Ima Anam Inen̄ede Inyene Uko
Ima Anam Inen̄ede Inyene Uko
“Abasi ikọnọhọ nnyịn edu ufep, edi eke odudu ye eke ima ye eke eti ibuot.”—2 TIMOTHY 1:7.
1, 2. (a) Nso ke ima ekeme ndinam owo anam? (b) Ntak emi Jesus ekenen̄erede enyene uko?
EBE ye n̄wan oro ẹdọde ndọ obufa ẹkenịm enịm ke esụk mbọhọ obio kiet ke edem usiahautịn Australia. Mmọ ẹma ẹkpere ndisịm obot ke ini akamba anịm kiet okoyomde ndimen n̄wan oro. Ebe esie ama ọsọsọp onụk enye osio, anamde anịm oro emen enye utu ke n̄wan esie. Ke ini ẹkenọde utịn̄ikọ n̄kpa ebe esie, ebeakpa oro ama ọdọhọ ete: “Enye ọkọnọ uwem esie ke ibuot mi.”
2 Ke akpanikọ, ima ekeme ndinam owo enen̄ede enyene uko. Jesus Christ ke idemesie ama ọdọhọ ke “idụhe owo emi enyenede ima eke okponde akan emi, owo ndikpayak ukpọn̄ esie nnọ ke ibuot mme ufan esie.” (John 15:13) Ikọyọhọke ofụri usen kiet tọn̄ọ Jesus eketịn̄ ikọ oro, enye ama ọnọ uwem esie man anyan̄a ofụri ubonowo. (Matthew 20:28) Akan oro, Jesus ikọnọhọ uwem esie ke ntak mbabuat n̄kpọntịbe man owụt ke imenyene uko. Enye ama ọfọfiọk ke ẹyesak imọ nsahi, ẹtụhọrede imọ, ẹbiom imọ ikpe ke ufịk, ekem ẹwot imọ ke eto ndutụhọ. Enye ama akam etịm mbet esie idem eben̄e se iditịbede, ete: “Sese, nnyịn imọn̄ idọk ika Jerusalem, ndien ẹyeyak Eyen owo ẹnọ mbọn̄ oku ye mme ewetn̄wed, ndien mmọ ẹyebiom enye ikpe n̄kpa ẹnyụn̄ ẹyak enye ẹnọ mbon idụt, ndien mmọ ẹyesak enye nsahi ẹnyụn̄ ẹfiari enye etap ẹnyụn̄ ẹmia enye ẹnyụn̄ ẹwot enye.”—Mark 10:33, 34.
3. Nso ikanam Jesus enen̄ede enyene uko?
3 Nso ikanam Jesus enen̄ede enyene uko? Ekedi ke ntak oro enye ọbuọtde idem onyụn̄ abakde Abasi. (Mme Hebrew 5:7; 12:2) Nte ededi, ima oro enye akamade Abasi ye ekemmọ owo akanam enye enen̄ede enyene uko. (1 John 3:16) Edieke inyenede utọ ima oro, ibuọtde idem ye Abasi, inyụn̄ ibakde enye, nnyịn n̄ko imekeme ndinyene uko nte Christ. (Ephesus 5:2) Didie ke ikeme ndinyene utọ ima oro? Oyom ifiọk ebiet oro ima otode.
“Ima Oto Abasi”
4. Ntak ẹkemede ndidọhọ ke ima oto Jehovah?
4 Jehovah edi ima ye Enye emi ima otode. Apostle John ekewet ete: “Ndima, ẹyak nnyịn ika iso ima kiet eken, koro ima oto Abasi, ndien owo ekededi eke amade ima edi Abasi okobon onyụn̄ enyene ifiọk Abasi. Owo eke mîmaha ima ifiọkke Abasi, koro Abasi edi ima.” (1 John 4:7, 8) Ntem, owo oro ekemede ndinyene ima nte Abasi edi owo oro nnennen ifiọk anamde enye asan̄a ekpere Jehovah, onyụn̄ adade ifiọk oro esịn ke edinam ke ofụri esịt.—Philippi 1:9; James 4:8; 1 John 5:3.
5, 6. Nso ikanam akpa mme anditiene Jesus ẹnyene ima oro ebietde eke Christ?
