Upperneq Guutimillu mianerinninneq iluaqutigalugit sapiissuseqarneq

„Tuppallerit pissatsillutillu [Sapiillutillu nukittugit, NV]! . . . Uanga [Jehova], tassaasunga Guuti, najorpakkit.“ — JOSVA 1:9.

1, 2. (a) Inuit isiginnittaasiat naapertorlugu Israelikkut Kana’anikkunnik ajugaaffiginninnissamut qanoq periarfissaqartigaat? (b) Josva qanoq neriorsoqqissaarneqarpa?

UKIUMI 1473-imi u.n.s. Israelikkut nunap neriorsuutigisap alloriusaaniippullusooq. Taakku unamminiagassariumaagaat pillugit Mosesi ima oqarpoq: „Ullumi Jordanikkut ikaassaatit nunamut neriorsuutigisamut iserniarlutit inuiaat ilinnit pissaaneqarnerullutillu amerlanerusut qimaatikkiartorlugit illoqarfiillu portusoorsuarnik qarmallit tiguariartorlugit. Tamaani najugaqartut Anakikkut tusaamavatit, inorujussuit nukittuut. Taakku pillugit oqaaserineqartartut uku tusareersimavatit: ’Kikkut Anakikkunnut atasinnaappat?’“ (5 Mosesi 9:1, 2) Aap, sorsuttartut taakkua angisoorsuit tusaamasaapput! Aamma Kana’animiut ilaat sakkutooqarput hestimik qimuttulinnik qamuteqartunik, qamutit assakaasui saviminermik aserorterutitallit. — Eqqartuussisut 4:13.

² Israelikkulli inuiaqatigiiusimapput inussiaasut ukiullu 40-t kingulliit inoqajuitsumiissimallutik. Taamaammat inuit isiginnittaasiat naapertorlugu Israelikkut Kana’anikkunnik ajugaaffiginninnissamut periarfissaqanngillat. Mosesilli Jehova tatigilluinnarpaa, aamma ’takusinnaavaa’ Jehovap taakku najorai. (Hebræerit 11:27) Mosesip inuiaqatigiit ima oqarfigai: ’Jehovap Guutivit siuninni ingerlasup taakku nungutikkumaarpai. Illit siuninni qunutikkumaarpai.’ (5 Mosesi 9:3; Tussiaat 33:16, 17) Mosesip toqunerata kingorna Jehovap Josva neriorsoqqissaarpaa najorumaarlugu. Jehova ima oqarpoq: „Illit inuiaallu tamassi Jordani ikaarniarsiuk nuna Israelikkunnut tunniukkumasara iserfigiartorlugu. Inuutillutit kialuunniit ajugaaffigisinnaassanngilaatit. Najortuassavakkit soorlu Mosesi najorsimagiga.“ — Josva 1:2, 5.

3. Josvap uppernissamut sapiissuseqarnissamullu suna iluaqutigaa?

³ Josva Jehovamit ikiorneqarumalluni siulersorneqarumallunilu Guutip inatsisaanik atuarlunilu eqqarsaatiginneqqissaartariaqarpoq taakkualu malillugit inuusariaqarluni. Jehova ima oqarpoq: „Taava iluatsitsilluassaatit pilluarumaarlutillu. Uangami ivertissimavakkit; tuppallerit pissatsillutillu [sapiillutillu nukittugit, NV]! Erseqinak nikallornalluunniit; uangami [Jehova], tassaasunga Guuti, najorpakkit qanoq iliorninni tamani.“ (Josva 1:8, 9) Josva Guuti naalakkamiuk sapiillillunilu nukittorpoq iluatsitsilluarlunilu. Taassumali ilutigisaasa amerlanersaasa Guuti naalanngilaat. Taamaammat iluatsitsilluanngillat, inoqajuitsumilu toqupput.

Inuiaat uppissuseqarnatillu sapiissuseqanngitsut

4, 5. (a) Alapernaarsuiartortitat qulit isumaat Josvap Kalebillu isumaannut sanilliullugu qanoq ippa? (b) Inuiaat uppernikinnerannut Jehova qanoq periarpa?

