Dipotso Tse di Tswang Kwa Babading

Boikarabelo jwa phuthego ke bofe fa Mokeresete yo o kgweetsang koloi a nna le kotsi e go swang batho mo go yone?

Kgang ya molato wa madi e tshwanetse ya sekasekwa ka gonne phuthego e tshwanetse go tila go nna le molato wa madi o o kopanetsweng. (Duteronome 21:1-9; 22:8) Motho yo o neng a kgweetsa a bo a dira kotsi e go swang mongwe mo go yone a ka nna le molato wa madi fa e le gore o ne a le botlhaswa kgotsa fa e le gore o robile mongwe wa melao ya ga Kaesara ya pabalesego kgotsa ya tsela, ka boomo. (Mareko 12:14) Mme go na le dintlha tse dingwe tse di tshwanetseng go sekasekwa.

Mmolai yo o neng a tshabela kwa go mongwe wa metse ya Baiseraele ya botshabelo o ne a tshwanelwa ke go sekisiwa. Fa go fitlhelwa gore o ne a sa bolaya motho ka boomo, o ne a tla letlelelwa go tswelela a nna mo motseng, mo a ka se kang a tshwarwa ke mmusolosi wa madi teng. (Dipalo 35:6-25) Ka jalo fa Mokeresete a na le seabe mo losong lwa mongwe lwa kotsi, bagolwane ba tshwanetse go sekaseka kgang go bona gore a o na le molato wa madi. Tshwetso ya puso kgotsa ya kgotlatshekelo ga se tsone di laolang gore phuthego e tla tsaya kgato efe.

Ka sekai, kgotla e ka bolela gore mokgweetsi o na le molato wa go tlola molao o o rileng wa tsela, mme bagolwane ba ba sekasekang kgang bone ba ka nna ba bona a se na molato wa madi ka gonne a ne a ka se kgone go laola maemo a a bakileng loso. Mme le fa kgotla e ka tsholola kgetsi, bagolwane ba ka nna ba swetsa ka gore tota o na le molato wa madi.

Tshwetso ya bagolwane ba ba sekasekang kgetsi e tshwanetse ya theiwa mo Dikwalong le mo mabakeng a a itsegeng sentle—go dumela ga mokgweetsi gore o molato kgotsa bosupi jwa batho ba le babedi kgotsa ba le bararo ba ba ikanyegang ba ba iponetseng ka matlho. (Duteronome 17:6; Mathaio 18:15, 16) Fa go bonala go na le molato wa madi, go tshwanetse ga tlhomiwa komiti ya boatlhodi. Fa komiti e bona gore motho yo o nang le molato wa madi o a ikwatlhaya, o tla kgalemelwa kafa go tlhokegang ka gone go dirisiwa Dikwalo, mme o tla tseelwa ditshiamelo dingwe mo phuthegong. A ka se tlhole a direla e le mogolwane kgotsa motlhanka wa bodiredi. O tla beelwa le dithibelo tse dingwe gape. Gape o ikarabelela mo Modimong ka ntlha ya botlhaswa, kgotsa go se nne kelotlhoko mo go bakileng kotsi le loso.—Bagalatia 6:5, 7.

Re ka tshwantsha jaana: Fa e le gore maemo a bosa a ne a le maswe ka nako ya kotsi, mokgweetsi o ne a tshwanetse go nna kelotlhoko thata. Fa e le gore o ne a otsela, o kabo a ile a ema a itapolosa go fitlha boroko bo fela, kgotsa o ka bo a kopile mongwe o sele go kgweetsa.

A re re mokgweetsi o ne a le mo lobelong. Fa Mokeresete ope a kgweetsa ka lobelo lo lo fetang lobelo lo lo beilweng lwa tsela, ga a neye “Kaesara dilo tsa ga Kaesara.” Gape go bontsha gore ga a tlotle boitshepo jwa botshelo, ka gonne go dira jalo go ka baka loso lwa motho. (Mathaio 22:21) Mo ntlheng eno, ela tlhoko ntlha e nngwe gape. Mogolwane o tla bo a tlhomela letsomane sekao se se ntseng jang fa a tlhokomologa melao ya ga Kaesara ya tsela kgotsa a sa e ikobele ka boomo fela?—1 Petere 5:3.

Bakeresete ga ba a tshwanela go batla gore ba bangwe ba bo ba le mo lefelong le le rileng ka nako e e rileng e ba ka se kang ba kgona go e tshwara ba sa tlole molao wa lobelo lwa tsela. Le fa go ntse jalo, gantsi go ka tlhokega gore motho a emelele nako e sa le teng kgotsa a fetole thulaganyo ya gagwe gore a tle a nne le nako e e lekaneng gore a tsamaye sentle. Fa go dirwa jalo, Mokeresete a ka se raelesege go tsamaya ka lobelo lo lo kwa godimo ga lo lo tshwanetseng, mme o tla kgona go tsamaisana le melao ya tsela ya puso ya “balaodi ba bagolo.” (Baroma 13:1, 5) Seno se tla thusa mokgweetsi go itisa mo dikotsing tse go swang batho mo go tsone tse di ka bakang molato wa madi. Gape se tla dira gore a kgone go tlhoma sekao se se tshwanetseng mme a nne a na le segakolodi se se siameng.—1 Petere 3:16.