Kosog nin Boot na Naparigon nin Pagkamoot
Kosog nin Boot na Naparigon nin Pagkamoot
“An Dios nagtao sato bakong nin espiritu nin pagkamatalaw, kundi nin puersa asin nin pagkamoot patin nin toltol na isip.”—2 TIMOTEO 1:7.
1, 2. (a) Puedeng itulod nin pagkamoot an sarong tawo na gibohon an ano? (b) Taano ta pambihira an kosog nin boot ni Jesus?
SARONG bagong kasal an nag-scuba diving harani sa sarong banwaan sa sirangan na baybayon nin Australia. Paibabaw na kutana sinda kan an sarong great white shark marikas na parani sa babae. May pagkapusoan na itinulod parayo kan lalaki an saiyang agom asin sia na sana an nagpasakmal sa pating. “Itinao nia an saiyang buhay para sako,” an sabi kan balo sa seremonya sa lobong.
2 Iyo, an pagkamoot puedeng magtulod sa mga tawo na ipaheling an pambihirang kosog nin boot. Si Jesu-Cristo mismo nagsabi: “Mayo nin siisay man na namoot nin orog pa kaini, na itao nin saro an saiyang kalag para sa saiyang mga katood.” (Juan 15:13) Dai pang 24 oras pakatapos na sabihon ni Jesus an mga tataramon na ini, itinao nia an saiyang buhay, bakong para sa saro sanang tawo, kundi para sa katawohan. (Mateo 20:28) Dugang pa, dai idinolot ni Jesus an saiyang buhay sa sarong biriglaan na akto nin pagkapusoan. Aram nia antes pa na sia pag-oolog-ologon asin mamaltratohon, sesentensiahan nin daing katanosan, asin gagadanon sa sarong hariging pasakitan. Inandam pa ngani nia an saiyang mga disipulo sa kaaabtan na ini, na nagsasabi: “Uya kita, nagtutukad pa-Jerusalem, asin an Aki nin tawo itatao sa mga poon na saserdote asin sa mga eskriba, asin sisilotan sia ninda na gadanon patin itatao sia sa mga tawo kan mga nasyon, asin pagkakalwagan sia ninda asin lulutaban sia asin hahampakon sia patin gagadanon sia.”—Marcos 10:33, 34.
3. Ano an nakakontribwir sa dakulang kosog nin boot ni Jesus?
3 Ano an nakakontribwir sa ekstraordinaryong kosog nin boot ni Jesus? Dakula an nagin kabtang kan pagtubod asin diosnon na takot. (Hebreo 5:7; 12:2) Minsan siring, orog sa gabos an kosog nin boot ni Jesus gikan sa saiyang pagkamoot, sa Dios sagkod sa saiyang kapwa tawo. (1 Juan 3:16) Kun kukultibaron niato an siring na pagkamoot apuera sa pagtubod asin diosnon na takot, ikakapaheling man niato an arog-Cristong kosog nin boot. (Efeso 5:2) Paano niato mapapatalubo an siring na pagkamoot? Kaipuhan niatong rekonoseron an Ginigikanan kaiyan.
“An Pagkamoot Gikan sa Dios”
4. Taano ta masasabing si Jehova an Ginigikanan nin pagkamoot?
4 Si Jehova an personipikasyon nin pagkamoot sagkod Ginigikanan kaiyan. “Mga namomotan,” an isinurat ni apostol Juan, “padagos kitang magkaminorootmootan, huli ta an pagkamoot gikan sa Dios, asin an gabos na namomoot namundag gikan sa Dios asin nagkakamit kan kaaraman dapit sa Dios. An dai namomoot dai nakakamidbid sa Dios, huli ta an Dios pagkamoot.” (1 Juan 4:7, 8) Kun siring, an arog-Dios na pagkamoot puedeng tumalubo sa sarong tawo solamente kun sia marani ki Jehova paagi sa tamang kaaraman asin mahiro sono sa kaaraman na iyan paagi sa odok sa pusong pagkuyog.—Filipos 1:9; Santiago 4:8; 1 Juan 5:3.
