Trengecatr Hna Acatren Hnei Ihnim
Trengecatr Hna Acatren Hnei Ihnim
“Ke thaa hnei Akötesie hna hamë shë la ua ka xou; ngo loi pe ka men, me ka ihnim, me ka inamacan.”—2 TIMOTEO 1:7.
1, 2. (a) Nemene la hna upi së troa kuca hnene la ihnim? (b) Pine nemen matre ka ketrepengöne kö la aqane catre i Iesu?
HNENE la lue trefën ka xötrei faipoipo hna sië hnagejë ngöne la qahlapa ezine la ketre traon götrane kohmiju e Osetralia. Nyidroti pala hi a aj, ene pe weje fetra pi hi la ketre eötr atraqatr troa thapa la föe. Ngo hnene la trahmanyi hna canga ukun ananyine la föe i angeic me nue la eötr troa heji angeic. Öni föe ngöne la ijine kola kele wezipo, ka hape: “Hnei nyidrëti hna nue la mele i nyidrëti thatraqai ni.”
2 Nyipici laka, kola upi së hnene la ihnimi troa amamane la etrune la trengecatre së. Hnei Iesu Keriso hna qaja ka hape: “E tro kete ate a hamëne la mele i angeice thatraqane la ite sine i angeic, pëkö ihnimi ka sisitia hune lai.” (Ioane 15:13) Caa drai thupene la hnei Iesu hna qaja la itre trengewekë cili, nge nyidrëti fe hi a hamëne pi la sipu mele i nyidrë, thaa kowe hmekuje kö la alacaas, ngo kowe la nöjei atr asë. (Mataio 20:28) Ketre, thaa hnei Iesu kö hna nue pi hi la mele i nyidrë nyine amamane ka hape ka tru trengecatrene nyidrë. Ohea, canga atre hnyawa kö nyidrëti laka, troa thaipiëne me qanangazo nyidrë, me menu la aqane kootrë nyidrë, me humuthi nyidrëti hune la sinöe. Hnei nyidrëti fe hna hnëkëne la itretre drei nyidrë troa hane cile kowe la jole cili, öni nyidrë: “Hana wang, eësha tro Ierusalema eë, nge tro ha nue la Nekö i ate kowe la ite tane i angete huj, me angete cinyihany, nge tro angat’ a axeciëne la tro angeic’ a mec, nge troa nue angeic koi angete ethen ; nge tro angat’ a hnyima sai angeic, me thaucën, me hnyijuën, me humuth.”—Mareko 10:33, 34.
3. Nemene la ka aijijë Iesu troa hetrenyi la ketre trengecatre ka tru?
3 Qa ngöne nemene matre ketrepengöne kö la trengecatr hna amamane hnei Iesu? Qa ngöne hi laka, eje thei nyidrëti la lapaun memine la xoue Akötresie. (Heberu 5:7; 12:2) Ngo ame la ka nyipi ewekë, ke hna nyitrepene la trengecatre i Iesu hnene la ihnimi nyidrëti koi Akötresie me kowe la itre sine huliwa i nyidrë. (1 Ioane 3:16) Maine tro sa eëne la ihnimi cili xane la lapaun memine la xoue Akötresie, haawe, tro fe hë së a atreine troa hane catre tui Iehova. (Efeso 5:2) Tro sa eëne tune kaa lai ihnimi cili? Nyipi ewekë la tro sa atrehmekune hnyawa la qaane la ihnim.
“Qaa Thei Akötresieti La Ihnim”
4. Pine nemen matre kola qaja ka hape Iehova la qeqe ne la ihnim?
4 Atreine hi tro sa qaja ka hape Iehova la ihnim me qaane la ihnim. Hnei Ioane aposetolo hna cinyihane ka hape: “Ange hnimina fe, loi e tro sha ihnimikeu; ke qa thei Akötesie la ihnim; nge hna hnahone qa thei Akötesie angat’ asë angete ihnim, nge ate hmekunyi Akötesieti hë hnei angat. Ame la ate tha ihnimi kö, te, tha’te Akötesieti kö hnei angeic; ke Akötesieti la ihnim.” (1 Ioane 4:7, 8) Nemene la aqane tro la atr a hetrenyi la ihnimi cili, ene la ihnimi ka eje thei Akötresie? Loi e tro angeic a catre easenyi koi Iehova jëne la nyipi atrehmekune me thele troa trongëne hnyawa la atrehmekune cili cememine la hni ka idrengethenge.—Filipi 1:9; Iakobo 4:8; 1 Ioane 5:3.
