Lafwa ek Lakrent pour Bondye i prodwi Kouraz

“Pran kouraz e for . . . Zeova ou Bondye i avek ou.”—ZOZYE 1:9.

1, 2. (a) Dapre pwennvi imen, eski pep Izrael ti pou kapab ranport laviktwar lo bann Kananeen? (b) Ki lasirans Zozye ti gannyen?

AN 1473 A.N.L., nasyon Izrael ti’n pare pour antre dan Later Promiz. Moiz ti rapel sa pep ki zot ti pou rankontre difikilte. I ti dir: “Ozordi ou pe travers Zourden pour antre e pran sa ki pour bann nasyon ki pli gran e pli for ki ou, bann gran lavil fortifye ziska dan lesyel, en pep renonmen e gran, bann garson Anakim. Ou menm . . . ou’n tann dir, ‘Lekel ki kapab reziste bann garson Anak?’” (Deterononm 9:1, 2) Wi, sa bann gran gerye ti byen renonmen! Deplis, serten Kananeen ti annan bann larme byen ekipe, avek seval, e dan larou zot saret ti annan bann kouto feray.—Ziz 4:13.

² Me bann Izraelit zot, zot ti en nasyon ki ti an lesklavaz e zot ti’n fek fini pas 40 an dan dezer. Nenport imen ki ti analiz zot sitiasyon ti pou dir ki i enposib pour zot ranport laviktwar lo zot lennmi. Me kantmenm sa, Moiz ti annan lafwa; i ti kapab ‘vwar’ Zeova kot pe diriz zot. (Ebre 11:27) Moiz ti dir sa pep, “Zeova ou Bondye pe pas devan ou . . . I pou ekstermin zot, e li menm ki pou fer zot soumet devan ou.” (Deterononm 9:3; Psonm 33:16, 17) Apre ki Moiz ti’n mor, Zeova ti asir Zozye ki I pou avek zot. I ti dir li: “Leve e travers Zourden ansanm avek sa pep dan sa pei ki mon pe donn zot, bann garson Izrael. Toudilon ou lavi personn pa pou opoz ou. Zis parey mon ti avek Moiz, mon pou osi avek ou.”—Zozye 1:2, 5.

3. Kwa ki ti ed Zozye pour annan lafwa ek kouraz?

³ Pour kapab ganny sipor ek gidans Zeova, Zozye ti bezwen lir e reflesir lo Lalwa Bondye e aplik li dan son lavi toulezour. Zeova ti dir li: “Ler ou fer sa ou pou trouv sikse e ou pou azir avek lasazes. Pa mon’n konmann ou? Pran  kouraz e for. Pa bezwen soke oubyen tranble avek lafreyer, akoz Zeova ou Bondye i avek ou partou kot ou ale.” (Zozye 1:8, 9) Zozye ti for, kouraze e trouv sikse dan lavi, akoz i ti ekout Bondye. Me laplipar son zenerasyon pa ti fer parey li. Pour fini kont, zot pa ti trouv sikse e zot ti mor dan dezer.

En Pep san Lafwa ki mank Kouraz

4, 5. (a) Konman latitid sa dis espyon ti diferan avek Zozye ek Kaleb? (b) Ki mannyer Zeova ti reazir, lefe ki pep Izrael ti napa lafwa?

⁴ Karant an pase, kan pour premye fwa pep Izrael ti apros later Kanaan, Moiz ti anvoy douz zonm pour espyonn sa pei. Dis ti retournen avek lafreyer. Zot ti dir: ‘Tou dimoun ki nou ti vwar laba i bann zean.’ “Laba nou ti vwar bann Nefilim, bann garson Anak, ki sorti parmi bann Nefilim; alors nou ti konmans santi ki nou parey kasbol.” Apard bann Anakim, eski “tou dimoun” ti bann zean? Non. Eski bann Anakim ti desandans bann Nefilim ki ti egziste avan Deliz? Byensir non! Me kantmenm sa, vi ki sa dis espyon ti’n egzazere, sa ti senm lafreyer parmi bann Izraelit. Zot ti menm anvi retourn Lezip, sa later kot zot ti bann lesklav!—Nonm 13:31–14:4.

