Loi e Troa Catre Thenge La Lapaune Me Qoue Akötresie
Loi e Troa Catre Thenge La Lapaune Me Qoue Akötresie
“Catejë, nge iahlëpi . . . Iehova Akötesi’ö thei’ö.”—IOSUA 1:9.
1, 2. (a) Thenge la aqane waiewekë i atr, atreine kö troa nga angetre Kanana hnei angetre Isaraela? (b) Nemene la ithuecatr hnei Iosua hna kapa?
AME ngöne lo macatre 1473 M.P.K., kola hnëkë hnei angetre Isaraela troa lö kowe la nöje hna thingehnaean. Ame la Mose a goeën la etrune la itre jol, ene pe angeic a canga amexeje jë koi angatr ka hape: “Tro eö a tro shashaithe Ioridano ngöne la drai celë, mate tropi troa thapa la ite nöje ka tru me ka cate hui’ö, ite lapa ka tru me hna xupi hagene uti hë la hnengödrai, nöjei ate ka tru me ka hoea, ite nekö i Anaka, hnei’ö hna deng, ka hape ‘Dei la ate troa cile qëmeke ne la ite nekö i Anaka?’ ” (Deuteronomi 9:1, 2) Nyipici laka, ame lai itre atr ka hoea nge ka isi catr, tre, ka hlemu catr angatr! Ketre, ame la itre xaa sooc ne Kanana, tre, itre ka hnëkë hnyawa angatr; hetrenyi angatr la itre hose me itre ikatr; ame ngöne la itre iwiile ne la itre ikatre i angatr ke hna saan la itre ifao ka ithiny nyine jia ne isi.—Angete Amekötin 4:13.
2 Ame pena Isaraela, tre, ketre nöj hna thahluën ekö, nge fotrine lao macatre ne pane tro agö ngöne la hnapapa. Haawe, matre ame koi atr, tre, iamamanyikeu elanyi e tro angatr a thapa la isi. Ngo, hetrenyi thei Mose la lapaun; ijiji angeice hi troa ‘öhnyi’ Iehova, lo Atre eatrongëne la nöje i Nyidrë. (Heberu 11:27) Öni Mose koi angetre Isaraela ka hape: “Iehova Akötesi’ö la mekene la tronge i’ö, tro nyidëti a apatenyi angat, me aconyi angate qëmeke i’ö.” (Deuteronomi 9:3; Salamo 33:16, 17) Thupene lo hna meci hnei Mose, hnei Iehova hna qaja xeciëne koi Iosua laka tro Nyidrëti a xatua angeic, öni Nyidrë: “Cilejë, troja shashaithe Ioridano, ce eö me nöjei ate asëjëihë celë, kowe la nöje hnenge hna hamë angat, ite nekö i Isaraela. Tha tro kö kete ate a cile qëmeke i’ö ngöne la nöjei drai asëjëihë ne mel’eö; tro ni a ce me eö tune lo hnenge hna ce me Mose.”—Iosua 1:2, 5.
3. Nemene la ka xatua Iosua troa lapaun me hetrenyi la trengecatr?
3 Nyipi ewekë troa e hnei Iosua la Trenge Wathebo i Akötresie me mekune thele ej me trongëne ej ngöne la mele i angeic. Öni Iehova ka hape: “Ame hnei’ö hna troa loi xölene ngöne la jë i’ö, me manathith. Hape u, tha hnenge hna ahnithe koi’ö? Catejë, nge iahlëpi; the qou kö, nge the hmengöhmengöne kö, ke eje kö Iehova Akötesi’ö thei’ö ngöne la hnei’ö hna troa tro kow.” (Iosua 1:8, 9) Pine laka hnei Iosua hna drei Akötresie, ene pe hetrenyi thei angeice la trenge catr, nge kola tro loi la mele i angeic. Ngo, ala nyimu la itre ka ce xötr me angeic ka thaa i drei. Hnëjine la pune koi angatr, matre meci asë pë hë angatr ngöne la hnapapa.
Ame Itre Ka Pë Lapaune Tre Troa Pë Trenge Catr
4, 5. (a) Aceitunëne jë la aqane ujë ne lo ala ten lao atr ka alamekën la nöj memine la aqane ujë i Iosua me Kaleba. (b) Tune kaa la aqane ujë i Iehova qëmekene la nöje ka pë lapaune?