⁴ Israelikkut ukiut 40-t tamatuma siorna Kana’ani qanilligamikku, Mosesip angutit aqqaneq-marluk nunamut tamatumunnga alapernaarsuiartortippai. Taakku ilaat qulit uteramik annilaarsimasupilussuupput. Ima naammagittaalliorput: „Inuit nunami tassani takusavut tamarmik angisoorujussuupput. Allaammi takusaqarpugut inorujussuarnik [nefiliminik, NV] — Anakip erneri inorujussuarnut [nefiliminut, NV] ilaapput. Taakkununnga naleqqiulluta pillertatut immitsinnut isigivugut.“ ’Inuit tamaasa’ — Anakikkuinnaanngitsut — inorujussuunerarmatigik ilumoorpa? Naamik. Anakikkut nefilimit, Ulersuaq sioqqullugu inuusut, siuaasaraat? Soorunalimi naamik! Taamatulli ingasattajaarnerat pissutaalluni tammaarsimaffimmiittut annilaangangaalerput. Inuiaat allaat Egyptenimut,  nunamut inussiaaffiginikuusaminnut, uterusulerput! — 4 Mosesi 13:31–14:4.

⁵ Alapernaarsuiartortitalli ilaat marluk Josva Kalebilu nunamut neriorsuutigisamut isernissaminnut pileripput. Kana’animiut „iffiap oqummigassannguup iinissaatut ajornanngisitsigalugit nungutissinnaavavut“, oqarput. „Illersuisuisa qimassimavaat, uagulli [Jehovap] najorpaatigut. Taamaattumik inuiaat taakku ersigeqinasigit!“ (4 Mosesi 14:9, 1990) Josva Kalebilu taama isumalluartigigamik sianiilliorpat? Naamerluinnaq! Israelikkut ilagalugit takusimavaat Jehovap perluit qulit atorlugit Egypteni nunallu tamatuma guutii nikanarsarai. Tamatuma kingorna takuaat Jehovap Farao sakkutuuilu Immami Aappalaartumi ipitikkai. (Tussiaat 136:15) Taamaammat alapernaarsuiartortitat qulit taakkunanngalu sunnertittut annilaanganissaminnut pissutissaqanngillat; patsisiginiagassaqanngillat. Jehova assut aliasulluni ima oqarpoq: „Inuiaat ukua qanoq sivisutigisumik asiginnassagaminnga? Qanoq sivisutigisumik upperiumassannginnaminnga uffa taama amerlatigisunik nalunaaqutiliorfigisimagitsik.“ — 4 Mosesi 14:11.

6. Sapiissuseq uppernermut qanoq attuumassuteqarpa, tamannalu ullutsinni qanoq erserpa?

⁶ Jehovap ajornartorsiutaasoq ingerlaannaq oqaatigaa — inuiaat qunutuneratigut paasinarsivoq uppernikitsuusut. Aap, upperneq sapiissuserlu imminnut attuumassuteqarluinnarput, imminnut ima attuumassuteqartigipput apustili Johannesi ilagiit kristumiut taakkualu anersaakkut sorsunnerat pillugit ima allassinnaasimalluni: „Silarsuarmut ajugaaneq tassa uagut uppernerput.“ (1 Johannesi 5:4) Guutip naalagaaffia pillugu nutaarsiassaq nuannersoq ullumikkut nunarsuaq tamakkerlugu oqaluussissutigineqarpoq, Jehovap Nalunaajaasui — inuusuttut utoqqaallu, nukittuut qajannartullu — 6 millioninit amerlanerusut Josvap Kalebillu uppernerattut uppermata. Akeraasoq kinaluunniit sakkutoorpassuarnik assertuutaasunik sapiitsunik taakkuninnga nipangersitsisinnaasimanngilaq. — Romamiut 8:31.

’Nigortunut ilaaniaqinak’

7. ’Nigorneq’ qanoq paasisariaqarpa?

