Ang Kaisog Gipalig-on sa Gugma
Ang Kaisog Gipalig-on sa Gugma
“Kita wala hatagi sa Diyos ug espiritu sa katalaw, kondili sa gahom ug sa gugma ug sa maayong panghunahuna.”—2 TIMOTEO 1:7.
1, 2. (a) Ang gugma magtukmod sa usa ka tawo sa pagbuhat sa unsa? (b) Nganong talagsaon ang kaisog ni Jesus?
USA ka bag-ong kasal nga magtiayon ang nag-scuba diving duol sa usa ka lungsod sa sidlakang baybayon sa Australia. Motunga na unta sila sa dihang ang usa ka dako, puti nga iho mihasmag sa babaye. Sa kamaisogon, giduso sa lalaki ang iyang asawa ug ang lalaki maoy giatake sa iho. “Iyang gihatag ang iyang kinabuhi alang kanako,” miingon ang biyuda panahon sa serbisyo sa paglubong.
2 Oo, ang gugma mahimong magtukmod sa mga tawo sa pagpakita ug talagsaong kaisog. Si Jesu-Kristo miingon: “Walay usa nga may gugmang labaw pa kay niini, nga ang usa magtugyan sa iyang kalag alang sa iyang mga higala.” (Juan 15:13) Wala dangtig 24 ka oras human isulti ni Jesus kining mga pulonga, iyang gihatag ang iyang kinabuhi, dili lang para sa usa ka tawo, kondili alang sa tanang tawo. (Mateo 20:28) Dugang pa, si Jesus wala maghalad sa iyang kinabuhi sa usa ka hinanali nga buhat sa kaisog. Siya nahibalong daan nga siya biaybiayon ug pasipad-an, pahamtangan ug dili-makataronganong sentensiya, ug pagapatyon diha sa estaka sa pagsakit. Giandam pa gani niya ang iyang mga tinun-an alang niining hitaboa, nga nag-ingon: “Ania kita, nagatungas paingon sa Jerusalem, ug ang Anak sa tawo igatugyan ngadto sa pangulong mga saserdote ug sa mga eskriba, ug ilang pagahukman siya sa kamatayon ug igatugyan siya ngadto sa mga tawo sa mga nasod, ug ilang pagabugalbugalan siya ug pagalud-an siya ug pagahampakon siya ug pagapatyon siya.”—Marcos 10:33, 34.
3. Unsay nagpatungha sa dakong kaisog ni Jesus?
3 Unsay nagpatungha sa talagsaong kaisog ni Jesus? Ang pagtuo ug diyosnong kahadlok adunay dakong bahin niana. (Hebreohanon 5:7; 12:2) Apan, labaw sa tanan, ang kaisog ni Jesus naggikan sa iyang gugma, alang sa Diyos ug sa iyang isigkatawo. (1 Juan 3:16) Kon atong ugmaron ang maong gugma gawas pa sa pagtuo ug diyosnong kahadlok, kita usab makapasundayag ug kaisog nga sama sa iya ni Kristo. (Efeso 5:2) Sa unsang paagi maugmad nato ang maong gugma? Kinahanglang ilhon nato ang Tinubdan niini.
“Ang Gugma Nagagikan sa Diyos”
4. Nganong ikaingon nga si Jehova mao ang Tinubdan sa gugma?
4 Si Jehova mao ang larawan sa gugma ug ang Tuboran niana. Misulat si apostol Juan: “Mga hinigugma, magpadayon kita sa paghigugmaay sa usag usa, tungod kay ang gugma nagagikan sa Diyos, ug ang matag usa nga nahigugma gipanganak gikan sa Diyos ug nakabaton ug kahibalo sa Diyos. Siya nga wala mahigugma wala makaila sa Diyos, tungod kay ang Diyos gugma.” (1 Juan 4:7, 8) Busa, ang gugma nga sama sa iya sa Diyos maugmad lamang diha sa usa ka tawo kon siya makigsuod kang Jehova pinaagi sa tukmang kahibalo ug molihok sumala nianang kahibaloa uban ang kinasingkasing nga pagkamasinugtanon.—Filipos 1:9; Santiago 4:8; 1 Juan 5:3.
