Ne Ba Tabela Mulao wa Jehova

BO ALBERT D. SCHROEDER, ba mwa Sitopa Se Si Etelela sa Lipaki za Jehova, ne ba felize bupilo bwa bona bwa fa lifasi la Bulalu, la 8 March, 2006. Ne ba na ni lilimo za ku pepwa ze 94 mi ne ba tandile lilimo ze 73 mwa bukombwa bwa nako kaufela.

Muzwale Schroeder n’a pepezwi mwa Saginaw, Michigan, ili kwa U.S.A. ka 1911. * Ha ne ba sa li banana, ne ba itutile ze ñata ka za Bibele ku bokukw’a bona ba basali, ba ne ba ba lutile hape ku tabela ku balanga Linzwi la Jehova. Muzwale Schroeder n’a itutile puo ya Silatini, Sijelemani, ni bumanjinela bwa magesi kwa Univesiti ya kwa Michigan. Kono ha ne ba nze ba zwelapili ku utwisisa Mañolo, ba tuhela lituto za bona za kwa sikolo mi ba kalisa musebezi wa nako kaufela wa ku kutaza Mubuso. Ka 1932, ba memiwa ku yo ba mwa lubasi lwa Betele lwa kwa Brooklyn, mwa New York.

Ka 1937, Muzwale Schroeder ha n’a li wa lilimo za ku pepwa ze 26, a ketiwa ku okamela musebezi wa Lipaki za Jehova mwa naha Britain. Tukufalelo ya bona mwa musebezi wa ku kutaza ne i susuelize ba bañata teñi k’o kuli ba kalise musebezi wa nako kaufela. Kwa batu ba ne ba sebelize hamoho ni bo Schroeder kwa Betele ya kwa London, ne ku na ni mutangana wa libizo la John E. Barr. Hamulaho sibeli sa bona ne ba sebelize hamoho ka lilimo-limo mwa Sitopa Se Si Etelela.

Musebezi wa na petile Muzwale Schroeder kwa ku tusa Lipaki za Jehova ne u lemuhilwe mwahal’a lilimo za ndwa. Ka August 1942, bo Schroeder ne ba lunduzwi mwa naha ya Britain. Hamulaho wa musipili o botehisa wa ku sila liwate la Atlantic ka sisepe ka nako ye ne i kolota ndwa, ba fita mwa Brooklyn ka September.

Ka nako yeo, batanga ba Jehova ne ba libelela kuli hamulaho wa Ndwa ya Lifasi ya Bubeli ne ku ka ba ni musebezituna o ne u ka tokwa ku eziwa. Muzwale Schroeder n’a komokile hahulu ni ku taba ha na zibisizwe musebezi wa na ka eza, wa ku lukisa za kosi ya lituto za Sikolo sa Bibele sa Giliadi sa Watchtower. Ka lilimo ze ñata, bo Schroeder ne ba sebelize sina baluti kwa Giliadi, inge ba tusa ku luta balumiwa. Baituti be ne ba lutile mwa sikolo sa Giliadi ni be ne ba lutile hamulaho mwa Sikolo sa Bukombwa bwa Mubuso ba sa hupulanga lituto ze nde ze ne ba lutanga mwa kilasi. Ne ba tabela ku susueza baituti ba bona ku tabela milao ya Mulimu mi ne ba koñomekanga butokwa bwa ku ziba Jehova.

Ka 1956, muzwale Schroeder a nyala bo Charlotte Bowin, mi ka 1958, ba ba ni mwan’a bona wa mushimani wa libizo la Judah Ben. Muzwale Schroeder ne li munna ni ndate wa Sikreste yo munde. Ka 1974, bo Schroeder ba kala ku sebeleza mwa Sitopa Se Si Etelela, mi sikwata se, ne si itebuhile hahulu kutwisiso ya bona. Ne li muzwale ya sishemo ni ya ikokobeza, mi sa butokwa ni ku fita, n’a batanga ku bubanisa libizo le lituna la Mulimu. Lu na ni niti ya kuli muzwale Schroeder ki kale a amuhela mupuzo wa hae kwa lihalimu ka ku ba Mukreste ya tozizwe ya n’a ‘tabela mulao wa Jehova.’—Samu 1:2.

[Litaluso za kwatasi]