⁷ Ullumikkut Jehovamut kiffaasut nutaarsiassaq nuannersoq sapiillutik oqaluussissutigaat, apustili Paulusitut ima allattutut isumaqaramik: „Uagut ilaanngilagut tammassutaasumik nigortunut, ilaavugulli tarnitta annaanneqaatissaannik uppertunut.“ (Hebræerit 10:39) Grækerit oqaasiat Paulusip matumani atugaa ’nigorneq’-mik nutserneqartoq annilaangallatsiarneq pissutigiinnarlugu nigornertut paasisariaqanngilaq, Guutimummi kiffaasut aalajaatsut ilarpassui ilaannikkut annilaangasarput. (1 Samueli 21:13; 1 Kunngit 19:1-4) Oqaaserli taanna Biibilimi oqaatsinik qinerlerfissiami nassuiarneqarpoq „sallusuissummik soraarussinertut“. Aamma ilanngullugu eqqaaneqarpoq oqaaseq taanna assersuunneqarsinnaasoq Guutimut kiffartornermi „tingerlaammik appaanermut taamalu kigaallannermut“. Upperluartut ajornartorsiuteqaleraangamik ’kigaallannissartik’ soorunalimi eqqarsaatiginavianngilaat — ajornartorsiut malersorneqarnerugaluarpat, peqqiilliornerugaluarpat allatulluunniit misilinneqarnerugaluarpat. Sapiillutilli Jehovamut kiffartortuassapput, taassuma imminnik  isumassuingaarnera pisinnaasamillu killeqarnerannik ilisimanninnera ilisimaaralugu. (Tussiaat 55:23; 103:14) Illit taama uppertigivit?

8, 9. (a) Jehova qanoq ililluni kristumiut siulliit uppernerannik nakussatsitsiva? (b) Uppernerput nakussatsinniarlugu qanoq iliorsinnaavugut?

⁸ Ilaanni apustilit misigipput uppernikillutik, taamaammallu Jiisusi ima oqarfigaat: „Uppernermik annerusumik tunisigut!“ (Lukasi 17:5) Taakku ilumoorlutik qinnutaat akineqarpoq, pingaartumik ukiumi 33-mi piinsip ulluani anersaaq illernartoq neriorsuutigineqartoq ajoqersukkanut kuineqarmat tamannalu pissutaalluni Guutip oqaasiinik siunertaanillu paasisimasaqarnerulermata. (Johannesi 14:26; Apustilit Suliaat 2:1-4) Ajoqersukkat uppernerat nakussatsinneqareermat oqaluussinermi immikkut suliniuteqalerput, taamaalillunilu akerlilersuisoqaraluartoq nutaarsiassaq nuannersoq „qilaap ataani pinngortitanut tamanut“ oqaluussissutigineqarpoq. — Kolossemiut 1:23; Apustilit Suliaat 1:8; 28:22.

⁹ Upperluartunngorumalluta kiffartortuarsinnaajumallutalu uaguttaaq Biibilimik atuaqqissaartariaqarlutalu atuakkatsinnik eqqarsaatiginnittariaqarlutalu anersaaq illernartoq qinnutigisariaqarparput. Josvap, Kalebip ajoqersukkallu kristumiut siulliit pisimanerattut sallusuissut Guutimeersoq isummatsigut uummatitsigullu puiuikkiuttariaqarparput. Taava uppernerput anersaakkut sorsunnitsinni pinertusaarnissamut ajugaanissamullu pisariaqartumik sapiissuseqalissutigissavarput. — Romamiut 10:17.

Guutip piuneranik upperinninnerinnaq naammanngilaq

10. Upperneq ilumoortoq qanoq paasisariaqarpa?

¹⁰ Soorlu itsaq Guutimut kiffaasunit aalajaatsunit erseqqissarneqartoq, upperneq sapiissuseqartitsillunilu pinertusaarsinnaatitsisoq Guutip piuneranik upperinninnerinnaanngilaq. (Jaaku 2:19) Jehovamik ilisarisimannilernissaq taassuminngalu tatiginnilluinnarnissaq pisariaqarpoq. (Tussiaat 78:5-8; Ussatit 3:5, 6) Aammattaaq uummatikkut iluunngarluni upperineqartariaqarpoq Guutip inatsisaanik najoqqutassiaanillu maleruaaneq uagutsinnut pitsaanerpaasoq. (Esaja 48:17, 18) Uppernermut ilumoortumut ilaavortaaq Jehovap neriorsuutiminik tamanik eqquutititsiumaarneranik ’ujarlersiminillu akissarsisitsiumaarneranik’ qularutiginninngilluinnarneq. — Hebræerit 11:1, 6; Esaja 55:11.

