Makosog an Boot Huli sa Pagtubod Asin Diosnon na Takot
Makosog an Boot Huli sa Pagtubod Asin Diosnon na Takot
“Magmakosog an saimong boot asin magpakakosog ka . . . Si Jehova na saimong Dios nasa kaibanan mo.”—JOSUE 1:9.
1, 2. (a) Sa punto de vista nin tawo, ano an posibilidad na manggana an Israel tumang sa mga Cananeo? (b) Anong pag-asegurar giraray an inako ni Josue?
KAN 1473 B.C.E., palaog na sa Dagang Panuga an nasyon nin Israel. Mapadapit sa kadepisilan na nasa enotan, ipinagirumdom ni Moises sa banwaan: “Ika madakit ngonyan sa Jordan tanganing lumaog asin palayason an mga nasyon na mas dakula asin makapangyarihan kisa saimo, mga siudad na dakula asin nakukutaan abot sa kalangitan, sarong banwaan na dakula asin haralangkaw, mga aki ni Anaquin, na ika man sana an . . . nakadangog na sinabi, ‘Siisay an makakatindog nin marigon sa atubangan kan mga aki ni Anac?’” (Deuteronomio 9:1, 2) Iyo, an higanteng mga parapakilaban na ini bantog! Dugang pa, an nagkapirang Cananeo may mga hukbo na kompleto sa kagamitan, may mga kabayo asin karuwahe na an mga rueda may mga karit na batbat.—Hokom 4:13.
2 Sa ibong na lado, an Israel dati sarong nasyon nin mga oripon asin katatapos pa sana kan saindang 40 taon sa kaawagan. Huli kaini, sa punto de vista nin tawo, garo baga harayo an posibilidad na manggana sinda. Pero, si Moises may pagtubod; ‘naheheling’ nia si Jehova na ginigiyahan sinda. (Hebreo 11:27) “Si Jehova na saimong Dios minadakit sa enotan mo,” an sinabi ni Moises sa banwaan. “Popohoon nia sinda, asin sia an madaog sa sainda sa atubangan mo.” (Deuteronomio 9:3; Salmo 33:16, 17) Pagkagadan ni Moises, inasegurar giraray ni Jehova si Josue kan Saiyang pagsuportar, na sinasabi: “Buhat, dumakit ka sa Jordan na ini, ika asin an bilog na banwaan na ini, pasiring sa daga na itatao ko sa sainda, sa mga aki ni Israel. Mayo nin siisay man na marigon na makakatindog sa atubangan mo sa gabos na aldaw kan saimong buhay. Kun paanong nasa kaibanan ako ni Moises masasakaibanan mo man ako.”—Josue 1:2, 5.
3. Ano an nakakontribwir sa pagtubod asin kosog nin boot ni Josue?
3 Tanganing kamtan an suporta asin paggiya ni Jehova, si Josue dapat na magbasa asin maghorophorop sa Ley nin Dios asin mamuhay sono dian. “Paagi kaiyan gigibohon mong mapanggana an saimong dalan asin paagi kaiyan mahiro ka na may kadonongan,” an sinabi ni Jehova. “Bako daw na pinagbotan taka? Magmakosog an saimong boot asin magpakakosog ka. Dai ka makubhanan o masindakan, huli ta si Jehova na saimong Dios nasa kaibanan mo saen ka man paduman.” (Josue 1:8, 9) Huling si Josue naghinanyog sa Dios, sia nagin makosog an boot, makosog, asin mapanggana. Minsan siring, an kadaklan sa saiyang kapag-arakian dai naghinanyog. Bilang resulta, sinda dai nagin mapanggana, asin sinda nagadan sa kaawagan.
Daing Pagtubod na Banwaan na Mayo nin Kosog nin Boot
4, 5. (a) Paano ikakakomparar an aktitud kan sampulong espiya sa aktitud ni Josue asin Caleb? (b) Ano an reaksion ni Jehova sa kadaihan nin pagtubod kan banwaan?