4 Fotre hë lao macatre qaane lo kola easenyine e Kanana hnei angetre Isaraela; hnei Mose hna upe la truelofe lao thupëtresij matre troa alamekën la nöje Kanana. Treene thei angatr la ka bëek, nge atraqatre la xou thei angatr. Öni angatr e qaja ka hape: “Ame la nöjei ate asë hne huni hna öhn’e cili, te, ite ka hoea. Hne huni hna öhn’e cili la ite hmae ka hoea, ite nekö i Anaka, ite ka xulu qa ngöne la ite hmae ka hoea; nge eëhuni a tune la ite sipa koi huni kö.” Hapeu, “la nöjei ate asë” thaa kolo jë kö lo itre Anaka, lo itre atr ka hoea? Ohea. Hapeu, kolo kö lo itre Anaka, itre matra ne lo itre hmae ka hoea, ka mele ekö lo paatre petre kö la iwë. Ohea! Pine la itre trenge ewekë cili, kola haöthe la lapa hnene la xou atraqatr. Matre angatre fe hë a pi bëeke hmaca a tro Aigupito, lo nöj ka thahluë angatr!—Numera 13:31–14:4.
5 Ngo, luetre pe kö thene lo lai itre ka alamekën la nöj, Iosua me Kaleba; catre pe kö la aja i nyidro troa lö ngöne la Nöje Hna Thingehnaean. Öni nyidroti e qeje angetre Kanana, ka hape: “nyine a shë nyuden.” Patë hë thei angate la nyine he angat, nge eje kö the shë Iehova. The tro kö sha qoue nyuden.” (Numera 14:9) Hapeu, thaa nango sasaithi tulu kö la aqane goeëne nyidroti la nöje cili? Ohea. Ceitu memine lo itretre Isaraela ka lapa pë hë, hnei angatr hna öhnyi Iehova e aipiëne lo nöje ka draië, ene, Aigupito memine lo itre joxu i angeic, jëne lo treen lao hulö. Thupene lai, hnei angatr hna goëe Iehova e alö Farao memine la itre sooce i nyidrë hnine la hnagejë ka palulu. (Salamo 136:15) Kola mama hnyawa laka ka xou menu lo lai treen ka alamekën la nöj memine lo itre atr hnei angatr hna axouen. Öni Iehova e qaja me amamane la trenge elëhni Nyidrë ka hape:“Uti hë eue laka tha tro kö angat’ a lapaune koi ni ngöne la nöjei iamamanyikeu asë lo hnenge hna kuca ngöne nyipi angat?”—Numera 14:11.
6. Nemene la aliene matre qaja jë ka hape, thaa ka isa tro kö la trenge catr me lapaune, nge tune kaa la aqane mama lai ewekë cili enehila?
6 Hnei Iehova hna amamane hnyawane la itre ewekë ka ajolëne la itre atr, ene la kola wanaxoeën la pë lapaune i angatr hnene la aqane ujë i angatr ka pë trenge catr. Eje hi laka ame la lapaune me trenge catr, tre, thaa ka isa tro kö, celë hi matre hna qaja hnei Ioane aposetolo la pengöne la ekalesia i Keresiano memine la isi hnene ej hna troa tro xom ngöne la götrane la ua; hnei angeic hna cinyihane ka hape: “Dei lola cat, ate cate hune la fen, ene la lapaune shë.” (1 Ioane 5:4) Enehila, kola cainöjëne la maca ka loi ne la Baselaia hnene la lapaune ka ceitu memine la lapaune thei Iosua me Kaleba, ngöne la fen asë hnene la ala sikis milio lao Temoë i Iehova, itre thöth me itre qatr, itre ka hetre trenge catr me itre ka thaa egöcatr. Pëkö ithupëjia ka atreine troa thinge la ukeineqë ne la trongene isi cili ka tru trenge catr.—Roma 8:31.