5, 6. Ano an nakatabang sa enot na mga parasunod ni Jesus na mapatalubo an arog-Cristong pagkamoot?
5 Sa saiyang ultimong pamibi kaiba kan saiyang 11 maimbod na apostol, ipinaheling ni Jesus an koneksion kan pakamidbid sa Dios asin pagtalubo sa pagkamoot, na nagsasabi: “Ipinamidbid ko sa sainda an saimong ngaran asin ipapamidbid ko pa, tanganing an pagkamoot na ikinamoot mo sa sako mapasa sainda asin ako sa kasaro ninda.” (Juan 17:26) Tinabangan ni Jesus an saiyang mga disipulo na pataluboon an klase nin pagkamoot na yaon sa pag-oltanan nia asin kan saiyang Ama, na ihinahayag paagi sa tataramon sagkod sa halimbawa kun ano an irinerepresentar kan ngaran nin Dios—an marahayon na mga kualidad nin Dios. Huli kaini, si Jesus makakasabi: “Sia na nakaheling sa sako nakaheling man sa Ama.”—Juan 14:9, 10; 17:8.
6 An arog-Cristong pagkamoot bunga kan banal na espiritu nin Dios. (Galacia 5:22) Kan akoon kan enot na mga Kristiano an ipinanugang banal na espiritu kan Pentecostes 33 C.E., bako sanang nagirumdoman ninda an dakol na bagay na itinokdo sa sainda ni Jesus kundi mas lubos man nindang nasabotan an kahulogan kan Kasuratan. An mas hararom na pakarorop na ini minalataw na nakaparigon sa saindang pagkamoot sa Dios. (Juan 14:26; 15:26) An resulta? Dawa pa nameligro an sainda mismong buhay, pusoan asin maigot nindang ihinulit an maogmang bareta.—Gibo 5:28, 29.
Kosog nin Boot Asin Pagkamoot na Ipinapaheling sa Gibo
7. Ano an kinaipuhan na tagalan ni Pablo asin Bernabe kan sinda magkaibahan na nagbiahe sa pagmimisyonero?
7 Si apostol Pablo nagsurat: “An Dios nagtao sato bakong nin espiritu nin pagkamatalaw, kundi nin puersa asin nin pagkamoot patin nin toltol na isip.” (2 Timoteo 1:7) Si Pablo nagtataram base sa saiyang personal na eksperyensia. Estudyare kun ano an inagihan nia asin ni Bernabe kan sinda magkaibahan na nagbiahe sa pagmimisyonero. Naghulit sinda sa dakol na siudad, kaiba an Antioquia, Iconio, asin Listra. Sa lambang siudad, may mga tawong nagturubod, alagad an iba nagin antipatikong mga paratumang. (Gibo 13:2, 14, 45, 50; 14:1, 5) Sa Listra ginapo pa ngani si Pablo nin anggot na sururog, na binayaan sia sa paghonang gadan na sia! “Minsan siring, kan palibotan sia kan mga disipulo, sia tuminindog asin naglaog sa siudad. Asin kan suminunod na aldaw naghale sia kaiba ni Bernabe pasiring sa Derbe.”—Gibo 14:6, 19, 20.
8. Paano ipinabanaag kan kosog nin boot na ipinaheling ni Pablo asin Bernabe an saindang hararom na pagkamoot sa mga tawo?