⁵ Parkont de dan sa douz espyon ti vreman anvi antre dan Later Promiz. Sa ti Zozye ek Kaleb. Zot ti dir ki bann Kananeen i “parey dipen pour nou.” “Zot in perdi zot labri, e Zeova i avek nou. Pa bezwen per zot.” (Nonm 14:9) Vi ki Zozye ek Kaleb ti pozitif, eski zot lespwar ti dan vid? Be non! Ansanm avek lezot Izraelit, zot ti vwar kan Zeova ti anvoy dis fleo pour imilye Lezip ki ti vreman for, ek tou son bann bondye. Apre, zot ti vwar kot Zeova ti fer Faraon avek son lafors militer noye dan Lanmer Rouz. (Psonm 136:15) I kler alors, ki sa dis espyon ek lezot Izraelit ti napa okenn rezon pour zot per. Pour montre son sagrinasyon, Zeova ti dir: “Pour konbyen letan zot pa pou met lafwa dan mwan pour tou sa bann siny ki mon’n fer parmi zot?”—Nonm 14:11.

6. Dan ki fason lafwa i relye etrwatman avek kouraz, e ki mannyer nou vwar sa ozordi?

⁶ Zeova ti revele akoz sa pep ti per fasilman, se akoz zot ti mank lafwa. Wi, lafwa ek kouraz i de keksoz ki mars ansanm etrwatman. Nou vwar sa dan parol ki zapot Zan ti ekrir konsernan kongregasyon Kretyen ek son kondisyon spirityel. I ti dir: “Nou ganny laviktwar lo lemonn; par nou lafwa.” (1 Zan 5:4) Ozordi i ankor annan sa bann ki annan lafwa parey Zozye ek Kaleb. Akoz sa, i’n fer ki i annan en pe plis ki sis milyon Temwen Zeova, konpri sa ki zenn konman sa ki vye, sa ki annan lafors konman sa ki napa bokou, ki pe pres sa bon nouvel Rwayonm. Napa en lennmi ki’n kapab fer sa gran larme, ki kouraze e pwisan, reste trankil.—Romen 8:31.

Pa “retourn an aryer”

7. Ki savedir “retourn an aryer”?

⁷ Avek kouraz, bann serviter Zeova i pres sa bon nouvel akoz zot annan sa menm leta lespri avek zapot Pol, ki ti ekrir: “Nou pa parmi sa bann dimoun ki retourn an aryer e ki ganny detri, okontrer nou parmi bann ki annan lafwa e ganny sove.” (Ebre 10:39) “Retourn an aryer” parey Pol i fer resorti i pa vedir kan nou per pour en pti pe letan, akoz en kantite serviter fidel Bondye a en serten moman dan zot lavi ti santi zot per. (1 Samyel 21:12; 1 Lerwa 19:1-4) Plito, sa lekspresyon, dapre en diksyonner i vedir “rekile, bes lebra,” oubyen “pran laverite alalezer.” I osi azoute ki i kapab pe konpar sa aksyon avek en “bato ki pe bes son lavwal e ki redwir son vites,” e dan menm sans en dimoun osi i kapab “ralanti” dan servis Bondye. Byensir, sa bann ki zot lafwa i for pa “ralanti” kan zot rankontre difikilte dan lavi, ki swa i persekisyon, move lasante oubyen lezot problenm. Okontrer, zot avanse dan servis Zeova, akoz zot konnen ki Zeova i kontan zot en kantite e i osi konn zot limit. (Psonm 55:22; 103:14) Eski ou annan sa kalite lafwa?

8, 9. (a) Ki mannyer Zeova ti fortifye lafwa bann premye Kretyen? (b) Ki nou kapab fer pour batir nou lafwa?