5, 6. Nemene la ka xatuane la itretre drei Iesu ekö troa eëne la tulu ne ihnimi hna amë pe hnei nyidrë?
5 Ame ngöne la thithi tixenuë i Iesu ngöne lo ce nyidrëti pë hë memine lo levine lao aposetolo ka mele nyipici pe, hnei nyidrë hna amamane la lue mekune ka caas, ene la troa atre Akötresie memine la troa kökötre ngöne la ihnim; öni nyidrë: “Hnenge hna amamane koi angate la atesiwa i cilie, nge tro kö ni a amaman ; mate eje kö e kuhu ite hni angate la ihnim, tune lo hna hnimi ni hnei cilie, nge ini e kuhu ite hni angat.” (Ioane 17:26) Hnei Iesu hna xatuane la itretre drei nyidrë troa eëne la pengöne la ihnim ka eje thei nyidrë me Tretretro i nyidrë. Kola amamane hnei nyidrë jëne la hna qaja me hna kuca la hna nyihatren hnene la ëje i Akötresie, ene lo itre thiina ka sisitria i Nyidrë. Ene pe nyidrëti a qaja jë ka hape: “Ame la ate goeë ni, angeice fe a goeëne la Tretretro.”—Ioane 14:9, 10; 17:8.
6 Ame la tulu ne ihnimi hna hamën hnei Iesu, tre, celë fe wene ne la uati hmitrötre i Akötresieti lai. (Galatia 5:22) Ame ngöne lo Penetekos 33 M.K., hna kapa hnene la itre pane Keresiano ekö lo uati hmitrötr hna thingehnaeane hë koi angatr; thaa hnei angatr hmekuje kö hna mekune hmaca lo itre ewekë ka nyimutre hna ini angatre hnei Iesu, ngo angatre fe hë a hane trotrohnine hnyawa la aliene la Tusi Hmitrötr. Qa ngöne lai, kökötre hnyawa pi hi la ihnimi angatr koi Akötresie, hnene la ejuine la trotrohnine cili. (Ioane 14:26; 15:26) Nemene ju hë la thangane lai? Kola mama ngöne la aqane catre cainöjëne angatr la maca ka loi, laka, ngacama hna sewe angatre ju hë, ngo thaa hnei angatre kö hna hmacahmaca.—Ite Huliwa 5:28, 29.
Kola Mama La Trengecatr Memine La Ihnim
7. Nemene la hnei Paulo me Banaba hna xomihninahoean ngöne lo itre jë i nyidro lue mesinare?
7 Hna cinyihane hnei Paulo aposetolo ka hape: “Ke tha hnei Akötesie hna hamë shë la ua ka qou; ngo loi pe ka men, me ka ihnim, me ka inamacan.” (2 Timoteo 1:7) Paulo a qaja la hnei nyidrëti hna melën. Tro sa ce wang la hnei nyidrëti me Banaba hna kuca ngöne lo nyidroti a mesinare. Hnei nyidroti hna cainöj ngöne la itre traon ka nyimutre, ene Anetioka me ikonio me Lusetara. Hetre itre xaa atr a kapa la maca me hane lapaun, ngo ame itre xan, tre, angatr a icilekeu. (Ite Huliwa 13:2, 14, 45, 50; 14:1, 5) Ame e Lusetara, tre, hna tranyi Paulo hnei etë, me nue angeic kösë ka meci pë hë! “Nge angete deng’ a cile xöteithi nyidë, ame hna cile jë nyidë, me tro kowe la lapa; nge elanyi nyidëti a ce tro me Banaba Derebe eë.”—Ite Huliwa 14:6, 19, 20.
8. Pine nemene matre ijije hi tro sa qaja ka hape ame la trengecatre i Paulo me Banaba, tre, ka xulu qa ngöne la sipu ihnimi nyidroti kowe la itre atr?