5, 6. Unsay nakatabang sa unang mga sumusunod ni Jesus sa pag-ugmad ug gugma nga sama sa iya ni Kristo?
5 Sa iyang kataposang pag-ampo uban sa iyang 11 ka matinumanong mga apostoles, gipakita ni Jesus ang kalambigitan sa pagkaila sa Diyos ug sa pagtubo diha sa gugma, nga nag-ingon: “Gipaila ko ang imong ngalan kanila ug igapaila pa kini, aron nga ang gugma nga imong gibati kanako maanaa unta kanila ug ako mahiusa kanila.” (Juan 17:26) Gitabangan ni Jesus ang iyang mga tinun-an sa pag-ugmad sa matang sa gugma nga naglungtad tali kaniya ug sa iyang Amahan, nga nagpadayag pinaagi sa pulong ug panig-ingnan kon unsay gihawasan sa ngalan sa Diyos—ang maanindot nga mga hiyas sa Diyos. Busa, si Jesus makaingon: “Siya nga nakakita kanako nakakita usab sa Amahan.”—Juan 14:9, 10; 17:8.
6 Ang gugma nga sama sa iya ni Kristo maoy bunga sa balaang espiritu sa Diyos. (Galacia 5:22) Sa dihang nadawat sa unang mga Kristohanon ang gisaad nga balaang espiritu niadtong Pentekostes 33 K.P., wala lamang nila mahinumdomi ang daghang butang nga gitudlo ni Jesus kanila kondili mas bug-os usab nilang nasabtan ang kahulogan sa Kasulatan. Kining mas lalom nga pagsabot dayag nga nagpalig-on sa ilang gugma sa Diyos. (Juan 14:26; 15:26) Unsay resulta niana? Bisag nameligro ang ilang kinabuhi, sila maisogon ug masiboton nga nagwali sa maayong balita.—Buhat 5:28, 29.
Kaisog ug Gugma Gipakita
7. Unsay naagoman ni Pablo ug Bernabe sa ilang misyonaryong panaw?
7 Si apostol Pablo misulat: “Kita wala hatagi sa Diyos ug espiritu sa katalaw, kondili sa gahom ug sa gugma ug sa maayong panghunahuna.” (2 Timoteo 1:7) Si Pablo nagsulti pinasukad sa iyang eksperyensiya. Tagda kon unsay naagoman niya ug ni Bernabe sa ilang misyonaryong panaw. Sila nagsangyaw diha sa daghang siyudad, lakip na sa Antioquia, Iconio, ug Listra. Diha sa matag siyudad, ang ubang mga tawo nahimong mga magtutuo, apan ang uban nahimong grabeng magsusupak. (Buhat 13:2, 14, 45, 50; 14:1, 5) Sa Listra ang nasuko nga magubtanong panon nagbato pa gani kang Pablo, ug gibiyaan siya kay naghunahuna sila nga patay na siya! “Apan, sa dihang ang mga tinun-an mialirong kaniya, siya mitindog ug misulod ngadto sa siyudad. Ug sa pagkasunod nga adlaw siya migikan uban kang Bernabe paingon sa Derbe.”—Buhat 14:6, 19, 20.