11. Josva Kalebilu uppernertik sapiinnertillu pillugu qanoq pilluaqqusaappat?

¹¹ Upperneq taamaattoq ineriartortarpoq. Sallusuissut naapertorlugu inuunerput, pilluaqqussutinik ’ussiinerput’ qinnutittalu akineqarnerannik ’takunninnerput’, allatut oqaatigalugu inuunitsinni Jehovap siulersuineranik maluginninnerput ilutigalugu ineriartortarpoq. (Tussiaat 34:9; 1 Johannesi 5:14, 15) Qularutiginngilarput Josvap Kalebillu uppernerulersimanissaat Guutip ajunngissusianik misiginninnerujartortillutik. (Josva 23:14) Makku eqqarsaatigeriakkit: Josva Kalebilu ukiut 40-t inoqajuitsumi ingerlaarnerminni inuuinnarput, soorlu Guutip tamanna neriorsuutigisimagaa. (4 Mosesi 14:27-30; 32:11, 12) Kana’animik tiguaaniarnermi  ukiunik arfinilinnik sivisussusilimmi peqataapput. Kiisalu sivisuumik inuunertik peqqinnertillu allaallu namminneq nunaatissaminnik kingornuttaqattaagassamik tunineqarnertik pilluaqquneqaatigaat. Erseqqingaarami Jehovap aalajaallutik sapiillutillu imminut kiffartortunik akissarsisitsisarnera! — Josva 14:6, 9-14; 19:49, 50; 24:29.

12. Tussiaat 138:2 qanoq paasisariaqarpa?

¹² Guutip Josvamut Kalebimullu ilumoorfiginnilluni tunniusimanera tussiaasiortup oqaasiisa ukua ilumuussusiannut erseqqissaataavoq: „Oqaatsivit piviusunngornerat ativit isumaanut tunngasunik tamanik qimmuitippat.“ (Tussiaat 138:2, NV) Jehovap atini neriorsuummut atassuseraangagu, neriorsuutip tamatuma eqquunnerata ilimagineqartut tamaasa ’qimmuttarpai’. (Efesosimiut 3:20) Aap, ’Jehovamik qiimmattaatiginninnerminnik annerpaatitsisut’ pakatsinngisaannarput. — Tussiaat 37:3, 4, NV.

Angut „Guutimit iluarisaasimasoq“

13, 14. Sooq Enokip upperneq sapiissuserlu pisariaqartippai?

¹³ Upperneq sapiissuserlu pillugit ilinniarsinnaasupilussuuvugut Jehovamut nalunaajaasup kristumiut sioqqullugit inuusup, Enokip, maligassiaata misissorneratigut. Enokip suli siulittuisalernaniluunniit nalusimagunanngilaa uppernini sapiissutsinilu misilinneqarumaartut. Tamanna qanoq ililluni nalunngissinnaagamiuk? Jehova Naatsiivimmi Edenimi oqarsimammat Guutimut kiffartortut Saatanimullu Diaavulumut kiffartortut akerariikkumaartut, imaluunniit uumissoqatigiikkumaartut. (1 Mosesi 3:15) Enokip aamma nalunngilaa uumissuineq tamanna inuiaat oqaluttuarisaaneranni siusissukkut pilersoq, Kainip qatanngunni Abeli toqummagu. Taakkumi ataataat, Adami, Enokip inunngornerata kingorna suli ukiut 310-ngajaat inuuvoq. — 1 Mosesi 5:3-18.

¹⁴ Taamatut pisoqaraluartoq Enokip sapiilluni ’Guuti ilumoortoq saqeqatigiuarpaa’ inuillu Jehovamut „oqaaserisaat soqqusaatsut“ assuaralugit. (1 Mosesi 5:22, NV; Judasi 14, 15) Pallorfiginninnermik ilumoortumik qunusuilluni taamatut aalajangiussigami Enoki akerarpassuaqalersimagunarpoq inuuneralu navianartorsiulerluni. Pisimasumi tamatumani Jehovap pruffiitini toqup annernartuinut asattuuppaa. Jehovap Enoki ’Guutimit iluarisaaneranik’ uppernarsaavigereerlugu ’peerutitippaa’, immaqa siulittuitilluni qiimmattangaarnermini toqu misiginnginniassammagu. — Hebræerit 11:5, 13; 1 Mosesi 5:24.