 ⁸ En moman dan zot lavi, bann zapot ti santi ki zot ti napa ase lafwa, alors zot ti dir Zezi: “Fer nou ganny plis lafwa.” (Lik 17:5) Zot demann ki zot ti fer avek senserite ti ganny akorde. Sa ti arive zour Lapannkot lannen 33 N.L., kan lespri sen, parey zot ti’n ganny promet, ti desann lo bann disip e sa ti fer zot pli konpran Parol Bondye ek son plan. (Zan 14:26; Akt 2:1-4) Apre ki zot lafwa ti’n ganny fortifye, bann disip ti konmans pres sa bon nouvel “avek tou dimoun dan lemonn antye” malgre lopozisyon.—Kolosyen 1:23; Akt 1:8; 28:22.

⁹ Pour nou kapab avanse dan predikasyon e fortifye nou lafwa, nou osi nou bezwen etidye e reflesir lo Parol Bondye, e priye pour ganny lespri sen Bondye. Nou bezwen imit Zozye, Kaleb ek bann premye Kretyen. Pour nou kapab annan sa lafwa ki pou donn nou sa kouraz pour andire dan nou lager spirityel e sorti viktorye, nou bezwen fer laverite penetre dan nou lespri ek leker.—Romen 10:17.

Lafwa i plis ki zis krwar

10. Ki savedir vre lafwa?

¹⁰ Parey ti leka avek bann fidel serviter Bondye dan lepase, pour nou kapab annan sa lafwa ki donn nou kouraz ek landirans, nou bezwen fer plis ki zis krwar Bondye i egziste. (Zak 2:19) Nou bezwen konn Zeova konman en vre personnaz, e met tou nou konfyans dan li. (Psonm 78:5-8; Proverb 3:5, 6) Savedir nou bezwen konvenki avek tou nou leker ki ler nou obeir bann lalwa ek prensip Bondye, sa i pour nou prop dibyen. (Izai 48:17, 18) Nou osi bezwen annan antyerman konfyans ki Zeova pou akonpli tou son bann promes e ki “i rekonpans tou bann ki rod li.”—Ebre 11:1, 6; Izai 55:11.

11. Dan ki fason Zozye ek Kaleb ti ganny beni pour zot lafwa ek kouraz?

¹¹ Vre lafwa pa toultan reste menm nivo. Anmezir ki nou viv laverite, nou lafwa i ogmante, nou “gout” bann benediksyon, nou “vwar” nou lapriyer ganny reponn, e nou santi ki Zeova i la pe gid nou dan plizyer fason. (Psonm 34:8; 1 Zan 5:14, 15) Nou kapab asire ki lafwa Zozye ek Kaleb ti vin pli for kan zot ti eksperyans labonte Bondye dan zot lavi. (Zozye 23:14) Annou egzamin serten pwen: Zot ti reste vivan pandan sa 40 an vwayaz dan dezer zis parey Bondye ti’n promet zot. (Nonm 14:27-30; 32:11, 12) Zot ti vreman enplike dan sa misyon pour konkerir later Kanaan, pandan 6 zan. Finalman, zot ti kapab viv pour bokou letan e an bonn sante, zot ti menm ganny zot prop leritaz. Pa Zeova i vers en kantite benediksyon lo sa bann ki servi li fidelman e avek kouraz!—Zozye 14:6, 9-14; 19:49, 50; 24:29.

12. Konman Zeova i fer son parol vin bokou plis ki nenport kwa ki nou ti ekspekte?

¹² Labonte leker ki Bondye ti demontre anver Zozye ek Kaleb i fer nou mazin parol en psalmis ki ti dir: ‘Ou’n lev ou parol menm parlao tou ou non.’ (Psonm 138:2) Kan Zeova i asosye son non avek en promes, lakonplisman sa promes i vin bokou plis ki nenport kwa ki nou ti ekspekte. (Efezyen 3:20) Wi, zanmen Zeova i dezapwent sa bann ki “pran bokou plezir” dan li.—Psonm 37:3, 4.