4 Kuarentang taon bago kaiyan, kan enot na magdangadang an Israel sa Canaan, si Moises nagsugo nin 12 lalaki tanganing espiyahan an daga. An sampulo nagbaralik na natatakot. “An gabos na tawo na naheling niamo sa tahaw kaiyan mga tawo na haralangkawon,” an kagsing ninda. “Duman naheling mi an mga Nefilim, an mga aki ni Anac, na gikan sa mga Nefilim; kaya sa sadiri niamong pagheling kami nagin siring sa mga lukton.” Mga higante daw “an gabos na tawo”—bako sanang an mga Anaquin? Bako. An mga Anaquin daw mga gikan kan mga Nefilim bago kan Baha? Siempre bako! Pero, huli sa mga pagbiribid na ini, an nakakalunos na takot luminakop sa kampo. An banwaan gusto na nganing bumalik sa Egipto, an daga kan saindang kaoripnan!—Bilang 13:31–14:4.
5 Minsan siring, an duwa sa mga espiya, si Josue asin Caleb, galagang lumaog sa Dagang Panuga. “Tinapay ta” an mga Cananeo, an sabi ninda. “Binayaan na sinda kan saindang pailihan, asin si Jehova nasa sato. Dai kamo matakot sa sainda.” (Bilang 14:9) Si Josue asin Caleb daw mga optimista na mayong basehan? Bako nanggad! Kaiba kan bilog na nasyon, naheling ninda na sinupog ni Jehova an makapangyarihan na Egipto asin an mga dios kaiyan paagi sa Sampulong Damat. Dangan naheling ninda na linamos ni Jehova si Faraon asin an saiyang puersa militar sa Dagat na Pula. (Salmo 136:15) Malinaw nanggad, an takot na ipinaheling kan sampulong espiya asin kan mga naimpluwensiahan ninda dai puedeng ipanarahotan. “Sagkod noarin na dai sinda matubod sa sako sa gabos na tanda na ginibo ko sa tahaw ninda?” an sinabi ni Jehova, na ipinapahayag an saiyang hararom na kakologan sa boot.—Bilang 14:11.
6. Sa anong paagi na konektado sa pagtubod an kosog nin boot, asin paano ini naheheling sa presenteng mga panahon?
6 Tinumbok ni Jehova an pinakadahelan kan problema—an pagkamatalaw kan banwaan nagpapaheling kan saindang kadaihan nin pagtubod. Iyo, an pagtubod asin kosog nin boot magkakonektar na marhay, kaya si apostol Juan nakapagsurat mapadapit sa Kristianong kongregasyon asin sa espirituwal na pakikilaban kaiyan: “Ini an kapangganahan na nakadaog sa kinaban, an satong pagtubod.” (1 Juan 5:4) Ngonyan, an pagtubod na arog kan ki Josue asin Caleb nagin dahelan na ikinakahulit an maogmang bareta kan Kahadean sa bilog na kinaban kan labing anom na milyon na Saksi ni Jehova, hoben asin gurang, pusog asin maluya an hawak. Mayong kaiwal na nakapapondo sa pagtaram kan mapuersa asin makosog an boot na hukbong ini.—Roma 8:31.
Dai Kamo ‘Sumibog’
