e pasa di sa abi leki bakapisi taki sma lasi den libi, bika a sani disi kan meki taki a kisi brudu-paiman. Boiti dati, a sma disi sa de wan bun eksempre gi trawan, èn a sa tan abi wan bun konsensi.—1 Petrus 3:16.