8 An paghuma daw na ini sa buhay ni Pablo nagin dahelan na pumondo na sinda ni Bernabe huli sa takot? Kabaliktaran nanggad an nangyari! “Pakagibo nin nagkapirang disipulo” sa Derbe, an duwa “nagbalik sa Listra asin sa Iconio asin sa Antioquia.” Taano? Tanganing parigonon an boot kan mga bagohan na magdanay na makosog an pagtubod. “Kita kaipuhan na lumaog sa kahadean nin Dios paagi sa dakol na kasakitan,” an sabi ni Pablo asin Bernabe. Malinaw nanggad, an saindang kosog nin boot hale sa saindang hararom na pagkamoot sa ‘saradit na karnero’ ni Cristo. (Gibo 14:21-23; Juan 21:15-17) Pakatapos magnombra nin kamagurangan sa kada saro kan bago pa sanang mabilog na mga kongregasyon, an duwang tugang na lalaking ini namibi asin ‘idinolot sinda ki Jehova na sa saiya sinda nagturubod.’
9. Sa anong paagi naghimate an kamagurangan sa Efeso sa pagkamoot ni Pablo sa sainda?
9 Si Pablo tawong tunay nanggad na mapagmalasakit asin makosog an boot kaya namotan siang marhay kan dakol na enot na Kristiano. Girumdomon an nangyari sa sarong pagtiripon na pinangenotan ni Pablo kaiba an kamagurangan sa Efeso, na duman nagdanay sia sa laog nin tolong taon asin nakaeksperyensia nin grabeng persekusyon. (Gibo 20:17-31) Pakatapos niang enkaminaron sindang pastoran an aripompon nin Dios na ipinagkatiwala sa sainda, si Pablo nagluhod kaiba ninda asin namibi. Dangan, “dakol-dakol na pagtangis an nangyari sa tahaw ninda gabos, asin kinugos ninda an liog ni Pablo saka mapagpadangat na hinadokan sia, huli ta ikinamondong gayo ninda an saiyang itinaram na dai na ninda maheheling an saiyang lalauogon.” Kanigoan kan pagkamoot kan mga tugang na ini ki Pablo! Tunay nanggad, kan dumatong an panahon na kaipuhan nang humale, si Pablo asin an saiyang mga kaibaiba sa pagbiahe kinaipuhan na ‘sumuway sa sainda,’ huli ta magabat na marhay an boot kan lokal na kamagurangan na pahaleon sinda.—Gibo 20:36–21:1.
10. Paano ipinaheling kan mga Saksi ni Jehova sa presenteng aldaw an makosog an boot na pagkamoot para sa lambang saro?
10 Ngonyan, an nagbibiaheng mga paraataman, mga magurang sa kongregasyon, asin dakol na iba pa namomotan na marhay huli sa kosog nin boot na ipinapaheling ninda para sa mga karnero ni Jehova. Halimbawa, sa mga nasyon na pinapasakitan nin guerra sibil o na an paghuhulit prohibido, isinasapeligro kan nagbibiaheng mga paraataman asin kan saindang agom an saindang buhay asin katalingkasan tanganing madalaw an mga kongregasyon. Siring man, dakol na Saksi an nagdusa sa kamot kan antipatikong mga namamahala asin kan saindang mga parasunod huli sa dai pagpasaloib sa saindang mga kapwa Saksi ni pagbuyagyag kun saen ninda kinukua an espirituwal na kakanon. Rinibong iba pa an pinersegir, pinasakitan nin grabe, asin ginadan pa ngani huli sa dai ninda pag-ontok sa paghuhulit kan maogmang bareta o pagpondo sa pakikiasosyar sa mga kapagtubod sa Kristianong mga pagtiripon. (Gibo 5:28, 29; Hebreo 10:24, 25) Arogon logod niato an pagtubod asin pagkamoot kan siring na makosog an boot na mga tugang na lalaki asin babae!—1 Tesalonica 1:6.
Dai Nindo Togotan na Lumipot an Saindong Pagkamoot
11. Sa anong mga paagi na si Satanas nakikilaban sa espirituwal tumang sa mga lingkod ni Jehova, na naghahagad nin ano sa kabtang ninda?