15. Enoki ullumikkut Jehovap kiffaanut qanoq maligassiuilluarpa?

¹⁵ Paulusip Enokip peerutitaanera eqqaaqqammerlugu uppernerup pingaaruteqassusia ima erseqqissaqqippaa: „Uppersuseqarnani Guutimit iluarisaaneq ajornaqaaq.“ (Hebræerit 11:6) Enokip uppissuseqarnini Guutimik saqeqateqarnissaminut silarsuarmullu guutiitsumut taassuma eqqartuussutaanik oqaluussissutiginninnissamut iluaqutigaa. Taamaalilluni Enoki uagutsinnut maligassiuilluarpoq. Suliassaq taassuma suliaanut assingusoq suliarissavarput silarsuarmi pallorfiginninnermut ilumoortumut akeqqersimaarfiusumi ajussutsimillu ulikkaartumi. — Tussiaat 92:8; Matthæusi 24:14; Saqqummersitat 12:17.

Guutimik mianerinninneq pissutigalugu sapiissuseqarneq

16, 17. Obadja kinaava, pissutsillu atugai qanoq ippat?

¹⁶ Uppernerinnaanngitsoq aammali Guutimik mianerinninneq sapiissuseqarnerulissutigisinnaavarput. Angut Guutimik mianerinninnermi maligassiuisoq maluginiarnartoq pruffiiti Eliap nalaani, kunngi Akabip naalagaaffimmut avannarlermut Israelimut naalakkersuinerani, inuusimasoq sammeriartigu. Kunngi Akabip naalakkersuisuunerata nalaani Ba’alimik pallorfiginninneq naalagaaffimmik  avannarlermik aatsaat taama mingutsitsitigaaq. Ba’alimmi pruffiitii 450-it Asherallu pruffiitii 400-t dronningi Jezabelip nerriviani nerisarput. — 1 Kunngit 16:30-33; 18:19.

¹⁷ Akabip nulia, Jezabeli, Jehovamut akeraavoq naakkittaatsuullunilu sorraatsoq, taassumalu pallorfiginninneq ilumoortoq nunamit nungutinniarsaraa. Jehovap pruffiitiisa ilai toquppai allaallu Elia toqoriaraluarlugu, taannalu Jordanip illuatungaanut qimaalluni Guutip ilitsersuutaanik maleruaanermigut aniguivoq. (1 Kunngit 17:1-3; 18:13) Takorloorsinnaaviuk taamanikkut naalagaaffimmi avannarlermi pallorfiginninnermik ilumoortumik tapersersuiniarneq qanoq erloqinartigisimassanersoq? Sulilu erloqinarnerusimassannginnerluni kunngip illussaarsuanerpiaq sulisuugaanni? Obadjap Guutimik mianerinnittuusup, Akabip pilittaata, pissutsit tamakkorpiaat atugarai. — 1 Kunngit 18:3.

18. Sooq Obadja Jehovamik pallorfiginnittutut maligassaalluarpa?

¹⁸ Qularnanngitsumik Obadja Jehovamik pallorfiginneriaatsimini mianersorlunilu malunnaarsaarpoq, eqqortuusulli akerlianut akuersiinnanngilaq. Kunnginik allakkat siulliit 18:3-mi taanna pillugu ima allassimavoq: „Obadja Guutimik mianerinnilluinnartuuvoq.“ Aap, Obadjap Guutimik mianerinninnera maligassaalluarpoq! Taamatut iluaqutaasumik mianerinninnini qaqutigoortumik sapiissuseqalissutigaa, tamannalu erserpoq Jezabeli Jehovap pruffiitiinik toqutseqqammiinnartoq.