5 Ke ini Jesus ọkọbọn̄de akpatre akam ye mme apostle esie 11, enye ama owụt ke ndifiọk Abasi ye ima ẹsisan̄a kiet, ete: “Ami mmonyụn̄ nnam mmọ ẹfiọk enyịn̄ fo nyonyụn̄ nnam mmọ ẹfiọk, man ima oro afo akamade mi okpodu ye mmọ, ami n̄kponyụn̄ ndu ke ebuana ye mmọ.” (John 17:26) Jesus ama an̄wam mme mbet esie ẹnyene ukem ima oro enye enyenede ọnọ Ete esie, onyụn̄ ada ikọ ye uwụtn̄kpọ owụt ke ndifiọk enyịn̄ Abasi ọwọrọ ndifiọk mme utịbe utịbe edu Abasi. Ntak edi oro Jesus ọkọdọhọde ke ‘owo eke okụtde imọ okụt Ete imọ n̄ko.’—John 14:9, 10; 17:8.
6 Ima oro ebietde eke Christ edi mbun̄wụm edisana spirit Abasi. (Galatia 5:22) Ke ini akpa mme Christian ẹkebọde edisana spirit oro ẹken̄wọn̄ọde ke Pentecost 33 E.N, mmọ ẹma ẹti ediwak n̄kpọ oro Jesus ekekpepde, ẹnyụn̄ ẹnen̄ede ẹfiọk N̄wed Abasi. Anaedi akwa ifiọk emi ama anam mmọ ẹnen̄erede ẹma Abasi. (John 14:26; 15:26) Nso ikedi utịp? Mmọ ẹma ẹnen̄ede ẹnyene uko ẹnyụn̄ ẹsịn ifịk ẹkwọrọ eti mbụk idem ke ini eketiede nte ẹmọn̄ ẹwot mmọ.—Utom 5:28, 29.
Se Uko ye Ima Ẹnamde
7. Nso ke Paul ye Barnabas ẹkeyọ ke ini mmọ ẹkenamde utom isụn̄utom?
7 Apostle Paul ekewet ete: “Abasi ikọnọhọ nnyịn edu ufep, edi eke odudu ye eke ima ye eke eti ibuot.” (2 Timothy 1:7) Paul eketịn̄ se iketịbede inọ enye. Kam kere se iketịbede inọ enye ye Barnabas ke ini mmọ ẹkesan̄ade kiet ẹnam utom isụn̄utom. Mmọ ẹma ẹkwọrọ ikọ ke ediwak obio, esịnede Antioch, Iconium, ye Lystra. Ke obio kiet kiet, ndusụk owo ẹma ẹsikabade ẹdi mme andinịm ke akpanikọ, edi mbon eken ẹma ẹsinen̄ede ẹbiọn̄ọ mmọ. (Utom 13:2, 14, 45, 50; 14:1, 5) Ke Lystra, otu mbon ntịme ẹma ẹkam ẹtọn̄ọ Paul ke itiat, ẹkerede ẹte enye akpa! “Edi, ke ini mbet ẹdade ẹkan enye ẹkụk, enye adaha ke enyọn̄ odụk ke obio. Ndien ke ndan̄nsiere enye asan̄a ye Barnabas aka ke Derbe.”—Utom 14:6, 19, 20.
8. Didie ke Paul ye Barnabas ẹkeda uko ẹwụt ke imenen̄ede ima mme owo?
8 Nte se iketịbede inọ Paul ama anam enye ye Barnabas ẹyom nditre utom ukwọrọikọ? Baba-o! Ke ẹma ‘ẹkenam ediwak mbet’ ke Derbe, Paul ye Barnabas ẹma “ẹfiak ẹnyọn̄ọ Lystra ye Iconium ye Antioch.” Ntak oro mmọ ẹkefiakde ẹka do? Man ẹkesịn udọn̄ ẹnọ mbufa mbet ẹsọn̄ọ ẹdu ke mbuọtidem! Paul ye Barnabas ẹkedọhọ mmọ ẹte: “Nnyịn inyene ndibe ke ediwak ukụt ndụk ke obio ubọn̄ Abasi.” Nte an̄wan̄ade, ata ima oro mmọ ẹkenyenede ẹnọ “n̄kpri erọn̄” Christ ọkọnọ mmọ utọ uko oro. (Utom 14:21-23; John 21:15-17) Ke ẹma ẹkemek mbiowo ke mbufa esop oro ẹkesiakde, Paul ye Barnabas ẹma ẹbọn̄ akam ẹnyụn̄ “ẹyak mmọ ẹsịn ke ubọk Jehovah emi mmọ ẹkabarede ẹdi mme andinịm enye ke akpanikọ.”
