Go ba Sebete ka go ba le Tumelo le ka go Boifa Modimo

“O tiišê matla, O dirê senna . . . Morêna Modimo wa xaxo ó êma le wêna.”—JOŠUA 1:9.

1, 2. (a) Go ya ka pono ya batho, na Baisiraele ba be ba ka kgona go fenya Bakanana? (b) Ke kgonthišetšo efe yeo Jošua a ilego a e newa?

KA 1473 B.C.E., setšhaba sa Isiraele se be se itokišeditše go tsena Nageng ya Kholofetšo. Mabapi le ditlhohlo tšeo di bego di se letetše, Moše o ile a gopotša setšhaba seo gore: “O tlo tloxa Ò sela noka ya Jorodane, wa y’o fenya dithšaba tše kxolo tše di Xo fetaxo ka matla, le metse e mexolo e fihlaxo lexodimong. Sethšaba se sexolo sa leêmô le letelele ké Ba-Enaki ba O . . . kwilexo xe ba bolêlwa ba thwe: Ké mang e a kaxo xahlana le Ba-Enaki!” (Doiteronomio 9:1, 2) Ee, bahlabani ba ba dinatla ba be ba tumile! Ka godimo ga moo, Bakanana ba bangwe ba be ba e-na le madira ao a hlamilwego gabotse, a e-na le dipere le dikoloi tša ntwa tše di bego di e-na le disekela tša tšhipi maotwaneng a tšona.—Baahlodi 4:13.

² Baisiraele, ka lehlakoreng le lengwe, e be e le setšhaba sa makgoba gomme ba be ba sa tšwa go fetša nywaga e 40 lešokeng. Ka baka leo, go ya ka pono ya batho ba be ba ka se ke ba fenya. Lega go le bjalo, Moše o be a e-na le tumelo; o be a kgona go “bona” gore Jehofa o ba eteletše pele. (Baheberu 11:27) Moše o ile a botša setšhaba gore: “Morêna Modimo wa xaxo e a y’o xo sela à Xo etile pele, ké mollô o fišaxo; Yêna ó tlo ba thuba, a ba kokobetša pele xa xaxo.” (Doiteronomio 9:3; Psalme 33:16, 17) Ka morago ga lehu la Moše, Jehofa o ile a kgonthišetša Jošua gore O tla mo thekga, a re: “Tsoxa O selê noka yé ya Jorodane; wêna le sethšaba sé ka moka Le yê naxeng ye ke e neilexo Ba-Isiraele. Xa xo na e a tl’o xo êma xe O fihla mehla yohle ya xo phela xa xaxo. Ke tlo êma le wêna byalo ka xe ke be ke êma le Mošê.”—Jošua 1:2, 5.

3. Ke’ng seo se thušitšego Jošua gore a be le tumelo le sebete?

³ E le gore a hwetše thekgo ya Jehofa le tlhahlo, Jošua o swanetše go bala Lentšu la Modimo le go naganišiša ka lona gomme a le diriše. Jehofa o itše: “Ké mo O tl’o xo ba le mahlatse ditseleng tša xaxo, ké mo O tl’o xo lêtlêxêlwa. Ke Xo laetše-xê xore O tiišê matla, O dirê senna. O se kê wa thšoxa, O se kê wa xakanêxa, ka xobane Morêna Modimo wa xaxo ó êma le wêna mo xohle mo O yaxo.” (Jošua 1:8, 9) Ka ge Jošua a ile a theetša Modimo, o ile a ba sebete, a tia matla gomme a atlega. Lega go le bjalo, bontši bja dithaka tša gagwe ga se bja ka bja theetša. Ka baka leo, ga se bja ka bja atlega gomme bo ile bja hwa lešokeng.

Batho ba se Nago Tumelo le Sebete

4, 5. (a) Boemo bja kgopolo bja dihlodi tše lesome bo be bo fapane bjang le bja Jošua le Kalebe? (b) Jehofa o ile a arabela bjang go se beng le tumelo ga batho bao?

⁴ Nywaga e 40 pele ga moo ge Baisiraele ba fihla Kanana, Moše o ile a roma dihlodi tše 12 gore di ye go hlola naga. Tše lesome di ile tša boa di tšhogile. Di llile ka gore: “Gomme batho ka moka bao re ba bonego go yona ke ba bagolo ka tsela e sa tlwaelegago. Go yona re bone Banefilimi, barwa ba Enaki, bao ba tšwago go Banefilimi; mo mahlong a rena ka noši re bile bjalo ka ditšie.” Na ke “batho ka moka”—e sego feela barwa ba Enaki—bao e bego e le dinatla? Aowa. Na barwa ba Enaki e be e le ditlogolwana tša Ba-Nefilimi ba mehleng ya pele ga meetse-fula? Ga go bjalo le gatee! Lega go le bjalo, ka baka la go feteletšwa mo ga dilo, setšhaba ka moka se ile sa aparelwa ke poifo e kgolo. Batho ba ile ba ba ba nyaka go boela Egipita, naga yeo  ba bego ba dirilwe makgoba go yona!—Numeri 13:31–14:4, NW.