8 Hapeu, hna axounyi Paulo kö hnene la itupathi celë me sewe angeic me Banaba troa cainöj? Ohea! Thupene la hna “ahmalane la ka ala nyimu troa deng” e Derebe, nyidroti a “hmaca Lusetara eë, me Ikonio, me Anetioka.” Pine nemen? Kolo hi matre troa ithuecatre kowe la itre ka xötrei atre la nyipici troa cile catre ngöne la lapaun. Hnei Paulo me Banaba hna qaja ka hape: “Qâ shë troa lö kowe la baselaia i Akötesie hna jëne la ite aköte ka kösau.” Kola mama hnyawa laka, ame la trengecatre i angatr, tre, ka xulu qa thene la ihnimi angatr kowe la itre “mamoe” i Keriso. (Ite Huliwa 14:21-23; Ioane 21:15-17) Thupene la hna acile la itre qatre thup ngöne la itre ekalesia hna xötrei eköth, hna cile fë la thithi hnene la lue trejin me “nue angate pi koi Joxu, lo hnei angate hna lapaune kow.”
9. Nemene la aqane ketr la itre qatre thup ne Efeso hnene la ihnimi Paulo koi angatr?
9 Pine laka Paulo la ketre atr ka ihnimi me catre nyihlue i Akötresieti ekö, haawe, nyimutre catre la itre pane Keresiano ka hnimi angeic. Pane mekune hmaca ju la hna kuca ekö ngöne la icasikeu hna eköth hnei Paulo memine la itre qatre thup ne Efeso, traone hnei nyidrëti hna pane lapa a köni macatre, nge götran hnei nyidrëti hna mele ngön hnine la itre icilekeu ka nyimutre. (Ite Huliwa 20:17-31) Thupene la hna ithuecatre koi angatr troa thupëne la itre mamoe i Akötresie me nue nyudren koi angatr, ame hnei Paulo hna ce sa iwatingöneca me ce thithi me angatr. Thupene lai, “iteijenyi atraqate angat’asë, me thipine la nyinawa i Paulo, me idemi me nyidë, nge sisitia la mecitei angate ngöne la tenge ewekë hnei nyidëti hna qaja, ka hape, tha tro hmaca kö angat’ a öhne la qëmeke i nyidë.” Drei la etrune la ihnimi ne la itre trejine koi Paulo! Ketre, ame hë la kola traqa la ijine tro hmaca Paulo a tro memine la itre sine ce tro i nyidrë, ‘nango jole pi hë tro angatr a inu,’ ke, thaa ajane kö la itre qatre thup troa nue angatr.—Ite Huliwa 20:36–21:1.
10. Tune kaa la aqane catre ihnimikeu la Itretre Anyipici Iehova ne la hneijine së?
10 Ame enehila, tru la hna hnime la itre qatre thup ka iwai trootro, me itre qatre thup hnine la itre ekalesia, me itre xane ju kö, pine la trengecatre hnei angatr hna xome thatraqane la itre mamoe i Iehova. Drei la ketre ceitun: Ame ngöne la itre nöje gaa isi maine hna wathebone ngön la huliwa ne cainöj, hetrenyi e cili la itre itupathi ka tru catre kowe la itre qatre thup ka iwai trootro memine la itre föe i angatr; maine jë tro angatr a eatr, maine pena troa akalabusi angatr. Ketre, nyimutre la Itretre Anyipici Iehova ka akötr fene la musi ne la itre atr ka icilekeu memine la itre ka ce huliwa me angatr; ame la kepine lai, tre, hnene laka, xele kö la Itretre Anyipici Iehova ma wanaxoeën la itre trejine me angatr me qajaqaja la itre ka hamën la xeni ne la ua. Hna akötrëne la itre xan, itre thauzane la etrun, nge hna humuthe fe pine laka, thaa hnei angatre kö hna hmaca troa cainöjëne la maca ka loi, maine ce sine pena memine la itre trejin la itre icasikeu i Keresiano. (Ite Huliwa 5:28, 29; Heberu 10:24, 25) Epi tro fe sa xötrethenge la lapaun memine la ihnimi ne la itre trejine trahmanyi me föe ka catre ngöne la itupath!—1 Thesalonika 1:6.
The Nue Kö Troa Nanazije La Ihnimi Nyipunie
11. Ngöne nemene götran la Satana a isi ngöne la götrane la ua memine la itre hlue i Iehova, memine la itre hnei Nyidrë hna upi angatr troa kuca?