7. Ano an boot sabihon nin ‘pagsibog’?
7 An mga lingkod ni Jehova ngonyan makosog an boot na naghuhulit kan maogmang bareta huling an kaisipan ninda kapareho kan ki apostol Pablo, na nagsurat: “Bako kita an klase na minasibog pasiring sa kalaglagan, kundi an klase na may pagtubod sa ikakapagdanay na buhay kan kalag.” (Hebreo 10:39) An ‘pagsibog,’ siring kan nasambitan ni Pablo, dai nangangahulogan nin pakaeksperyensia nin temporaryo sanang pagkatakot, huli ta may mga panahon na natakot man an dakol na maimbod na lingkod nin Dios. (1 Samuel 21:12; 1 Hade 19:1-4) Imbes, iyan nangangahulogan nin “pag-atras, paghale,” magin “pabaya sa pangangapot sa katotoohan,” an paliwanag nin sarong diksionaryo sa Biblia. Idinudugang kaiyan na an ‘pagsibog’ tibaad sarong metapora na basado sa “pagbaba kan layag asin sa siring pagmenor” mapadapit sa paglilingkod sa Dios. Siempre, an mga may makosog na pagtubod dai nag-iisip na “magmenor” kun may problemang lumataw—baga man iyan persekusyon, helang, o iba pang klase nin pagbalo. Imbes, nagpapadagos sindang maglingkod ki Jehova, huling aram ninda na sia lubos na nagmamalasakit sa sainda asin aram nia an saindang mga limitasyon. (Salmo 55:22; 103:14) Igwa daw kamo nin siring kaiyan na klase nin pagtubod?
8, 9. (a) Paano pinakosog ni Jehova an pagtubod kan enot na mga Kristiano? (b) Ano an magigibo niato tanganing parigonon an satong pagtubod?
8 Sarong beses nagsaboot an mga apostol na kulang an saindang pagtubod, kaya sinabi ninda ki Jesus: “Tawe kami nin orog pang pagtubod.” (Lucas 17:5) Sinimbag an saindang sinserong kahagadan, nangorogna kan Pentecostes 33 C.E., kan an ipinanugang banal na espiritu huminilig sa mga disipulo asin nagtao sa sainda nin mas hararom na pakarorop sa Tataramon asin katuyohan nin Dios. (Juan 14:26; Gibo 2:1-4) Huling napakosog an saindang pagtubod, pinonan kan mga disipulo an sarong kampanya nin paghuhulit na sa ibong nin pagkontra nagpangyaring ikapaabot an maogmang bareta sa “gabos na linalang sa sirong nin langit.”—Colosas 1:23; Gibo 1:8; 28:22.
9 Tanganing maparigon an satong pagtubod asin magpadagos sa satong ministeryo, dapat man niatong pag-adalan asin horophoropon an Kasuratan asin mamibi para sa banal na espiritu. Solamente paagi sa pagtudok kan katotoohan kan Dios sa satong isip asin puso—siring kan ginibo ni Josue, Caleb, asin kan enot na Kristianong mga disipulo—na magkakaigwa kita nin pagtubod na matao sa sato nin kosog nin boot na kaipuhan tanganing makatagal sa satong espirituwal na pakikipaglaban asin magin mapanggana.—Roma 10:17.
Pagtubod—Bakong Paniniwala Sana
10. Ano an kaiba sa tunay na pagtubod?
10 Siring kan ipinaheling kan mga nagdadanay na may integridad kan suanoy, an pagtubod na nagbubunga nin kosog nin boot asin pakatagal bakong paniniwala sana sa Dios. (Santiago 2:19) Iyan nagkakaipo na mamidbid niato si Jehova bilang sarong persona asin magkaigwa nin lubos na kompiansa sa saiya. (Salmo 78:5-8; Talinhaga 3:5, 6) Nangangahulogan iyan na bilog na puso kitang nagtutubod na an paghimate sa mga ley asin prinsipyo nin Dios para sa pinakaikakarahay niato. (Isaias 48:17, 18) Kalabot man sa pagtubod an pagkaigwa nin lubos na pagsarig na ootobon ni Jehova an gabos na ipinanuga nia asin sia nagigin “an parabalos sa mga maigot na naghahanap sa saiya.”—Hebreo 11:1, 6; Isaias 55:11.