11 Kan si Satanas ihulog sa daga, desidido siang iluwas an saiyang kaanggotan sa mga lingkod ni Jehova huli ta sinda “nagkukuyog sa mga togon nin Dios asin [nagpapatotoo] ki Jesus.” (Kapahayagan 12:9, 17) An saro sa mga taktika kan Diablo iyo an persekusyon. Minsan siring, sa parate baliktad an nagigin resulta kan estratehiyang ini huli ta ginigibo kaiyan na orog pa nganing dumayupot sa lambang saro an banwaan nin Dios sa mga bogkos nin Kristianong pagkamoot asin nagpapahiro sa dakol sa sainda na magin mas maigot. An saro pang taktika ni Satanas iyo an pagpukaw sa makasalan na mga inklinasyon nin tawo. An pakikilaban sa pakanang ini nangangaipo nin kosog nin boot sa laen na paagi huling an pakikilaban panlaog, tumang sa salang mga horot kan sadiri niatong ‘madaya asin desesperadong’ puso.—Jeremias 17:9; Santiago 1:14, 15.
12. Paano ginagamit ni Satanas “an espiritu kan kinaban” sa saiyang paghihingoang paluyahon an satong pagkamoot sa Dios?
12 Kaiba sa arsenal ni Satanas an saro pang mapuersang armas—“an espiritu kan kinaban,” an boot sabihon, an nangingibabaw na inklinasyon o motibasyon kaiyan, na biyong kontra sa banal na espiritu nin Dios. (1 Corinto 2:12) An espiritu kan kinaban nagpapalakop nin kahanaban asin materyalismo—“an mawot kan mga mata.” (1 Juan 2:16; 1 Timoteo 6:9, 10) Minsan ngani an materyal na mga bagay asin kuarta bako man mismo an nakakadanyar, kun an pagkamoot niato dian sinasalidahan an pagkamoot niato sa Dios, kun siring si Satanas an nanggana. An kapangyarihan, o “autoridad,” kan espiritu kan kinaban nakadepende sa pan-akit kaiyan sa makasalan na laman, sa pagigin mapandaya kaiyan, sa pagigin daing ontok kaiyan asin, siring sa doros, sa pagigin lakop kaiyan. Dai nindo pagtogotan na maimpluwensiahan an saindong puso kan espiritu kan kinaban!—Efeso 2:2, 3; Talinhaga 4:23.
13. Paano puedeng mabalo an satong moral na kosog nin boot?
13 Minsan siring, kaipuhan an moral na kosog nin boot tanganing labanan asin isikwal an maraot na espiritu kan kinaban. Halimbawa, kaipuhan an kosog nin boot na bumuhat asin lumuwas sa sarong sinehan o gadanon an komputer o telebisyon kun lumataw an dustang mga ladawan. Kaipuhan an kosog nin boot na manindogan tumang sa nakakaraot na impluwensia nin kairiba asin putolon an pakikiasosyar sa maraot na mga pag-iriba. Siring man, kaipuhan an kosog nin boot sa pagsurog sa mga ley asin prinsipyo nin Dios sa atubangan nin pag-olog-olog, baga man hale sa mga kaeskuela, katrabaho, kataed, o paryente.—1 Corinto 15:33; 1 Juan 5:19.
14. Ano an maninigo niatong gibohon kun kita naimpluwensiahan kan espiritu kan kinaban?
14 Kun siring, mahalaga nanggad na pakosogon niato an satong pagkamoot sa Dios asin sa satong espirituwal na mga tugang na lalaki asin babae! Magtao nin panahon na siyasaton an saindong mga pasohan asin pamumuhay tanganing maheling kun baga naimpluwensiahan na kamo kan espiritu kan kinaban sa ano man na paagi. Kun naimpluwensiahan na kamo—dawa dikit—kun siring mamibi ki Jehova para sa kosog nin boot na haleon iyan asin dai na togotan na makaimpluwensia giraray iyan. Dai iignorohon ni Jehova an siring na sinserong mga pakimaherak. (Salmo 51:17) Dugang pa, an saiyang espiritu mas makapangyarihan nanggad kisa kan sa kinaban.—1 Juan 4:4.