⁵ Lega go le bjalo, dihlodi tše pedi e lego Jošua le Kalebe, di be di ikemišeditše go tsena Nageng ya Kholofetšo. Di itše: “[Ba-Kanana] re tlo ba ja byalo ka boxôbê; xa ba n’e kôtsê; Morêna ó na le rena. Le se ba boifê.” (Numeri 14:1-9) Na Jošua le Kalebe ba be ba holofetše lefeela? Ga go bjalo le gatee! Bona gotee le setšhaba ka moka ba bone ge Jehofa a fenya Egipita e matla le medimo ya yona ka Dikotlo tše Lesome. Ke moka ba ile ba bona ge Jehofa a nweletša Farao le madira a gagwe Lewatleng le Lehwibidu. (Psalme 136:15) Go molaleng gore poifo yeo e bontšhitšwego ke dihlodi tše lesome le bao ba ilego ba tutuetšwa ke tšona e be e ka se ke ya lokafatšwa. Ge a hlalosa bohloko bjo bo tseneletšego bjoo a bego a bo kwa, Jehofa o itše: “Sethšaba sé . . . se tlo thôma neng xo mpôta ka ’baka la matete ohle ao, a ke a dirilexo mo xo bôná?”—Numeri 14:11.

6. Sebete se tswalana bjang le tumelo, gona se se bonwa bjang mehleng ya lehono?

⁶ Jehofa o ile a hlalosa modu wa bothata—go ba le poifo ga setšhaba go bontšhitše gore ga se na tumelo. Ee, tumelo le sebete di tswalana kudu mo e lego gore moapostola Johane o ile a ngwala mabapi le phuthego ya Bokriste le ntwa ya yona ya moya gore: “Ye ke phenyo ye e fentšego lefase, tumelo ya rena.” (1 Johane 5:4) Lehono, tumelo e bjalo ka ya Jošua le Kalebe e feleleditše ka go bolelwa ga ditaba tše dibotse tša Mmušo lefaseng ka bophara ke Dihlatse tša Jehofa tše fetago dimilione tše tshela tša ba banyenyane le ba bagolo, bao ba lego matla le bao ba fokolago. Ga go lenaba leo le kgonnego go thibela sehlopha se se matla le se nago le sebete.—Baroma 8:31.

Le se ke la ‘Gomela Morago’

7. Go ‘gomela morago’ go bolela’ng?

⁷ Bahlanka ba Jehofa lehono ba bolela ditaba tše dibotse ka sebete ka gobane ba dumelelana le moapostola Paulo yo a ngwadilego gore: “Ga re mohuta o gomelago morago tshenyegong, eupša re mohuta wo o nago le tumelo e phedišago moya.” (Baheberu 10:39) Go etša ge Paulo a boletše, go ‘gomela morago’ ga go bolele go boifa ka nakwana, ka gobane ka dinako tše dingwe bahlanka ba botegago ba Jehofa ba ile ba ba le poifo. (1 Samuele 21:12; 1 Dikxoši 19:1-4) Go e na le moo, pukuntšu e nngwe ya Beibele e re go ‘gomela morago’ go bolela “go gogela morago, go tlogela,” “go tšea therešo gabohwefo.” E oketša ka gore go ‘gomela morago’ go ka swantšhwa le “go theola seila ya sekepe ka go rialo gwa fokotšwa lebelo” tirelong ya Modimo. Ke therešo gore bao ba nago le tumelo e matla ga ba nagane ka “go fokotša lebelo” ge ba welwa ke mathata—e ka ba e le tlaišo, go babja goba teko le ge e le efe. Go e na le moo, ba phegelela go hlankela Jehofa ba lemoga gore o tloga a e-na le taba le bona le gore o tseba mafokodi a bona. (Psalme 55:22; 103:14) Na o na le tumelo e bjalo?

8, 9. (a) Jehofa o ile a matlafatša tumelo ya Bakriste ba pele bjang? (b) Re ka dira’ng go matlafatša tumelo ya rena?