11. Sa anong paagi na si Josue asin Caleb binendisyonan huli sa saindang pagtubod asin kosog nin boot?
11 An siring na pagtubod bakong inaktibo. Iyan nagtatalubo mantang iinaaplikar niato an katotoohan sa satong buhay, ‘nananamitan’ niato an mga pakinabang, ‘naheheling’ niato an mga simbag sa satong mga pamibi asin, sa iba pang mga paagi, namamatean an paggiya ni Jehova sa satong buhay. (Salmo 34:8; 1 Juan 5:14, 15) Makakasierto kita na nagrarom an pagtubod ni Josue asin Caleb mantang nananamitan ninda an karahayan nin Dios. (Josue 23:14) Estudyare an mga puntong ini: Naligtasan ninda an 40 taon na pagbaklay sa kaawagan, siring kan ipinanuga nin Dios sa sainda. (Bilang 14:27-30; 32:11, 12) Tinawan sinda nin aktibong kabtang sa anom na taon na pagsakop sa Canaan. Sa katapustapusi, nakamtan ninda an halawig na buhay asin marahay na salud patin inako pa ngani ninda an saindang personal na mga mana. Binabalosan nanggad ni Jehova an mga maimbod asin makosog an boot na naglilingkod sa saiya!—Josue 14:6, 9-14; 19:49, 50; 24:29.
12. Paano ‘ibinabantog ni Jehova an kadakulaan kan saiyang tataramon’?
12 An mamomoton na kabootan nin Dios ki Josue asin Caleb nagpapagirumdom sa mga tataramon kan salmista: “Ibinantog mo an kadakulaan kan saimong tataramon nin orog pa kisa saimong ngaran.” (Salmo 138:2) Kun ginagamit ni Jehova an saiyang ngaran tanganing garantiyahan an sarong panuga, ‘nababantog an kadakulaan’ kan kaotoban kan panugang iyan huli ta linalabihan kaiyan an gabos na inaasahan. (Efeso 3:20) Iyo, nungkang sinusudya ni Jehova an linalaoman kan mga ‘labi-labi nanggad na naoogma’ sa saiya.—Salmo 37:3, 4.
Sarong Tawo na ‘Nakapaogmang Marhay sa Dios’
13, 14. Taano ta kaipuhan ni Enoc an pagtubod asin kosog nin boot?
13 Dakol an manonodan niato manongod sa pagtubod asin kosog nin boot paagi sa pag-estudyar kan halimbawa na itinao nin saro pang saksi bago kan mga Kristiano—si Enoc. Dawa bago nia pinonan an pagpropesiya, posibleng marhay na aram ni Enoc na mababalo an saiyang pagtubod asin kosog nin boot. Paano? Huli ta sinabi ni Jehova sa Eden na magkakaigwa nin pag-iiwal, o pagkaongis, sa pag-oltanan nin mga naglilingkod sa Dios asin nin mga naglilingkod ki Satanas na Diablo. (Genesis 3:15) Aram man ni Enoc na an pagkaongis na ini puminutok na sa kapinonan kan kasaysayan nin tawo kan gadanon ni Cain an saiyang tugang na si Abel. Tunay nanggad, an saindang ama, si Adan, nabuhay nin haros 310 na taon pakatapos na mamundag si Enoc.—Genesis 5:3-18.
14 Minsan siring, sa ibong kan mga katunayan na ini, si Enoc makosog an boot na “padagos na naglakaw sa kaibahan kan tunay na Dios” asin kinondenar an “gabos na labi-labi karaot na bagay” na sinasabi kan mga tawo tumang ki Jehova. (Genesis 5:22; Judas 14, 15) Huli sa daing takot na paninindogan na ini para sa tunay na pagsamba minalataw na si Enoc nagkaigwa nin dakol na kaiwal, na nagsapeligro kan saiyang buhay. Sa pangyayaring ini, pinangyari ni Jehova na dai mamatean kan saiyang propeta an kolog nin kagadanan. Pakatapos na ihayag ki Enoc “na napaogma niang marhay an Dios,” “ibinalyo” sia ni Jehova hale sa buhay pasiring sa kagadanan, tibaad durante nin sarong propetikong pangalipadngan.—Hebreo 11:5, 13; Genesis 5:24.