The “Hmacahmaca” Kö
7. Nemene la aliene la kola hape “hmacahmaca”?
7 Kola catre troa cainöjëne la maca ka loi hnene la itretre Anyipici Iehova pine laka angatr a ce hni me Paulo, aposetolo, atre cinyihane ka hape: “Ame shë, te, tha ite sine i angate kö lo angete hmacahmaca kowe la hnëjin; ngo ite sine i angat’angete lapaune uti hë la mele la u.” (Heberu 10:39) Ame la hna amexej hnei Paulo, ene, la troa “hmacahmaca”, ke thaa kolo kö a hape troa mel hnine la xou ngöne la itre hnepe ijine ka co hi; nyimutre la itre hlue i Akötresieti ka mele nyipici koi Nyidrë ka hane xou. (1 Samuela 21:12; 1 Itre Joxu 19:1-4) Ngo kola qeje pengön la “hmacahmaca” hnene la ketre diksionere ne Tusi Hmitrötr, ka hape “troa kötëpu, troa tro,” troa “wangacone la nyipici.” Kola qaja mina fe hnene la itusi cili ka hape, ame la “hmacahmaca” tre, maine jë ketre ceitune ka amamane la “ketre atr ka tha ipiën la sihnyeu ne la ketre he matre troa nyenyape hmidra”; kösë kolo lai a qaja la pengöne la huliwa i angeic koi Akötresie. Eje hi lai laka, ame kowe la itre ka catre lapaun, tre, thaa hnei angatre kö hna pane mekune troa hunyinyi ngöne la kola traqa la itre jol, maine hnene la hna icilekeu, maine hnei meci pena, maine ketre itupath. Angatre pe a thele troa catre nyi hlue i Iehova, me atrehmekune laka, Nyidrëti a kukehni angatre hnyawa nge atre pengöne hi Nyidrëti la itre ifego ngöne la mele i angatr (Salamo 55:22; 103:14) Hapeu, eje kö thei nyipunieti la lapaune cili?
8, 9. (a) Tune kaa la aqane acatrene Iehova la lapaune ne lo itre pane Keresiano?(b) Nemene la nyine tro sa kuca matre troa acatrene la lapaune së?
8 Ame ngöne la ketre ijine kola nango nanazije la lapaune i itre aposetolo, öni angatr koi Iesu ka hape: “Nyi xane ju la lapaune hun.” (Luka 17:5) Hna kapa la sipo i angatr ngöne lo Penetekos 33 M.P.K., ngöne la kola traqa hnene la Uati Hmitrötr hune la itretre dreng me aijijë angatr troa trotrohnine hnyawa la Wesi Ula memine la aja i Akötresie. (Ioane 14:26; Ite Huliwa 2:1-4) Ase hë acatrene la lapaune i angatr, ene pe kola catre cainöjëne la maca ka loi hnene la itretre dreng, ngacama tru la icilekeu; hna tro fë la maca kowe “la nöjei ate asëjëihë e celë fen.”—Kolose 1:23; Ite Huliwa 1:8; 28:22.
9 Easë mina fe, maine easa ajan troa acatrene la lapaune së me catre cainöj, loi e tro sa inine me sine thele la Tusi Hmitrötr, nge thaa tro pi kö sa thëthëhmine troa thithi koi Akötresie troa xatua së jëne la uati hmitrötre i Nyidrë. Tro sa hetrenyi la lapaun ka troa hamëne la trenge catr ka aijijë së troa catre isi ngöne la götrane la ua me hun, e hne së hna amë hnyawa la nyipici qaathei Akötresie hnine la itre he me itre hni së, tui Iosua me kaleba memine lo itre Keresiano ne la hneijine i Iesu.—Roma 10:17.
Ame La Lapaun, Tre, Thaa Ene Hmekuje Kö La Troa Jele Nyipicine
10. Nemene la aliene la nyipi lapaun?
10 Tune lo hna amamane hnene lo itre hlue i Akötresieti ekö, kola hetrenyi la trenge catr memine la xomihniahoeany qa ngöne la hna lapaun, ngo thaa ene hmekuje kö la troa jelenyipici Akötresie. (Iakobo 2:19) Kösë kolo lai a hape, tro sa thele troa atrepengöi Iehova ceitune memine la easa thele troa atre la ketre atr, nge troa lapaune koi Nyidrë cememine la hni ka pexej. (Salamo 78:5-8; Ite Edomë 3:5, 6) Ame la aliene la troa lapaune cememine la hni ka pexej, tre, kolo lai a hape, tro sa wanga atrune hnyawa la itre wathebo i Akötresie memine la itre trepene meköti Nyidrë, ke, celë hi ewekë lai nyine troa kuca ka sisitria. (Isaia 48:17, 18) Ame mina fe la troa lapaun, tre, ene la troa xecie hnyawa koi së laka, tro Iehova a aejëne asë la itre hnei Nyidrëti hna thingehnaean, nge Nyidrëti “la ate nyi june koi angete thele catë nyidë.”—Heberu 11:1, 6; Isaia 55:11.