9. Didie ke mbiowo Ephesus ẹkenam n̄kpọ ẹban̄a ima oro Paul akamade mmọ?
9 Paul ama enen̄ede ama mme owo onyụn̄ enyene uko, anamde ediwak ke otu akpa mme Christian ẹnen̄erede ẹma enye. Ti se iketịbede ke ini Paul okosobode ye mbiowo Ephesus, kpa ebiet oro enye okodude ke isua ita ọyọ ọkpọsọn̄ ubiọn̄ọ. (Utom 20:17-31) Ke ama ekesịn udọn̄ ọnọ mmọ ete ẹbọk otuerọn̄ Abasi oro ẹkeyakde ẹsịn mmọ ke ubọk, Paul ama ọtọn̄ọ edọn̄ ọbọn̄ akam ye mmọ. Ekem, “ọkpọsọn̄ ntuan̄a [ama] odu ke otu mmọ kpukpru, mmọ ẹnyụn̄ ẹwan̄a Paul ke itọn̄ ẹtịm enye inua ima ima, koro mmọ ẹfụhọde etieti ẹban̄a ikọ oro enye eketịn̄de ete mmọ idikwe imọ iso aba.” Nditọete emi ẹkenen̄ede ẹma Paul didie ntem! Ke akpanikọ, ke ini Paul ye mme nsan̄a esie ẹkeyomde ‘ndikpọn̄ mmọ,’ eketie mbiowo oro nte ke mmọ ikpọkpọn̄ke.—Utom 20:36–21:1.
10. Didie ke Mme Ntiense Jehovah mfịn ẹwụt ke imenen̄ede ima kiet eken?
10 Mfịn, ẹsinen̄ede ẹma mme esenyịn oro ẹsan̄ade-san̄a, mbiowo esop, ye ediwak mbon eken ke ntak uko oro mmọ ẹsidade ẹnam n̄kpọ ẹnọ mme erọn̄ Jehovah. Ke uwụtn̄kpọ, ke mme idụt oro ẹn̄wanade ekọn̄ mbio-obio m̀mê ke mme obio oro ẹkpande utom ukwọrọikọ, mme esenyịn oro ẹsan̄ade-san̄a ye iban mmọ ẹsisịn uwem mmọ ke itiendịk man ẹkese mme esop. Kpasụk ntre, ediwak Ntiense ẹsisobo ibak ibak ukọbọ ke ubọk mme andikara ye mbonutom ukara, sia mmọ mîsimaha nditịn̄ ebiet oro ekemmọ Mme Ntiense ẹdude m̀mê nditịn̄ ebiet oro mmọ ẹdade udia eke spirit. Ẹsikọbọ, ẹtụhọrede, ẹnyụn̄ ẹkam ẹwot ediwak tọsịn eken koro mmọ mîsimaha nditre ndikwọrọ eti mbụk Obio Ubọn̄ m̀mê nditre ndisop idem ọtọkiet ye nditọete mmọ ke mme mbono esop. (Utom 5:28, 29; Mme Hebrew 10:24, 25) Nnyịn ikpakam ikpebe mbuọtidem ye ima oro uko uko nditọete emi ẹnyenede!—1 Thessalonica 1:6.