8. Sa unsang paagi ang kaisog nga gipakita ni Pablo ug Bernabe nagbanaag sa ilang halalom nga gugma alang sa mga tawo?
8 Kini bang pagsulay sa pagpatay kang Pablo nakapahadlok kaniya ug kang Bernabe mao nga sila mihunong sa pagsangyaw? Wala gayod! Human “makahimog ubay-ubayng mga tinun-an” sa Derbe, ang duha ka lalaki “namalik ngadto sa Listra ug sa Iconio ug ngadto sa Antioquia.” Ngano? Aron sa pagdasig sa mga bag-ohan sa pagpabiling lig-on sa pagtuo. “Kita kinahanglang mosulod sa gingharian sa Diyos pinaagi sa daghang kasakitan,” miingon si Pablo ug Bernabe. Tin-aw nga ang ilang kaisog nagsumikad sa ilang halalom nga gugma alang sa “gagmayng mga karnero” ni Kristo. (Buhat 14:21-23; Juan 21:15-17) Human magtudlog mga ansiyano diha sa matag usa sa bag-ong-natukod nga mga kongregasyon, ang duha ka igsoon nag-ampo ug “gipiyal sila ngadto kang Jehova nga kaniya sila nahimong mga magtutuo.”
9. Sa unsang paagi ang mga ansiyano nga taga-Efeso misanong sa gugma ni Pablo alang kanila?
9 Si Pablo maoy mahigugmaon ug maisogon kaayo nga tawo nga tungod niana daghan sa unang mga Kristohanon ang mibati ug halalom nga gugma alang kaniya. Hinumdomi kon unsay nahitabo sa usa ka tigom nga gipahigayon ni Pablo uban sa mga ansiyano nga taga-Efeso, diin siya migugol ug tulo ka tuig ug nakaagom sa grabeng pagsupak. (Buhat 20:17-31) Human sila dasiga sa pagbantay sa panon sa Diyos nga gipiyal kanila, si Pablo miluhod uban kanila ug nag-ampo. Unya, “silang tanan nanghilak pag-ayo, ug ilang gigakos si Pablo sa liog ug gihalokan siya nga mabination, tungod kay sila ilabinang nasakitan sa pulong nga iyang gisulti nga sila dili na makakita pag-usab sa iyang nawong.” Pagkadako sa gugma niining mga igsoona alang kang Pablo! Gani, sa dihang panahon na sa pagbulagbulag, kinahanglang langkaton ni Pablo ug sa iyang mga kauban ang ilang kaugalingon gikan kanila tungod kay halos dili na sila palakwon sa mga ansiyano.—Buhat 20:36–21:1.
10. Sa unsang paagi ang modernong-adlaw nga mga Saksi ni Jehova nagpakita ug maisogong gugma alang sa usag usa?
10 Karon, ang nagapanawng mga magtatan-aw, mga ansiyano sa kongregasyon, ug daghan pa gimahal pag-ayo tungod sa kaisog nga ilang gipakita alang sa mga karnero ni Jehova. Pananglitan, sa mga nasod nga gidaot sa gubat sibil o diin gidili ang buluhatong pagsangyaw, ang nagapanawng mga magtatan-aw ug ang ilang mga asawa nagpameligro sa ilang kinabuhi ug kagawasan aron makaduaw sa mga kongregasyon. Sa susama, daghang Saksi ang nag-antos sa mga kamot sa mabatokong mga magmamando ug sa mga sumusunod niini tungod sa dili nila pagbudhi sa ilang mga isigka-Saksi o pagbutyag kon asa nila gikuha ang espirituwal nga pagkaon. Libolibo pa ang gilutos, gipaantos, ug gipatay pa gani tungod kay dili sila mohunong sa pagsangyaw sa maayong balita o mohunong sa pagpakig-uban sa mga isigka-magtutuo diha sa Kristohanong mga tigom. (Buhat 5:28, 29; Hebreohanon 10:24, 25) Hinaot sundogon nato ang pagtuo ug gugma nianang maisogong mga igsoong lalaki ug babaye!—1 Tesalonica 1:6.
Ayaw Tugoti nga Mabugnaw ang Inyong Gugma
11. Sa unsang mga paagi si Satanas adunay espirituwal nga pagpakiggubat batok sa mga alagad ni Jehova, nga nagkinahanglan ug unsa sa ilang bahin?