 En Zonm ki ti fer “plezir Bondye”

13, 14. Akoz Enok ti bezwen annan lafwa ek kouraz?

¹³ Nou kapab aprann en kantite lo lafwa ek kouraz par egzamin legzanp en lot serviter Bondye ki ti viv avan lepok Kretyen. Sa i Enok. Menm avan ki i ti konmans profetize, Enok ti konnen ki son lafwa ek kouraz ti pou ganny teste. Konman? Akoz depi dan zarden Edenn, Zeova ti dir ki pou annan laenn ant serviter Bondye ek serviter Satan. (Zenez 3:15) Enok ti osi konnen ki sa laenn ti deza egziste depi ki Kaen ti touy son frer Abel. Anfet apre ki Enok ti ne, zot papa, savedir Adan, ti viv preski 310 zan.—Zenez 5:3-18.

¹⁴ Malgre tousala, avek kouraz, Enok “ti kontinyen mars avek sa vre Bondye,” e kondann ‘move keksoz’ ki sa pep ti dir kont Zeova. (Zenez 5:22; Zid 14, 15) Lefe ki Enok pa ti per pour defann vre ladorasyon, sa ti fer li annan en kantite lennmi, e son lavi ti an danze. Alors, Zeova ti anpes son profet sibir en lanmor kriyel. Apre ki i ti’n fer Enok konnen ki i ti pe fer li “plezir,” Zeova ti “pran” li e fer li mor, i kapab ki sa ti arive pandan en vizyon profetik.—Ebre 11:5, 13; Zenez 5:24.

15. Ki legzanp Enok in kite pour bann serviter Zeova ozordi?

¹⁵ Apre ki i ti fini koz lo sa ki ti arive avek Enok, pour ankor enn fwa, Pol ti met lanfaz lo lenportans pour annan lafwa. I ti dir: “San lafwa personn pa kapab fer plezir Bondye.” (Ebre 11:6) Wi, lafwa ti donn Enok sa kouraz pour mars avek Zeova e pour anons Son mesaz zizman avek tou sa bann ki pa ti pe servi Bondye. Enok in kit en bon legzanp pour nou dan sa domenn. Nou osi nou annan en travay parey Enok pour fer, dan en lemonn ki rezet vre ladorasyon e ki ranpli avek mesanste.—Psonm 92:7; Matye 24:14; Revelasyon 12:17.

Lakrent pour Bondye i prodwi Kouraz

16, 17. Lekel Obadya, e dan ki sitiasyon i ti trouv li ladan?

¹⁶ Apard lafwa, i annan en lot kalite ki prodwi kouraz, sa i lakrent ek respe pour Bondye. Annou egzamin en zoli legzanp. Sa i en zonm ki ti annan lakrent pour Bondye ki ti viv dan lepok profet Eliya ek Lerwa Aab, ki ti diriz lo rwayonm nor Izrael. Pandan letan ki Aab ti pe dirize, bann Izraelit dan rwayonm nor ti’n ganny kontaminen en kantite par ladorasyon Baal. Anfet, 450 profet Baal ek 400 profet poto sakre, ki ti en senbol seksyel, ti pe “manz lo latab Zezabel,” madanm Aab.—1 Lerwa 16:30-33; 18:19.

¹⁷ Zezabel ki ti en lennmi kriyel, ti esey fer tou pour elimin vre ladorasyon. I ti touy serten profet Zeova e i ti menm esey touy Eliya, ki avek led Bondye ti kapab travers e sov lot kote larivyer Zourden. (1 Lerwa 17:1-3; 18:13) Eski ou kapab mazinen ki mannyer i ti difisil pour soutenir vre ladorasyon sa letan dan rwayonm nor Izrael? Pa i ti pou pli difisil ankor pour en dimoun ki travay dan pale lerwa! Anfet, sanmenm sitiasyon ki Obadya, * en serviter e en zonm ki ti annan lakrent pour Bondye, ti trouv li ladan.—1 Lerwa 18:3.