Kûyak Ima Fo Ebịt
11. Didie ke Satan esin̄wana ye mme asan̄autom Jehovah, ndien nso ke mmọ ẹnyene ndinam?
11 Ke ini ẹkesiode Satan ẹduọk ke isọn̄, enye ama ebiere ndin̄wan̄a iyatesịt esie nduọk mme asan̄autom Jehovah ke ntak oro mmọ “ẹnịmde ibet Abasi ẹnyụn̄ ẹnyenede utom editie ntiense nnọ Jesus.” (Ediyarade 12:9, 17) Ukọbọ edi kiet ke otu mme usụn̄ oro Devil adade anam emi. Ediwak ini, ukọbọ esinyene nti utịp sia esinam ikọt Abasi ẹnen̄erede ẹma kiet eken, esinyụn̄ anam ediwak mmọ ẹnen̄erede ẹnyene ifịk. Satan esida udọn̄ unam idiọk nte usụn̄ en̄wen ndinam mbuọtidem nnyịn emem. Man ibiọn̄ọ n̄kari emi, oyom inyene uko ke usụn̄ en̄wen koro emi edi en̄wan oro in̄wanade ke esịtidem nnyịn ye ndiọi udọn̄ oro ẹdude ke ‘abian̄a abian̄a ye mbiara’ esịt nnyịn.—Jeremiah 17:9; James 1:14, 15.
12. Didie ke Satan ada “spirit ererimbot” emi odomo ndinam ima oro imade Abasi ebịt?
12 Satan enyene okopodudu n̄kpọekọn̄ en̄wen—“spirit ererimbot,” oro edi akpan odudu oro esinamde mme owo ẹnam n̄kpọ, kpa odudu emi ọbiọn̄ọde-biọn̄ọ edisana spirit Abasi. (1 Corinth 2:12) Spirit ererimbot esịn udọn̄ ọnọ idiọkitọn̄ ye uma-inyene, kpa “mbumek enyịn.” (1 John 2:16; 1 Timothy 6:9, 10) Okposụkedi inyene ye okụk mîdiọkke, edieke imade mmọ ikan Abasi, do Satan akan nnyịn. Se isinamde spirit ererimbot emi enyene “odudu” edi ke mme edinam esie ẹsidọn̄ mbiara obụkidem nnyịn itọn̄. Mmọ ẹsinyụn̄ ẹtie n̄kari n̄kari, ẹsọn̄ ubọk, ndien ukem nte ofụm, mmọ ẹnen̄ede ẹtara ẹsuana. Kûyak spirit ererimbot emi abiat fi esịt!—Ephesus 2:2, 3; Mme N̄ke 4:23.
13. Didie ke ẹkeme ndidomo nsọn̄ọnda nnyịn?
13 Nte ededi, oyom inyene uko ndinam se inende man ibiọn̄ọ inyụn̄ ikan idiọk spirit ererimbot emi. Ke uwụtn̄kpọ, oyom inyene uko man ikeme ndisan̄a n̄wọrọ ke ufọk senima m̀mê ndikọbi kọmputa m̀mê TV ke ini ẹtọn̄ọde ndiwụt oburobụt ndise. Oyom inyene uko man ikûkpebe ndiọi edinam ubọkn̄ka nnyịn inyụn̄ itre idiọk nsan̄a. Kpasụk ntre, oyom inyene uko man isọn̄ọ ida inịm mbet ye mme edumbet Abasi ke ini nsan̄a ufọkn̄wed, nsan̄autom, mbọhọidụn̄, m̀mê iman ẹsakde nnyịn nsahi.—1 Corinth 15:33; 1 John 5:19.
14. Nso ke ikpanam edieke spirit ererimbot emi ebede nnyịn?
14 Mmọdo, edi akpan n̄kpọ didie ntem ndinen̄ede mma Abasi ye nditọete nnyịn eke spirit! Da ini dụn̄ọde mme utịtmbuba ye usụn̄ uwem fo se m̀mê edu ererimbot emi ebe fi ke usụn̄ ekededi. Edieke ebede fi—idem ata esisịt—bọn̄ akam ben̄e Jehovah uko man ekeme ndisio enye ke idemfo mfep kûnyụn̄ uyak enye ebe fi aba. Jehovah idisịnke utọ eben̄e ofụri esịt oro. (Psalm 51:17) N̄ko-n̄ko, spirit esie enen̄ede okop odudu akan eke ererimbot.—1 John 4:4.
Ndise Mban̄a Mme Ọkpọkpọ Mfịna Uko Uko
15, 16. Didie ke edinyene ima nte Christ ekenyenede ekeme ndin̄wam nnyịn iyọ mme ọkpọkpọ mfịna? Nọ uwụtn̄kpọ.