15. Anong marahayon na halimbawa an itinao ni Enoc para sa mga lingkod ni Jehova ngonyan?
15 Pakatapos tolos na sambiton an pagbalyo ki Enoc, idinoon giraray ni Pablo an importansia nin pagtubod, na nagsasabi: ‘Dugang pa, kun dai nin pagtubod imposible na mapanigoan na gayo an Dios.’ (Hebreo 11:6) Iyo, huli sa pagtubod si Enoc nagkaigwa nin kosog nin boot na maglakaw sa kaibahan ni Jehova asin ipahayag an Saiyang mensahe nin paghokom sa sarong daing Dios na kinaban. Sa bagay na ini, si Enoc nagtao nin marahayon na halimbawa para sa sato. Igwa kita nin kaagid na gibohon sa sarong kinaban na kontra sa tunay na pagsamba asin pano nin gabos na klase nin karatan.—Salmo 92:7; Mateo 24:14; Kapahayagan 12:17.
Kosog nin Boot na Huli sa Diosnon na Pagkatakot
16, 17. Siisay si Abdias, asin ano an nagin kamugtakan nia?
16 Apuera sa pagtubod, may saro pang kualidad na nagkokontribwir sa kosog nin boot, arin na baga, an reberensial na takot sa Dios. Estudyaran niato an sarong pambihirang halimbawa nin sarong tawong matatakton sa Dios na nabuhay kan mga panahon kan propetang si Elias asin ni Hadeng Acab, na namahala sa amihanan na kahadean nin Israel. Durante kan pamamahala ni Acab, pinaraot kan pagsamba ki Baal an kahadean sa amihanan sa daing kaagid na paagi. Sa katunayan, 450 propeta ni Baal asin 400 na propeta kan sagradong palo, sarong simbolo kan ikinabuhay nin lalaki, an “nagkakarakan sa lamesa ni Jezabel,” na agom ni Acab.—1 Hade 16:30-33; 18:19.
17 Sarong daing pakundangan na kaiwal ni Jehova, si Jezabel naghingoang pohoon sa daga an tunay na pagsamba. Ginadan nia an nagkapira sa mga propeta ni Jehova asin naghingoa pa nganing gadanon si Elias, na sa pagdirehir nin Dios nagdulag pasiring sa ibong kan Jordan. (1 Hade 17:1-3; 18:13) Naiimahinar daw nindo kun gurano kadepisil na suportaran an dalisay na pagsamba sa kahadean sa amihanan kan panahon na idto? Mas maraot pa, kumusta kun kamo kaidto nagtatrabaho sa mismong palasyo kan hade? Iyan an nagin situwasyon kan matatakton sa Dios na si Abdias, * na mayordomo sa harong ni Acab.—1 Hade 18:3.
18. Ano an nagpangyari ki Abdias na magin pambihira bilang parasamba ki Jehova?
18 Daing duda, si Abdias mapagmaan sagkod mapagmansay sa saiyang pagsamba ki Jehova. Pero, dai sia nagkompromiso. Sa katunayan, an 1 Hade 18:3 nagsasabi sato: “Si Abdias ngani may dakulang pagkatakot ki Jehova.” Iyo, an pagkatakot ni Abdias sa Dios pambihira! Bilang resulta, an nakakarahay na takot na ini nagtao sa saiya nin pambihirang kosog nin boot, siring kan ipinapaheling dai nahaloy pakatapos na ipagadan ni Jezabel an mga propeta ni Jehova.