11. Nemene la itre manathithi hna kapa hnei Iosua me Kaleba, qa ngöne laka hnei nyidroti hna lapaun, nge hetre trengecatre hnei nyidroti hna kuca?
11 Thaa ka cile kö la lapaune cili, ngo ka tro. Ej’a kökötre draië pine laka easa melëne la nyipici, me “dem” la itre manathith, me “goeën” la itre thithi së hna sa hnei Akötresie, nge ame ngöne la itre xaa götran, easa wange atrehmekune laka, Iehova a eatrongëne la mele së. (Salamo 34:8; 1 Ioane 5:14, 15) Kola xecie fe koi së laka, ame la ka acatrene la lapaune i Iosua me Kaleba, tre, hnene laka, hnei nyidroti hna öhne la ihnimi Iehova. (Iosua 23:14) Tro hmaca së a pane ce wange lo lai itre ewekë cili: Hnei nyidroti hna mele pe qa ngöne lo footre lao macatre ne tro ngöne la hnapapa, tune lo hna thingehnaeane hë ekö hnei Akötresie. (Numera 14:27-30; 32:11, 12) Hnei nyidroti hna catre isi ngöne lo sikisi lao macatre matre troa thapa la nöje Kanana. Thupene lai, hna amanathithi nyidro; hnei nyidroti hna mele aqeany, nge egöcatre la mele i nyidro. Nge hnei nyidroti mina fe hna isa kapa isa caa edrö i nyidro, isa caa götrane hna hamëne koi nyidro. Eje hi lai laka, Iehova a nyi june hnyawa me amanathithine la itre atr ka catre nyihlue i Nyidrë me mele nyipici koi Nyidrë!—Iosua 14:6, 9-14; 19:49, 50; 24:29.
12. Tune kaa la aqane ‘atrune i Iehova la hnei Nyidrë hna thingehnaean’?
12 Hnene la ihnimi gufa i Akötresieti koi Iosua me Kaleba hna amekunë së hmaca lo trenge ewekë ne la atre cinyihane la salamo, kola hape: “Ase hë cilieti atrune la wesi ula i cilie hune la atesiwa i cilie asë.” (Salamo 138:2) E Iehova a xome la ëje i Nyidrë troa saenën la ketre hna thingehnaean, haawe, kolo hi lai a “atrune” ej, ngöne laka, tro kö a ketre pengöne catre la aqane troa eatr la hna thingehnaeane cili. (Efeso 3:20) Ejehi laka thaa tro kö Iehova a ahleuhleune la itre ka “madrine” koi Nyidrë.—Salamo 37:3, 4.
Ketre Atr Ka “Amadi Akötesie”
13, 14. Pine nemene matre nyipi ewekë koi Enoka troa hetrenyi la lapaune memine la trenge catr?
13 Ijije fe tro sa atrehmekune hnyawa la lapaune memine la trenge catr, e hne së hna pane lapa mekune la tulu hna amë pe hnei Enoka, ketre hlue i Akötresie ka mele ekö qëmekene troa traqa hnei Keriso. Qëmekene tro angeic a nyiqaane perofeta, atre hi Enoka laka, troa tupathe la lapaune me trenge catre i angeic. Pine nemen? Pine laka, hnei Iehova ha hna ahnithe ekö e Edena ka hape, troa hetre ithupëjia maine imethinë ka troa mama thene la itre ka nyi hlue i Akötresie memine la itre ka nyi hlue i Satana, lo Diabolo. (Genese 3:15) Ketre, atre hi Enoka laka, ame la imethinë cili, tre, ka hekö hë, hmekune lo Kaina a humuthi Abela trejine me angeic. Ketre, kola e la 310 lao macatre ne mele Adamu, thupene la hna mala Enoka.—Genese 5:3-18.