 ⁸ Ka nako e nngwe baapostola ba ile ba ikwa ba hloka tumelo, ka gona ba re go Jesu: “Re nee tumelo e oketšegilego.” (Luka 17:5) Kgopelo ya bona e tšwago pelong e ile ya arabja, kudu-kudu ka Pentekoste ya 33 C.E., ge moya o mokgethwa o holofeditšwego o theogela godimo ga barutiwa gomme o ba nea kwešišo e tseneletšego ya Lentšu la Modimo le morero wa gagwe. (Johane 14:26; Ditiro 2:1-4) Ba matlafaditšwe tumelong, barutiwa ba ile ba thoma lesolo la go bolela leo le ilego la dira gore ditaba tše dibotse di bolelwe “tlholong yohle yeo e lego tlase ga legodimo” go sa šetšwe kganetšo.—Bakolose 1:23; Ditiro 1:8; 28:22.

⁹ E le gore re matlafatše tumelo ya rena le go phegelela bodireding bja rena, le rena re swanetše go ithuta Mangwalo le go naganišiša ka wona gomme re rapelele moya o mokgethwa. Ke feela ge re gatelela therešo ya Modimo ka menaganong le dipelong tša rena—go etša ge Jošua, Kalebe le barutiwa ba pele ba Bakriste ba dirile—mo re tlago go ba le tumelo yeo e re neago sebete sa go kgotlelela ntweng ya rena ya moya gomme ra fenya.—Baroma 10:17.

Tumelo—E Feta go fo Dumela

10. Tumelo ya kgonthe e akaretša’ng?

¹⁰ Bjalo ka ge go bontšhitšwe ke babotegi ba bogologolo, tumelo yeo e tlišago sebete le kgotlelelo e akaretša se se fetago go fo dumela go Modimo. (Jakobo 2:19) E nyaka gore re tsebe Jehofa bjalo ka motho gomme re mmote ka mo go feletšego. (Psalme 78:5-8; Diema 3:5, 6) E bolela go dumela ka dipelo tša rena ka moka gore go kwa melao ya Modimo le melao ya gagwe ya motheo go hola rena kudu. (Jesaya 48:17, 18) Le gona tumelo e akaretša go ba le kgodišego e feletšego ya gore Jehofa o tla phethagatša dikholofetšo tša gagwe ka moka gomme a ba “moputsi wa bao ba mo tsomago ka phišego.”—Baheberu 11:1, 6; Jesaya 55:11.

11. Jošua le Kalebe ba ile ba putswa bjang ka baka la tumelo ya bona le sebete?

¹¹ Tumelo e bjalo e a gola. E gola ge re diriša therešo maphelong a rena, re hwetša ditšhegofatšo, re ‘bona’ dikarabo tša dithapelo tša rena, gomme ka ditsela tše dingwe, re lemoga tlhahlo ya Jehofa maphelong a rena. (Psalme 34:8; 1 Johane 5:14, 15.) Re kgodišegile gore tumelo ya Jošua le Kalebe e ile ya matlafala ge ba lemoga gore Modimo ke yo botho. (Jošua 23:14) Ela hloko dintlha tše: Ba phologile nywaga e 40 ya go sepela lešokeng go etša ge Modimo a ba holofeditše gore ba tla phologa. (Numeri 14:27-30; 32:11, 12) Ba bapetše karolo ya bohlokwa lesolong la nywaga e tshela la go fenya naga ya Kanana. Mafelelong, ba ile ba newa bophelo bjo botelele le boemo bjo bobotse bja tša maphelo gaešita le go newa bohwa bja bona ka noši. Ruri Jehofa o putsa  bao ba mo hlankelago ka potego le sebete!—Jošua 14:6, 9-14; 19:49, 50; 24:29.

12. Jehofa o ‘godiša lentšu la gagwe’ bjang?

¹² Botho bja Modimo bjo lerato go Jošua le Kalebe bo re gopotša mantšu a mopsalme a rego: “O godišitše lentšu la gago ka baka la leina la gago mo go fela.” (Psalme 138:2, PK) Ge Jehofa a diriša leina la gagwe go kgonthišetša kholofetšo, phethagatšo ya kholofetšo yeo e ‘godišwa’ ka kgopolo ya gore e feta ditebelelo ka moka. (Baefeso 3:20) Ee, Jehofa le ka mohla ga a ke a nyamiša bao ba mo ‘thabelago.’—Psalme 37:3, 4.

Monna yo a ‘Kgahlišitšego Modimo Gabotse’

13, 14. Ke ka baka la’ng Henoge a be a swanetše go ba le tumelo le sebete?

