An Saiyang Pagkaogmang Marhay Yaon sa Ley ni Jehova

NATAPOS ni Albert D. Schroeder, miembro kan Namamahalang Grupo kan Mga Saksi ni Jehova, an saiyang daganon na buhay kan Mierkoles, Marso 8, 2006. Sia 94 anyos asin ginamit nia an labing 73 na taon sa bilog na panahon na ministeryo.

Si Tugang na Schroeder namundag sa Saginaw, Michigan, E.U.A., kan 1911. * Kan aki pa, dakol an nanodan nia manongod sa Biblia sa saiyang lola sa ina, na itinadom man sa saiya an pagkamoot sa pagbasa kan Tataramon ni Jehova. Nag-adal sia nin lenguaheng Latin saka Aleman asin inhenyeriya elektrikal sa Unibersidad nin Michigan. Minsan siring, mantang nagtatalubo an saiyang pag-apresyar sa Kasuratan, nagpondo sia sa saiyang sekular na pag-eskuela tanganing maglaog sa bilog na panahon na paghuhulit kan Kahadean. Kan 1932 sia nagin miembro kan pamilyang Bethel sa Brooklyn, Nueva York.

Kan 1937, sa edad na 26, si Tugang na Schroeder ninombrahan na magdirehir kan gibohon kan Mga Saksi ni Jehova sa Britania. An saiyang kaigotan sa paghuhulit nakaenkaminar sa dakol duman na maglaog sa bilog na panahon na paglilingkod. An sarong hoben na lalaki na saiyang nakaibanan sa Bethel sa Londres iyo si John E. Barr. Sa huri, sinda magkaibanan na naglingkod nin dakol na taon bilang miembro kan Namamahalang Grupo.

An gibohon ni Tugang na Schroeder para sa Mga Saksi ni Jehova nagin risa kan mga taon nin guerra. Kan Agosto 1942 sia idineportar hale sa Britania. Pagkatapos nin nakakapanluyang biahe sa panahon nin guerra pabalyo sa Atlantiko, sia nakapuli sa Brooklyn kan Setyembre.

Kan panahon na idto, inaantisipar na kan mga lingkod ni Jehova na may dakulang gibohon na kaipuhan na hamanon pagkatapos kan Guerra Mundial II. Si Tugang na Schroeder nasorpresa asin naogmang akoon an saiyang sunod na asignasyon—an pagtabang na gibohon an kurso nin pag-adal para sa Paadalan sa Biblia kan Watchtower sa Gilead. Sa laog nin nagkapirang taon, sia naglingkod duman bilang sarong instruktor, na nagtatabang na sanayon an mga misyonero. An mga estudyante na saiyang tinokdoan sa Gilead asin sa huri sa Pang-Kahadean na Paadalan sa Pagmiministro igwa nin maogmang mga rekuerdo manongod sa mga klaseng tinokdoan nia. Sia maogmang marhay sa pagtadom nin pagkamoot sa mga ley nin Dios sa saiyang mga estudyante asin idinoon an importansia nin pakamidbid ki Jehova.

Kan 1956, naagom ni Tugang na Schroeder si Charlotte Bowin, asin kan 1958 namundag an saindang aking lalaki, si Judah Ben. Si Tugang na Schroeder sarong marahayon na Kristianong agom asin ama. Kan 1974, sia nagpoon na maglingkod bilang miembro kan Namamahalang Grupo, kun saen pinahalagahan na marhay an saiyang pakarorop. Sia maboot asin mapakumbabang tawo na, orog sa gabos, mawot na ibantog an kadakulaan kan dakulang ngaran nin Dios. Kompiado kita na inako na ni Tugang na Schroeder an saiyang langitnon na balos bilang sarong linahidan na Kristiano na tunay na ‘naogmang marhay sa ley ni Jehova.’—Salmo 1:2.

[Nota sa Ibaba]