19. Obadjap iliuusia sapiissuseqarneranik ersersitsisoq suua?

¹⁹ Ima allassimasoqarpoq: „Taamani Jezabelip [Jehovap] pruffiitii nungutinnialermagit Obadjap pruffiitit 100-t qaarusunni marlunni isertortippai qaarusummi ataatsimi 50-iutillugit, isumagisarpaalu nerisassaannik imigassaannillu.“ (1 Kunngit 18:4) Soorlu takorloorsinnaagipput, angutinik hundredenik isertorluni nerisitsineq navianartorujussuuvoq. Obadja Akabimut Jezabelimullu tigusaritinnaveersaaginnarani aammattaaq pruffiitioqqusersunut 850-inut illussaarsuarmiittartunut malugitinnaveersaartariaqarpoq. Qularnanngitsumik aamma nunami tamatumani guutipilussiortorpassuit allat, naasorissaasut akimarngillu, Obadjamik qulaarinissamut periarfissarsigaluarunik taamaaliussagaluarput, kunngi dronningilu qujanarniarfiginiarlugit. Taamaakkaluartorli Obadjap Jehovap pruffiitii sapiilluni isumassorpai, guutipilussiortunit taakkunannga malugitinngitsooqqatarluni. Guutimik mianerinninnerup sapiissuseqalersitsisinnaaneranut takussutissaalluangaarami!

20. Obadjap Guutimik mianerinninnini qanoq iluaqutigaa, Obadjallu maligassiaa illit qanoq iluaqutigaajuk?

²⁰ Obadja Guutimik mianerinnittuunerminik sapiissuseqarnerminillu ersersitsimmat Jehovap taassumunnga akeraasunut illersorsimannguatsiarpaa. Ussatit 29:25-mi ima allassimavoq: „Inunnik qunugisaqarneq napiaaniutinngortarpoq, [Jehovamilli] tatiginnittoq aarlerissutissaqanngilaq.“ Obadja piginnaanilissuunngilaq; tigusaanissani toqutaanissanilu annilaangagaa, soorluttaaq uagut taamaassagaluartugut. (1 Kunngit 18:7-9, 12) Inunnut qunusimassaaq, Guutimilli mianerinninneq tamatuma ajugaaffiginissaanut sapiissuseqalissutigaa. Obadja tamatsinnut minnerunngitsumillu kiffaanngissuseqarunnaassutigisinnaasaminnik imaluunniit allaat toqussutigisinnaasaminnik Jehovamut kiffartortunut maligassaalluarpoq. (Matthæusi 24:9) Qanortoq tamatta Guutimik „mianerinnilluta ataqqinnillutalu“ Jehova kiffartorfiginiarlugu ilungersorisa. — Hebræerit 12:28.

21. Allaaserisami tulliuttumi suna sammineqassava?

²¹ Imaanngilaq upperneq Guutimillu mianerinninneq kisimik sapiissuseqalersitsisartut; asanninneq suli sapiissuseqalersitsinerungaarsinnaavoq. Paulusi ima allappoq: „Guutip tuninngilaatigut anersaamik qunutuumik, kisianni tunivaatigut anersaamik nakuussuseqartumik asannissuseqartumillu silatussuseqartumillu.“ (2 Timotheusi 1:7) Allaaserisami tulliuttumi misissussavarput ulluni kingullerni atugarliungaarfiusuni makkunani sapiilluta Jehovamut kiffartornissamut asanninneq qanoq iluaqutigisinnaaneripput. — 2 Timotheusi 3:1.

Qanoq akissavit?

• Josuap Kalebillu sapiissuseqarnissaminnut suna iluaqutigaat?

• Upperneq ilumoortoq qanoq paasisariaqarpa?

• Sooq Enokip Guutip eqqartuussutaa qunusuilluni oqaluussissutigaa?

• Guutimik mianerinninneq sapiissuseqarnissamut qanoq iluaqutigisinnaavarput?

[Atuaqqissaarnermi apeqqutit]

[Qupp. 8, 9-mi assiliartaq]

Jehovap Josvamut peqqussutaa imaappoq: „Sapiillutillu nukittugit“

[Qupp. 10-mi assiliartaq]

Obadjap Guutip pruffiitii isumassorlugillu paarai

[Qupp. 11-mi assiliartat]

Enokip Guutip oqaasia nakimaalluni nalunaajaatigaa