11 Ame lo kola ukapië satana a tro celë fen, hnei angeic hna nue la trenge elëhni angeic hune la itre hlue i Iehova, pine laka, angatr a “drenge thenge la nöjei wathebo i Akötesie, me angetre xome la nyine anyipici Iesu Keriso.” (Hna Amamane 12:9, 17) Ame la ketre aqane iamenu i Satana, tre, ene la troa icilekeu. Ngo ame itre xaa ijin, tre, kolo jë petre hi ka hape acatrene hnyawa jë la aqane ihnimi ne la itre hlue i Akötresie me ukune la ka alanyimu troa catre cainöjëne la maca ka loi. Ame fe la ketre aqane iamenu i Satana, tre, troa iaöne la itre atr matre tro angatr a kei kowe la itre aja ka ngazo i angatr. Maine easa ajan troa cile kowe la aqane nyinyithina i Satana celë, loi e tro sa catr ngöne la nöjei götran, pine laka, ame la isi, tre eje ekuhu hni së; easa isi memine la itre aja së ka ngazo memine la hni së ka ‘iaö me ka ngazo’.—Ieremia 17:9; Iakobo 1:14, 15.
12. Nemene la aqane xome Satana la “mekuna ne la fen” matre troa thele troa ananazijëne la ihnimi së koi Akötresie?
12 Hetrenyi fe la ketre jiane isi Satana, ene lo “mekuna ne la fen.” Kola qaja la itre aqane ihuline la fen maine itre hnene ej hna uku së troa kuca, itre ewekë ka icilekeu memine la uati hmitrötre i Akötresie. (1 Korinito 2:12) Kola sajuëne hnene la mekuna ne la fen la meciu ewekë memine la pi aja mo, ene lo “meciune ne la lue mek.” (1 Ioane 2:16; 1 Timoteo 6:9, 10) Loi e tro sa atre hnyawa laka, thaa ka ngazo kö la itre mo ne fen memine la manie, ngo maine tru hë itre ej hune la ihnimi së koi Iehova, haawe, ase hë lai hnai së hnei Satana. Ame la ua maine mekuna ne la fen, tre, hetre emenene ej, pine laka, ej a iaö së me xeexe la itre aja së ka ngazo, me iamenu me iwajahuj, nge pine laka, ceitune ej memine la enyi hne së hna manon, laka thatreine kö troa isa tro memin. The tro pi kö sa nue la mekuna ne la fen troa athixötrëne la itre hni së!—Efeso 2:2, 3; Ite Edomë 4:23.
13. Nemene la aqane tro sa cile kowe la itupath jëne la trengecatr hne së hna kuca matre troa hetrenyi la thiina ka loi?
13 Maine easa ajane troa cile me thipetrije la mekune ka ngazo ne la fen, loi e tro sa catre troa thupëne la thiina së. Drei la ketre ceitun: troa hetre trengecatr troa cil me lö trije la ketre film ne sinema maine troa thinge la ordinatör maine televizio pena, e kola amamane la kuci ngazo. Loi e troa hetre trengecatre mina fe troa cile catr ngöne la itre itupathi ka tru catr, me troa kötrene la itre sine ce elo ka ngazo. Ketre nyipi ewekë mina fe troa hetrenyi la trengecatr matre troa trongëne la itre trenge wathebo i Akötresie memine la itre trepene meköti Nyidrë qëmekene la itre atr ka thele troa ahmahmanyi së; maine jë itre sine ini së, me itre sine huliwa së, me itre ka lapa easenyi së maine itre sinee së.—1 Korinito 15:33; 1 Ioane 5:19.
14. Nemene la nyine tro sa kuca maine hna löthi së hë hnene la ua ne la fen?
14 Haawe, drei la enyipiewekën la tro sa acatren la ihnimi së koi Akötresie me kowe la itre trejine me easë trahmanyi me föe ngöne la götrane la ua! Thele ijine jë troa pane wange la itre aja memine la itre aqane mele i epun, matre troa atre ka hape ase jë fe kö löthe la itre xaa götran hnene la ajan ne la fen. Maine hna nango löthi së hë, haawe, thithi jë koi Iehova matre tro Nyidrëti a hamëne la trengecatr ka ijije troa xometrije ej me troa thungijën ej troa ajojezi së. Thaa tro jë kö Iehova a dreisimine la itre sipo cili ka qa kuhu itre hni së. (Salamo 51:17) Ketre, ka trene mene catre kö la ua i Nyidrë hune la ua ne la fen.—1 Ioane 4:4.