11 Sa dihang si Satanas gitambog sa yuta, siya determinadong ipahungaw ang iyang kasuko sa mga alagad ni Jehova tungod kay sila “nagabantay sa mga sugo sa Diyos ug [nagpamatuod] bahin kang Jesus.” (Pinadayag 12:9, 17) Ang usa sa mga taktika sa Yawa mao ang paglutos. Apan, subsob nga kining maong estratehiya mosumbalik tungod kay kini nakapasuod pa hinuon sa katawhan sa Diyos diha sa bugkos sa Kristohanong gugma ug nagpalihok sa daghan kanila nga magmasiboton pa. Ang laing taktika ni Satanas mao ang pagtagbaw sa makasasalang hilig sa tawo. Ang pagsukol niining maong taktika nagkinahanglag lahi nga matang sa kaisog tungod kay ang pagpakigbugno maoy sulodnon, batok sa sayop nga mga tinguha sulod sa atong kaugalingong ‘malimbongon ug desperado’ nga kasingkasing.—Jeremias 17:9; Santiago 1:14, 15.
12. Sa unsang paagi gigamit ni Satanas “ang espiritu sa kalibotan” sa iyang paningkamot nga pahuyangon ang atong gugma sa Diyos?
12 May lain pang puwersadong hinagiban si Satanas—“ang espiritu sa kalibotan,” sa ato pa, ang nagpatigbabaw nga kiling o panukmod niini, nga supak gayod sa balaang espiritu sa Diyos. (1 Corinto 2:12) Ang espiritu sa kalibotan nagpasiugdag kadalo ug materyalismo—“ang tinguha sa mga mata.” (1 Juan 2:16; 1 Timoteo 6:9, 10) Bisan tuod ang materyal nga mga butang ug salapi dili makadaot, kon ang atong gugma niana molabaw sa atong gugma sa Diyos, nan nakadaog si Satanas. Ang gahom, o “awtoridad,” sa espiritu sa kalibotan anaa sa pagkamadanihon niini sa makasasalang unod, sa pagkamalinglahon niini, sa pagkamakanunayon niini ug, sama sa hangin, sa pagkamakaylapon niini. Ayawg tugoti ang espiritu sa kalibotan nga makatakod sa imong kasingkasing!—Efeso 2:2, 3; Proverbio 4:23.
13. Sa unsang paagi ang atong kaisog sa paghupot ug moral nga kahinlo masulayan?
13 Apan, aron masuklan ug masalikway ang daotang espiritu sa kalibotan, gikinahanglan ang kaisog sa paghupot ug moral nga kahinlo. Pananglitan, nagkinahanglag kaisog ang pagtindog ug pagbiya sa sinehan o pagpatay sa kompiyuter o TV sa dihang motungha ang law-ay nga mga hulagway. Nagkinahanglag kaisog ang pagsukol sa makadaot nga pagpit-os sa isigkaingon ug ang pagputol sa daotang panagkauban. Sa samang paagi, nagkinahanglag kaisog ang pagbarog dapig sa mga balaod ug mga prinsipyo sa Diyos sa dihang biaybiayon sa mga kauban sa eskuylahan, kauban sa trabaho, silingan, o kaha sa mga paryente.—1 Corinto 15:33; 1 Juan 5:19.
14. Unsay angay natong buhaton kon kita natakdan na sa espiritu sa kalibotan?
14 Nan, pagkahinungdanon nga atong palig-onon ang atong gugma sa Diyos ug sa atong espirituwal nga mga igsoon! Paggahin ug panahon sa pagsusi sa imong mga tumong ug paagi sa pagkinabuhi aron masuta kon ang espiritu sa kalibotan nakatakod ba kanimo sa bisan unsang paagi. Kon nakatakod na kini kanimo—bisag gamay—nan pag-ampo kang Jehova alang sa kaisog nga matangtang ug masalikway kana. Patalinghogan ni Jehova ang maong sinserong mga pag-ampo. (Salmo 51:17) Dugang pa, ang iyang espiritu mas gamhanan kay nianang iya sa kalibotan.—1 Juan 4:4.