15 Unana-mfọnmma ye usọn̄ emi ẹsiwakde ndisụn̄ọ ke udọn̄ọ, edibiomo ndo, mfụhọ, ye ata ediwak mfịna eken ẹdi mfịna efen oro mme asan̄autom Jehovah ẹyọde. (Rome 8:22) Ndinyene ima nte Christ ekenyenede ekeme ndin̄wam nnyịn iyọ mme mfịna emi. Kam kere ban̄a uwụtn̄kpọ Namangolwa emi ẹkebọkde ke ubon Christian ke Zambia. Namangolwa ama akabade edi owo n̄kpọnnam ke ini ekedide isua iba. Enye ọdọhọ ete: “Mma ndiọn̄ọ ke ndi owo n̄kpọnnam, ndien n̄kekere ke owo ndomokiet idimaha ndisan̄a n̄kpere mi. Edi nditọete mi eke spirit ẹma ẹnam mi n̄kpụhọde ekikere. Oro akanam nsehe aba idem mi nte owo n̄kpọnnam, ndien nte ini akakade mma nna baptism.”
16 Okposụkedi enyenede n̄kpọitie mbon n̄kpọnnam, Namangolwa esinyene ndinyọnyọni ke usụn̄ utatan oro owo mîsịnke itai. Kpa ye oro, enye esinam utom usiakusụn̄ unọ un̄wam ke nsụhọde n̄kaha ọfiọn̄ iba kpukpru isua. Mmọn̄eyet ama asiaha enyeneufọk kiet ke ini Namangolwa ọkọkwọrọde ikọ ọnọ enye. Ntak-a? Mbuọtidem ye uko eyenete an̄wan emi ama enen̄ede otụk enyeneufọk oro. Jehovah enen̄ede ọdiọn̄ ukeme Namangolwa koro nditọ ukpepn̄kpọ Bible esie ition ẹna baptism ndien kiet ke otu mmọ edi ebiowo ke esop. Namangolwa ọdọhọ ete: “Ukot esinen̄ede abiak mi, edi nsiyakke oro akpan mi.” Eyenete an̄wan emi edi kiet ke otu ediwak Ntiense ke ofụri ererimbot oro ẹkopde mmemidem ke ikpọkidem, edi ima oro mmọ ẹmade Abasi ye mbọhọidụn̄ ẹnam mmọ ẹnen̄ede ẹkop odudu ke spirit. Utọ mbon emi ẹsọn̄ urua didie ntem ke enyịn Jehovah!—Haggai 2:7.
17, 18. Nso isin̄wam ediwak owo ẹyọ udọn̄ọ ye mme mfịna eken? Nọ mme uwụtn̄kpọ n̄kann̄kụk.
17 Udọn̄ọ ọfiọn̄ ekeme n̄ko ndinam idem emem owo m̀mê akam anam owo ofụhọ. Ebiowo esop kiet ọdọhọ ete: “Eyenete an̄wan emi ọdọn̄ọde udọn̄ọ ikịm an̄wan n̄kụhọ ye udọn̄ọ ekpụt odu ke otu ukpepn̄kpọ n̄wed nnyịn, eyenete an̄wan efen ọdọn̄ọ kansa, iba ẹdọn̄ọ ata idiọk ewan̄kọ, ndien owo efen ọdọn̄ọ orụk udọn̄ọ ikpaidem ẹkotde lupus ye mbiakidem ẹkotde fibromyalgia. Ndusụk ini idem esimem mmọ. Edi mmọ isifiakke mbono esop ibọhọke ke ini idem enen̄erede abiak mmọ mîdịghe mmọ ẹdu ke ufọkibọk. Kpukpru mmọ ẹsiwọrọ an̄wautom kpukpru ini. Mmọ ẹsinam mi nti ikọ Paul emi: “Ke adan̄aemi n̄kopde mmemidem, adan̄aoro ke n̄kop odudu.” Esịt esinem mi ndikụt ima ye uko mmọ. Etie nte udọn̄ọ emi anam mmọ ẹnen̄erede ẹfiọk se uwem ọwọrọde ye se inen̄erede idi akpan n̄kpọ ke uwem.—2 Corinth 12:10.