¹³ Re ka ithuta mo gontši mabapi le tumelo le sebete ka go hlahloba mohlala wo o beilwego ke hlatse e nngwe ya mehleng ya pele ga Bokriste—Henoge. Go ka direga gore Henoge o tsebile pele a ka thoma go porofeta gore tumelo ya gagwe le sebete di tla lekwa. Go bjalo bjang? Ka gobane tšhemong ya Edene Jehofa o be a boletše gore go be go tla ba le bonaba, goba lehloyo magareng ga bao ba hlankelago Modimo le bao ba hlankelago Sathane Diabolo. (Genesi 3:15) Le gona, Henoge o be a tseba gore lehloyo le le thomile mathomong a histori ya batho ge Kaine a bolaya ngwanabo e lego Abele. Ge e le gabotse tatago bona, Adama, o phetše nywaga e ka bago 310 ka morago ga ge Henoge a belegwe.—Genesi 5:3-18.

¹⁴ Lega go le bjalo, go sa šetšwe ditherešo tše, ka sebete Henoge ‘o ile a tšwela pele a sepela le Modimo’ gomme a nyatša ‘dilo tše di tšhošago’ tšeo batho ba bego ba di bolela kgahlanong le Jehofa. (Genesi 5:22; Juda 14, 15) Go bonagala go emela ga gagwe borapedi bja therešo ka sebete go ile gwa dira gore Henoge a be le manaba a mantši gomme gwa bea bophelo bja gagwe kotsing. Ka baka leo, Jehofa o ile a šireletša moporofeta wa gagwe bohlokong bja lehu. Ka morago ga go utollela Henoge gore o be a “kgahlišitše Modimo gabotse,” Jehofa o ile a mo ‘tloša’ ka go mo fetišetša lehung, mohlomongwe nakong ya ge a be a lora toro ya boporofeta.—Baheberu 11:5, 13; Genesi 5:24.

15. Henoge o beetše bahlanka ba Jehofa ba lehono mohlala ofe o mobotse?

¹⁵ Kapejana ka morago ga go bolela ka go tlošwa ga Henoge, Paulo o ile a buša a gatelela bohlokwa bja tumelo ka gore: “Ka ntle le tumelo go kgahliša Modimo gabotse ga go kgonege.” (Baheberu 11:6) Ee, go ba le tumelo go neile Henoge sebete sa go sepela le Jehofa le go bolela molaetša wa Gagwe wa kahlolo go batho bao ba sa boifego Modimo. Ka go dira bjalo, Henoge o re beetše mohlala o mobotse. Re na le modiro o swanago woo re swanetšego go o dira lefaseng leo le ganetšago borapedi bja therešo le leo le tletšego mohuta o mongwe le o mongwe wa bobe.—Psalme 92:7; Mateo 24:14; Kutollo 12:17.

Go ba Sebete ka Baka la go Boifa Modimo

16, 17. Obadya e be e le mang, gomme ke boemo bofe bjo a ilego a ikhwetša a le go bjona?

¹⁶ Ka ntle le tumelo, go na le seka se sengwe seo se dirago gore re be le sebete, e lego go boifa Modimo ka tsela ya tlhompho. Anke re ahla-ahleng mohlala o kgahlišago wa monna yo a boifago Modimo yo a phetšego mehleng ya moporofeta Eliya le Kgoši Ahaba yo a bego a buša mmušo wa ka leboa wa Isiraele. Nakong ya pušo ya Ahaba, borapedi bja Baali bo ile bja senya mmušo wa ka leboa ka tsela e kgolo. Ge e le gabotse, baporofeta ba Baali ba 450 le baporofeta ba 400 ba kokwane e kgethwa, e lego seswantšho  sa setho sa botona, ba be ba ‘fepša ke Isebele,’ mosadi wa Ahaba.—1 Dikxoši 16:30-33; 18:19.

¹⁷ Isebele, yoo e bego e le lenaba le sehlogo la Jehofa, o ile a leka go fediša borapedi bja therešo nageng. O ile a bolaya ba bangwe ba baporofeta ba Jehofa gomme a leka go bolaya le Eliya, yoo a ilego a phologa ka go tshela noka ya Jorodane a hlahlwa ke Modimo. (1 Dikxoši 17:1-3; 18:13) Na o bona kamoo go bego go le thata ka gona go boloka borapedi bjo bo sekilego mmušong wa ka leboa ka nako yeo? Se sebe le go feta, go thwe’ng ge e ba o be o šoma ka mošate? Bjoo ke boemo bjo Obadya * yo a boifago Modimo, mohlanka wa lapa la Ahaba, a ilego a ikhwetša a le go bjona.—1 Dikxoši 18:3.