Pag-atubang nga Maisogon sa Personal nga mga Pagsulay
15, 16. Sa unsang paagi ang gugma nga sama sa iya ni Kristo motabang kanato sa pagsagubang sa personal nga mga pagsulay? Paghatag ug pananglitan.
15 Ang ubang mga suliran nga kinahanglang sagubangon sa mga alagad ni Jehova naglakip sa mga epekto sa pagkadili-hingpit ug pagkatigulang, nga subsob mosangpot sa sakit, pagkabaldado, depresyon, ug daghan pang mga problema. (Roma 8:22) Ang gugma nga sama sa iya ni Kristo makatabang kanato sa pagsagubang niining maong mga pagsulay. Tagda ang panig-ingnan ni Namangolwa, kinsa gimatuto diha sa usa ka Kristohanong pamilya sa Zambia. Sa nag-edad siya ug dos anyos, si Namangolwa nabaldado. Miingon siya: “Ako maulawon kay ako naghunahuna nga ang mga tawo ngil-aran sa akong panagway. Apan ang akong espirituwal nga mga igsoon mitabang kanako sa paglantaw sa mga butang sa lahi nga paagi. Tungod niini, akong nabuntog ang akong pagkamaulawon, ug sa ngadtongadto ako nabawtismohan.”
16 Bisan tuod si Namangolwa adunay wheelchair, subsob nga kinahanglan siyang mokamang kon moagi siya sa balason, dili-aspaltado nga dalan. Bisan pa niana, siya nakigbahin sa ministeryo ingong oksilyare payunir labing menos duha ka bulan kada tuig. Ang usa ka tagbalay mihilak sa dihang gisangyawan siya ni Namangolwa. Ngano? Tungod kay natandog siya pag-ayo sa pagtuo ug kaisog sa atong igsoon. Ingong pamatuod sa dagayang panalangin ni Jehova, lima sa ginatun-an sa Bibliya ni Namangolwa ang nabawtismohan, ug ang usa nag-alagad ingong ansiyano sa kongregasyon. Miingon siya: “Ang akong mga bitiis subsob nga magngulngol pag-ayo apan wala nako kana tugoti nga mopahunong kanako.” Kining igsoona maoy usa lamang sa daghang Saksi sa tibuok kalibotan nga luya ug lawas apan lig-on ug espiritu tungod sa ilang gugma sa Diyos ug sa silingan. Pagkatilinguhaon nilang tanan sa mga mata ni Jehova!—Haggeo 2:7.
17, 18. Unsay nakatabang sa daghan sa pag-antos sa sakit ug sa ubang mga pagsulay? Paghatag ug pipila ka lokal nga mga pananglitan.
17 Ang laygay nga sakit makapahigawad usab, makapahinabo pa gani ug depresyon. Miingon ang usa ka ansiyano sa kongregasyon: “Sa grupo sa pagtuon sa libro nga akong ginatambongan, ang usa ka sister nag-antos sa diabetes ug sakit sa rinyon, ang usa adunay kanser, duha ang may grabeng artraytis, ug ang usa dunay lupus ug fibromyalgia. Usahay sila mahigawad. Bisan pa niana, makapalta lamang sila ug tigom sa dihang sila masakiton kaayo o naadmit sa ospital. Ang tanan regular diha sa pag-alagad sa kanataran. Sila nakapahinumdom kanako kang Pablo, kinsa miingon: ‘Sa dihang ako maluya, ako gamhanan hinuon.’ Nakadayeg ako sa ilang gugma ug kaisog. Tingali tungod sa kahimtang sa ilang panglawas, nahimong mas tin-aw ang ilang panglantaw sa kinabuhi ug sa kon unsay tinuod nga hinungdanon.”—2 Corinto 12:10.