18. Akoz Obadya ti en serviter Bondye ki ti eksepsyonnel?

¹⁸ Sirman, i ti bezwen fer byen atansyon e pridan dan son ladorasyon pour Zeova. Me kantmenm sa, i pa ti fer konpromi. Anfet 1 Lerwa 18:3 i dir nou ki “Obadya ti en dimoun ki ti annan en kantite lakrent pour Zeova.” Wi sa lakrent ki Obadya ti annan pour Zeova ti eksepsyonnel! An retour sa ti donn li sa kouraz ekstraordiner, e nou vwar sa zis apre ki Zezabel ti’n touy bann profet Zeova.

19. Kwa ki montre ki Obadya ti annan kouraz?

¹⁹ Nou lir: “Kan Zezabel ti touy bann profet Zeova, Obadya ti pran san profet, par group senkant e i ti kasyet zot dan en kavern, i ti donn zot dipen ek delo.” (1 Lerwa 18:4) Sirman pour donn manze san dimoun an kasyet koumsa, ti en latas vreman danzere. Obadya pa ti pe zis fer atansyon ki Aab ek Zezabel i pri  li, me i ti osi bezwen veye ki sa 850 fo profet pa ti dekouver li, akoz souvan zot ti vin dan pale. Deplis, vi ki Izrael ti ranpli avek bann fo adorater, enkli sa ki pov ziska bann prens, san okenn dout si zot ti trouv Obadya zot ti pou fer konnen, akoz zot ti pou kontan ganny faver lerwa ek larenn. Me kantmenm sa, devan zot de gongon lizye, avek kouraz Obadya ti kontinyen pran swen avek profet Zeova. Pa lakrent pour Zeova i kapab donn nou en pwisans enkrwayab!

20. Ki mannyer lakrent pour Bondye ti ed Obadya, e konman son legzanp i ed ou?

²⁰ Vi ki lakrent pour Bondye ti fer Obadya devlop kouraz, aparaman Zeova ti protez li kont son bann lennmi. Proverb 29:25 i dir: “Tranble devan zonm se sa ki vin en latrap, me sa ki met konfyans dan Zeova pou ganny proteze.” Obadya ti en imen parey nou, i ti per ki i ganny tyonbo e touye, zis parey nou nou ti pou santi si nou ti dan son plas. (1 Lerwa 18:7-9, 12) Kantmenm sa, sa lakrent ki i ti annan pour Bondye ti donn li sa kouraz pour sirmont lafreyer ki i ti’n kapab annan pour zonm. Obadya i en zoli legzanp pour nou tou, sirtou pour sa bann ki pe servi Zeova dan bann landrwa kot zot pa lib pour pratik zot ladorasyon oubyen kot zot lavi i an danze. (Matye 24:9) Nou swete ki nou tou nou servi Zeova avek lakrent ek respe.—Ebre 12:28.

21. Ki nou pou egzaminen dan lartik swivan?

²¹ Pa zis lafwa ek lakrent pour Bondye ki fer nou devlop kouraz. Lanmour i kapab en lot kalite ki pli for. Pol ti ekrir: “Bondye pa’n donn ou en lespri timidite, me okontrer, en lespri ki ranpli nou avek lafors, lanmour ek moderasyon.” (2 Timote 1:7) Dan lartik swivan nou pou vwar konman lanmour i kapab ed nou pour servi Bondye avek kouraz dan sa bann dernyen zour difisil.—2 Timote 3:1.

[Not anba lo paz]

Eski ou kapab reponn?

• Kwa ki ti fer li posib pour Zozye ek Kaleb annan kouraz?

• Ki savedir vre lafwa?

• Akoz Enok pa ti per pour proklanm mesaz zizman Bondye?

• Ki mannyer lakrent pour Bondye i ed nou annan kouraz?

[Kestyon]

[Portre lo paz 15]

Zeova ti konmann Zozye: “Pran kouraz e for”

[Portre lo paz 17]

Enok ti koz parol Bondye avek kouraz