Loi e Tro Sa Catr Troa Qëmek Kowe La Itre Itupath
15, 16. Troa xatua së tune kaa hnene la tulu ne ihnimi Keriso, e kola cile kowe la itre sipu itupathi së? Hamëne jë la ketre ceitun.
15 Hetrenyi la itre xaa itupath hnene la itre hlue i Iehova hna troa qëmeke kow, tune la itre ethanyin la ngazo memine la kola tro ipië trootro la mel, itre xaa ijin kola tithe hnei mec, maine sine atr pena ha, maine kola hace hni, me itre xaa jole ju kö ka nyimutre. (Roma 8:22) Tro la tulu ne ihnimi Iesu a xatua së troa cile kowe la itre itupathi cili. Drei la tulu i Namangolewa; hnei angeic hna tru hnine la ketre fami Keresiano ne Zaabia. Ame lo kola lue macatre i angeic, sine atr pë hë Namangolewa. Öni angeic, ka hape: “Eni a nango hmahma me mekune laka maine jë troa xoue ni hnene la itre atr. Ngo hna xatua ni hnene la itre trejine me eni ngöne la ua, troa ketrepengön la aqane tro ni a waiewekë. Ame la thangane lai, tre, hnenge hna cile kowe la jol ka eje theng, ene la hmahma, nge eni a hane xome ju fe la bapataiso.”
16 Ngacama ka ti ikatr Namangolewa, ngo ame ngöne la itre xaa ijin, hnei angeic hna wewë hune la gojenyi gaa dro. Hnei angeice fe hna pionie ka ixatua, lue treu ngöne la nöjei macatre. Hna treij hnene la ketre atr ngöne la kola cainöje koi angeic hnei Namangolewa. Pine nemen? Pine laka hna ketri angeic hnene la lapaunene la trejine föe memine la trengecatre i eahlo. Kola mama hnyawa la aqane amanathithi Namangolewa hnei Iehova, ke faifi lao atr hnei angeic hna inine ka xome hë la Bapataiso, nge qatre thupe hë la ketre e hnine la ekalesia. Öni angeic, “Akötre catre la lue cang, ngo thaa hnenge kö hna hmacahmaca.” Nyimutre la Itretre Anyipici Iehova e cailo fen ka tui Namangolewa, laka, kucakuca catre la ngönetrei i angatr, ngo ame pe tre, egöcatre la mekun, pine laka atraqatre la ihnimi angatr koi Akötresie me kowe la itre atr ka lapa easenyi angatr. Drei la elolo i nyudreni asë xajawai Iehova!—Haggai 2:7.
17, 18. Nemene la ka xatuane la itre atr ka alanyim troa xomihninahoean la itre mec me itre xaa itupathi ju kö? Hamëne jë la itre xaa ceitun ngöne la nöj.
17 Jëne nanazij la atr hna tith paluan hnene la ketre mec, nge tro fe a wezipo la he pine lai. Hna qaja hnene la ketre qatre thup, ka hape: “Ame ngöne la ketre gurup ne Ini Tus hnenge hna hane sin, tre, hetrenyi la ketre trejine föe hna tith hnene lo meci ne suka (diabet), nge ka uti xele eahlo; ame ketre, tre ka iutr (kaser), lue xan ka wewë lue ca, nge ame ketre, tre, lue meci eahlo, Lupus (meci ne madra) me fibromyalgia (meci itre non). Ame itre xaa ijin, tre, kucakuca la mekuna i angatr. Ngo angatre hi a thaa hane traqa troa sin la itre icasikeu, ke tru catre pala ha la meci angatr maine pitale hmaca pena ha. Ka sine pala hi angatr la huliwa ne cainöje ngöne itre hnalapa trootro. Angatr a amekunë ni lo hna qaja hnei Paulo ka hape: ‘Ame la eni a kucakuca, ijine eni hi lai a catr.’ Kola amadrinë ni hnene la ihnimi angatr memine la trengecatre i angatr. Hnene la ewekë ka traqa koi angatr, maine jë kola mama hnyawa koi angatr la ka nyipi ewekë catr kowe la mel.”—2 Korinito 12:10.