18. Ke’ng se se dirilego gore Obadya e be morapedi wa Jehofa yo a kgahlišago?

¹⁸ Ga go pelaelo gore Obadya o be a le šedi e bile a na le temogo borapeding bja gagwe go Jehofa. Lega go le bjalo, ga se a ka a kwanantšha. Ge e le gabotse, 1 Dikxoši 18:3 e re botša gore: “Obadya yêna ó be a boifa Morêna xa-xolo.” (Mongwalo o sekamego ke wa rena.) Ee, go boifa Modimo ga Obadya go be go kgahliša. Ke moka poifo ye e swanetšego e ile ya mo nea sebete se se makatšago, go etša ge go ile gwa bonala gatee-tee ka morago ga ge Isebele a bolaile baporofeta ba Jehofa.

19. Obadya o ile a dira’ng seo se bontšhago gore o be a e-na le sebete?

¹⁹ Re bala gore: “E kile ya re mola Isebele a bolaya baprofeta ba Morêna, Obadya a tšea baprofeta ba lekxolo a ba uta mefomeng; xo o mongwê a iša ba masome a fetšaxo seatla, a ba babalêla ka boxôbê le ka meetse; le xo o mongwê a iša ba masome a fetšaxo seatla.” (1 Dikxoši 18:4) Bjalo ka ge o ka nagana, go fepa banna ba lekgolo ka sephiring e be e le modiro o kotsi kudu. Obadya o be a swanetše go phema go swarwa ke Ahaba le Isebele gotee le go bonwa ke baporofeta ba maaka ba 850 bao ba bego ba e-tla ka mošate ka mehla. Ka ntle le moo, barapedi ba bangwe ba maaka kua Isiraele, bao ba bego ba akaretša batho ba tlwaelegilego le bakgomana, ba be ba ka diriša sebaka le ge e le sefe go utolla Obadya e le gore ba kgahliše kgoši le kgošigadi. Lega go le bjalo, Obadya o ile a hlokomela baporofeta ba Jehofa ka sebete a dutše a le gare ga barapedi ba ba medimo ya diswantšho. Ruri go boifa Modimo go nea motho sebete!

20. Go boifa Modimo ga Obadya go ile gwa mo thuša bjang, gona mohlala wa gagwe o go hola bjang?

²⁰ Jehofa o ile a šireletša Obadya go manaba a gagwe ka ge a ile a bontšha sebete ka go boifa Modimo. Diema 29:25 e re: “Xo boifa batho xo wetša moreong; xo pholoxa e a bôʹtaxo Morêna.” Obadya e be e le motho yo a tlwaelegilego; o be a boifa go swarwa le go bolawa go fo etša ge le rena re be re ka ikwa bjalo. (1 Dikxoši 18:7-9, 12) Lega go le bjalo, go boifa ga gagwe Modimo go ile gwa mo nea sebete e le gore a fenye go boifa batho le ge e le gofe mo a ka bego a be a e-na le gona. Ruri Obadya ke mohlala o mobotse go rena ka moka, kudu-kudu go bao ba beilego tokologo ya bona gaešita le maphelo a bona kotsing ka baka la go rapela Jehofa. (Mateo 24:9) Ee, eka ka moka ga rena re ka katanela go hlankela Jehofa “ka go boifa Modimo le go šia.”—Baheberu 12:28.

21. Ke’ng seo se tlago go ahla-ahlwa sehlogong se se latelago?

²¹ Ga se tumelo le go boifa Modimo feela tšeo di neago motho sebete; lerato le lona e ka ba tutuetšo e matla. Paulo o ngwadile gore: “Modimo ga se a re nea moya wa bofšega, eupša o re neile wa matla le lerato le wa go hlaphogelwa monaganong.” (2 Timotheo 1:7) Sehlogong se se latelago, re tla bona kamoo lerato le ka re thušago go hlankela Jehofa ka sebete mehleng ye e hlobaetšago ya bofelo.—2 Timotheo 3:1.

[Mongwalo wa ka tlase]

Na o ka Araba?

• Ke’ng seo se dirilego gore Jošua le Kalebe ba be sebete?

• Tumelo ya kgonthe e akaretša’ng?

• Ke ka baka la’ng Henoge a be a tsebatša dikahlolo tša Modimo ka sebete?

• Go boifa Modimo go nea motho sebete bjang?

[Dipotšišo tša Thuto]

[Seswantšho go letlakala 16, 17]

Jehofa o laetše Jošua gore: “O tiišê matla, O dirê senna”

[Seswantšho go letlakala 18]

Obadya o ile a hlokomela baporofeta ba Modimo le go ba šireletša

[Diswantšho go letlakala 19]

Henoge o boletše lentšu la Modimo ka sebete