14 Ngacama hna traqa la itre ewekë cili, ngo, hnei Enoka hna catre “ce trotro me Akötesie” me jelengazone la itre atr ka qaja “la nöjei tenge ewekë ka calogit” hui Iehova (Genese 5:22; Iuda 14, 15) Ame la thangane la hnei Enoka hna cila xome catrëne la hnyipi hmi, ke, ala nyimu la itre ithupëjia ka nyi ethane la mele i Enoka. E cili hi la Iehova a ananyine la perofeta i Nyidrë, la itre akötre ne la mec. Thupene la kola ase amamane koi Enoka “laka ate amadi Akötesie” angeic, haawe, hnei Iehova hna “xomi angeic” qa ngöne la mel kowe la mec, maine jë ngöne la ketre ijine angeic a hmengöhmengöne me goeëne la itre hna perofetan.—Heberu 11:5, 13; Genese 5:24.
15. Nemene la tulu ka lolo hnei Enoka hna amë pë hë kowe la itre ka nyi hlue i Iehova enehila?
15 Thupene la kola ase qaja la hna xomi Enoka, hnei Paulo hna amexeje la enyipiewekëne la lapaun; öni angeice ka hape: “Ngo tha’teine kö troa amadi [Akötresie] e pëkö lapaune.” (Heberu 11:6) Nyipici laka hnene la lapaune hna thue trenge catre koi Enoka, matre tro angeic a ce tro me Iehova me cainöjëne la hnei Nyidrëti hna amekötine kowe la ketre fene ka ngazo. Haawe, ketre tulu ka lolo catre lai hna amë pë hë koi së hnei Enoka. Ceitune hi lai memine la huliwa hne së hna troa kuca ngöne la fene enehila ka icilekeu memine la nyipi hmi, nge hna haöth hnene la nöjei pengöne ewekë ka ngazo.—Salamo 92:7; Mataio 24:14; Hna Amamane 12:17.
Ame La Trenge Catre, Tre, Ka Fetra Qa Ngöne La Xoue Akötresie
16, 17. Drei lae Obadia, nge nemene la itre ewekë ka traqa koi angeic?
16 Hetrenyi la ketre thiina e tröne la lapaun, ka hamëne la trengecatr: ene, la troa metrötre me xoue Akötresie. Tro sa ce wange la ketre tulu ne la ketre atr ka xoue Akötresie, ka mele ekö ngöne la itre hneijine i Elia perofeta, me Ahaba, joxu ne la Baselaia ne Isaraela götrane ciepi. Ngöne la ijine kola nyi joxu hnei Ahaba, hna löthe menune pala ha la Baselaia ne ciepi hnene la hmi Baala. Eje hi laka, 450 lao perofeta i Baala nge 400 lao perofeta ne lo isinöe ka hmitrötr, ketre ewekë ka nyi hatrene la ka sis; angatr a “hane xeni ngöne la laulau i Iezebela,” lo föe i Ahaba.—1 Itre Joxu 16:30-33; 18:19.
17 Hnei Iezebela, ketre ithupëjia me Iehova hna kuca catrëne la ngazo, me thele troa apaatrene la nyipi hmi qa ngöne la nöj. Hnei angeic hna humuthe la itre xaa perofeta i Iehova me thele troa humuthi Elia; eloine pe hnei Iehova hna eatrongë Elia me kötre jëne la hneopegejë e Ioridrano. (1 Itre Joxu 17:1-3; 18:13) Drei kö la ejolene ekö troa cila xome hnyawa la nyipi hmi ngöne la hneijine cili, hnine la baselaia ne ciepi? Nge maine nyipunieti ju la ka huliwa hnine la hna nyi joxu, hapeu, thaa tro kö a jole koi nyipunie? Hna traqa lai ewekë cili koi Obadia, ketre hlue atre musinëne la nöjei ewekë i Ahaba. a—1 Itre Joxu 18:3.
18. Pine nemene matre kola qaja ka hape Obadia la ketre atre nyi hlue i Iehova ka sisitria?
18 Thaa luelue kö së laka, hnei Obadia hna atreine troa hmek me ipië ngöne la aqane ujë i angeic me nyi hlue i Iehova. Ngo thaa hnei angeice kö hna lue hna hnim. Eje hi laka, önine la ate cinyihane la 1 Ite Joxu 18:3 ka hape: “Obadia a qou atraqat’ e Iehova.” Nyipici laka, sisitria catr la aqane xoue Akötresieti hnei Obadia! Hnene la xou cili hna hamëne koi angeic la ketre trenge catre ka sisitria, hnei angeic hna amamane thupene ju fe kö lo kola humuthe hnei Iezebela lo itre perofeta i Iehova.