18 Maine nyipunieti a isi memine la ketre meci maine itre xaa jole pena, tre, “thithi jë the mano kö” matre thaa tro kö nyipunieti a nanazij. (1 Thesalonika 5:14, 17) Eje hi lai laka, ame itre xaa ijin, tre, nango loi, ngo ame pena ha e ketre ijin, ke kolo hmaca pena ha ngazo, matre ka loi e troa goeën aloine la itre ewekë, ene la itre ewekë ngöne la götrane la ua, tune lo mejiun ne la Baselaia, mejiune ka sisitria catr. Hna qaja hnene la ketre trejine föe ka hape: “Ame koi ni tre, cainöje trootro hi la nyin la mecing.” Ame la troa tro fë la maca ka loi kowe la itre xan, tre, ewekë lai ka xatua eahlo troa goeën aloine la itre ewekë.
Tro La Ihnimi a Xatuane La Itre Ka Kuca La Ngazo Troa Bëeke Koi Iehova
19, 20. (a) Nemene la ka troa xatuane la itre ka kei kowe la ngazo matre troa hetre trengecatre i angatr hmaca troa bëeke koi Iehova? (b) Nemene la hna troa ce wang ngöne la hna cinyihan ka troa xulu?
19 Thaa ka hmaloi kö troa bëeke hmaca koi Iehova la itre ka kucakuca trootro ngöne la götrane la ua maine ka kuca pena la ngazo. Ngo troa hetrenyi la trengecatr e hnei angatr hna ietra nyipici me aciane hmaca la ihnimi angatre koi Akötresie. Tro sa ce wange la pengöi Mario, ketre atr ka mele e Amerika. a Hnei Mario hna tro trije la ekalesia i Keresiano; angeice hë a iji menu la kahaitr me kuci dorog, nge thupene la 20 lao macatre, hna umë angeic e kalabus. Öni angeic ka hape: “Hnenge hna nyiqaane mekune hnyawa la melenge elany me troa hane e hmaca la Tusi Hmitrötr. Thupene lai, eni hmaca ha a hane wanga atrune hnyawa la itre thiina i Iehova, tune la troa senge la itre ngazo së; celë hi hnenge lai hna lapa majemine sipone ngöne la thith. Thupene la hna nue ni qa kalabus, hnenge hna neën lo itre sine ce elong ekö lo, nge eni hë a sine la itre icasikeu i Keresiano, nge kolo fe hë a hane acili ni hmaca hnine la ekalesia. Maine nyipici laka eni pala pë hë la a xeni pune lo itre hnenge hna kuca ekö, ngo loi pe, hetrenyi hë ni la ketre mejiune ka mingöminge catr. Thatreine kö ni troa olene asë la aqane utipi ni me senge hnei Iehova la itre ngazong.”—Salamo 103:9-13; 130:3, 4; Galatia 6:7, 8.
20 Eje hi lai laka, ketre hace ka tru la troa bëeke hmaca koi Iehova hnene la itre atr ka tui Mario. Ngo hnene la hnei angatr hna inine la Tusi Hmitrötr me thith, me thele mekun, ene pe cia hmaca jë hi la ihnimi angatr koi Iehova, me hamë angatr la trengecatr memine la hni ne ajan ka catr troa nyihlue i Nyidrë. Hna aegöcatrenyi Mario fe hnene la mejiun ne la Baselaia. Eje hi laka, ame la ihnim me lapaun, me xoue Akötresie, me mejiun, tre, itre ewekë lai ka troa hamë trengecatr koi së nge nyine loi kowe la mele së. Ame pë hë ngöne la hna cinyihan ka troa xulu, tro pë hë së a ce wange la ahnahna ka sisitria ngöne la götrane la ua.
[Ithueamacany]
a Hna saze la ëj.
Ijije kö tro nyipunieti a sa?
• Nemene la enyipiewekën la ihnim ngöne la trengecatre ka tru hna kuca hnei Iesu?
• Nemene la aqane hamë trengecatre koi Paulo me Banaba, hnene la ihnimi nyidroti kowe la itre trejine me nyidro?
• Nemene la aqane thele me kuca Satana matre troa ae trootro la ihnimi ne la Keresiano?
• Kola hamëne koi së hnene la ihnimi Iehova la trengecatr troa xomihninahoean la itre itupath; nemene itupath?
[Thying]