Pag-atubang sa Personal na mga Pagbalo na May Kosog nin Boot
15, 16. Paano makakatabang sa sato an arog-Cristong pagkamoot na makaya an personal na mga pagbalo? Magtao nin halimbawa.
15 Kaiba sa iba pang mga kasakitan na kaipuhan na labanan kan mga lingkod ni Jehova an mga epekto nin pagkabakong sangkap asin pagkagurang, na sa parate nagbubunga nin helang, pagkabaldado, depresyon, asin dakol na iba pang problema. (Roma 8:22) An arog-Cristong pagkamoot makakatabang sa sato na mapangganang atubangon an mga pagbalong ini. Estudyare an halimbawa ni Namangolwa, na pinadakula sa sarong Kristianong pamilya sa Zambia. Si Namangolwa dos anyos kan sia mabaldado. “Masusupgon ako kaidto,” an sabi nia, “huling iniisip ko na makukubhanan an mga tawo sa itsura ko. Alagad tinabangan ako kan sakong mga tugang sa espirituwal na mansayon an mga bagay-bagay sa laen na paagi. Bilang resulta, napangganahan ko an sakong pagkamasusupgon, asin pag-abot nin panahon nabautismohan ako.”
16 Minsan ngani si Namangolwa igwa nin sadiring silyang de rueda, sa parate kinakaipuhan niang maglakaw paagi sa saiyang mga kamot asin tuhod kun nasa mabaybay na tinampo. Pero, nakikikabtang sia sa ministeryo bilang auxiliary payunir kisuerra duwang bulan kada taon. Nagtangis an sarong kagharong kan magpatotoo sa saiya si Namangolwa. Taano? Huling biyong napukaw an boot nia kan pagtubod asin kosog nin boot kan satong tugang na babae. Bilang ebidensia kan mayaman na bendisyon ni Jehova, lima sa mga inadalan sa Biblia ni Namangolwa an nabautismohan, asin an saro naglilingkod bilang magurang sa kongregasyon. “Parateng makologon an mga tabay ko,” an sabi nia, “alagad dai ko tinotogotan na papondohon ako kaiyan.” An tugang na babaeng ini saro sana sa dakol na Saksi sa bilog na kinaban na maluya an hawak alagad makosog an boot huli sa saindang pagkamoot sa Dios asin sa kapwa. Kanigoan na kawiliwili sa mata ni Jehova an gabos na siring na indibiduwal!—Haggeo 2:7.
17, 18. Ano an nakakatabang sa dakol na tagalan an helang asin iba pang pagbalo? Magtao nin nagkapirang lokal na halimbawa.
17 An pabalikbalik na helang puede man na makapanluya nin boot, makatao pa ngani nin makuring kamondoan. “Sa inaatenderan kong grupo nin pag-adal sa libro,” an sabi nin sarong magurang sa kongregasyon, “an sarong tugang na babae may diabetes asin helang sa bato, an saro may kanser, duwa an may grabeng artritis, asin an saro may lupus sagkod fibromyalgia. Kun beses nanluluya an boot ninda. Pero, dai sinda nakakaatender sa mga pagtiripon solamente kun grabe an saindang helang o sinda nasa ospital. Gabos sinda regular sa paglilingkod sa langtad. Nagpapagirumdom sinda sa sako dapit ki Pablo, na nagsabi: ‘Kun noarin ako maluya, saka man ako mapuersa.’ Hinahangaan ko an saindang pagkamoot asin kosog nin boot. An saindang situwasyon nagtatao gayod sa sainda nin mas malinaw na pokus sa buhay asin sa kun ano talaga an mahalaga.”—2 Corinto 12:10.