18 “Ẹkûdop ndibọn̄ akam” nyom un̄wam mbak idem edimem mbufo edieke ẹdọn̄ọde m̀mê ẹnyenede mfịna en̄wen. (1 Thessalonica 5:14, 17) Ke akpanikọ, afo emekeme ndikop editịmede esịt, edi domo ndiwụk ekikere ke mme akpan n̄kpọ, kpa mme n̄kpọ eke spirit, akpan akpan ke ọsọn̄urua idotenyịn oro inyenede ke Obio Ubọn̄. Eyenete an̄wan kiet ọdọhọ ete: “Nsida utom ukwọrọikọ nte ibọkusọbọ.” Ndikwọrọ eti mbụk nnọ mbon en̄wen esinam enye enyene idotenyịn.
Ima An̄wam Mbon Oro Ẹnamde Idiọk Ẹfiak Ẹtiene Jehovah
19, 20. (a) Nso ikeme ndin̄wam mbon oro ẹnamde idiọk ẹnyene uko ndifiak ntiene Jehovah? (b) Nso ke ẹdineme ke ibuotikọ oro etienede?
19 Isimemke utom inọ ediwak mbon oro ẹkopde mmemidem ke n̄kan̄ eke spirit m̀mê mbon oro ẹnamde idiọk ndifiak ntiene Jehovah. Edi mmọ ẹkeme ndinam oro edieke mmọ ẹnen̄erede ẹtua n̄kpọfiọk ẹnyụn̄ ẹfiak ẹdemerede akpa ima oro mmọ ẹkemade Abasi. Da Mario * emi odụn̄de ke United States ke uwụtn̄kpọ. Mario ama ọkpọn̄ esop Christian, akabade edi owo mmịn onyụn̄ enyene mbumehe uda n̄kpọsọn̄ ibọk ndien ke isua 20 ẹma ẹkebe, ẹma ẹkọbi enye. Mario ọdọhọ ete: “Mma ntọn̄ọ ndinen̄ede n̄kere mban̄a ini iso mi, nnyụn̄ mfiak ntọn̄ọ ndikot Bible. Nte ini akakade, mma ndifiọk mme edu Jehovah, akpan akpan mbọm, mma nsinyụn̄ mben̄e enye atua mi mbọm. Ke ẹma ẹkesio mi ke ufọk-n̄kpọkọbi, n̄kodụkke aba nsan̄a ye n̄kani ufan mi, edi n̄kesidụk mme mbono esop Christian, ndien ẹma ẹfiak ẹda mi ke esop. Ke ndọk se n̄kọtọde, edi idahaemi, mmenyene utịbe utịbe idotenyịn. Mmenen̄ede n̄kọm Jehovah ke mbọm ye edifen nnọ esie.”—Psalm 103:9-13; 130:3, 4; Galatia 6:7, 8.
20 Ke nditịm ntịn̄, mbon oro ẹtiede nte Mario ẹnyene ndinen̄ede nsịn ukeme man ẹfiak ẹtiene Jehovah. Ndifiak ndemede akpa ima oro ẹkenyenede ẹnọ Abasi ke ndikpep Bible, mbọn̄ akam, nnyụn̄ ntie n̄kere se ẹkpepde ayanam mmọ ẹnyene uko ẹnyụn̄ ẹbiere ndifiak ntiene Jehovah. Idotenyịn Obio Ubọn̄ ama ọsọn̄ọ Mario idem n̄ko. Ke adianade ye ima, mbuọtidem, ye mbak Abasi, idotenyịn n̄ko ekeme ndinen̄ede nnọ nnyịn uko. Ke ibuotikọ oro etienede, nnyịn iyenen̄ede idụn̄ọde ọsọn̄urua enọ eke spirit emi.
[Ikọ idakisọn̄]
^ ikp. 19 Ẹkpụhọ enyịn̄.
Nte Afo Emekeme Ndibọrọ?
• Didie ke ima akanam Jesus enen̄ede enyene uko?
• Didie ke ima oro Paul ye Barnabas ẹkemade nditọete akanam mmọ ẹnen̄ede ẹnyene uko?
• Didie ke Satan odomo ndinam ima mme Christian ebịt?
• Ima oro imade Jehovah ekeme ndinam nnyịn iyọ mme idomo ewe?
[Mme Mbụme Ukpepn̄kpọ]
[Ndise ke page 23]
Ima oro Paul akamade mme owo ama anam enye ekeme ndiyọ mme idomo
[Ndise ke page 24]
Oyom inyene uko man inam se Abasi oyomde
[Ndise ke page 24]
Namangolwa Sututu