19. Nemene la hnei Obadia hna kuca matre troa amamane la trenge catre i angeic?
19 Easë a e ka hape: “Nge ngöne la ijine humuthe la ite perofeta i Iehova hnei Iezebela, Obadia a xome la ite perofeta a ca haded, me juetë angate isa ala luate nge luepi ngöne la lue ngönemenyi, me thu a i angatr me thue mel.” (1 Ite Joxu 18:4) Pane mekune jë së laka, hnei Obadia hna ithuane juetrëne la waan hadredre lao atr; hapeu, thaa ketre huliwa kö lai ka troa hetre ethane ka ngazo kowe la mele i angeic. Thaa Obadia hmekuje kö a troa hmekëne wanga troa ee angeic hnei Ahaba me Iezebela, ngo tro mina fe angeic a thupën, ke mekuhni angeice jë hnene lo 850 lao perofeta thoi ka majemine traqa kowe la uma ne la joxu. Ngöne la ketre götran, tro mina fe angeic a thupëne lo itre xaa ka nyihlue i Baala, qaane ju hi la ka eëny uti hë la taane la nöj; canga tro hi angatr a iuti sai matre troa kepe angatr hnei Ahaba me Iezebela. Ngo, qëmekene la itre ka hmi thoi cili, pëkö ka atre laka, hnei Obadia hna catre troa xatuane la itre perofeta i Iehova. Drei la etrune la men e troa xoue Akötresie!
20. Nemene la aqane xatua Obadia hnene la xoue Akötresie, nge nemene la ini hne së hna troa xome qa ngöne la tulu i angeic?
20 Pine laka hnei Obadia hna amamane la trenge catr jëne la xoue Akötresie, eje hi laka hnei Iehova hna thupë angeic qa ngöne la iakötrë ne la itre ithupëjia me angeic. Hna qaja ngöne Ite Edomë 29:25, ka hape: “E kola qoue ate, te, nyine hnö lai; ngo troa adraiëne la ate lapaune koi Iehova.” Ketre atr ka tu së hi lae Obadia; ame la aqane xou i angeic troa xölehuji angeic, me humuthi angeic, tre, tu së fe hi. (1 Ite Joxu 18:7-9, 12) Ngo hnene laka ka xoue Akötresieti angeic, ene pe hetre trengecatre i angeic troa elë hune la xoue atr, ke maine ju tro hi angeic a xouene la itre atr. Obadia la ketre tulu ka lolo catre koi easë asë, easë itre ka catre thili koi Iehova, e traqa ju akalabusi së maine troa thapa pena la mele së. (Mataio 24:9). Celë hi matre, catre pi së troa nyihlue i Iehova “memine la metöte me qou.”—Heberu 12:28.
21. Nemene la hne së hna troa ce wang ngöne la ngöne la ini ka troa xulu?
21 Thaa lapaune hmekuje kö me xoue Akötresie la lue thiina ka troa akökötrene la trenge catre së; atreine fe hi tro la ihnimi a hamëne koi së la ketre trengecatre ka tru catr. Hna cinyihane hnei Paulo ka hape: “Tha hnei Akötesie hna hamë shë la ua ka qou; ngo loi pe ka men, me ka ihnim, me ka inamacan.” (2 Timoteo 1:7) Ame ngöne la ini ka troa xulu, tro pena sa ce wang la aqane troa xatua së hnene la ihnim troa nyi hlue i Iehova ce memine la trenge catr ngöne la itre ijine akötr ne la itre drai hnapin hne së hna melën enehila.—2 Timoteo 3:1.
[Ithueamacany]
a Thaa perofeta Obadia kö la hna qaja e celë.
Ijije Kö Tro Nyipunieti a Sa?
• Nemene la ka akökötrene la trenge catre i Iosua me Kaleba?
• Nemene la hnene la nyipi lapaune hna upi së troa kuca?
• Pine nemen matre thaa xou i Enoka kö troa cainöjën la hna amekötine hnei Akötresie?
• Tune kaa la aqane akökötren la trenge catr hnene la xoue Akötresie?
[Thying]