18 Kun kamo nakikipaglaban sa kamatean, helang, o iba pang problema, “mamibi nin daing ontok” para sa tabang tanganing dai kamo magin biktima nin panluluya nin boot. (1 Tesalonica 5:14, 17) Siempre, posibleng magkakaigwa kamo nin marahay asin maraot na mga kamugtakan sa emosyon, alagad hingoahon na magpokus sa positibo, espirituwal na mga bagay, nangorogna sa satong mahalagang marhay na paglaom sa Kahadean. “Para sa sako, terapi an ministeryo sa langtad,” an sabi nin sarong tugang na babae. An pagpaabot kan maogmang bareta sa iba nakakatabang sa saiya na mapagdanay an positibong punto de vista.
An Pagkamoot Nakakatabang sa mga Nagkasala na Bumalik ki Jehova
19, 20. (a) Ano an puedeng makatabang sa mga nahulog sa pagkakasala na magkaigwa nin kosog nin boot na bumalik ki Jehova? (b) Ano an totokaron sa sunod na artikulo?
19 An dakol na nagin maluya sa espirituwal o nahulog sa pagkakasala nasasakitan na bumalik ki Jehova. Alagad an siring na mga indibiduwal magkakaigwa kan kinakaipuhan na kosog nin boot kun sinda talagang magsosolsol asin papalaadon liwat an saindang pagkamoot sa Dios. Estudyare si Mario, * na nag-eerok sa Estados Unidos. Binayaan ni Mario an Kristianong kongregasyon, nagin alkoholiko asin adikto sa droga asin, pakalihis nin 20 taon, nabilanggo. “Pinonan kong mag-isip nanggad manongod sa sakong ngapit asin basahon giraray an Biblia,” an sabi ni Mario. “Pag-abot nin panahon, naapresyar ko an mga kualidad ni Jehova, nangorogna an saiyang pagkaherak, na parate kong ipinapamibi. Kan paluwason ako sa bilanggoan, rinayoan ko an dati kong mga kaibaiba, nag-atender ako sa Kristianong mga pagtiripon, asin sa katapustapusi nakabalik ako sa dating kamugtakan sa kongregasyon. Inaani ko sa pisikal an sakong itinanom, alagad ngonyan minsan paano igwa ako nin makangangalas na paglaom. Labi-labi an pasasalamat ko ki Jehova huli sa saiyang pagmalasakit asin pagpapatawad.”—Salmo 103:9-13; 130:3, 4; Galacia 6:7, 8.
20 Siempre, an mga nasa situwasyon na kaagid kan ki Mario kaipuhan na magmaigot nanggad na bumalik ki Jehova. Alagad an saindang napukaw na pagkamoot—bilang resulta nin pag-adal sa Biblia, pamibi, asin paghorophorop—matao sa sainda kan kinakaipuhan na kosog nin boot asin determinasyon. Si Mario napakosog man kan paglaom sa Kahadean. Iyo, kaiba kan pagkamoot, pagtubod, asin diosnon na takot, an paglaom puedeng magin makosog na puersa para sa ikakarahay kan satong buhay. Sa sunod na artikulo, sisiyasaton niato nin mas maingat an mahalagang marhay na espirituwal na balaog na ini.
[Nota sa Ibaba]
^ par. 19 Sinalidahan an ngaran.
Masisimbag daw Nindo?
• Paano an pagkamoot nakakontribwir sa pambihirang kosog nin boot ni Jesus?
• Paano an pagkamoot sa mga tugang nagtao nin pambihirang kosog nin boot ki Pablo asin Bernabe?
• Sa anong mga paagi hinihingoa ni Satanas na luway-luway na raoton an Kristianong pagkamoot?
• An pagkamoot ki Jehova puedeng magtao sa sato kan kosog nin boot na tagalan an anong mga pagbalo?
[Mga Hapot Para sa Pag-adal]
[Ritrato sa pahina 23]
An pagkamoot ni Pablo sa mga tawo nagtao sa saiya kan kosog nin boot na maghingoa
[Ritrato sa pahina 24]
Kaipuhan an kosog nin boot tanganing suportaran an mga pamantayan nin Dios
[Ritrato sa pahina 24]
Namangolwa Sututu