Tona Inangaro ra Tei te Ture a Iehova

KO ALBERT D. SCHROEDER, e mema no te Pupu Akaaere o te Au Kite o Iehova, kua akamutu aia i tona oraanga i te enua nei i te Ruitoru, Mati 8, 2006. E 94 ona mataiti e kua tere atu i te 73 mataiti i pou iaia i roto i te angaanga orometua tamou.

Kua anauia te Taeake ko Schroeder i Saginaw, Michigan, Marike, i te 1911. * Tona tamarikianga, e maata tikai tana i mou mai no runga i te Pipiria mei tona mama ruau i te tua o tona mama, tei akatupu ki roto iaia, i te inangaro no te tatau i te Tuatua a te Atua. Kua apii aia i te reo Ratino, Tiamani, e te pae uira, o te angaanga enitinia i te Apii Teitei o Michigan. Inara, i te maata mai anga tona ariki rekareka i te au Tuatua Tapu, i reira kua akamutu aia i tana au apii e kua rave tamou i te angaanga tutu i te Patireia. I te 1932 kua riro mai aia ei mema no te pamiri Betela i Brooklyn, New York.

I te 1937, i te 26 mataiti, kua akamanaia te Taeake ko Schroeder ei akaaere i te angaanga a te Au Kite o Iehova i Peritane. Kua riro tona inangaro no te angaanga tutu aere i te akamaroiroi i te manganui kia piri ki te angaanga tamou. Tetai mapu tane tei piri atu aia i ko i te Betela i London koia oki ko John E. Barr. I muri mai kua tavini kapiti raua no te au mataiti e manganui i roto i te Pupu Akaaere.

Kua kiteaia rai te angaanga a te Taeake ko Schroeder no te Au Kite o Iehova i te au mataiti o te tamaki. I roto ia Aukute 1942 kua akaateaia mai aia mei Peritane. I muri ake i tetai teretere anga ngata i te tuatau tamaki na te moana Ataranatika, kua tae atu aia ki Brooklyn i roto ia Tepetema.

I taua taime ra, kua tapapa ke ana te au tavini o Iehova e e aka angaanga maata te ka anoanoia i te rave i muri ake i te Tamaki II o te Ao. Kua poitirere e kua rekareka tikai te Taeake ko Schroeder i te ariki anga i tana tukuanga angaanga ou​—kia tauturu i te akatupu maata atu i te au akapapaanga apii no te Apii Pipiria Punanga Tiaki no Gileada. No tetai au mataiti, kua tavini aia ei puapii, i te tauturu i te tereni i te au mitinari. Tana aronga i apii ana i Gileada e i muri mai i roto i te Apii Orometua Patireia, e maata tikai to ratou manako akaperepere no tana au pupu apii. E mea inangaro roa nana i te apii i te inangaro i te au ture a te Atua ki tana aronga apiipii e i te akaketaketa i te puapinga o te kite ia Iehova.

I te 1956, kua akaipoipo te Taeake ko Schroeder ia Charlotte Bowin, e i te 1958 kua anau mai ta raua tamaiti, ko Judah Ben. Ko te Taeake ko Schroeder, e tane e te metua Kerititiano meitaki tikai. I te 1974, kua akamata aia i te tavini i roto i te Pupu Akaaere, e kua ariki rekareka maata roaia tona kite pakari i reira. E tangata takinga meitaki aia e te akaaka ko tei, inangaro i runga ravao, i te akakaka i te ingoa ngateitei o te Atua. Te papu nei ia matou e kua rauka i te Taeake ko Schroeder tana tutaki i te rangi ei Kerititiano akatainuia ko tei ‘inangaro tika tikai i te ture a Iehova.’​—Salamo 1:2.

[Tataanga Rikiriki i Raro]