19. Ano an ginibo ni Abdias na nagpaheling kan saiyang kosog nin boot?
19 Mababasa niato: “Nangyari kan laglagon ni Jezabel an mga propeta ni Jehova, si Abdias kuminua nin sanggatos na propeta asin itinago sinda nin manlimalimang polo sa sarong lungib, asin dinarahan nia sinda nin tinapay asin tubig.” (1 Hade 18:4) Siring kan maiimahinar nindo, an hilom na pagpakakan sa sanggatos katawo peligrosong marhay. Bako sanang kinaipuhan na likayan ni Abdias na madakop sia ni Acab asin Jezabel kundi kinaipuhan man niang likayan na mariparo kan 850 falsong propeta na pirmeng nagduduman sa palasyo. Apuera kaiyan, an dakol na iba pang falsong parasamba sa daga nin Israel, poon sa mga paraoma sagkod sa mga prinsipe, daing duwa-duwa na aaprobetsaran an ano man na oportunidad na ibuyagyag an ginigibo ni Abdias tanganing makua ninda an pabor kan hade asin reyna. Minsan siring, sa ngangaan mismo kan gabos na parasambang ini sa idolo, may kosog nin boot na inasikaso ni Abdias an mga pangangaipo kan mga propeta ni Jehova. Kanigoan kamapuersa nanggad kan pagkatakot sa Dios!
20. Paano nakatabang ki Abdias an saiyang diosnon na takot, asin paano nakakatabang sa saindo an saiyang halimbawa?
20 Huling si Abdias nagpaheling nin kosog nin boot paagi sa diosnon na takot, minalataw na iningatan sia ni Jehova tumang sa saiyang mga kaiwal. An Talinhaga 29:25 nagsasabi: “An pagtakig sa mga tawo sarong siod, alagad an nagtitiwala ki Jehova iingatan.” Si Abdias ordinaryo sanang tawo; takot siang madakop asin gadanon, kun paanong kita iyo man. (1 Hade 18:7-9, 12) Pero, an diosnon na takot nagtao sa saiya kan kosog nin boot na daogon an ano man na takot sa tawo na tibaad namatean nia. Si Abdias sarong marahayon na halimbawa para sa sato gabos, nangorogna sa mga nagsasamba ki Jehova sa ibong kan peligro sa saindang katalingkasan o sa saindang buhay pa ngani. (Mateo 24:9) Iyo, kita logod gabos magmaigot na paglingkodan si Jehova “na may diosnon na takot asin may pagkangirhat na paggalang.”—Hebreo 12:28.
21. Ano an totokaron sa sunod na artikulo?
21 An pagtubod asin diosnon na takot bako sana an mga kualidad na nagpapatalubo nin kosog nin boot; an pagkamoot puedeng magin mas mapuersa pa ngani. “An Dios nagtao sato bakong nin espiritu nin pagkamatalaw, kundi nin puersa asin nin pagkamoot patin nin toltol na isip,” an isinurat ni Pablo. (2 Timoteo 1:7) Sa sunod na artikulo, maheheling niato kun paano kita matatabangan nin pagkamoot na maglingkod ki Jehova nin may kosog nin boot durante kan delikadong huring mga aldaw na ini.—2 Timoteo 3:1.
[Nota sa Ibaba]
^ par. 17 Bako sia an propetang si Abdias.
Masisimbag daw Nindo?
• Ano an nakakontribwir sa kosog nin boot ni Josue asin Caleb?
• Ano an kaiba sa tunay na pagtubod?
• Taano si Enoc ta daing takot sa pagbalangibog kan mensahe nin paghokom nin Dios?
• Paanong an diosnon na takot nakakakontribwir sa kosog nin boot?
[Mga Hapot Para sa Pag-adal]
[Ritrato sa pahina 16, 17]
Pinagbotan ni Jehova si Josue: “Magmakosog an saimong boot asin magpakakosog ka”
[Ritrato sa pahina 18]
Inasikaso asin prinotehiran ni Abdias an mga propeta nin Dios
[Mga Ritrato sa pahina 19]
Pusoan na itinaram ni Enoc an tataramon nin Dios