18 Kon nakigbisog ka sa kaluyahon, sakit, o uban pang problema, “pag-ampo nga walay-hunong” alang sa tabang aron dili ka mabiktima sa kahigawad. (1 Tesalonica 5:14, 17) Siyempre, lagmit may mga panahon nga ikaw malipayon ug may mga panahon nga ikaw masulub-on, apan sulayi sa pagsentro ang imong pagtagad sa positibo, espirituwal nga mga butang, ilabina sa atong bililhong paglaom sa Gingharian. “Alang kanako, ang pag-alagad sa kanataran maoy tambal,” matod pa sa usa ka sister. Ang pagpaambit sa maayong balita sa uban nakatabang kaniya sa paghupot ug positibong panglantaw.
Ang Gugma Makatabang sa mga Makasasala sa Pagbalik Kang Jehova
19, 20. (a) Unsay makatabang niadtong nakasala aron sila makabatog kaisog sa pagbalik kang Jehova? (b) Unsay hisgotan sa sunod nga artikulo?
19 Daghang nangaluya sa espirituwal o nakasala ang nalisdan sa pagbalik kang Jehova. Apan ang gikinahanglan nga kaisog mabatonan lamang nila kon sila tinuod nga maghinulsol ug maghaling pag-usab sa ilang gugma sa Diyos. Tagda si Mario, a nga nagpuyo sa Tinipong Bansa. Si Mario mibiya sa Kristohanong kongregasyon, nahimong alkoholiko ug giyanon sa droga ug, human sa 20 ka tuig, napriso. “Ako nagsugod sa pagpamalandong bahin sa akong kaugmaon ug sa pagbasa pag-usab sa Bibliya,” matod pa ni Mario. “Sa ngadtongadto, akong naapresyar ang mga hiyas ni Jehova, ilabina ang iyang kaluoy, nga subsob nakong giampo. Human ako makagawas sa prisohan, akong gilikayan ang akong kanhing mga kauban, ako misugod pagtambong sa Kristohanong mga tigom, ug sa ngadtongadto napasig-uli. Giani na nako karon ang akong gipugas, apan maayo na lang kay ako may maanindot na nga paglaom. Mapasalamaton kaayo ako kang Jehova tungod sa iyang pagkamabination ug pagkamapinasayloon.”—Salmo 103:9-13; 130:3, 4; Galacia 6:7, 8.
20 Siyempre, kadtong susamag kahimtang ni Mario kinahanglang maningkamot nga makabalik kang Jehova. Apan ang ilang nahaling pag-usab nga gugma—nga maoy resulta sa pagtuon sa Bibliya, pag-ampo, ug pagpamalandong—maghatag kanila sa gikinahanglang kaisog ug determinasyon. Si Mario napalig-on usab sa paglaom sa Gingharian. Oo, duyog sa gugma, pagtuo, ug diyosnong kahadlok, ang paglaom makahatag usab ug dakong benepisyo sa atong kinabuhi. Sa sunod nga artikulo, atong susihon pag-ayo kining bililhong espirituwal nga gasa.
[Footnote]
a Ang ngalan giusab.
Makatubag Ka Ba?
• Sa unsang paagi ang gugma nagpatungha sa talagsaong kaisog ni Jesus?
• Sa unsang paagi ang gugma alang sa mga igsoon naghatag kang Pablo ug Bernabe ug talagsaong kaisog?
• Pinaagi sa unsa nga si Satanas naningkamot sa pagpahuyang sa Kristohanong gugma?
• Ang gugma kang Jehova makahatag kanato ug kaisog sa pag-antos sa unsang mga pagsulay?
[Mga Pangutana sa Pagtuon]
[Hulagway sa panid 23]
Ang gugma ni Pablo sa katawhan naghatag kaniya ug kaisog nga molahutay
[Hulagway sa panid 24]
Nagkinahanglag kaisog ang pagbarog dapig sa mga sukdanan sa Diyos
[Hulagway sa panid 24]
Namangolwa Sututu